ໝວດທີ່ຂຶ້ນຕົ້ນດ້ວຽສຣະ "ເ"

 

  • ເກົ້າຊິແຈ້ງ ສິບຊິແຈ້ງ ຢ່າມີເມກມາບັງ
    ຢ່າມີ ຍັງຣາຫູ ບຽດບຽນພຣະຈັນເຈົ້າ.

  • ເກົ້າສິໄລລານ້ອງ ສິບບໍ່ປອງສິລາຈາກ
    ປາກເອີ້ນ ນາງສັ່ງນ້ອງ ສາແລ້ວຈັ່ງຄ່ອຽໄປ

  • ເກັບຫົວໃຈ ທີ່ຕາຽດ້ານ ປິດຕຳນານຄົນໃຈໝໍ່
    ບໍ່ຂໍ ຮັກຊ້ຳເຖົ້າ ໃຫ້ຄົນເວົ້າພ່ຳຫຍັນ
    ປາກຢືນຢັນ ຕ້ອງເຮັດໄດ້ ທາງຫົວໃຈກະວ່າຄັກ
    ຫຼາບກະດັກ ເຂັດກະດໍ້ ພໍແລ້ວສ່ຳຜູ່ຍິງ
    ບໍ່ຈິງ ໃຈພໍດີ້ ຄົບກັບໃຜ ນ້ຳຕາຫຼັ່ງ
    ເສັຽນ້ຳ ຕາເປັນຖັງ ຕັ້ງແຕ່ເປັນໜຸ່ມນ້ອຽ ຈົນວ່າຄ້ອຽເຄີ່ງຄົນ
    ເສືອກສົນ ຊົ້ນຫຼົບລີ້ ໃຈມີແຜ ຊ້ຳແລ້ວຊ້ຳເຫຼົ່າ
    ບອກວ່າ ເຊົາ ເຊົາ ເຊົາ ແສນຊິເຫງົາກະທໍ່ນີ້ ຊິຂໍລີ້ຢູ່ຜູ່ດຽວ
    ສິບໍ່ ຂໍກ່ຽວຂ້ອງ ດອງຫົວໃຈທີ່ບູດເນົ່າ
    ມ້ຽນເຂົ້າ ລີ້ນຊັກໄວ້ ກຸນແຈໄລ້ລ໊ອກຂັງ
    ອານິຈຈັງ ບໍ່ມີຫຍັງທ່ຽງແທ້ ຮ້ອຽກຸນແຈ ຍັ້ງບໍ່ຢູ່
    ໄດ້ມາພົບບຸນຊູ ສາວຜູ່ງາມຍິ່ງລ້ຳ ຄຳເວົ້າກະມ່ວນຫູ

  • ເຈົ້າຜູ້ ພົ້ວດອກຊ້ອນ ຊອນກີບສະເລເຕ
    ໃຈອ້າຽ ເຊເສັຽຫຼັກ ຮັກນາງຈົນໝົດກ້ຽງ

  • ເໝີດຫົວ ໃຈສຸດສ້ຽງ ເໝີດສຳນຽງສິໂອ້ອ່າວ
    ມາພົບ ສາວເທື່ອນີ້ ສິດີແທ້ແນ່ນອນ

  • ເກີດມາ ດົນນານແທ້ ແຕ່ບໍ່ເກັ່ງທາງຜຍາ
    ວ່າໄປ ຕາມປັນຍາ ກໍ່ວ່າພໍພຽງນີ້
    ດີບໍ່ດີ ອາພັຍໃຫ້ ຄັນອ່ານໄປ ຄຳບໍ່ຄ່ອງ
    ແນວບໍ່ ສອດສ່ອງເຫຼື້ອມ ຮຽນຊັ້ນແຄ່ປະຖົມ
    ສົມບໍ່ສົມ ແລ້ວແຕ່ເຈົ້າ ໃຫ້ອ່ານເອົາແລ້ວເຕີມຕໍ່
    ນີ້ລະນໍ້ ຄວາມຮູ້ໜ້ອຽ ມີປົມດ້ອຽດ່າງສມອງ.

  • ເຂົ້າສັ່ງນາ ກ້າສັ່ງທົ່ງ ຄືປາຫຼົງແມ່ນ້ຳ ຫົນຫ້ອງບ່ອນອ່າສັຍ.

  • ເຄີຽເປັນຊາຽ ໃຈກ້າ ສັງມາໝົດ ປັນຍາ ກິນສຸຣາ ຈົນເສັຽທ່າ
    ມີແຕ່ເຫຼົ້າ-ນ້ຳຕາ ມາເປັນເພື່ອນເກື່ອນກຸ້ມ ສຸມໄໝ້ ຫວ່າງໃຈ

  • ເຄີຽເຫັນສາວ ມາຫລາຍບ້ານ ໄປທຳງານກໍ່ຫຼາຍທີ່
    ແຕ່ບໍ່ເຄີຽເຫັນມີ... ສາວຜູ້ດີຈັ່ງເຈົ້າ ຈຶ່ງມາເວົ້າກ່າວຖາມ.
  • ເຄືອບຸນ ມາແລ່ນກ້ຽວ ເຄືອບຸນ ຊ້ຳພັດມາຍ
    ເຄືອຫວາຍກ້ຽວ ເຄືອຫວາຍຊ້ຳພັດເນົ່າ
    ມີແຕ່ພົງເຜົ່າຜູ້ ຊູລ້ຽງຈຶ່ງໃຫຍ່ສູງ.

  • ເງາະຮູບຮ້າຽ ຍັງໄດ້ຄູ່ຣົຈຈະນາ
    ປະສາຫຍັງຮູບຄີງ ສິ່ງບໍ່ຈິງຍືນຍັ້ງ
    ອານິຈຈັງ ສັງຂານນີ້ ຄົນເຮົາມີບໍ່ແຕກຕ່າງ
    ຕ່າງແຕ່ ຄວາມທ່ຽງແທ້ ກັມພຸ້ນສິສັ່ງສົມ ມານໍ້
    ວາສນາ ສິພານພໍ້ ສິບິນມາຄືນົກເຈົ່າ ດອກເພິ່ນວ່າ
    ຫຼືສິແມ່ນ ນົກເຈົ່າເຖົ້າ ຫີວເຂົ້າຈັ່ງເວີ່ນມາ
    ອັນວ່າ ເຣື້ອງໝູ່ນີ້ ກະແລ້ວແຕ່ບຸນກັມ
    ທີ່ເຮົາ ພາກັນທຳ ແຕ່ງແປງສົມສ້າງ

  • ເຈັບກໍ່ ເຈັບຜູ້ດຽວ ໃຜບໍ່ຫຼຽວມາພໍ້ ໂອເດ້ນໍເປັນຕາໜ່າຽ
    ຊີວິດ ລູກຜູ້ຊາຍ ມັນນ່າອາຽພີ່ນ້ອງ ຫຼົງຫ້ອງຮ່ອມທາງ
    ເຈັບບໍ່ ຈາງຈືດໄດ້ ເວົ້ານຳໃຜເຂົາກໍ່ວ່າ
    ໃຜກໍ່ ມາເຍາະເຍີ້ຍ ເຊີຍເຫຼັ້ນພ່ຳຢັນ

  • ເຈັບດ້ວຍ ຄວາມປາກນີ້ ໜັກກວ່າຂະຍຸງຕີ
    ແສນຊິ ປົວຢາຫຍັງ ກໍບໍ່ມີຫາຍໄດ້.

  • ເຈັບທາງ ກາຍພໍທົນໄດ້ ເຈັບທາງໃຈແສນອຸກອັ່ງ
    ຍ້ອນຄວາມຫວັງອັ່ງມ້າງ ວາງຖິ້ມບໍ່ຫ່ວງຫາ
    ໂພດແທ້ ນໍນ້ອງຫຼ້າ ລືມວາຈາເຄີຍເວົ້າຕໍ່
    ບອກໃຫ້ ອ້າຍນັ່ງຣໍ ຂໍໃຫ້ອ້າຍນັ່ງເຝົ້າ  ເສັຽແລ້ວພັດເລົ່າລືມ.

  • ເຈັບອົກ ປານໄຟໄໝ້ ເຈັບໃຈປານຟ້າຜ່າ
    ເຈັບບ່າ ແບກໄມ້ຕີ້ວ ເດືອນຫ້າກໍບໍ່ປານ.

  • ເຈັບອົກ ປານໄຟໄໝ້ ເຈັບໃຈປານຟ້າຜ່າ
    ເຈັບຕາ ປານໄມ້ຄ້ອນ ຄະເນີນປ້ຳຕ່ອຍຕີ.

  • ເຈົ້າຊ່າງ ມາຫາເວົ້າ ເອົາເມືອງມາເປັນປ່າ
    ມາເອົາ ດົງດ່ານດ້າວ ເປັນບ້ານບ່ອນແປນ

    ແນວວ່າ ຂອງຢູ່ນ້ຳ ບໍ່ຫ່ອນເກີດກັບບົກ
    ຊິໃຫ້ ດອນນາຮົກ ເປົ່າແປນຊິເປັນໄດ້.

  • ເຈົ້າຜູ້ ເຄືອຜັກສົ້ມ ບໍ່ສົມເຄືອຜັກໄສ່
    ຂ້ອຽຜູ້ຮ້າຽ ບໍ່ສົມເຈົ້າຜູ້ດີ.

  • ເຈົ້າຜູ້ ເດືອນເພັງແຈ້ງ ມີແສງສັງບໍ່ສ່ອງ
    ເຈົ້າຜູ້ ດາວດາດຟ້າ ບໍ່ແຍງພື້ນພະສຸທາ.
  • ເຈົ້າຜູ້ ແພຜືນຜ້າ ກາສາອ້າຽຢາກຫົ່ມ ເບິ່ງເດ໋
    ອ້າຽຢາກ ໂຈມໂຈກແທ້ ໃຫ້ນາງນ້ອຽໜິ່ງນອນ

    ພໍວ່າ ເດິກເດິກຂ້ອນ ສິໄຂກອນອອກກ່ອມ
    ພໍໃຫ້ ຫອມນາດນ້ອງ ໄສຍາຫ້ອງຢູ່ສບາຽ ພີ່ແລ້ວ

  • (ຫຼ້ານາງເອີ້ຽ)
    ເຈົ້າຜູ້ ແນວນາມເຊື້ອ ເຄືອຫວາຽຢູ່ໃນເຫຼົ່າ
    ອ້າຽສິ ເປັນຜູ່ເຂົ້າ ຖາງຕົ້ນກົ່ນຫາ
    ນາງເປັນ ປາຢູ່ນ້ຳ ຊາຽເປັນນາ ໄວ້ຖ້າໂຕ່ງ
    ນາງເປັນ ດົງໃຫຍ່ກວ້າງ ພວງໄມ້ ຫາກແມ່ນຊາຽ

    ເຮັດຈັ່ງໃດ ຈັ່ງສິ ໄດ້ເຫັນໜ້າ ຍິນແຕ່ສຽງວາຈາ ນ້ອງນັ້ນມາຕ້ານຕໍ່
    ຢູ່ໃສນໍ້ນາດນ້ອງ ຢູ່ຫົນຫ້ອງ ແມ່ນບ່ອນໃດ

    ແມ່ນຢູ່ໄກຫຼືຢູ່ໃກ້ ຢູ່ທາງໃດ ບອກອ້າຽແນ່
    ຄິດຮອດ ນຳແຕ່ແທ້ ສິເປັນບ້າປ່ວງລະເມີ

    ຍ້ອນເຜີໃຈ ໃນຄຳເວົ້າ ທີ່ເຄີຽຈາຕ້ານຕໍ່
    ເຮັດໃຫ້ອ້າຽນີ້ຣໍ ພໍໄດ້ພໍ້ນ້ອງຫຼ້າ ຄືຄຳເວົ້າມ່ອມພະນາງ

    ອົດທົນ ແສນອ້າງວ້າງ ນາງບໍ່ອ່ວຽມາຫາ
    ບໍ່ຄື ຄຳສັນຍາ ວ່າກັນແຕ່ຄາວນັ້ນ
    ນອນກະຝັນເຖິງນ້ອງ ນວນລະອອງ ເນື້ອອຸ່ນ
    ຈັ່ງໃດເດ້...ຈັ່ງສິເໝິດວ້າວຸ້ນ ໄດ້ເຫັນໜ້າມ່ອມພະນາງ ຫຼ້າເອີຽ

  • ເຈົ້າຜູ້ ຊຸບຜັກຕີ້ວ ເພພັງຕ່ອນປາແດກ
    ຄັນເອົາ ຜົວແຕ່ນ້ອຽ ພາເຈົ້າໃຫ້ໜ້າດຳ

  • ເຈົ້າຜູ້ ງູເຫຼືອມອໍ້ ຫາກິນຕາຍຕັ້ງແຕ່ເຕົ່າ
    ສັງບໍ່ຂຶ້ນໂຄກກວ້າງ ກິນຊ້າງຄ່າແພງ.

  • ເຈົ້າຜູ້ ພົ້ວດອກຊ້ອນ ອອນຊອນເດ້ແຕ່ທາງພີ່
    ໜີໄປໃສ ກໍ່ຄິດພໍ້ ບໍ່ມີມົ້ມຈົ່ມຫາ
    ຄຶດເຖິງ ເດີ້ດວງໜ້າ ວາສນາຮຽງຮ່ວມ
    ຄວາມພໍໃຈໄຝ່ຝັ້ນ ຝັນໄວ້ບໍ່ຈາງ.

  • ເຈົ້າຜູ້ ເຄືອຜັກສົ້ມ ບໍ່ສົມເຄືອຜັກໄສ່
    ຂ້ອຽຜູ້ຮ້າຽ ບໍ່ສົມເຈົ້າຜູ້ດີ

  • ເຈົ້າຜູ້ ເຊື້ອຊາດຊ້າງ ຍົດໃຫຍ່ສະກຸນສູງ
    ຢຸ່ໃນ ຝູງສັກກາ ໄພ່ບົນພົງປ້ອງ
    ອ້າຍຢາກ ຢອງຫຼັງຂຶ້ນ ໄປຢືນເປັນແຢ່ງ
    ຢາກເປັນ ແຫຼ້ງຮັບໃຊ້ ນວນນ້ອງຄູ່ຊູ່ຍາມ.

