ໝວດທີ່ຂຶ້ນຕົ້ນດ້ວຽຕົວ "ຮ"

  • ຮາກເຄີຽ ຝັງຍັ່ງພື້ນ ຄົນກະເລົ່າວຽນຕັດ
    ເຊາະໂກນໃຫ້ເປັນຄົກ ເພື່ອວ່າເຫັນຄຸນໄມ້
    ເຂົ້າເຄີຽຕຳຮຳເຄີຽໄດ້ ເກືອໝູແລະເປັດໄກ່
    ເຄີຽໝ່າແລງໝ່າງາຽໄວ້ໜື້ງ ແທນສາກກະໜ່ຳຕຳ

    ພໍມາເຖິງຍຸຄລ້ຳ ສມັຍໃໝ່ມີເຂົ້າມາ
    ຄົນປ່ຽນເປັນໂຮງສີ ສິເລົ່າລືມໄລພື້ນ
    ຂຸດຄົກຂື້ນ ຈາກດິນຕັ້ງໂທນໂຖ່
    ສາກບໍ່ຕຳ ມອງບໍ່ຕ້ອງ ເຫຼືອໄວ້ແຕ່ເບິ່ງແຍງ

  • ຮັກແສນຮັກກະຕ້ອງຮ້າງ ທາງຫຼາຽທາງໄດ້ເດີນດ່ຽວ
    ໃບໄມ້ຂຽວນຳປ່າໄມ້ ກະຍັງຮູ້ວ່າຫຼົ່ນເຫຼືອງ
    ເປືອງຫົວໃຈສິຫວນໂຕ້ ໂອ້ອ່າວຄນິງຫາ
    ຄົນບໍ່ມາຫວນຮັກ ກະເລົ່າລືມວາງຖີ້ມ

  • ຮັກກັນ ນີ້ເຖິງຊິຢູ່ຟາກຟ້າ ກ້ຳຝ່າຽເຂົາຂຽວ
    ກະຄືຢູ່ຫໍໂຮງດຽວ ກ່ຽວພັນແພງຕູ້ມ.

  • ຮັກກັນນັ້ນ ແມ່ນສິຢູ່ຟາກຟ້າ ພູຜາໃຫຍ່ກວມບັງ
    ຄືນັ່ງນອນນຳກັນ ກ່ຽວກົມກວມກັ້ງ
    ຄັນແມ່ນຊັງກັນແລ້ວ ຕາດຽວບໍ່ຫຼຽວຫຼ່ຳ
    ຄືນຳເມກມ່ານໄມ້ ກວມກັ້ງກໍ່ບັງ.

  • ຮັກຂ້າງດຽວ
    ອ້າຽນີ້ ຫຼົງຮັກນ້ອງ ກ້ານກ່ອງກັນນິກາ
    ເຈົ້າຜູ່ດວງມາລາ ຫຼາກຫຼາຽໝູ່ແມງລ້ອມ
    ພຽນຖນອມແນມເຝົ້າ ຢາກໝາຽເຊົາແຈ້ງຈອດ
    ຄິດຕໍ່ຍອດຍາບສ້ອຽ ພະມອນນ້ອຽຢາກໄຕ່ຕອມ

    ເພີ່ນຫາກມາເລົ່າລ້ອມ ຂອມເຂຕດວງສີ
    ດວງມາລີງາມໃສ ຢູ່ໃນກາງກັ້ນ
    ສຸດກະສັນຈິຕໂອ້ ແນວວ່າໂຕເຊື້ອຕ່ຳ
    ບໍ່ສົມຄຳຄ່າລົ້ນ ພຽງບິນໝົ້ນສ່ວນສົນ

    ຫຼີກບໍ່ພົ້ນ ວົນແຫວກຕາດາງ (ຮູຕາຂ່າຽ)
    ຫາກແຕ່ຄາງຄໍຕິດ ຄິດຫາແຕ່ທາງມົ້ມ
    ຈິຕພີ່ແຖຖລຳຫຼົ້ມ ຍ້ອນໝາຽດົມດວງດອກ
    ທຽວຫາຊອກປ່ອງເຂົ້າ ມາລາເຈົ້າໃຫ້ຊວ່າງໃຈ

  • ຮັກຂອງເຮົາສິຄົງໝັ້ນ ສາຽສັມພັນບໍ່ຂາດເຄິ່ງ
    ນ້ອງເພິ່ງອ້າຽຊາຽເພິ່ງນ້ອງ ເຄືອຂ້ອງກ່ຽວສມັຍ
    ນັບມື້ນີ້ສິມີອ້າຽ ເປັນພາຽກັບເຮືອລ່ອງ
    ຄັນວ່າອ້າຽເປັນໜອງ ນາງສິເປັນຍັງນ້ຳ ນຳກົ້ນຢູ່ບໍ່ວາຽ
    ຄັນແມ່ນທາງຝ່າຽອ້າຽ ຕາຽເປັນແຫຕາຫ່າງໆ
    ນາງສິເປັນຂ້ອງຫ້ອຽ  ນຳຮອຽອ້າຽຢູ່ສູ່ຍາມ

