ໝວດທີ່ຂຶ້ນຕົ້ນດ້ວຽສຣະ "ແ"

 

  1. ແກງໜໍ່ໄມ້ ຕົ້ມໃສ່ຢານາງ
    ຢ້ານແຕ່ຈາງໃຈຈິດ ຈືດຈາງທາງອ້າຍ
    ຢ້ານເພິ່ນຜິນຜັນຜ້າຍ ກາຍໄປໄລຈາກ
    ຢາກຂອງຊາວຕ່າງບ້ານ ອາຫານພື້ນເພິ່ນເຂົາ.

  2. ແງ່ງຂີງບໍ່ລະຈາກເຫງົ້າ ເສົາເຮືອນບໍ່ລືມຂື່
    ຜືບໍ່ລືມຂອບຫ້ວຽ ຊີວິຕມ້ວຽອ້າຽບໍ່ລືມ

    ໃຫ້ອ້າຽໄລລືມນ້ອງ ບໍ່ມີໄລລືມງ່າຽ
    ຟ້າທະລາຽ ດິນສິຫຼຸບຫຼົ່ມມ້າງ ທາງອ້າຽແມ່ນບໍ່ລືມ

  3. ແສນເສັຽດາຽ ມາເຫັນເຈົ້າ ເປັນແຟນເຂົາ ແລ້ວນໍ້ອຸ່ນ
    ບຸນບໍ່ມີຄືເຂົາ ໃຈເລົ່າເລີຽອູດເອົ້າ ຮົມເຮົ້າຮ້ອນດັ່ງໄຟ

    ເກີດຢູ່ໃສ ນໍນາງຫຼ້າ ອ້າຽຫາມາພໍ້ເນື້ອອຸ່ນ
    ບຸນອ້າຽມີແຕ່ຊ້າ ມາໄດ້ກະບໍ່ທັນ

  4. ແຖວທາງບ້ານ ລາວເຮົາເກືອບທຸກຖີ່ນ
    ກິນກະປອມລາບແຍ້ ຫອຽຕົ້ມປົ່ນປູ

    ຢູ່ຕູບນ້ອຽ ແອ້ມຈ່າມຝາຕອງ
    ເພິ່ນຜູ້ມີເງິນທອງ ໄດ້ຢູ່ເຮືອນຝາແປ້ນ
    ແດນດິນນີ້ ສະຖານທອງທ້ອງທົ່ງ
    ເໝີດແລ້ວດົງປ່າໄມ້ ແປນກ້ຽງ...ຊູ່...ເມືອງ

    ທຸກຖີ່ນເບື້ອງ ເປັນທົ່ງດົງເໝີດ
    ມີແຕ່ຫົນທາງຣົຖ ແລ່ນລຽນເຕັມບ້ານ
    ຫຼານເຫຼັນຫຼ້ອນ ຊອນມາໂຜດແຜ່
    ຕໍ່ໄປຄົງສິແຫຍ້ ຄົນແໜ້ນອັ່ງດີນ

    ດີນແຄບຊ້ຳ ເກືອບສິຊ່ຳໃບຂາມ
    ແຕ່ກ່ອນນາເຄີຽງາມ ໂລດບໍ່ມີທາງແລ້ງ
    ດຽວນີ້ ແຜ່ນດີນແຫ້ງ ດິນແດງເກີດຝຸ່ນ
    ຜິດກັບຄາວກ່ອນກີ້ ດຽວນີ້ຫາກຕ່າງກັນ

    ເບື້ອງໜ້ານັ້ນ ອັນວ່າອານາຄົດ
    ຄົນສິຫຼາຽຄືມົດ ມາອັ່ງອໍຊໍຊ້ອງ
    ຂອງກະແພງສາຊ້ຳ ເງິນຄຳກະຂາດໄຖ່
    ເຮັດຈັ່ງໃດນໍພີ່ນ້ອງ ໄປໜ້າສິບໍ່ຕາຽ ແດ່ລື

    ຄິດຕໍ່ໄມ້ ກະໂລດວ່າບໍ່ມີດົງ
    ຄິດຕໍ່ເງິນໃນຖົງ ກະບໍ່ມີເຫຼືອຄ້າງ
    ນາ ສວນ ສ້າງ ກະເບົາບາງບິແບ່ງ
    ຄຶດອາສັຍເພິ່ງແບ້ງຄ໌ ທີ່ແພງໄວ້ກະບໍ່ຍັງ ແທ້ແລ້ວ

  5. ແນນມິ່ງນັ້ນ ຄືດັ່ງວາສນາ
    ບາຣະມີມຸງ ເຫຼື່ອມງຳກວມກັ້ງ
    ວາສນາເຄີຽສ້າງ ກອງບຸນຊາດກ່ອນ
    ເຄີຽໄດ້ເກັບດອກຊ້ອນ ຊອນຕົ້ນຮ່ວມກໍ.