  • ເຈົ້າຜູ້ ເມືອວັ້ງໆ ບໍ່ຫຼຽວຫຼັງມາເອີ້ນສັ່ງ
    ຄັນບໍ່ ເອີ້ນສັ່ງໃກ້ ກໍພໍເອີ້ນສັ່ງໄກ.

  • ເຈົ້າຜູ້ ເຮືອສະເພົາກວ້າງ ເດີນທາງວາດໃຫຽ່
    ນ້ຳຮ່ອງໃສຫ້ວຽນ້ອຽ ບໍ່ຄອຽໃຫ້ໄດ້ລ່ວງເດີນ

  • ເຈົ້າຜູ້ ເກີນພະອົງແກ້ວ ແນວສູງບໍ່ກ້າໄຕ່
    ຢ້ານແຕ່ ໄຫຼພລາດລົ້ມ ໂຄມຫຽ້າຄາບດິນ

  • ເຈົ້າຜູ້ ອິນເຫຼົາປັ້ນ ສະຫວີວັນຟ້າຢາດ
    ມະນີຊາດສິ່ງແກ້ວ ເຫັນແລ້ວສວ່າງຕາ

    ປຸຣິສສາ ສເມີອ້າຽ ບໍ່ມີໝາຽຊິໄດ້ຮ່ວມ ສາແລ້ວ
    ຝາກແຕ່ ຄວາມສົ່ງຫ້ອຽ ຄອຽໄດ້ວ່າແຕ່ກອນ.
  • ເຈົ້າຜູ້ ແນວນາມມ້າ ອາຊະໄນມະນີກາບ
    ສັງຊິມາໄຕ່ພື້ນ ຄືອ້າຍຮ່ອນຊິເປັນ.

  • ເຈົ້າຜູ້ ແນວນາມແກ້ວ ຢ່າໄດ້ເປີດດິນຊາຍ
    ເຈົ້າຜູ້ ແນວຄວາຍເຂົາ ຢ່າຊູ່ລືມຄວາຍຕູ້.

  • ເຈົ້າຜູ້ ແນວນາມຊ້າງ ສັດສູງບໍ່ຫ່ອນຕ່ຳ
    ບໍ່ຄື ເຊື້ອໄກ້ກຸ້ມ ຫາງສັ້ນບໍ່ຫ່ອນຍາວ.

  • ເຈົ້າຜູ່ແປງຄວາມເວົ້າ ເອົາຜຍາມາຈາມ່ວນ
    ແມ່ນຄົນ ລາວລ້ວນໆ ຄວນແນມໄວ້ເບິ່ງຄອງ

    ໃຫ້ຈເຣີນເດີ້ນ້ອງ ຜູ່ມອງເບິ່ງເຫັນປະສາງ
    ບໍ່ໃຫ້ ຈາງມາງຫາຍ ເຮັ່ຍນຳສມັຍນີ້
    ຍັງຄົງ ມີຄົນເວົ້າ ເນົາຜຍາພາມ່ວນ
    ຂໍເຊີນ ຊວນທຸກທ່ານ  ຫັນມາກົ້ມເບິ່ງແຍງ ນຳກັນເດີ້

  • ເຈົ້າຜູ້ ແພຜຶນກວ້າງ ປູໄປໃຫ້ມັນເຫຼື່ອມ
    ນ້ອງເຫຼື່ອມອ້າຍ ອ້າຍເຫຼື່ອມນ້ອງ ຄືຟ້າເຫຼື່ອມດິນ.

  • ເຈົ້າຜູ່ ແພຜືນຜ້າ ກາສາອ້າຽຢາກຫົ່ມ ເບິ່ງເດ
    ຮຽມສິ ໂຈມກອດກ້ຽວ ກຽວກີ້ງນີ່ງນອນ
    ພໍວ່າ ເດີກເດິກຂ້ອນ ສິໄຂກອນອອກກ່ອມ
    ພໍໄດ້ ຫອມນາດນ້ອງ ໄສຍາຫ້ອງຢູ່ສບາຽ ພີ່ແລ້ວ

  • ເຈົ້າຜູ້ ໄຊຫຼາຽທ້າງ ທາງຢາມມາຫຼາຽປ່ອງ
    ພຸ້ນກະທ້າງ ພີ້ກະທ້າງ ໄຫຼເຂົ້າແມ່ນຊູ່ທາງ.

  • ເຈົ້າຜູ້ ໂພສີສ້ອຍ ພຶກສາງອຍບິນໄຄວ່
    ນົກໂຕໃດ ກໍ່ແກວ່ນລຶ້ງ ເນົາຄ້າງເພິ່ງພາ

    ອ້າຍເປັນກາ ບໍ່ຮ່ອນເຂົ້າ ມາເນົາໃນຊົ້ນຮົ່ມ
    ບຸນບໍ່ ສົມຮົ່ມກວ້າງ ກາຍໃກ້ເພິ່ນໄລ່ໜີ.

  • ເຈົ້າຜູ້ ໂພສີກວ້າງ ກາງສວນນົກແກວ່ນ
    ບິນອອກ ມື້ລະຮ້ອຍ ບິນເຂົ້ານັບບໍ່ໄຫວ.

  • ເຈົ້າຜູ້ ແພຜືນກວ້າງ ປູມາໃຫ້ມັນເຫຼື່ອມ
    ສັງມາ ປູອ້ອມລ້ອມ ແພງໄວ້ນັ່ງຜູ່ດຽວ ແທ້ນໍ.
  • ເຈົ້າຜູ້ ກິນເຂົ້າຈ້າວ ຂາຍາວ ສູງເຈິ່ນເທິ່ນ
    ອ້າຽຜູ້ກິນເຂົ້າປັ້ນ ຂາສັ້ນຍັັ່ງບໍ່ເຖິງ.

  • ເຈົ້າຜູ້ ກົກຕານຕັ້ງ ກາງນາຕົ້ນຕ່ຳ
    ຝົນຊິຮຳແດດຊິຕ້ອງ ຕານນ້ອຽໃຫ້ຄ່ອຍທົນ ເອົາເດີ້

    ອ້າຍພີ່ຫຼຽວເມືອບ້ານ ເຫັນຕົ້ນຕານເປັນຈຸ່ມກຸ່ມ
    ໃຜເດ້ນໍ້ ຊິໄດ້ມາຫໍ່ຫຸ້ມ ກິນນ້ຳກ່ອນພີ່ຊາຍ.

  • ເຈົ້າຜູ້ ຂຽວໃບຫວ້ານ ຕາຫວານຜູ້ອ້າຽຫ່ວງ
    ເຈົ້າຜູ້ພວງດອກຊ້ອນ ອ້າຍວອນເວົ້າຢ່າໜ່າຍແໜງ

    ຄວາມທີ່ອ້າຽເວົ້າແຈ້ງ ທຸກແຫ່ງບໍ່ມີຕົວະ
    ຢາກຊິມາພັນພົວ ກົ່ວຜະຍອມຫອມກຸ້ມ
    ຄວາມຮັກວຽນມາຫຸ້ມ ຄືກະຊຸມງຸມກະຕ່າ
    ແມ່ນຊິໄປຊິມາ ກໍ່ຄຶດຫາແຕ່ເຈົ້າ ຄອຽເຝົ້າຫ່ວງບໍ່ເຊົາ.

  • ເຈົ້າຜູ່ ຂຽວໃບຫວ້ານ ເຈົ້າຜູ່ຫວານບໍ່ມີເບື່ອ
    ເຈົ້າຜູ່ ຂຽວໝາກເຂືອ ເຈົ້າຜູ່ເຄືອໝາກແຄ້ງ ເຈົ້າຜູ່ນ້ອຽດ້ອງແດ້ງ ຢາກແຍງເຊົ້າລ່ຳແລງ

    ເຈົ້າຜູ່ ແຕ່ງໝາກແຕງຄ້າງ ຫວັງຫອບເມືອກິນກັບປົ່ນ
    ເຈົ້າຜູ່ ຂຽວໃບກະໂດນ ຢາກງອຽໂພນກ່ອງກ້ານ ກິນກັບກ້ອຽໄຂ່ມົດແດງ

  • ເຈົ້າຜູ່ ຂຽວບໍ່ມີແຫ້ງ ຢ່າຣະແວງໃຫ້ໃຈໝົ່ນ
    ຄົນຮັກຈິງນັ້ນແມ່ນອ້າຽ ຢາກໝາຽເຂົ້າ ເປັນຄູ່ນອນ

  • ເຈົ້າຜູ້ ຊຸບຜັກຕີ້ວ ເພພັງຍ້ອນປາແດກ
    ຄັນເອົາຜົວແຕ່ນ້ອຽ ພາເຈົ້າໜ້າດຳ.

  • ເຈົ້າຜູ້ ຈັນເດີນດ້າວ ເດືອນເພັງສິບຫ້າຄ່ຳ
    ຂໍຈົ່ງໃສສ່ອງແຈ້ງ ແຍງອ້າຍຜູ້ປະສົງ ແດ່ທ້ອນ.

  • ເຈົ້າຜູ່ສີໃບຫວ້ານ ປ້ອນຄຳຫວານ ໃຫ້ອ້າຽປ່ວງ
    ຫ່ວງແຕ່ນຳນາດນ້ອງ ຄອງຖ້າເຝົ້ານັ່ງຄູຍ

    ແກ້ມເອີ້ຽແກ້ມ ປຸ໋ຍຫຼຸ່ຍ....ຍາມໃດອ້າຽສິຫາເງິນໄດ້ເປັນກອງ ຫາທອງໄດ້ເປັນຕັ້ງ ຄືດັ່ງຄຳຈາ
    ຈາກກັນພໍເພ-ລາ ຄືຫ່າງກັນນານລ້ຳ
    ຄຳອ້າຽເຄີຽບອກຖ້າ ຫົກສິບປີ ເຫີງໄປຢ້ານເປັນຕ່າງ
    ຢ້ານຫົວອົກສິແຕກມ້າງ ນຳເຈົ້າຢູ່ບໍ່ເຊົາ

    ເອົາຈັ່ງຊີ້ໄດ້ບໍ່ຫຼ້າ...ອ້າຽຂໍຢືມນຳ ວາທີແມ່ເຖົ້າກ່ອນ
    ສ່ວນສິຜ່ອນທໍ່ໃດນັ້ນ ມີລູກແລ້ວຈັ່ງວ່າກັນ

  • ເຈົ້າຜູ້ ຊົງຜົມຫ້ຽນ ສາວນັກຮຽນ ສິຮູ້ບໍ່
    ໄດ້ຍິນສຽງ ພຽງພົບພໍ້ ອ້າຍລໍຖ້າ ວ່າສິຖາມ

    ເຫັນເຈົ້າຫົວຍຸ້ມຍ້າມ ໜ້າເປີ່ນເວີ່ນ ເກີນສຳອາງ
    ແນມນີ້ວນາງ ບໍ່ມີແຫວນ ຢາກກ່ຽວແນນ ຄຽງໃກ້
    ຂຽນຈົດໝາຽ ບັລລະຍາຽໄວ້ ເຫດໃດ໋ໃດ໋ ບໍ່ກ້າສົ່ງ
    ປົງວາງໄວ້ຕໍ່ໜ້າ ເພິ່ນມາຊ້ຳກວດໃສ່ຖັງ

    ຫົວອົກ ອຸກອັ້ງມັ້ງ ນໍນັ່ງ ເປັນເອົາໜັກ
    ບໍ່ໄດ້ ເຜີຽຄວາມຮັກ ສ່ວນສິ ມໍຣະນາມ້ຽນ
    ແນວວ່າໂຕສຽມຫ້ຽນ ປະສົງຫາແຕ່ດິນແກ່ນ
    ແນນເປັນສຽມບ້ອງຕື້ນ ປະສົງທື້ນໃສ່ແຕ່ໂພນ

    ຮັກຫຼາຽ ຮອດສິລົ້ນ ຄິດຕໍ່ ແຕ່ນຳນາງ
    ເຈົ້າຜູ້ ຄີງຂາວບາງ ບໍ່ສວ່າງສາງ ທາງອ້າຽ
    ພີ່ມັນຈົນ ຄົນຂີ້ຮ້າຽ ຈິຕໃຈໝາຽ ໝັ້ນທ່ຽງ
    ສິຂໍສ່ຽງ ຮັກໝັ້ນ ຄັນສົມແມ້ງ ສິແຕ່ງຕາມ

    ອ້າຽເຜີໃຈ ຕັ້ງແຕ່ຕົ້ນ ເຈົ້າສິວ່າ ແນວໃດ
    ເຈົ້າຜູ່ແວວ ຕາໃສ ໃສ່ ແພ ພອນ ຜ້າ
    ເສັ້ນຜົມປີວ ຍາມເດີນກ້າວ ຖືກະເປົາ ເວົ້າກະມ່ວນ
    ສັງມາຊວນເຮັດໃຫ້ ໃຈອ້າຽຫວັ່ນໄຫວ ແທ້ນໍ

  • ເຈົ້າຜູ້ ດວງດອກຟ້າ ໃນອຸຣາໜັກໜ່ວງ
    ສຸດທີ່ເປັນຫ່ວງນ້ອງ ໃຈສະບັ້ນສັ່ນສາຍ

    ນັບແຕ່ນ້ອງພາກອ້າຍ ຄວາມສະບາຍບໍ່ມາໄຄວ່
    ມື້ນຶ່ງເຈັບ ມື້ນຶ່ງໄຂ້ ມື້ນຶ່ງໄຫ້ ຫານ້ອງຢູ່ສູ່ແລງ

    ຕາເວັນແດງຄ່ຳຄ້ອຍ ຄອຍທາງບ່ອນນ້ອງຢູ່
    ຄິດນຳຊູ້ຕ່າງແດນ ຄິດນຳແຟນຕ່າງບ້ານ ພໍປານໄຂ້ບໍ່ຊ່ວງຫາຍ

    ແມ່ນນາງຄິດຮອດອ້າຍ ສົມດັ່ງວາຈາ
    ຫຼືມາຈາພໍຄິດ ຮ່ຳຮອນແຕ່ທາງອ້າຍ
    ໃຫ້ຊາຍໄລລືມຖິ້ມ ບໍ່ມີໄລດອກລືມງ່າຍ
    ຄັນແມ່ນ ດິນບໍ່ຫງາຍ ດິນຊາຍບໍ່ປີ້ນ ຄັນແມ່ນຫີິນຢູ່ນ້ຳ ບໍ່ຟູຂຶ້ນແມ່ນບໍ່ລືມ.
  • ເຈົ້າຜູ່ ດຳປີ້ປີ້ ລົງນະທີລ້າງອາບ
    ແມ່ນສິນອນແຊ່ນ້ຳ ສາມມື້ກະບໍ່ຂາວ ດອກນາ

  • ເຈົ້າຜູ້ ຕົ້ນດອກງີ້ວ ຄະນຶງຮອດປາບົກ
    ເຈົ້າຜູ້ ແນວນາມນົກ ຢ່າໄດ້ລືມໄລແຮ້ວ.