  • ຮັກສເມີໝາຽໝັ້ນ ສັມພັນພຽງພາກ
    ບໍ່ຫ່ອນຈາກເຈົ້າໄດ້ ໂດຽດ້າມດັ່ງດີ
    ມໂນຈິດອ້າຽນີ້ ນອນແນບແຕ່ນຳນາງ
    ບໍ່ອາດວາງຄີງຫຼັບ ລ່ວງເລີຽເຫຼືອລ້ຳ
    ກັມໂຕເດ້ ນອນດຽວດາຽດອກ
    ອ້າຽຂໍບອກນາດນ້ອງ ນາງຫຼ້າວ່າຄິດນຳ ແທ້ແລ້ວ.

  • ຮັກຖາມຫາມື້ຮ້ອຽຖ້ຽວ ໃຈຖາມກ່ຽວມື້ພັນຫົນ.

  • ຮັກນາງນ້ອງ ນວນນາດອິນແປງ
    ສາຽຕາແຍງ ລ່ຳຫຼິງດີລ້ວນ
    ງາມສເມີຖ້ວນ ທວຽຖັນປັ້ນໜ່ວຽ
    ແຂນກ່ອງສ້ວຽ ນວຽນີ້ວນາດນາງ

    ໜ້າອິ່ມອ້າງ ນັຍຍະເນຕດຳດີ
    ສົມແສງສີ ແກ້ມນວນຍວງຝ້າຽ
    ຜົມຜາງຜ້າຽ ຍອຍປີວເປັນທີວຖ່າວ
    ງາມຖືກຕາໝູ່ທ້າວ ໃຈຫ້າວຊິຖ່າວຕາຽ.

  • ຮັກມາລາງຈາງເຊື້ອ ເກືອນ້ຳປາໝາກນາວໃສ່
    ຫົວຫອມພິກຍິກໃສ່ພ້ອມ ເຂົ້າຂົ້ວປ້ອມໃສ່ຊີມ

  • ຮັກບໍ່ໄດ້ເວົ້າ ອົກຊິເໜົ່າໂນມໃນ
    ຮັກບໍ່ໄດ້ໄຂວາຈາ ອົກສິເພພັງມ້າງ.

  • ຮັກບໍ່ໄດ້ຢູ່ຊ້ອນ ເປັນຄູ່ຜົວເມັຽ ກໍຕາມຖ້ອນ
    ອ້າຍຂໍພຽງອັກສອນ ກ່າວກອນຜຍາເວົ້າ
    ຍາມໃດນາງຊົງເສົ້າ ອ້າຍຂໍເອົາໃຈຊ່ອຽ
    ອັນຄວາມທຸກໃຫຍ່ນ້ອຍ ຂໍອ້າຍໄດ້ແບ່ງເບົາ

    ຄຳປາກເວົ້າ ຫາກອອກແຕ່ໃຈຈິງ
    ຫຼິງສຳຄັນ ຜູກພັນກະໃຈແມ້ງ
    ຫຼຽວເຫັນແຈ້ງ ທາງໃນເລີຽໄຂບອກ
    ບໍ່ຮ່ອນຫຼອກເຊື່ອງລີ້ ອຳອິ້ງລ່າຍພາງ

    ຂໍແນບຂ້າງ ພຽງແຕ່ໃນໃຈ
    ບໍ່ຫວັງໄປກຸມກົກ ກອດກຽວຊູຊ້ອນ
    ປຽບສເມືອນໂຕມ້ອນ ທາວໃຍໃຂບໍ່ສ່ອງ ເຫັນແລ້ວ
    ຄວາມຮັກອ້າຍແລະນ້ອງ ຂໍໃຫ້ໝັ້ນຢູ່ໃນ.

  • ຮັກຫອມກັນໝາຽໝັ້ນ ຫຼາຽສັນພູກະປີນໄຕ່
    ທັງຫ້ວຽໃຫຍ່ແລະໂຄກຄ້ອຽ ກະເດີນດັ້ນດ່ວນເຖິງ
    ພໍໄດ້ຟັງຄຳເວົ້າ ບໍ່ເຂົ້າເທື່ອດອກງານດອງ
    ໃຈອ້າຽພອງລືມໂຕ ໄຊໂຍສຽງລັ້ນ
    ໄດ້ຮັບສານວັນນີ້ ເປັນຂ່າວດີກັບຜູ້ອື່ນ
    ອ້າຽນອນເສົ້າຢູູ່ເໝີດຄືນ ນ້ຳຕາໄຫຼຈົ້ນໆ ຈົນລົ້ນຄຸຖັງ.