  6. ແນມເກົ່າເກື້ອ ເກີດຮ່ວມຮຽງຮັກ ແລ້ວນັ້ນ
    ໃຜຫ່ອນຂີນຂັດເຊີງ ສວາດດູດາຍໄດ້
    ສົມຄວນໄດ້ ຊິໄລລາປະປ່ອຍ ເປັນລື
    ແມ່ນວ່າສຸດຟາກຟ້າ ທະຍານຢື້ຢ່ອງເຖີງ

  7. ແນວຊາດ ເສືອໂຄ່ງເຖົ້າ ຈຳສິນຢ່າຟ້າວເຊື່ອ
    ລາງເທື່ອເຫັນໝູ່ເນື້ອ ສິນຊິມ້າງແຕກກະເດັນ.

  8. ແນວຍິງນີ້ ຫວານດີຕັ້ງແຕ່ປາກ
    ພາຽໃນຂົມຂີ້ງ້ວນ ໃຈສົ້ມດັ່ງໝາກຂາມ
    ມີຜູ້ຖາມຜູ້ເວົ້າ ເອົາເອົາບໍ່ມີຫຼີກ
    ຕາຽດັບກະຮັບໄດ້..ຕາຽວາຽກະຮັບໄດ້..ຕົວະແລ້ວກະບໍ່ເອົາ

  9. ແນວວ່ານາບໍ່ສົມເຂົ້າ ເສົາເຮືອນບໍ່ສົມຂື່
    ຜືບໍ່ສົມສາດຫ້ຽນ ງົວກວຽນບໍ່ສົມແອກ ຕາແຮກບໍ່ສົມໄກ່ຕົ້ມ ງົມລ້ຽງກະບໍ່ກິນ

    ຄຳບໍ່ສົມສ້ອຽ ພອຽນິລບໍ່ສົມພີ່
    ມວຽຜົມບໍ່ສົມດວງດອກໄມ້ ແສນຊິເອ້ກະບໍ່ຄື.

  10. ແນວນາມເຊື້ອ ຫອຽນາຕາຕ່ຳ
    ຕາບໍ່ສູງດັ່ງດ້າມ ຫອຽກວ້າງບ່ວງທະເລ

  11. ແນວນາມແກ້ວ ທຽມຫີນມັນຊິແມ່ນ
    ອັນວ່າແຫວນຄ່າລ້ານ ທຽມສ້ອຍຮ່ອນຊິເປັນ.

  12. ແນວນາມຂ້ອຽ ຫອຽນາໜ້າກ່ຳ
    ມັນບໍ່ສົມສ່ຳເຊື້ອ ເຄືອເຈົ້າຊາຕຫົງ.

  13. ແນວວ່າ ຄົນຈົນໄຮ້ ອນາຖາທຸກຍາກ
    ແສນຊິມາໜ່ຽວນ້ອມ ເໝິດມື້ກະເປົ່າດາຽ.

  14. ແນວວ່າ ໃຈປະສົງສ້າງ ກາງດົງກໍ່ໄປຮອດ
    ຄັນຄິດຢາກກອດອ້າຽ ຊິບາຽຜ້າມາຫົ່ມຄີງ

    ອັນຄວາມຈິງກະຄືເວົ້າ ຈາຮີດເຮົາຄວນຮັກຫໍ່
    ເໝິດຜູ້ເຕີມຕໍ່ຂໍ້ ເໝິດຜູ້ຍໍແຕ່ງໄວ້ ໄປໜ້າບໍ່ຈເຣີນ

  15. ແນວໃດດີພາກັນສ້າງ ແນວໃດວ້າງໃຫ້ປັດຝຸ່ນ
    ຜູ້ເກີດຫຼັງໃຫຽ່ລຸນ ຊິເປັນທຶນໝູ່ເຈົ້າ ພາເວົ້າຕໍ່ໄປ ພີ່ນ້ອງເອີ້ຽ.