  • ເຈົ້າຜູ້ ບຸບຜາສ້ອຽ ສຸຄົນທາເຫີຽກິ່ນ
    ເກົ້າແມ່ນ້ຳຊາວແມ່ນ້ຳ ຫອມກຸ້ມຮອດພີ່ຊາຽ

    ພີ່ຈຶ່ງບຸດົງດັ້ນ ປະສົງຄັນມາໃສ່
    ໃຈປະສົງຢາກຮູ້ ນາງນ້ອງຢູ່ຈັ່ງໃດ.

  • ເຈົ້າຜູ້ ບົວບານບ້າງ ກາງສະພັງກ້ານກ່ອງ
    ຢູ່ກາງໜອງຢ່ານກວ້າງ ມືອ້າຍເດ່ບໍ່ເຖິງ.

  • ເຈົ້າຜູ້ ຜັກອີ່ຕູ່ເຕັ້ຽ ຕົ້ນຕ່ຳໃບດົກ
    ກົກບໍ່ທັນທຽມໃບ ໄຍບໍ່ທັນໜາແໜ້ນ

    ສັງມາຈູມຈີຈໍ້ ງໍແງຈິບດອກ
    ຮາກບໍ່ທັນຫຍັ່ງພື້ນ ສັງມາປີ້ນປົ່ງໃບ.

  • ເຈົ້າຜູ້ ຢູ່ອິ້ງຕິ້ງ ເຈົ້າຜູ້ຕິ່ງມັນແກວ
    ເຈົ້າຜູ້ແນວມັນພົວ ຢ່າໄດ້ລືມສຽມຫ້ຽນ.

  • ເຈົ້າຜູ້ ຟືມຊາວຫ້າ ຂັນດີເນື້ອຖີ່ໆ
    ອ້າຽຢາກມີດ້າຽໃຫ້ນ້ອງຕ່ຳທໍ

    ເຈົ້າຊິພໍໃຈອ້າຽ ຕົນຊາຽສແວງໃສ່ ແນ່ບໍ້
    ຫຼືຊີຕິວ່າດ້າຽຍົບໃສ ຫຼືຊິຕິວ່າໄໝບໍ່ຍ້ອມ ບໍ່ຍອມໃຫ້ໃສ່ຟືມ.

  • ເຈົ້າຜູ້ ຟືມຊາວຫ້າ ປະສົງຫາແຕ່ໄໝຍອດ
    ດຳອອດຫຼອດຜູ້ຈັ່ງອ້າຽ ຕາຊ້າຽໃຫ້ລ່ຳມອງ.

  • ເຈົ້າຜູ້ ຫົງຄຳຜ້າຽ ເວຫາເຫີນເມກ
    ກາດຳຂໍໜ່ຽວນ້ອມ ນຳກົ້ນວ່າຈັ່ງໃດ.
  • ເຈົ້າຜູ່ ຫົງຄຳຜ້າຽ ກ່າຽເຂົາຄັນທະມາດ
    ເຈົ້າຊ່າງແລໃສ່ໄມ້ ໂພຕົ້ນຮົ່ມຂຽວ

    ບາດວ່າສາຂາໄມ້ ໂພບາງເຫຼືອງຫຼົ່ນ
    ຜັ່ນຊິໄດ້ອ່າວໂອ້ ຄນິງໄມ່ຢູ່ດົງ.

  • ເຈົ້າຜູ້ ຫົງຄຳຜ້າຍ ບໍ່ໝາຍງອຍຕົ້ນໄມ້ຕ່ຳ
    ເບັດໃສ່ໄມ້ແກ່ນສູງ ເບັດໃສ່ຍຸງແກ່ນຫຼ້ອນ ເບັດໃສ່ຂອນແກ່ນແຕ້ ລຳດົ້ວຈຶ່ງຈະງອຍ.

  • ເຈົ້າຜູ້ ຫົງຄຳຜ້າຍ ປາຍເຂົາຄັນທະມາດ
    ຮຸກຂາມີໝື່ນຕົ້ນ ຕົວເຈົ້າຫາກເພັນໜີ.

  • ເຈົ້າຢ່າ ປະຂ້ອຽໄວ້ ກາງໄຮ່ເປັນໝູ່ກາ
    ເຈົ້າຢ່າປະຂ້ອຽໄວ້ ກາງນາເປັນໝູ່ໄກ່
    ເຈົ້າຢ່າປະຂ້ອຽໄວ້ ໄລຖີ້ມໃຫ້ປ່ຽວພອຽ.

  • ເສຖະກິດພາໃຫ້ ໂລກກ້າວໜ້າ ຫຼືມັນວ່າໃຫ້ພາຖອຽ
    ຮ່ອງຮອຽໂບຮານຫຼັງ ເສື່ອມພັງທະລາຽລ້າງ
    ຫຼົງທາງລືມຄອງເຖົ້າ ຄືຫຼົງເງົາແລ້ວລູບໄຫຼ່
    ຕົກເຖີງຄາວສມອງໃສ ໃຜກະເຫັນແກ່ໂຕ ໃຜກະເຫັນແກ່ໄດ້ ໃຈຄົນນັ້ນຫ່າງທັມ

    ຮີດເກົ່າກ້ຳ ຊ້ຳເລົ່າລືມຫຼົງ
    ໂຄກ ປ່າ ດົງ ກະແປນເໝີດ ຮົຖຍົນກະເຕັມບ້ານ
    ຂອງໂບຮານກະເເລີຽຮ້າງ ຫາຽຈາງໄປຈາກຖີ່ນ
    ກິນກະມີແຕ່ຊື້ ຂອງກະມີແຕ່ຊື້ ຄືໃຊ້... ຕັ້ງແຕ່ເງິນ

    ເອີ້ນກັນ ສູ່ມື້ນີ້ ເຕັມທີຖີ່ນຊົນນະບົດ
    ຂນົບ(ຂະນົບ)ທັມນຽມລົດ ໂລດເລີຽບໍ່ເອົາໃຊ້
    ໄປຫາກິນໄກບ້ານ ຫຼານກັບຍາຽນັ່ງກອດເຂົ່າ
    ຮີດເກົ່າເໜີດມິດຊ້ຳ ນຳກົ້ນຊາຕອື່ນໄປ

    ຮີດສິບສອງຄອງເລິກໃຊ້ ເຊົາເຊື່ອບໍ່ຍອມຖື
    ຄົນກະຕືລືຫຼົງ ອົ່ງຕົນ...ລືມເຄົ້າ
    ລືມປິຕຸກັບທັງມານດາເຖົ້າ ຄົນເຮົາເອີ້ຽ... ຫຼົງຮອດປູ່
    ຮີດເກົ່າເຮົາບໍ່ກູ້ ຟູຟື້ນ ກະ ເຊື່ອມໂຊມ

    ດົນ ບໍ່ ດົນ ສັງຄົມກະສິຫຼົ້ມ ຄົນສິບົ່ມນິສັຍເສັຽ
    ເມັຽກະຈົນລືມຜົວ ຜົວກະຈົນລືມເມັຽ ບໍ່ເຊື່ອກັນສມັຍນີ້
    ປະເພນີໂບຮານຫຼົ້ມ ໄປຫຼົງຊົມເຊື້ອຊາຕເພີ່ນ
    ຫຼົງວັດຖຸ ຫຼົງເງີນ ເພີນຈົນຟາງມືດມົ້ວ ຫຼົງກາມພ້ອມ ຫ່ວງແຕ່...ເມົາ ພີ່ນ້ອງເອີ້ຽ

  • ເສັຽແຮງຫ້າງ ກະຖິນແຮບໍ່ໄດ້ແຫ່
    ບາດວ່າເພິ່ນບໍ່ຫ້າງ ກໍຍັງໄດ້ແຫ່ໄປ.

  • ເສັຽແຮງສ້າງ ກະຖິນແຮບໍ່ໄດ້ແຫ່
    ເຂົາບໍ່ໄດ້ຮ່ວມສ້າງ ຊ່າງມາໄດ້ແຫ່ໄປ.

  • ເສັຽແຮງ ຟັນເຮືອໄວ້ ຫຼາຽລຳໄວ້ແຄມທ່າ
    ເສັຽແຮງໝ່າເຂົ້າໄວ້ ຫຼາຽມື້ແຂກບໍ່ໂຮມ

    ແມ່ເພິ່ນຫໍ່ເຂົ້າຕົ້ມ ຫວັງສິໃສ່ກັນຫຼອນ
    ກັນ "ນະຄອນ" ບໍ່ທັນຈົບ ເພີ່ນຜັດສາຣຸບທ້າຽ
    ເສັຽແຮງບາຽຂັນຫ້າ ວ່າສິມາສົມມາ ລູງຕາປູ່ກັບຍ່າ
    ແມ່ອ້າຽຕ່ຳແພວາ ເອົາໄວ້ຖ້າລູກໃພ້ ຂີດລາຽໄວ້ຊ້ຳເລົ່າໝັນ

    ເສັຽແຮງໜ່ຽງເຂົ້າປັ້ນ ປ້ອນໝ່າມທ່າມເຮົາສອງ
    ມື້ກິນດອງ ຊ້ຳຜັດໜີ ວ່າອີກປີຮອດວັນມື້
    ມັນບໍ່ຄືດອກເດີ້ຫຼ້າ... ວາສນາເຮົາບໍ່ຄ່ອງ
    ຢ່າປອງຕົວະຫຼອກອ້າຽ  ໃຫ້ເປັນບ້າຝ່າຽດຽວ

    ມີທາງທຽວ... ໄປເດີ້ຫຼ້າ... ໄປກີນປາຫາວັງໃໝ່
    ຢ່າມາໄງ້ຮາກເຫງົ້າ ຂໍເວົ້າວ່າ "ບໍ່ສະອອນ"

  • ເສັຽດາຽເກີດຮ່ວມບ້ານ ສຖານຖິ່ນດິນດຽວ ເດ້ນໍ
    ເສັຍດາຽ ທຽວທາງນຳ ຕັ້ງແຕ່ນາເຖິງບ້ານ
    ເຈົ້າຜູ່ ຂຽວໃບຫວ້ານ ຫວານຕາອ້າຽເປັນຫ່ວງ
    ເຈົ້າຜູ່ ພວງດອກຊ້ອນ ອ້າຽວອນເວົ້າເຈົ້າຢ່າແໜງ

  • ເຍາະຢອກເຫຼັ້ນ ພໍເປັນຄຳ ກອນກ່າຽ
    ບົດຜຍາ ສົ່ງທ້າຽ ແຖມທ້ວງ ຊ່ວງກະໃຈ

    ຈາຄວາມໃນ ໄຂຄວາມແຈ້ງ ຖແລງກອນ ມີຊ້ອນຕໍ່
    ສັພພະຄຳ ຫຼອກລໍ້ ຕາງໄດ້ມ່ວນຍິນ

    ມວນມະໂນ ມອບສິ້ນ ຖວາຍບາດ ຄຳແພງ
    ຈຶ່ງໄດ້ແປງຍັງສານ ຜ່ານຜະອວນມວນແມ້ງ
    ຍໍສແດງ ພໍເຫັນຮູ້ ຕາມຮູ ພໍຮູ້ປ່ອງ
    ຂໍອາພັຍເດີ້ ພີ່ນ້ອງ ເວນຕ້ອງ ຢ່າໄດ້ພານ.
  • ເຍາະຍ່ອງໆ ມາຈອບສ່ອງ ເບິ່ງອ້າຽ ຊາຽຊ່າ ຄູຍສາວ
    ຄາຣົມລາວ ກະແຮ່ງຄັກ ມັກຫຼາຽ ຖືກໃຈແທ້
    ທັງບົທກອນ ຜຍາແກ້ ກ້ຽວກັນ ອ່ານແລ້ວມ່ວນ
    ຊວນຊື່ນຊົມ ພ່ອງໄຫ້ ເປັນບຸນຮ້າຽ ໄດ້ພົບເຫັນ

    ສິໄປເຊັນເອົາ ເຫຼົ້າມາຊຸມ ນັ່ງເຊັຽຕໍ່
    ປິດປະຕູ ສານໍ ຢ້ານຜູ່ສາວ ຕື່ນອ້າຽ ຝ່າຽພຸ້ນ ເພິ່ນສິໜີ

  • ເດີນດຽວດັ້ນ ປະສົງຫານ້ອງອຸ່ນ
    ຄັນມາພົບນາດນ້ອງ ໃຈສລັ້ງວັ່ງເວ.

  • ເດືອນສາມຄ້ອຍ ຄອຍນາງຢູ່ຄືເກົ່າ
    ຈົນວ່າເດືອນສີ່ເຂົ້າ ເດືອນຫ້າຊິຕ່າວເຖິງ

  • ເຫິງປານໃດຈັ່ງຊິພໍ້ ຫຼືໃຜນໍຄອຽເຝົ້າກ່ຽວ
    ອ້າຽນີ້ ຫຼຽວພໍ້ວໍ້ ຊິພົບພໍ້ຫຼືຈັ່ງໃດ.