  • ຮັກຮູບນ້ອງ ສອງມືຢາກກຸມກອດ
    ບໍ່ຫ່ອນຖອດຖິ່ມໄດ້ ໃຈອ້າຽຫາກກ່ຽວພັນ
    ແສນຈະໂສກາກັ້ນ ເກິນກວ່າການກຳໜົດ
    ຈິດພະອວນພາຍົດ ຍາກຢາສິປົວແປ້ວ
    ສັນໃດແຫຼ່ວ ໝໍເມືອງບອກແໜ່
    ຂໍຊ່ອຍປົວປິ່ນແກ້ ກຳກຸ້ມໃຫ້ສ່ວງໄຄ ແດທ່ອນ

  • ຮຽມນີ້ ຄືດັ່ງເຊື້ອຊາຕແຮ້ງ ເໝັນສາບກູຍຜົງ
    ບໍ່ແມ່ນແນວຫົງຄຳ ຊິຫ່ອນທຽມຈັນເຈົ້າ.

  • ຮຽມນີ້ ປຽບດັ່ງ ໄກ່ຜູ້ນ້ອຍ ພໍແຕ່ກໍ່ຮຽນຂັນ
    ຫາງບໍ່ທັນແຊມຂົນ ໜໍ່ຫອນຍັງຕື້ນ
    ຕົບປີກຂຶ້ນ ຕົນໂຕກໍຍັງອ່ອນ
    ປາກບໍ່ທັນແກ່ກ້າ ຈາເວົ້າກໍ່ບໍ່ເປັນ.

  • ຮຽມນີ້ ຄືຜັກຈອກຢູ່ນ້ຳ ຮາກຍັ່ງບໍ່ເຖິງດິນ
    ໄຫຼເວີນໄປເວີນມາ ກໍ່ບໍ່ມີເຟືອຽຄ້າງ
    ຄັນແມ່ນໄຫຼໄປຄ້າງ ເຟືອຽລຸ່ມເພິ່ນກໍ່ຖາງ
    ຄັນແມ່ນໄຫຼໄປຄ້າງ ເຟືອງບາງເພິ່ນກໍ່ຖາກ
    ວ່າສິຂໍຝາກເຈົ້າ ໃຫ້ເອົາເຂົ້າຮ່ວມນອນ

  • ຮຽມນີ້ ຄືດັ່ງບົວວັງນ້ຳ ສິໄປນຳທັງຊົ່ວ
    ຄັນແມ່ນນ້ຳແກ່ງຂື້ນ ບົວສິຍື້ຢືດນຳ

  • ຮຽມນີ້ ປອດອ້ອຽຊ້ອຽ ສເມີດັງຕອງຕັດ
    ຜັດແຕ່ເປັນຍິງມາ ຍັງບໍ່ມີຄົນຊ້ອນ.

  • ຮຽມນີ້ ມາຮອດແລ້ວ ມີແນວໃດຊິໃຫ້ຊ່ອຽ
    ຮຽມຊິເຕາະຕ່ອງຕ້ອຽ ຕາມເຈົ້າໃຫ້ວ່າມາ
    ບ່າວມາຖາມຊັ້ນເບາະຫຼ້າ ຕາມປະສາຜູ້ບ່າວ
    ເພິ່ນເຫັນສາວສ່ຳນ້ອຽ ງາມຊ້ຳພັດຢາກແຊວ.

  • ຮຽມນີ້ ຄວາມຮູ້ນ້ອຽ ຮູ້ຮ່ອມ ເບົາບົກ
    ຕາມແຕ່ ເທພາພຣະ ສິຈ່ອງ ຈູງ ຈຳຕ້ານ
    ຕາມແຕ່ ສົມພານກ້ຳ ກັມຫຼັງ ສິມາຊ່ອຽ
    ເອົາແຕ່ບຸນມາກນ້ອຽ ສິມາຍູ້ຊ່ອຽຊູ
    ຂໍໃຫ້ກູນາ ນ້ອຽ ຄົນພອຽ ພາກຖິ່ນ
    ຄັນຫາກ ຮຽມນີ້ພົ້ນ ສິທົນສ້າງ ຕັ້ງແຕ່ບຸນ

  • ຮອມຊິເປັນຕາໄດ້ ແມວກັບໜູຊ້ຳມາຜ່າ
    ຄັນບໍ່ມາຜ່າມ້າງ ຊິເອົາໄດ້ບ່ອນຂະມັງ.