  16. ແນວວ່າ ອ້າຽຮູບຮ້າຽ ຂີ້ຄັນຄາກສັນໃດ
    ສັງສິຈານຳດາວ ໄປ່ລືສິທຽມຊ້ອນ
    ຄືດັ່ງກວຽນບໍ່ສົມລໍ້ ງົວທຽມມັນບໍ່ຄ່ອງ
    ຄືດັ່ງຄົນຫາບນ້ຳ ບໍ່ສົມແທ້ຕໍ່ຄານ

    ບຽນບໍ່ສົມດົ້ງ ມັນສິຄຽງເຟືອດຈໍ່
    ຄ່າງບໍ່ສົມແອກນ້ອຽ ມັນສິໝັ້ນບ່ອນໃດ

    ຄືດັ່ງ ຂໍບໍ່ສົມຊ້າງ ໝາກໂປງລາງບໍສົມຕ່າງ
    ແສນສິເອົາເຊືອກໂຫຍ້ນ ໂຍນໄດ້ກະບໍ່ດັງ.

  17. ແນວອ້າຽ ຮຽນມາໜ້ອຽ ດ້ອຽດ່າງທາງປັນຍາ
    ບໍ່ມີຄົນປຶກສາ ຊ່ອຽຫາວິຊາແກ້
    ພຽງແຕ່ ກອນແຂ້ແຫຼ້ ແປຜຍາຫາປ່ອງ
    ສັບສຳນວນບໍ່ຖືກຕ້ອງ ໝົດໝ້ອງບ່ອນສິໄປ

    ກອນກາບໄດ້ ຂຽນໃສ່ພຽງຈາ
    ບໍ່ຫ່ອນໄປຫານຈາ ອາດຫາຫານເວົ້າ
    ພໍໄດ້ເຍີມຄົນເຖົ້າ ເອົາສຳນວນມາມ້ວນໃສ່
    ວາງບົດກອນວາດໄວ້ ພໍໃຫ້ອ່ານເຫັນ ແທ້ແລ້ວ.

  18. ແປງຂົວສ້າງ ສະພານທອງທຽວທ່ອງ
    ໝາຽຢາກເປັນພີ່ນ້ອງ ຈັ່ງມາຈ້ອງແວ່ຢາມ.

  19. ແປງຄຳເວົ້າ ຜຍາເກົ່າເປັນພາສິດ
    ປຣິສນາຄຳກອນ ປຣາດວອນສອນໄວ້
    ເພິ່ນຫັ້ນວ່າ ສັພເພເຫ-ຫຼາກ ຂວານຖາກບໍ່ມີຫອນ
    ຈອນຟອນບໍ່ມີຫາງ ລາກຂີ້ດິນຈຳກົ້ນ
    ນາບໍ່ມີຍັງນ້ຳ ເປັນນາທາມ ກະເຂີນຂາດ
    ມີຊາຕ ແຕ່ບໍ່ນັບໂຄຕເຊື້ອ ສິດີໄດ້ຈັ່ງໃດ

    ມີໄຊ ບໍ່ໃສ່ຕ້ອນ ຍາມໃດເດ໊ ສິໄດ້ ກິນປາໃຫຽ່
    ມີໄຫ ຫາກປາແດກ ຂາດໝໍ້ ໝໍມໍນັ້ນ ວ່າບໍ່ດີ
    ດີຜູ້ດຽວ ເພິ່ນວ່າ ໄດ້ດີໜ້ອຽ ດີຫຼາຽຄົນ ເພິ່ນຈັ່ງເອີ້ນ ວ່າເກ່ງ
    ໃຫ້ໄດ້ເສັງໄດ້ຮ້ອງ ໄດ້ຍໍຍ້ອງ ວ່າດີ

  20. ແພຜືນຜ້າ ໄໝທໍລາຽມັດໝີ່
    ສລັບສີສ່ອງເຫຼື້ອມ ງາມລ້ຳລື່ນແພ

    ອີກທັງຊຸມສີພື້ນ ດຳແດງອ່ອນແກ່
    ຂຽວນ້ຳເງິນຂີ້ມ້າ ຊົມພູພຸ້ນໂພດແຕ່ງາມ

    ຮູ້ບໍ່ນໍ້ວ່າ... ບ່ຽງຫຼັງຜືນແພຜ້າ ຄືຢາດເຮື່ອແຮງກາຽ
    ຈິຕແລະໃຈຝັງລົງ ແຫ່ງແພພັນເຊື້ອ
    ຜືນຜ້າຍ້ອງ ສວຽງາມຖາມຜູ້ຕ່ຳ
    ໜ້າດຳໆລ່ຳເຍີ້ນ ເມີນໜ້າວ່າບໍ່ສວຽ

  21. ແມ່ນຊິດີ ຫຼືຊິຮ້າຽ ເວົ້າໃສ່ນາງບໍ່ຖື
    ຢ່າຈັບປາສອງມື ຫຼືຊິເສັຽເໝິດຊ້ຳ
    ຫາບ່ອນກຳບໍ່ມີກຸ້ມ ສອງມືຫຍຸມ ຄວ້າແລ້ວເປົ່າ
    ສອງມືຊາວເອົາບໍ່ໄດ້ ຍ້ອນໃຈອ້າຽນັ້ນບໍ່ຈິງ.