  • ເດືອນບໍ່ໄລຈາກຟ້າ ເມຄາບໍ່ໄລຖິ່ນ
    ແຜ່ນດິນ ບໍ່ຈາກຫຍ້າ ປາບໍ່ບ້ອນພ່າຽໜີ

  • ຂີ້ຊີບໍ່ລາໄຕ້ ໄມ້ບໍ່ລາ ປ່າເສືອໃຫຍ່
    ອ້າຽຮັກນ້ອງ ນ້ອງຮັກອ້າຽ ໃຈນັ້ນກະບໍ່ລືມ

    ຟືມບໍ່ລາເນື້ອຝ້າຽ ຊາຽບໍ່ລາ ນ້ອງສິກ່ຽວ
    ສິຮັກດຽວໃຈດຽວ ທຽວເປັນແຟນມ່ອມອ້າຽ ທຸກຍາກໄຮ້ ສິຮ່ວມກັນ

  • ເດືອນຮຽງດາວ
    ສາວຮຽງຊູ້
    ນົກເຂົາຄູຮຽງຂ້າງຄູ່
    ກົບຫອຽປູຄູ່ຮູ້ໄງ້
    ນ້ອງກັບອ້າຽໃຫ້ຄູ່ກັນ
    ສາຽສັມພັນບໍ່ໃຫ້ຂາດ
    ວາສນາໃຫ້ສົມສົ່ງ
    ຄືຈັ່ງຫົງຄູ່ຫົງ
    ນວນອະນົງຄູ່ອ້າຽ
    ບໍ່ໝາຽປີ້ນປ່ຽນທາງ...

  • ຍາມເມື່ອ ເດິກໆຂ້ອນ ຫົວລົມວອນພັດວີ່ໆ
    ອ້າຽນີ້ ຄິດຮອດນ້ອງ ຄານໂກ້ຽຢູ່ເລາະຝາ

    ຟັງສຽງຝົນ-ປົນສຽງຟ້າ ເມຄາເມກໄຫຼລ່ວງ
    ປ່ວງຄິດນຳແຕ່ຊູ້ ຄວາຜ້າມາຫົ່ມນອນ

    ກອດໜອນນອນວອນໄຫວ້ ຖວິນໃຈແສນລຳບາກ
    ຍາກທວງຄັ່ງແຄ້ນ ຄາແໜ້ນຢູ່ຫວ່າງໃຈ

    ໂອນໍເຈົ້າຜູ້ແກ້ວແກ່ນໄທ້ ອາລັຍຫ່ວງຄນິງຫາ
    ຜວາຍາມຫຼັບຝັນ ຍັ່ງຄືນວັນແຈ້ງ.
    ຕະແຄງນອນຝັນເພີ້ ລະເມີໄປ ເປັນລາຽຕ່າງ
    ຄິດຢາກກິນລາບຊ້າງ ອຸກແທ້ເຮັດບໍ່ເປັນ

    ຄັນຢາກກິນແກງເໝັ້ນ ບໍ່ເຫັນໃຜເອົາມາໃຫ້
    ຍາກນຳເຮົາຜູ່ໄຮ້ ໃຜນັ້ນບໍ່ລ່ຳແຍງ

    ຢາກກິນແກງ ໝາກແຄ້ງຟ້າ ສາວໃດນາ ຊິມາຮ່ວມ
    ແນວວ່າຄວາມປາກເວົ້າ ເຮົານັ້ນບໍ່ເກັ່ງການ

    ຢາກຂອງຫວານ ທັງຂອງສົ້ມ ຢາກກິນນົມແມ່ລູກອ່ອນ
    ຢ້ານແຕ່ຕອນຈາກບ້ານ ກົວຢ້ານຊິຖືກຕີນ.

    ຢ້ານຄວາຽດຳຕຳຄວາຽຕູ້ ຕູລູໃສ່ຄວາຽດ່ອນ
    ແນວຈອນຟອນມ່າຽກ້ຽວ ໃຈດຽວແຕ່ງູເຫົ່າ
    ບ່າວແວງແຮ່ງຢາກເວົ້າ ສາວເຈົ້າສິວ່າຫຍັງ

  • ເຕືອນສາວນັັກຮຽນ
    ຮຽມນີ້ຂໍອ່າວເອື້ອນ ເຕືອນໝູ່ຊຸມສາວ
    ຍາມເມື່ອທາວເຄືອໄປ ໃຝ່ຮຽນຄວາມຮູ້
    ຢ່າຊູລືມຄຸນເຖົ້າ ທັງສອງຫາເງິນສົ່ງ
    ພໍ່ກັບແມ່ຈົນຫຼັງໂກ່ງ ຄອຽຫາເງິນຢູ່ບ້ານ ແຮງໜ້ອຽເພີ່ນຄ່ອຽທົນ

    ສົ່ງໃຫ້ລູກຜູ້ຕົ້ນ ໄດ້ຮຽນຕໍ່ມໍສູງ
    ສ່ວນອີ່ນາງຄົນປາຽ ສົ່ງຮຽນມໍຕົ້ນ
    ທົນຫາເງີນໄປໃຫ້ ເໝີດປີຈົນວ່າເມື່ອຽ
    ຂົນສົ່ງໄປເລື້ອຽໆ ຫາໄດ້ກະບໍ່ຍັງ

    ຍ້ອນວ່າຫວັງເພີ່ງເຈົ້າ ໄດ້ຮຽນຕໍ່ມໍສູງ
    ວ່າສິເອົາປຣິນຍາ ມາຕໍ່ເຕີມເສີມທ້າຽ
    ຢ່າທຳການຂາຽໜ້າ ຮຽນວິຊາໄປແນວອື່ນ
    ຍາມກາງຄ່ຳກາງຄືນ ບຶນອອກໄປເລາະເຫຼັ້ນ ທຽວເຕັ້ນຢູ່ເລາະບາຣ໌

    ຈັກວ່າ"ຊິງ" ຫຼືວ່າ "ຊ່າ" ວັຍຣຸ້ນໃໝ່ມັນແສນຊົນ
    ບໍ່ທັນດົນຜັດຂໍເງິນ ພໍ່ແມ່ໂຕທາງບ້ານ
    ນ້ອຽບໍ່ນານຜັດມີທ້ອງ ມານຫົວພອງບໍ່ມີພໍ່
    ເລີຽບໍ່ໄດ້ຮຽນຕໍ່ ກັບມາລ້ຽງລູກນ້ອຽ ໄທບ້ານສິຮຸ່ມຮໍ

    ເຫັນມາແລ້ວອ້າຽຈັ່ງຂໍ... ພໍ້ມາແລ້ວອ້າຍຈັ່ງເວົ້າ ເຈົ້າຢ່າລື່ນຄຳຈາ
    ອັນປຣິນຍາຄວາມຮັກ ແມ່ນບໍ່ຮຽນກະມີໄດ້
    ທົນຢູ່ໄປ ຮຽນໄປ ຍາມເຮົາຮຽນຈົບແລ້ວ ຈັ່ງຫາເອົາໃຫ້ສົມດັ່ງ
    ຈັ່ງບໍ່ຂາຽຂີ້ໜ້າ ມານດາເຈົ້າຜູ່ຢູ່ເຮືອນ

    ເປື້ອນກະໄດ້ຢູ່ ດອກນ້າ... ແຕ່ຜ້ານຸ່ງແພຖື
    ແຕ່ວ່າຄວາມສາວນາງ ຢ່າໃຫ້ມີເປິະເປື້ອນ
    ບໍ່ທັນມີເງິນເດືອນ ຮຽນບໍ່ທັນເຂົ້າຂັ້ນ ຢ່າໄດ້ພລັນໃຫ້ເຂົາສ່າ
    ເງິນຂາຽໄຮ່ຂາຽນາ ເອົາມາປ້ອມໃສ່ເຈົ້າ ບໍ່ທັນໄດ້ໄຖ່ຄືນ

    ບືນໃຫ້ມັນເຖີງຮາວ ຊາວໃຫ້ມັນເຖີງຂັ້ນ ບໍ່ທັນດົນສິມົ້ມຝັ່ງ
    ພໍ່ແມ່ຝາກຄວາມຫວັງ ໄວ້ກັບນາງໜໍ່ຫຼ້າ ຢ່າຂາຽໜ້າແມ່ຢູ່ເຮືອນ ແທ້ເນີ
    (ຮຽນສູງແລ້ວໃຫ້ຮ່ຳເພີງ ເດີ້ລູກຫຼານເອີ້ຽ...)

  • ເຖິງຊິເປັນເສືອເຖົ້າ ເລັບຍາວໆກໍຕາມຊ່າງ
    ບໍ່ມີໄປມຸ່ນມ້າງ ວາຍວຸ້ນບ່ອນຜູ່ໃດ
    ຈິດໃຈໃສທ່ຽງໝັ້ນ ບໍ່ຫັນເຫແຕກແຫຼ່ງ
    ບໍ່ສຳແດງອວດອ້າງ ໝາງກ້າວ່າເກັ່ງກວມ.

  • ເຖິງຊິຢູ່ຟາກຟ້າ ຂົງເຂຕເຂົາຂຽວ
    ກະຫາກເໝືອນເຮືອນຫໍ ແຫ່ງໂຮງດຽວກ້ຳ.
  • ເຖິງສິຫວນເຫັນຮູ້ ກະຝືນຢູ່ໃນຊວງ
    ບໍ່ອາດຄວນທວນຫາ ຈາກລາລືມຮ້າງ
    ມັນຣ໌ຄາ(ທາງ)ທາງໄປໜ້າ ໂຮຽບຸບຜາດອກອ່ອນ
    ເຈົ້າແພງສີກ່ຳກ້ອນ ໄປຖ້ອນອ້າຽສັ່ງຄວາມ

    ອ້າຽນີ້ເນົາຢູ່ກ້ຳ ຫັນອ່ວາຽ ຂໍອວາຽໄຊ
    ຂໍຈົ່ງສົມປະສົງໃຈ ຫະທັຍນາງນ້ອງ
    ບໍ່ຜຍອງວົນກ້ຽວ ທຽວຫາໄດ້ຄືເກົ່າ
    ຝາກແຕ່ຄວາມວ່າເວົ້າ ຈເຣີນລ້ຳຢ່າຫຼ່າລົງ ແທ້ແລ້ວ

    (ມັນຄາ = ມັຣຣຄາ = ທາງ)
  • ເທວະດາ ສອນໂລກ
    ບັດນີ້ ຂ້າຂໍໂຍຕິກາໄວ້ ຈາໄປບົດໃໝ່ ກ່ອນແລ້ວ
    ໃຫ້ຄ່ອຽຈຳຈື່ໄວ້ ເມືອໜ້າຢ່າກະທຳ ເຈົ້າເອີ້ຽ...

    ອັນວ່າ... ສັປປຸຣິໂສເຊື້ອ ແນວມນຸສຄົນເມືອງລຸ່ມ ເຮົານີ້
    ຈັກໃຫ້ສາວບ່າວນ໊ອຽ ເຝືອຝັ້ນກ່ອມກັນ
    ຈັກໃຫ້ເອົາກັນເຂົ້າ ທຽມສອງເປັນຄູ່
    ຈັກໃຫ້ເປັນຄູ່ແກ້ວ ກັນນັ້ນໃຫ້ລ່ຳດູ ນັ້ນຖ້ອນ

    ອັນວ່າ... ບິດາແກ້ວ ມານດາພໍ່ກັບແມ່ ເຂົານັ້ນ
    ຍັງພ່ຳພ້ອມ ກໍ່ຄວນແທ້ໃຫ້ແຕ່ງດອງ
    ຮີຕຫາກສັນໃດແທ້ ກະທຳຕາມທຸກສິ່ງຢ່າງ
    ຢ່າໄດ້ໄລລະມ້າງ ຄອງລ້ຳຮີຕຜີ

    ຢ່າໄດ້ເຫັນແກ່ໜ້າ ຝູງຄົນລື້ງແກວ່ນ ກັນນັ້ນ
    ໃຫ້ແມ່ນໃຈແມ່ຄ້ຳ ຜີເຮືອນນັ້ນກະຈັ່ງດີ

    ຄັນວ່າ ເຮັດລົບລ້າງ ມັກງ່າຽຄອງຜີ
    ບໍ່ໄດ້ມາວາຈາ ບອກເຂົາຄຳແຈ້ງ
    ມັນຈັກຂວາງເຂົາແທ້ ຜົວເມັຽສົມສູ່ ເຂົານັ້ນ
    ຄັນບໍ່ຕາຽ ກໍ່ຈັກເປັນຮ້າງໝ້າຽ ງານສ້າງບໍ່ຮຸ່ງເຮືອງ

    ບໍ່ດັ່ງນັ້ນ ຫາກຂວາງໝູ່ງົວຄວາຽ
    ທັງບິດອນມານດາ ບໍ່ຢູ່ຍືນເຖິງເຖົ້າ
    ການເຮືອນຢ້າວ ເປັນພັຍເຈັບປ່ວຽ ໄປແລ້ວ
    ເພາະເຮັດບໍ່ຖືກແທ້ ແກ່ຜີຄ້ຳ ເຮືອນນັ້ນກະຊ່າງເປັນ

    ຄວນເອົາຕາມຄຳເຖົ້າ ໂບຮານຕັ້ງແຕ່ງ ມາຖ້ອນ
    ຄັນບໍ່ໄດ້ໂຜດລ້ຽງ ພາຽທ້າຽຈັ່ງຄ່ອຽຂີນ

    ອັນວ່າ...ຍິງຊາຽນັ້ນ ເປັນກ່ຳພອຽສເມີພາກ ກັນນັ້ນ
    ພໍ່ແມ່ເຂົາຫາກ ມໍຣະມິ່ງມ້ຽນ ຕາຽແທ້ເກິ່ງກັນ
    ອັນນີ້ບໍ່ຄວນໃຫ້ ເອົາກັນເປັນຄູ່ ພຍາເອີ້ຽ...
    ສູ່ຄົນສູ່ກ່ຳພ້າ ກໍ່ຂວາງແທ້ສູ່ຄົນ ແທ້ແລ້ວ

    ຄັນເຂົາຫາກລື່ນຖ້ອຽ ຈັກເອົາກັນເປັນຄູ່ ສັນນັ້ນ
    ໃຫ້ລົງປຸກຕູບຕັ້ງ ກາງບ້ານຈັ່ງສູ່ຂວັນ ນັ້ນເນີ້
    ແລ້ວໃຫ້ສົມມາເຈົ້າ ວົງສ໌ຕາເຖົ້າແກ່
    ໃຫ້ພ່ຳພ້ອມ ມົງຄົນແລ້ວຈຶ່ງເອົາ ນັ້ນຖ້ອນ

    ອັນວ່າ... ເຮັດເທິງເຮືອນ ຫາກບໍ່ດີຈິງແທ້ ມັນຈັກມີໂທສຕ້ອງ ອັນຕະຣາຽມາບັງບຽດ
    ເຂົາຈັກທຸກຂມອດໄຮ້ ການສ້າງບໍ່ຮຸ່ງເຮືອງ ແທ້ນາ

    ອັນໜຶ່ງ... ທາງຊາຽນັ້ນ ບິດາຕາຽຈາກ ກໍ່ດີ
    ... ຝ່າຽຍິງນັ້ນ ພໍ່ຜູ້ເຖົ້າ ກໍ່ເລົ່າຕາຽ ກໍ່ດີ...
    ເຂົານີ້ ກໍ່ບໍ່ຄວນສົມສ້າງ ດອມກັນເປັນຄູ່
    ມັກຈັກລຳບາກຮ້ອນ ພົງເຊື້ອລູກຫຼານ

    ຝູງໝູ່ຊາວເມືອງພ້ອມ ງົວຄວາຽສັຕສິ່ງ ກໍ່ດີ
    ຮ້ອນເດືອດໄໝ້ ໝົດແທ້ສູ່ອັນ
    ເພາະວ່າຜິດຄອງແທ້ ທັມມະດາສອນໂລກ
    ກໍ່ຈຶ່ງຂຳເຂືອກຮ້ອນ ການສ້າງບໍ່ຮຸ່ງເຮືອງ

    ຂໍ້ໜຶ່ງ... ທາງຊາຽນັ້ນ ພໍ່ເສັຽຕາຽຈາກ ທາງຍິງນັ້ນ ແມ່ກໍ່ເສັຽຕາຽຈາກ ດັ່ງນີ້... ເຂົາເອົາກັນແລ້ວ ຫາກບໍ່ຕາຽຈາກກັນ...
    ກໍ່ຈັກເປັນຮ້າງໝ້າຽ ... ແປນເປົ່າບໍ່ມີຫຍັງ...
    ບໍ່ມັກຊອບທີ່ຫ້ອງ ພຣະທັມເຈົ້າກ່າວມາ

    ເກງຈັກເສັຽບຸຕນ້ອຽ ຍິງຊາຽລູກອ່ອນ
    ຈັກກະທຳສືສ້າງ ເຮືອນຢ້າວບໍ່ຮຸ່ງເຮືອງ
    ຂໍ້ໜຶ່ງ... ຍິງຊາຽສ້ອຽ ເອົາກັນເປັນຄູ່
    ສູ່ຄົນສູ່ຍາກໄຮ້ ເອົາກັນນັ້ນກໍ່ບໍ່ດີ

    ນັບແຕ່ມື້ສິຊົ່ວຊ້າ ເທົ້າຊົ່ວຕົວຕາຽ
    ຫາກຈັກມີຄຳທຸກ ຍາກກະແສແສນຊັ້ນ
    ອັນວ່າ... ຍິງຊາຽນັ້ນ ບໍ່ສົມກັນກ້ຳເກິ່ງ
    ເບື້ອງໜຶ່ງມີ ເບື້ອງໜຶ່ງໄຮ້ ປານນັ້ນຈຶ່ງຄວນ... ແທ້ແລ້ວ
    ອັນນີ້ກໍ່ຫາກມີໃນຫ້ອງ ເທວະດາສອນໂລກ ແທ້ແລ້ວ.
  • ເບີໂທອ້າຽ ຮັບສາຽພໍໄດ້ຢູ່
    ແຕ່ໂທອອກບໍ່ໄດ້ ເງິນເຕີມອ້າຽນັ້ນບໍ່ພໍ

  • ເປັດຮຽນໄຂ່ ໄກ່ຮຽນຂັນ ໝັ່ນເຮັດສ້າວ ສິໄດ້ຮາວເຄືອໝາກຖົ່ວ
    ຢາກຫອມບົ່ວໃສ່ກ້ອຽ ປຸ໋ຍນ້ອຽນ້ຳໃສ່ຫຼາຽ

  • ເປັນແຮງໃຈໃຫ້ເດີ້ອ້າຽ ບໍ່ຫວັງຄາຽຄວາມເປັນຫ່ວງ
    ດວງຈັນໃສເຈີດຈ້າ ເຫັນໜ້າຢູ່ບໍ່ເຊົາ

    ຮູ້ວ່າເຫງົາຍາມໄກໜ້າ ແນມດາຣາມື້ແສງສ່ອງ
    ຫຍິບມືຖືຂື້ນມາຈ້ອງ ມອງຊ້ຳເບິ່ງແຕ່ຈໍ

    ຍາມໃດນໍ້ ພໍສິໄດ້ ສຽງເຕີມໃຈ ພໍໄດ້ອຸ່ນ
    ດຶງໝອນໝູນ ປຸນແຂນອ້າຽ ພໍຄາຽເສົ້າເມື່ອຄຶດເຖິງ
    ມື້ຟັງເພງຊື້ງຊື້ງ ຄວາມຄຶດເຖິງ ຮອດລີ້ນປີ່
    ກາບຂໍພອນ ຄວາມໂຊກດີ ໃຫ້ຈົ່ງມີແກ່ອ້າຽ ພັຍຮ້າຽໃຫ້ຫ່າງໜີ

  • ເປັນຄວາມຈິງດັ່ງເພິ່ນເວົ້າ ຊຸມໝູ່ເຮົາໃຫ້ຟັງແດ່
    ພວກຊຸມເພິ່ນຊິມາແກ້ ທາງຂ້ອງໃຫ້ສ່ອງໃສ.

  • ເປັນຈັ່ງໃດນໍ້ ນົງນາງຫຼ້າ ບໍ່ເຫັນຈາມິດຈີ່ຫຼີ່
    ມາລືມຊາຍກ່ອນກີ້ ຄົນນີ້ແລ້ວໄປ່ນາງ

    ອ້າຽຜູ້ເຄີຽອວດອ້າງ ທາງຝ່າຽຢາຽຜຍາ
    ເຄີຽວາຈາບົດກອນ ຮ່ຳຮອນແລງເຊົ້າ
    ມາທົງເຫງົາໝອງໄໝ້ ຫຼືໃນໃຈເຈົ້າບໍ່ມ່ວນ
    ຫຼືເພາະອ້າຽມາກວນ ໃຫ້ນ້ອງພວນເກີດກຸ້ມ ສຸມສະທ້ອນບ່ອນຊວງ.

  • ເປັນຈັ່ງໃດນໍອ້າຽ ນ້ອງນີ້ຄິດນຳຫຼາຽ ນຳພີ່ຊາຽອ້າຽພີ່
    ຄຶດແຕ່ນຳຄົນດີ ມີແຕ່ຄອງຄອຽຖ້າ ມາຈາຕ້ານຕໍ່ອີ່ນາງ.

  • ເປັນຈັ່ງໃດເດ້ຫຼ້າ ເດິກໆມາຄິດຮອດພີ່ ບໍ່ນໍ້
    ອ້າຍນີ້ຄິດຮອດເຈົ້າ ແລງເຊົ້າໄດ້ຈົ່ມຫາ

    ແຕ່ບໍ່ອາດລ່ວງກ້າ ເກີນກວ່າໄດ້ທົນອົດ
    ແສນຣະທົມທັນທົດ ທ່ອງທຽວຜູ້ດຽວດົ້ນ
    ເປັນສັບສົນໃນເນື້ອ ມະໂນໃນໄຂ້ບໍ່ສວ່າງ
    ຢາກເປັນດວງດອກຊ້ອນ ຊອນຂ້າງຄູ່ຄີງ.
  • ເປັນຈັ່ງໃດເດ້ຫຼ້າ ເຫັນຊາຍມາຄືບໍ່ປາກ
    ຫຼືເຈົ້າຍາກເຣື່ອງບ້ານ ສະຖານຫ້ອງແຫ່ງເຮືອນ

    ອ້າຍຂໍບອກເອີ່ຍເອື້ອນ ເຕືອນຕ່ອນກອນຜຍາ
    ມາຢາກ ວາຈາໄຂ ຂ່າວຄຳແຖລງເວົ້າ
    ໃຈເຫງົາ ຄິດເຖິງນ້ອງ ນວນຣະອອງຈັ່ງໄຂບອກ
    ຂໍເວົ້າຢອກແດ່ຫຼ້າ ຢ່າຫານກ້າດ່າຊັງ

    ອ້າຍນີ້ຈິດຈອດຈັ້ງ ຫວັງວ່າຊິມາຖາມ
    ວ່າຈັ່ງໃດຄົນງາມ ຢູ່ສບາຍບໍ່ນໍນ້ອງ
    ຫຼືເຈົ້າມີການຂ້ອງ ເຄືອງໃນໃຫ້ໄຂກ່າວ
    ຄິດເຖິງຄາວກ່ອນກີ້ ຄວາມດີນັ້ນຣະຣຶກເຖິງ ແດ່ເນີ້.

  • ເປັນສ່ຽວ ອິຫຼີນັ້ນ ຕ້ອງຮັກກັນໝັ້ນແກ່ນ
    ຜູ່ໃດ ທຸກຍາກແຄ້ນ ຄຽງຂ້າງບໍ່ຫ່າງໜີ
    ຍາມມີພັຍຊ່ອຽກັນຕ້ານ ສູ້ບໍ່ໄຫວພາກັນແລ່ນ
    ບໍ່ຮ່ອນປະລະໄວ້ ໃຫ້ເຮົາດີ້ນຢູ່ຜູ່ດຽວ

    ດູແລຫຼຽວລ່ຳເຍື້ອນ ໄປມາໄດ້ເຊົາແວ່
    ໃຜຜູ່ ທຸກຍານແທ້  ດູແລໃຫ້ບໍ່ຫ່າງເຫີນ
    ມີວຽກງານກະໂທຣ໌ເອີ້ນ ມີງານກະມາຂ່າວ
    ເກີດເຣື່ອງຣາວກໍ່ໃຫ້ຮູ້ ຫາທາງສູ້ຊ່ອຽກັນ

    ສິ່ງສຳ ຄັນວ່ານັ້ນ ຕ້ອງບໍ່ມີ ອະບາຍະມຸກ
    ຫົນທາງແຫ່ງຄວາມທຸກ ສັບສົນໄປທາງໜ້າ
    ສົມບັຕຫາມາໄດ້ ຊິເໝີດໄປຍ້ອນສ່ຽວ
    ເຫຼືອແຕ່ຜ້າຕ່ຽວຕູ້ມ ພໍໃຫ້ຫົ່ມບີງ

    ສິ່ງທີ່ດີວ່ານັ້ນ ຕ້ອງສັຕຊື່ມີສິລທັມ
    ນຳຄວາມສັມມັກຄີກັນ ຜູກພັນໜຽວແໜ້ນ
    ແສນທຸກເຂັນບໍ່ໄລ້ຖິ້ມ ແພງກັນໝັ້ນແກ່ນ
    ຍອມຕາຽແທນກະຍ່ອມໄດ້ ຈັ່ງຊິເອີ້ນສ່ຽວອິຫຼີ ແທ້ແລ້ວ

  • ເປັນອິຫຍັງເດ້ຫຼ້າ ຈັ່ງໄດ້ຈາເອີ້ນຄົນຊ່ອຽ
    ເຫັນວ່າອ້າຽຕ່ຳຕ້ອຽ ນາງນ້ອຽບໍ່ຢາກສົນ

    ຫຼືວ່າອ້າຽຜູ່ນີ້ ບໍ່ຜູ້ດີຮູບບໍ່ຫຼໍ່
    ເປັນຈໍ່ຫຼໍ່ຈ້າຽລ້າຽ ສາຽຕາເຈົ້າບໍ່ຢາກມອງ ຊັ້ນບໍ້

    ບໍ່ເປັນຫຍັງດອກເດີ້ຫຼ້າ ພຽງຄຳຈາມາຕ້ານຕໍ່
    ກະພໍຮູ້ເຫດການ ວ່າເປັນວັນພີ່ອ້າຽ ໃຈຊ້ຳອ່ຳລາ

    ວາສນາອ້າຽມີນ້ອຽ ກະເທິງພອຽຕ້ອຽຕ່ຳ
    ຢູ່ຕາມກັມສ່ຳເຊື້ອ ຄົນຕ້ອຽຕ່ຳສກຸລ

    ຊິເຊົາມາວ່າວຸ້ນ ແລ້ວເດີ້ອຸ່ນທາງຈາ
    ອ້າຽຊິລານົງຄານ ຜ່ານຂວາງທາງໄວ້
    ຮຽມຂໍໄລລາເຈົ້າ ບໍ່ຂໍເນົາຮຽງຮ່ວມ
    ບຸນບໍ່ມີຊິໄດ້ລ້ວມ ເປັນໄມ້ປ່າດຽວ.

  • ເປັນຫຍັງນ້ອງ ອຶ້ງຕຶງມາບໍ່ປາກ
    ແມ່ນ້ອງປ້ອນຊີ້ນຊ້າງ ຄາງກະດ້າງປາກບໍ່ເປັນ.

  • ເປັນຫຍັງນ້ອງ ບໍ່ໄຂປ່ອງວາຈາ
    ຫຼືວ່າດວງມາລາ ຫ່ວງໃຍນຳຊູ້.