  22. ແມ່ນສິມີສິບຊູ້ອ້າຽສິໄລ ແມ່ນສິມີສິບໄຊອ້າຽສິຖີ້ມ ວາງເສັຽປະປ່ອຽ
    ວ່າສິຂໍຂອດໝັ້ນ ນຳເຈົ້າແຕ່ຜູ້ດຽວ.

  23. ແມ່ນຜູ້ໃດນໍລວງລໍ້ ສ.ພ.ຕົວະລ່າຽ
    ມາຊ່າງໃຈບາບຮ້າຽ ອວນນ້ອງທຸກຣະທົມ

    ຈາຄຳຂົມຕົວະເຫຼັ້ນ ທຳເວນໃຫ້ນ້ອງໜ່າຽ
    ລອງເລົ່າບອກໃຫ້ອ້າຽ ເຫັນແຈ້ງກະຈ່າງໃຈ ແດ່ທ້ອນ.

  24. ແມ່ນວ່າ ໄກມື້ນີ້ ມື້ອື່ນຊິມາຫາ
    ຄັນແມ່ນ ຊີວາຍັງ ຊິດ່ວນມາຫາເຈົ້າ
    ໄກກັນຍາມມື້ເຊົ້າ ໄກທໍ່ຂໍ້ມື
    ໄກມື້ຮື ໄກກັນທໍ່ນີ້ວກ້ອຽ
    ໄກມື້ເລົກມື້ນ້ອຽ ກະເລີຽຊ້ຳຊ່ຳບໍ່ເຫັນ.

  25. ແມ່ນອິຫຽັງນໍ້ຫຼ້າ ຄືມາຈາທື້ນທັ່ງ
    ເຈົ້າເປັນຫຍັງກະດໍ້ ຄືມາຈໍ້ໃສ່ພີ່ຊາຍ

    ຄືຊັງຫຼາຍແທ້ນໍນ້ອງ ໃຫ້ລອງຈາມາເບິ່ງ
    ເຈົ້າມາຊັງແຕ່ເຫິງ ສັງມາກັດແຂ້ວຫຽ້ຳ ງອນງ້ຳໃສ່ກັນ.

  26. ແລງລົງຄ້ອຍ ຟັງສຽງອອຍຈັກກະຈັ່ນ
    ຫົວໃຈຊາຍສະບັ້ນ ກະສັນໂອ້ອ່າວຫາ

    ສຸດຂອບຟ້າ ນ້ອງວ່າຄະນຶງເຫັນ
    ບໍ່ທັນນານກໍມາເໝັນ ໜ່າຍສອາງມວນມ້າງ
    ສັມພັນຈາງລືມຊ້ຳ ລືມຄຳທີ່ເຄີຍກ່າວ
    ໂອນໍສາວບ້ານນີ້ ສັງມາລີ້ຫຼອກຄຳ

    ຄົນໃຈດຳລືມຖິ້ມ ມິດອິ່ມຊິ່ມບໍ່ເຫັນຫົວ
    ຕົວະໃຫ້ຊາຍໃຈເພ ຄິດມານ້ຳຕາຍ້ອຽ
    ສຸດທີ່ຄອຍວັນມື້ ບໍ່ມີຖືສັດຈາແນ່
    ຄວາມຈາກປາກແປແປ... ສັງມາແວຕ່າວປີ້ນ ເປັນແປ້ວຣະວ່າງໃຈ ແທ້ແລ້ວ.

  27. ແລງລົງຄ້ອຍ ມະໂນຫງອຍເຫງົາຫງ່ວມ
    ຄິດຮອດຄວາມປາກເວົ້າ ອອຍເອື້ອນເອີ່ຍຄຳ

    ຄວາມປາກຢາກຢຳຍ້ານ ເປັນຢ່າງຄືເຂົາ
    ຢ້ານຖືກເຮົາຮຽມສອງ ຢ້ານຖືກຮອງຮຽງຊ້ອນ
    ອອນຊອນເດ້... ໃຈພີ່ເຊຊວນລ່າຍ
    ຢ້ານຕົກຖືກບ່ອນຮ້າຽ ຢາກອາຽອ້າງອັ່ງໃຈ.