  • ເພິ່ນຊິ ຍ່ອງເອົານາເຮື້ອ ເພິ່ນຊິເຟືອເອົານາແກ່ນ
    ຢາກໄດ້ແຟນຜູ້ມັກເວົ້າ ຊິຫາຽເສົ້າຊ່ວງພະທັຍ.

  • ເພິ່ນວ່າ ຊ້າງຈາກຊ້າງ ໄກຫ່າງກໍ່ຍັງກັບ
    ຫົງກັບຫົງລາລັບ ກໍ່ຍັງມີວັນພໍ້
    ປໍກັບຝ້າຽ ສານກະທໍພໍ້ກັນຢູ່
    ແຕ່ວ່າອ້າຽຈາກຊູ້ ຍາມພໍ້ຜັດບໍ່ມີ

  • ເຈົ້າຜູ້ຟືມຊາວຫ້າ ຂັນດີດອກເນື້ອຖີ່
    ຢ້ານແຕ່ໝີ່ບໍ່ສົມຝ້າຽ ຟືມເຈົ້າກໍ່ໍ່ເລົ່າລືມ.

  • ເພິ່ນວ່າ ດາວສເດັດດົ້ວ ບໍ່ໝາຍມົວມາເກືອກຝຸ່ນ
    ເໝືອນດັ່ງນ້ອງອຸ່ນຫຼ້າ ບໍ່ໝາຍຊ້ອນບ່າວພີ່ຊາຍ.

  • ເພິ່ນວ່າ ຖາມຂ່າວບ້ານ ຖາມຂ່າວເຖິງເສົາ
    ຖາມຂ່າວເຂົ້າໃນນາ ຂ່າວປາທັງຂ້ອງ
    ຄັນຖາມເຖິງພີ່ນ້ອງ ສຸກສະບາຽດີບໍ່
    ໄດ້ພໍສຸກຢູ່ໝັ້ນ ຄືກີ້ກ່ອນຫຼັງ

    ພັນທະນັງໃສເຫຼື້ອມ ງຳເຫຼື່ອມປາຖນາ
    ເຮັດໄຮ່ໃຫ້ໝານປາ ເຮັດນາໃຫ້ໝານຝ້າຽ
    ສຸກສ່ຳບາຽຫາຽຮ້ອນ ນອນຄືນຢ່າເອົ້າອັ່ງ
    ຢ່າມີທຸກອີ່ຫຍັງ ເງິນຄຳໄຫຼອັ່ງເຕົ້າ ໂຮມເຈົ້າຄູ່ສູ່ຄົນ.

  • ເພິ່ນວ່າ ປາອາສັຍວັງນ້ຳ ນ້ຳກໍ່ເພິ່ງວັງປາ
    ປາອາສັຍວັງເວີນ ຈື່ງລ່ອງລອຽນຳນ້ຳ
    ທາມອາສັຍຍັງຫ້ວຽ ງົວຄວາຍອາສັຍແອກ
    ຕາແຮກເພິ່ງໄກ່ຕົ້ມ ຈຶ່ງໂຕນຕຸ້ມຈາກຄອນ

    ຄືດັ່ງຂອນອາສັຍໄມ້ ນົກໄສ່ອາສັຍໂກນ
    ຄົນກະອາສັຍຄົນ ເພິ່ງກັນໂດຽດ້າມ
    ຄາມອາສັຍຍັງໝໍ້ ໝໍມໍອາສັຍສ່ອງ
    ຄ້ອງອາສັຍໄມ້ຄ້ອນ ຕີຕ້ອງຈຶ່ງຄ່ອຽດັງ

    ສາມັກຄີກັນໄວ້ ຄືເຂົ້າໜຽວໜຶ້ງໃໝ່
    ຢ່າໄດ້ເພແຕກມ້າງ ເໝືອນນ້ຳຖືກເຂົ້າໜຽວ

    ສາມັກຄີກັນໄວ້ ຄືຝົນແສນຫ່າ
    ຕົກລົງມາຈາກຟ້າ ໄຫຼໂຮມໂຫ້ງຢູ່ໜອງ.

 

  • ເພິ່ນວ່າ ມານຍານ້ອງ ເຕັມກະບຸງລົ້ນກະຕ່າ
    ເອົາອີ່ຫຍັງມາໂຕ່ງໄວ້ ຄືຊິລົ້ນເຮັ່ຽໄຫຼ
    ຄືຈັ່ງໃຈຂອງເຈົ້າ ຊ່າງບໍ່ຈິງດອກຄືວ່າ
    ທາງວາຈາກ່າວຕ້ານ ຈັກຈິງແທ້ດອກຈັ່ງໃດ
    ນີ້ລະນໍ້ເພິ່ນວ່າມານຍານີ້ ອັນແນວດີກະມີຢູ່
    ຊາຽໄດ້ເຫັນຈັ່ງອ່ານຮູ້ ແນວດີແລ້ວກະແມ່ນດີ
    ຕັ້ງແຕ່ຄາວກ່ອນກີ້ ຄວາມມີພໍຮູ້ຊ່າວ
    ເພິ່ນມານຍາເຈົ້າ ຮວມແລ້ວນັບໃສ່ກວຽນ
    ຈັກສິບກວຽນບໍ່ພໍຈ້ອຽ ແມ່ນຮ້ອຽກວຽນບໍ່ພໍໃສ່
    ຊາຽໄດ້ເຫັນຮັບຮູ້ ໂອ້ຽຈິງແທ້ດັ່ງເພິ່ນຈາ.

  • ເພິ່ນວ່າ ຫຼັກການເວົ້າ ຄົນເຮົາໃຫ້ຄິດກ່ອນ
    ຈັ່ງສິບໍ່ເດືອດຮ້ອນ ພາຽຊ້ອຽບາດເມື່ອລຸນ
    ເວົ້າໃຫ້ດີໄດ້ສູງລ້ຳ ໄດ້ເງິນຄຳຍ້ອນປາກ
    ເວົ້າຖາກຖາງເພິ່ນນັ້ນ ກັມຊິຕ້ອງເມື່ອລຸນ
    ເວົ້າເອົາບຸນຄຸນສ້າງ ບາຣະມີໃຫ້ສູງສົ່ງ
    ເວົ້າໃຫ້ຫຼົງ ລົມປາກພ້ອມ ສິຍອມໄດ້ສູ່ແນວ

  • ເພິ່ນວ່າ ຫຼີກບໍ່ມົ້ມ ແລ້ວແຕ່ວາສນາ
    ຊາຕາຂອງໃຜມັນ ດອກດວງພວງພົ້ວ
    ແມ່ນວ່າມີຄັນຮົ້ວ ພູຜາສູງໃຫຽ່
    ພຣົມຫາກຕົບແຕ່ງໃຫ້ ສິບັງໄວ້ກະບໍ່ຟັງ

    ແນນມິ່ງນັ້ນ ຄືດັ່ງວາສນາ
    ເປັນດັ່ງບາຣະມີມຸງ ເຫຼື່ອມງຳກວມກັ້ງ
    ວາສນາເຄີຽສ້າງ ກອງບຸນຊາຕກ່ອນ
    ເຄີຽໄດ້ເກັບດອກຊ້ອນ ຕາມຕົ້ນຮ່ວມກໍ

    ເຄີຽທຳນໍບຸນໄວ້ ບຸບເພສັນນິວາສ
    ຊາຕແຕ່ຄາວກ່ອນກີ້ ເຄີຽສ້າງຮ່ວມກັນ
    ຈັ່ງໄດ້ເຟືອແຝງຝັ້ນ ນຳກັນຊ້ອນຄູ່
    ບຸນຜລາສົ່ງຍູ້ ໃຫ້ເຮົາໄດ້ຮ່ວມກັນ ແທ້ແລ້ວ

 

  • ເພິ່ນວ່າ ລ້ຽງຊ້າງເຖົ້າ ຂາຽງາຍັງໄດ້ຄ່າ
    ລ້ຽງຊ້າງນ້ອຽ ຕາຽຈ້ອຽຄ່າບໍ່ມີ.

  • ເພິ່ນວ່າ ຮັກກັນນີ້ ສຸກຂີແສນສິກ່າວ
    ພວກບ່າວສາວໜຸ່ມນ້ອຽ ແພງຣະຫ້ອຽດັ່ງໜ່ວຽຕາ
    ຮັກກວ່າດິນແລະຟ້າ ສຸດສິວ່າ ບາດສົມຫວັງ
    ບາດຮັກມາເພພັງ ດັ່ງທະເລເພພື້ນ
    ແສນສິກືນກິນໄດ້ ພໍ້ຍາມໃດ ໃຈບານແບ່ງ
    ຍາມຮັກກັນແຮງແຮງ ຮັກແພງກັນວັນເວັນ ຄຶດເຫັນແຕ່ໃບໜ້າ ຢ້ານເປັນບ້າປ່ວຽຕາຽ

  • ເພິ່ນວ່າ ຮັກກັນໄວ້ ໄຄກວ່າຊັງກັນ
    ຢ່າໄດ້ຫັນຫຼັງຈາ ໝິ່ນພະວາຈາຟື້ນ
    ມີຈຸດຢືນຍືນໝັ້ນ ສັມພັນນ້ອງພີ່
    ເອົາຄວາມດີກ່າວຕ້ານ ວານໄວ້ວ່າຂໍ

    ມື້ໜ້າຍັງຊິພໍໍ້ ພານພົບປະສົບກັນ
    ຜູກສັມພັນໄມຕຣີ ຊູ່ວັນຍາວມື້
    ຢ່າຖືສິທທິຕັ້ງ ໂມຫັງມາບັງບຽດ
    ຢ່າໄດ້ຄຽດແຕກມ້າງ ວາງຖິ້ມປ່ອຽກັນ

    ສມານໃຈເດີ້ເຕີມຕັ້ງ ຣະວັງຕົນເປັນປະກອບ
    ຜິດຫຼືຖືກຝຶກໃຈໃຫ້ຄ່ອຍເວົ້າ ຫັນເຂົ້າປາກຈາ
    ໂທດໜັກໜາໃຫ້ເບົາບ້າງ ເຮັດໃຈຈາງວາງປ່ອຍ
    ຜິດອິຫຽັງເລັກນ້ອຽ ອອຍອ້າງຕ່າງອະພັຍ

    ມັນຈັ່ງ ເກີດ ກໍ່ ໄດ້ ກຸ່ມໃຫຍ່ ສາມັກຄີ
    ເອົາຄຸນງາມຄວາມດີ ຝ່າຍເຂົາມາຕັ້ງ
    ຢ່າໄດ້ໍຊັງຂັງຂໍ້ ສົມພໍປົງໃຫ້ລົງແຫຼ່ງ
    ໃຫ້ໝັ່ນຮັກໝັ່ນແພງ ໃຫ້ມັນສົມມາດແມ້ງ ມະໂນນ້ອມນຶ່ງດຽວ.

  • ເພິ່ນຫາກ ລືຊາຊ້າງ ໄພສານຕົວອາດ
    ໃຜຜູ້ລວນນັ່ງໃກ້ ງາຊ້າງຊິສຽບແທງ.

  • ເໝິດແຮງສິຢືນສູ້ ເໜີດແຮງຊູແຂນຂາຫຼ່ອຽ
    ຕາເວັນລົງຄ່ຳຄ້ອຽ ໃຈຂ້ອຽຄືໝົ່ນໝອງ ແທ້ນໍ.

  • ເໝີດທີ່ບຸນຄົນເຖົ້າ ສະກຸນວົງຕົກຕ່ຳ
    ສມັຍໃໝ່ບໍ່ລ້ຳ ສະກຸນເຄົ້າແຕກກະເດັນ.

  • ເວົ້າກັນສາສັ້ນໆ ຕົກລົງກັນໃຫ້ມັນຄ່ອງ
    ເຣື່ອງຄ່າດອງວ່າໄວ້ ແມ່ນພໍໄດ້ຢູ່ບໍ່ນໍ
    ບໍ່ແມ່ນຈຳ ພຽງຫຼອກລໍ້ ຖ້າງ່ຽງຄໍບໍ່ເຫັນໃງ່
    ຫາຽໄປໃສແລ້ວບາດນີ້ ເປັນຈັ່ງຊີ້ເຊື່ອບໍ່ໄຫວ

    ແມ່ນີ້ຮັບບໍ່ໄດ້ ຕ້ອງອັບອາຽຂາຽໜ້າເພີ່ນ
    ສິເດີນຍ່າງເຂົ້າບ້ານ ຄົນກະເອີ້ນເຕີ່ນນຳ
    ຍັງເວົ້າໃສ່ອີກຊ້ຳ ດູຕົນນຳແຕ່ລູກແມ່
    ເປັນສາວແກ່ຄ້າງບ້ານ ຂື້ນຄານແທ້ ລູກແມ່ເອີຍ

  • ເວົ້າກັບຊູ້ຢູ່ຕ່າງບ້ານ ປານຝາກໄຂ່ນຳກາ
    ເໝືອນຝາກປານຳແມວ ຝາກແຫຼວນຳໄກ່ນ້ອຽ
    ຝາກລາບກ້ອຽ ນຳໝາຂີ້ເຮື້ອນຫໍ່
    ຈັ່ງໃດນໍຊິເຫຼືອ ຍາມເມື່ອໄດ້ທ່າແລ້ວ ມັນຊິງາບມ່າມກືນ.

  • ເວົ້າຄ່າດອງ
    ນາງເອີ້ຽ... ຫຼ້ານາງຜູ້ ຮູບງາມນາມຄ່ອງ
    ນ້ອງຜູ່ດີຢາດຟ້າ ດວງດາຣາສວຽອະຣ່າມ
    ອ້າຽສິບໍ່ຂໍຖາມ ຕໍ່ລອງນຳດອກນ້ອງ ຄ່າດອງເຈົ້າແມ່ນສ່ຳໃດ
    ກະເຫັນໃຈຢູ່ດອກຫຼ້າ ລູກສາວເພີ່ນລ້ຽງມາຍາກ
    ຮັບປາກອ້າຽແນ່ຫຼ້າ ສິຖ້າອ້າຽໄດ້ບໍ່ນາງ
    ຄັນແມ່ນເຈົ້າຮັກໜັ້ນ ຈິງຈັງຄືນ້ອງວ່າ
    ຖ້າອ້າຽໄດ້ບໍ່ຫຼ້າ ບໍ່ດົນມື້ສິຕ່າວມາ
    ຂໍເວລາໄປຂາຽຄ້າ ຫາເງິນມາຂໍໝັ້ນແຕ່ງ
    ຖນອມແກ້ມແດງໆ ແພງຖນອມຖ້າອ້າຽ ໃຜມາເວົ້າຢ່າຫງ່ຽງຟັງ
    ຫາກອ້າຽຮັ່ງຣວຽໄດ້ ສິຂົນເງິນໃສ່ສິບລໍ້ ຍໍມາໃຫ້ນ້ອງເບິ່ງ
    ຫວານເລິງໆຍອດຊູ້ ໃຈເຈົ້າຢ່າປ່ຽນໄປ
    ສິຂໍໄກຈາກເຈົ້າ ຫົກສິບປີສິໄດ້ບໍ່
    ເພື່ອໃຫ້ພໍຄ່າຕັ້ງ ທັງທອງກ້ອນກໍ່ກອງ ນາງເອີ້ຽ...

  • ເວົ້ານຳຊູ້ຕ່າງບ້ານ ປານຝາກໄຂ່ໄວ້ນຳກາ
    ເໝືອນຝາກປານຳແມວ ບໍ່ແມ່ນແນວຊິເຫຼືອຄ້າງ
    ມີແຕ່ທາງຊິຫຽ້ຳ ກຳກືນລົງໂພ່ນ
    ຈົນວ່າເສັດສ່ຽງສິ້ນ ສາແລ້ວຈັ່ງຊິເຊົາ.

  • ເວົ້າພາກພື້ນ ຄຳກ່າຽກອນສລັບ
    ບໍ່ອາດພັນລະນານັບ ກ່ວຍກາຽເກີນອ້າງ
    ສົມມຸດວາງແວນໄວ້ ທາງໃນບໍ່ໃສສ່ອງ
    ຈາພໍຢອກນຸ່ງນ້ອງ ສະຫອງຫ້າວອ່າວຄວາມ.
  • ເວົ້າພື້ນ ຄົນໄກບ້ານ ມາທຳງານຮັບຈ້າງເພີ່ນ
    ເພື່ອຫາເງິນສົ່ງໃຫ້ ສອງໄທ້ເຖົ້າຢູ່ເຮືອນ
    ແມ່ນສິທຸກຍາກເຍື້ອນ ແສນຍາກກະຍອມອົດ
    ມອງບໍ່ເຫັນອານາຄົດ ວ່າສິດີຫຼືຮ້າຽ
    ຫ່ວງບໍ່ຫາຽນຳທາງບ້ານ ເຮືອນຊານຖານທ້ອງຖີ່ນ
    ສິຢູ່ກິນຍາກຫຍຸ້ງ ສຳບາຽໄດ້ຢ່າງໃດ

    ລູກນີ້ ເມືອບໍ່ໄດ້ ຍ້ອນວ່າວຽກຄາມື (ພໍ່ແມ່ເອີ້ຽ)
    ສັງມາຄືມີກັມ ຈ່ອງຈຳນຳກົ້ນ
    ດົນປານໃດສິຈົບສີ້ນ ໝົດຈົນພົ້ນຜ່ານ
    ຄັນວ່າເປັນລູກຈ້າງ ຝັນຄ້າງໄດ້ແຕ່ຫງອຽ

    ຫາກີນປານນົກນ້ອຽ ເຫີນຫ່າງຮວງຮັງ
    ໝົດເດືອນມາມີຫວັງ ສົ່ງເງິນເມືອບ້ານ
    ທົນອົດສາ...ບໍ່ຊາຄ້ານ ການງານຕາມໜ້າທີ່
    ເຮັດວຽກດີນາຽບໍ່ຍ້ອງ ບົກພ້ອງເພີ່ນດ່າເສັຽ

    ວ່າເປັນສັຕເປັນເຊື້ອ ຊາຕຊົ່ວເດັຽຣະສານ
    ປານບໍ່ມີຊີວິຕ ຜິດຜານສນຸກປ້ອຽ
    ຄືດຂື້ນມານ້ຳຕາຍ້ອຽ ເຫຼືອໃຈພອຽສ້ອຽໃຈອ່ອນ
    ປິດປະຕູໃສ່ກອນ ນອນມືກ່າຽໜ້າຜາກ ຍາມຍາກໄຫ້ໃສ່ໝອນ

    ເວດທະນາຮົນຮ້ອນ ຂົມຂື່ນຢາກຄືນຫາ
    ສອງບິດາມານດາ ຫ່ວງນຳບໍ່ມີແລ້ວ
    ແຖມໃຈຍັງມີແປ້ວ ແນວນາຽມາຮ້າຽຈົ່ມ ນີ້ແລ້ວ
    ຄຽດບໍ່ຂົມ ປາກບໍ່ກ້າ ຖຽງທ້າບໍ່ຮ່ອນເປັນ

    ຟັງແລ້ວກັດແຂ້ວເນັ້ນ ຮ້ອນຮຸ່ມສຸມອົກ
    ຫັນໜ້າຕົນວົນວົກ ໃສ່ງານບໍ່ບານຈ້ອຽ
    ກ່ຳລັງໃຈໄຫຼລົງຄ້ອຽ ໃຜສິພອຽອອຽແກ້ເງື່ອນ ໃຫ້ເດ້ນໍ
    ເບີ່ງບໍ່ເຫັນໝູ່ເພື່ອນ ພໍສິເອື້ອນອອດອ້ອຽ ນ້ຳຕາຍ້ອຽໃສ່ແຕ່ໝອນ

    ໃຜຜູ້ມີຄູ່ຊ້ອນ ພໍປັບທຸກກະຍັງດີ
    ໂຕນີ້ຕີ້ ບໍ່ມີໃຜ ສິຫ່ວງໃຍເຍືອນຍ້ຽມ
    ພໍປານສຽມມາແທງສ້ວງ ໃຫ້ທວງຈົນເລືອດຫຼັ່ງ
    ທັງການງານແຮ່ງໜັກ ທາງຮັກຊ້ຳຜັດເກີ້ ລະເມ່ີເພີ້ແຕ່ຜູ່ດຽວ

    ຊີວິດຂົມອາຣົມສ້ຽວ ມິຕສ່ຽວບໍ່ມາຢາມ
    ຢູ່ຊາມຊາວັນເວັນ ທຸກເຂັນນຳຄວາມໄຮ້
    ເປັນຄົນງານປານຄົນໃຊ້ ບໍ່ຖືກໃຈເຂົາກະຈົ່ມ ອີ່ແມ່ເອີ້ຽ
    ຊົມບໍ່ດີ ມີແຕ່ປ້ອຽ ນ້ຳຕາຍ້ອຽຢູ່ບໍ່ຖອງ

    ກັບຄືນຫ້ອງແລ້ວກະຮ້ອງ ນ້ຳຕາຢ່ອນໝອນເກັບ
    ເປັນເສດຖີຄວາມເຈັບ ສ່ວນເງິນຂາດເຂີນຊ້ຳ
    ເປັນເສດຖີຄວາມຊ້ຳ ເວນກັມໄດ້ໂອ້ອ່າວ ເດ້ນໍ
    ເບິ່ງລະຄອນຫຼອນຟັງຂ່າວ ຄືດເຖີງຊາວສ່ຳເຊື້ອ ສອງເຖົ້າພໍ່ແມ່ຄີງ

    ຄິດຮອດແກງຄິດຮອດປີ້ງ ປາແດກແຈ່ວແພວຜັກ
    ຄິດຮອດຄົນເຄີຽຮັກ ອະດີດນາງໄດ້ນອນກຸ້ມ
    ມໍຣະສຸມຊຸມຊ້ອນ ນອນໜາມຍາມວ້າເຫວ່
    ໃຈວັ່ງເວຄິດຮອດບ້ານ ສົງສານແທ້ແຕ່ຜູ່ດຽວ ພີ່ນ້ອງເອີ້ຽ...
  • ເວົ້າພື້ນຜຍານີ້ ໂຕຮຽມມີສ່ຳຫາງອື່ງ
    ອື່ງກະແມ່ນອື່ງນ້ອຽ ຄອງຈ້ອຽອື່ງຢາງ
    ຂໍຮ່ວມທາງຈາເວົ້າ ຜຍານຳຢ່າຊ້ຳຕື່ມ
    ຂໍເປັນນ້ຳແອ່ງນ້ອຽ ເຢັນຈ້ອຽຮ່ວມກະບວຽ ແນ່ທ້ອນ.

  • ເຫັນເຂົາ ຈາບົດເບື້ອງ ເຕື້ອງຕໍ່ຄວາມຄິດເຖີງ
    ໃຈຄນິງນຳຫາ ຫ່ວງຄົນທາງບ້ານ
    ເວລາການຜ່ານພົ້ນ ຍ້ອນຄວາມຈົນນັ້ນມາໄລ່
    ເຖີງແມ່ນວ່າສິຢູໄກ ແຕ່ຫົວໃຈຍັງຄຶດພໍ໊ ບໍ່ລືມເຈົ້າເຝົ້າຢູ່ຫຼັງ

  • ເຫັນໜ້າ ນ້ອງໜຶ່ງຄັ້ງ ຝັງແນບໃນດວງຈິຕ
    ວັນຄືນນອນ ອາວອນຄິດ ຫ່ວງຄນິງນຳນ້ອງ
    ຫົວໃຈໝອງຫະທັຍກຸ້ມ ພໍປານໄຟສຸມແກບ
    ອົກແທບແຕກມຸ່ນມ້າງ ນຳນ້ອງແຕ່ຜູ່ດຽວ

    ບໍ່ແມ່ນອ້າຽເວົ້າກ້ຽວ ລຽວລອກຄາຣົມຫວານ
    ເອົານ້ຳຕານມາລວງ ມົດແດງໃຫ້ຕິດໝໍ້
    ບໍ່ແມ່ນຊາຽມາລໍ້ ລວງອະນົງໃຫ້ຫຼົງເຊື່ອ
    ບໍ່ແມ່ນເສືອຫຼອກຕົ້ມ ຊົມຊ້ອນແລ້ວແລ່ນໜີ

    ສາຽໃຈຊາຽດວງນີ້ ແນວແນ່ບໍ່ແປຜັນ
    ປາກກັບໃຈຕຣົງກັນ ແນ່ນອນຢູ່ທາງອ້າຽ
    ຢ້ານແຕ່ສາຽສມອນນ້ອງ ບໍ່ໝາຽປອງປະສົງພີ່
    ຢ້ານຄົນດີຫຼອກອ້າຽ ຕາຽຍ້ອນຄອບນາງ

    ຢ້ານແຕ່ ຕົວະໃຫ້ເພີ້ ລະເມີປ່ວງຊວງກະສັນ
    ຕົວະໃຫ້ຝັນຄົນດຽວ ບໍ່ຫຼຽວແລນຳຊ້ຳ
    ແນວກາດຳຄືອ້າຽ ໝາຽຫົງເຫມະຣາຊ
    ປາດຖນາຮ່ວມຊ້ອນ ຄອນໄດ້ຄູ່ຄຽງ

    ຫາກສາວນາງບໍ່ເຕື້ອງ ເບື້ອງພີ່ກະຄົງຕຣົມ
    ຮັກບໍ່ສົມຄວາມຫວັງ ດັ່ງມະໂນໝາຽໄວ້
    ຂືນຢູ່ໄປ ບໍ່ເປັນແຫຼ້ວ ແນວຫົວໃຈມັນໂສກ
    ເພາະໂຣຄຄວາມຮັກກຸ້ມ ສຸມໄໝ້ດັ່ງໄຟ

    ຫາກຄວາມຫວັງບໍ່ໄດ້ ໂດຽດັ່ງໃຈມັກ
    ຂໍສມັກທາງຕາຽ ບໍ່ຮັກໃຜເລີຽນ້ອງ
    ຜິດຈາກປອງນາງຫຼ້າ ບໍ່ແລຫາໃຫ້ມັນຍາກ
    ຫາກຊາຕນີ້ ບໍ່ໄດ້ເຈົ້າ ຄອງເຖົ້າແກ່ຕາຽ

    ຊີວິຕຂອງໝ່ອມອ້າຽ ໄປສູ່ອາວະສານ
    ຢູ່ໄປນານທົນທຸກ ອຸກພະທັຍໃຈແທ້
    ອົກເປັນແຜໜອງຫົ້ງ ນວນອະນົງເຫີນຫ່າງ
    ໄມຕຣີຈາງຈືດຈ້ອຽ ສິລອຽໜ້າຢູ່ຈັ່ງໃດ

    ອ້າຽນີ້ຢູ່ບໍ່ໄດ້ ດອກນ້ອງອຸ່ນທູນຫົວ
    ຄອບວ່າມົວເມົາຫຼົງ ແຕ່ນົງນາງນ້ອງ
    ໃຈພີ່ປອງປະສົງຊ້ອນ ດອນເສືອກະສິຜ່າ
    ປາຖນາຕໍ່ຕັ້ງ ວັງແຂ້ກະສິລອຽ

    ແມ່ນວ່າດອຽຜາຂັ້ນ ພັນດອຽອ້າຽບໍ່ຫວັ່ນ
    ກ່ຳແພງສູງຊົ່ວຊັ້ນ ຕັນໄວ້ພີ່ສິປີນ
    ພູຜາຫີນເຫວກວ້າງ ທະເລຫຼວງສລາມໂຫດ
    ເລິກແສນໂຍດ ອ້າຽບໍ່ຢ້ານ ສິຫານກ້າຝ່າຟັນ

    ແມ່ນສິທຸກຮ້ອຽຊັ້ນ ພັນໝື່ນອຸປປະສັກ
    ໂສຕົກລົງປົງຮັກ ບໍ່ຫວັ່ນເລີຽທາງອ້າຽ
    ຂໍຍອມຕາຽດອມນ້ອງ ບໍ່ໝາຽປອງເປັນອື່ນ
    ວັນຄືນຮັກແຕ່ເຈົ້າ ຕະຜອງເຖົ້າລະມິ່ງມໍ.

  • ເຫັນວ່າ ຂ້ອຽຜູ້ຮ້າຽ ຢ່າຟ້າວໜ່າຽແໜງຊັງ
    ຫາກວ່າບຸນມັນຍັງ ສິຮຸ່ເຮືອງເມືອໜ້າ.

  • ເຫັນວ່າ ຂ້ອຽຜູ້ຮ້າຽ ຄອງວັຕກະຍັງງາມ
    ເຫັນວ່າຂ້ອຽຜູ້ຊາມ ຮີດຄອງກະຍັງຮູ້.
  • ເຫັນວ່າດຳຂີ້ຫຼີ້ ຢ່າຟ້າວຂີ່ເຮືອກາຍ
    ໄດ້ວ່າດຳຄອຍລອຍ ຢ່າຟ້າວພາຍເຮືອເວັ້ນ
    ບາດເຫັນເຮືອຄາແກ້ງ ດຳຄອຍລອຍຊິໄດ້ໍຊ່ອຍ
    ຄັນບໍ່ໄດ້ຊ່ອຍນ້ອຍ ຍັງຊິໄດ້ຊ່ອຍຫຼາຍ.

  • ເຫັນວ່າ ທຸກຍາກຮ້າຽ ເຂີນຂາດເງິນທອງ
    ຂ້ອຽກະມີໃຈດຽວ ຮັກຈິງຈັງແທ້
    ດີກວ່າເສຖຖີເຖົ້າ ເງິນຄຳເຕັມກະຕ່າ
    ເອົາເງິນມາຫຼອກເຈົ້າ ກິນແລ້ວເລີຽເລົ່າໜີ.

  • ເຫັນວ່າ ທຸກຍ້ອນໆ ຂໍນອນເຮືອນຢ່າຢ້ານແກ່ມ
    ອ້າຍບໍ່ແກ່ມດອກເຂົ້າ ແຕ່ຄຳເວົ້າແກ່ມທຸກຄົນ.

  • ເຫັນວ່າ ຂ້ອຽຜູ້ຮ້າຽ ຄອງວັດກະຍັງງາມ
    ເຫັນວ່າຂ້ອຽຮູບຊາມ ຮີດຄອງກະຍັງຮູ້.

  • ເຫັນວ່າຂ້ອຽຜູ້ຮ້າຽ ຢ່າຟ້າວໜ່າຽແໜງຊັງ
    ຫາກວ່າບຸນມັນຍັງ ຊິຮຸ່ງເຮືອງເມືອໜ້າ.

  • ເຫັນວ່າ ທຸກຍາກໄຮ້ ເຂີນຂາດເງິນທອງ
    ຂ້ອຽກະມີໃຈດຽວ ຮັກນາງຈິງແທ້
    ດີກວ່າເສດຖີເຖົ້າ ເງິນຄຳເຕັມກະຕ່າ
    ເອົາເງິນມາຫຼອກເຈົ້າ ສາແລ້ວກະເລົ່າໜີ.

  •  ເຫັນວ່າ ຍາວຄາດລ້າວ ຢ່າຟ້າວວ່າປາໄຫຼ
    ລາງເທື່ອເປັນແນວງູ ຕອດຕາຽບໍ່ມີຮູ້
    ເຫັນວ່າ ເບະເບຮ້ອງ ງົວເຮົາຢ່າຟ້າວວ່າ
    ລາງເທື່ອເປັນຊາຕເຊື້ອ ເສືອຮ້າຽຊິຄາບຄໍ

  • ເຫັນວ່າກອງຝອຽນ້ອຽ ຢ່າກອຽໃຈຢ່າຟ້າວນັ່ງ
    ລາງເທື່ອງູງອດງ້ຽວ ໃນຫັ້ນສິຕອດຕາຽ

  • ເຫັນວ່າຂອນລອຽນ້ຳ ຢ່າຄອງດາຽວ່າຂອນດອກ
    ລາງເທື່ອລົງແຊ່ນ້ຳ ຫຼາຽມື້ສິປົ່ງໃບ

  • ເຫັນວ່າແນວເສືອເຖົ້າ ຈຳສິລຢ່າຟ້າວເຊື່ອ
    ລາງເທື່ອເປັນໝູ່ເນື້ອ ສິລສິມ້າງແຕກກະເດັນ

  • ເຫັນວ່າອົບອົບຮ້ອງ ຢ່າຟ້າວວ່າສຽງກົບ
    ລາງເທື່ອງູທຳທານ ຕອດຕາຽບໍ່ມີມົ້ວ

  • ເຫັນວ່າອີ່ອີ່ຮ້ອງ ຢ່າວາງໃຈວ່າຈັກຈັ່ນ
    ລາງເທື່ອສຽງເຫົ່າຫ້ອມ ຂຽວກ້ຽວກໍ່ຫາກມີ ທ່ານເອີ້ຽ..

 

  • ເຫຼືອແຮງ ຝົນຕົກເທັ້ງ ນາໂພນນ້ຳບໍ່ອັ່ງ
    ເຫຼືອແຮງອ້າຍນັ່ງເວົ້າ ຕົວເຈົ້າຫາກບໍ່ຈາ.
    ເລື່ອນກະໃຫ້ເລື່ອນແຕ່ຟ້າ ລາກະໃຫ້ລາແຕ່ແຮມເຮັ່ງ
    ຍາມເດືອນເພັງເຈີດຈ້າ ໃຫ້ຄືນເຄົ້າຊູ້ເກົ່າຫຼັງ
    ນາງສິອົດສາຕັ້ງ ຕັ້ງຕໍ່ຣໍຄອຽ
    ຄອຽຄົງຄິດ ອ້າຽຕ່າວຄືນເມືອບ້ານ

  • ເອີ້ນສັ່ງນ້ອງ ຍາມສິຫ່າງໄກໜີ
    ສຸດຈະແສນໂສກີ ຮ່ຳຮອນແຮມຮ້າງ
    ບຸນກຸສົນເຄີຽສ້າງ ບໍ່ສົມທາງທຽວທ່ອງ
    ໄດ້ມາພົບນາດນ້ອງ ຄາວນ້ອຽໜຶ່ງໜີ

    ຕັ້ງແຕ່ກີ້ ປາງກ່ອນບໍ່ມາເຫັນ
    ຈວບວ່າເວນວຽນຊັດ ຈ່ອງດຶງມາພໍ້
    ໂອລະໜໍ...ນໍນ້ອງ ເຮົາສອງສິໄດ້ຫ່າງ
    ປະລະວາງຖີ້ມໄວ້ ໄລແລ້ວລ່ວງລາ

    ຝາກສັ່ງຟ້າ ໃຫ້ຟ້າສັ່ງນຳຝົນ
    ໄປຫາຄົນເຄີຽຮັກ ຮ່ວມຫໍເຮືອນກວ້າງ
    ຝາກນຳດວງດາຣາເຈົ້າ ແທນເງົາອ້າຽພີ່
    ຈັນໂທສີສ່ອງແຈ້ງ ແຍງເຈົ້າດັ່ງພີ່ຊາຽ

    ຄຶດຮອດອ້າຽ ໃຫ້ນ້ອງໝ່າຽນະພາສີ
    ແນມມະນີເດືອນດາວ ແຈ່ມຕາຕາງອ້າຽ

    ອທີຫາຽໝອງເສົ້າ ຄວາມເຫງົາງ້ຳເງື່ອນ
    ເປັນທີ່ເຕືອນຕໍ່ນ້ອງ ພະອວນນ້ອຽໄດ້ຮ່ຳເພີງ ພີ່ແລ້ວ

  • ເອີ້ນສັ່ງອ້າຽ ພາກພ່າຽລາໜີ
    ຢ່າໄດ້ມີໂພຽພັຍ ຫຸ່ມໃນຮົນເນື້ອ
    ໃຫ້ກຸສົນບຸນເອື້ອ ເຄືອບຸນໄດ້ດຶງຈ່ອງ
    ກັມຜັດເຕາະຕ່ອງຕ້ອຽ ຄຽງຂ້າງບໍ່ຫ່າງລາ

    ຝາກດວງຈັນຢູ່ຟ້າ ເບິ່ງດາຣາແກມໜ້າຊຸ່ມ
    ຄິດຮອດອຸ່ມທຸ່ມກ້ອນ ສມອນນ້ອງຫ່າງກັນ
    ຈຳໃຈຮ້າງ ມື້ສິຈາກລາໜີ
    ໜານຜັກຊີ ສິຫ່ຽວໂຮຽໝອງເສົ້າ
    ຄົນສິມາຈາເວົ້າ ຄຽງກາຽນຸດຊະນາດ
    ຄັນຂາດຮຽມມິ່ງແລ້ວ ຄູ່ແກ້ວກະບໍ່ມີ

    ຄິດຮອດອ້າຽ ຜູ່ລາຈາກໄກເຫີນ
    ໃຈຂອງນາງສະເທີນ ຄິດຄນິງຫຼິງຍ້ຽມ
    ຮຽມສິໄລລາແລ້ວ ອວນຄຳແອວສະອົ່ງ
    ຂື້ນບຸນສົ່ງຊາດກີ້ ໃຫ້ຄືນພີ້ຖິ່ນພະນາງ

  • ເຮັດຈັ່ງໃດສິລືມໄດ້ ຄວາມອາລັຍຍັງຄິດຮ່ຳ
    ຍັງຈົດຈຳພີ່ເວົ້າ ວອນເວົ້າວ່າຮັກດຽວ
    ພໍຍາມຫຼຽວເຫັນໜ້າ ທາງວາຈາເຈົ້າບໍ່ເອີ່ຽ
    ທຳທ່າເສີຍແລ້ວເລົ່າເລີຽຈາກນ້ອງ ໃຫ້ໝອງເສົ້າທຸກຕຣົມ

  • ເຮືອນບໍ່ຖີ້ມຄົນ
    ຝົນບໍ່ຖີ້ມນາ
    ສັຕສາບໍ່ຖີ້ມຝູງ
    ນົກຍູງບໍ່ຖີ້ມຫາງງາມ
    ຄວາມສັມພັນຈອດເຂົ້າໃສ່
    ຊື່ປານບັນທັດໄມ້ ໃສປານແກ້ວດື່ມນ້ຳ ຄຳອ້າຽແມ່ນບໍ່ລວງ

  • ເຮືອນບໍ່ມີສີໜ້າ ກາບິນມາມັນຊິລ່ວງ
    ມຸງຫຍ້າ ຄັນບໍ່ມີຕອກລີ້ວ ຊິໄປໝັ້ນຢູ່ບ່ອນໃດ.

  • ເຮົາຫາກ ແນວນາມເຊື້ອ ເຄືອໝາກນາວ ສີຫວານເຫວີ່
    ຄອບວ່າ ຕົ້ນຕ່າງຕົ້ນ ຄວາມສົ້ມ ຈັ່ງຕ່າງກັນ
    ຮຽມຂໍ ປາກກ່າວຕ້ານ ຂານຕໍ່ ຈາຣະຈາ
    ຮຽມຂໍ ເອົາເວລາ ແຕ່ງຜຍາ ຈາກ້ອມ
    ສິບນີ້ວ ອັນຊຸລີນ້ອມ ເໜືອສຽນ ຕາງທຽນທູບ
    ໝູບກາບແລ້ວ ຄຸນແກ້ວ ໜ່ວຽພຣະໄຕຣ

    ຂໍສະໜຳ ຣຳລຶກໄວ້ ເທົ້າຊົ່ວ ຊີວາຍັງ
    ຂອບພຣະຄຸນ ໃນແວວຫວັງ ທຸກພລັງ ໃຈເຈົ້າ
    ມາຖະແມ້... ມາໂຮມເຕົ້າ ເດີນກັນ ທຸກຊັ້ນສ່ວນ
    ຊາວລາວເຮົາ ຊ່ອຽຊ້ວນ ກັນພ້ອມ ພ່ຳຂບວນ

    ເລືອດລາວ ເຮົາລ້ວນ-ລ້ວນ ໃຫ້ເກາະກຸ່ມ ເປັນຊຸມແຊງ
    ຢ່າສະມີ ຫອງແຫງ ໃຫ້ ຫ່ຽວໂຫຽໂຮຽ ຮ້ວງ
    ໄທອື່ນເຂົາ ສິແຊວທ້ວງ ວ່າລາວເຮົາ "ບໍ່ເອົາຖ່ານ"
    ໃຜລະນໍ ສິບໍ່ຢ້ານ ໄທບ້ານ ເພິ່ນເຍາະຫຍັນ

    ໂອກາດດີ ມື້ນີ້ນັ້ນ ມາກອງກັ່ນ ກະວີການ
    ຈາກສະຕິ ປັນຍາຍານ ທີ່ອ່ອນເຍົາ ຍັງເບົາຕື້
    ຖາມຂ່າວສານ ຂອງວັນມື້ ເປັນແນວໃດ ໃຫ້ບອກແນ່
    ມີແນວໃດ ໃຫ້ຊ່ອຽແກ້ ຕູຂ້ອຽ ສິຊ່ອຽກັນ

    ອັນວ່າ ໂພສີສ້ອຽ ໃບບໍ່ດົກ ນົກບໍ່ແກວ່ນ
    ໝາກບໍ່ຫວານຈ້ອຽຈ້ອຽ ກາອ້ຽງບໍ່ທ່ຽວແວ
    ເຮົາຫາກທຽວທາງພໍ້ ນຳກັນຫຼາຽເທື່ອ
    ນ້ອງບໍ່ຈຳຈື່ໜ້າ ພະອວນອ້າຽກະເລົ່າລືມ ຊັ້ນແລ້ວ.
    ເຮົາຫາກ ມີໃຈຕັ້ງ ໃນມະໂນໜັ້ນແກ່ນ
    ຂໍແກ່ ຊຸມພີ່ນ້ອງ ເຫັນຮູ້ແລ້ວຢ່າໝາງ.