ໝວດທີ່ຂຶ້ນຕົ້ນດ້ວຽຕົວ "ອ"

  • ອາໄລອ້າຽ ແສນເສັຍດາຽ ຄິດຮອດພີ່
    ອ້າຽຄົນດີ ໜີຈາກນ້ອງ ຜູ່ເນົາຫ້ອງ ໃຫ້ຫ່ວງຫາ
    ລາໄປດີເດີ້ອ້າຽ ຄັນບຸນຫຼາຽ ພໍ້ກັນໃໝ່
    ດວງຈັນໃສ ແຈ່ມຟ້າ ແຫງນໜ້າ ເບິ່ງພີ່ຊາຽ

    ຄິດຮອດຫຼາຽ ແທ້ເດ້ອ້າຽ ຝາກດວງໃຈ ໄວ້ໃກ້ອຸ່ນ
    ຕັກເຄີຽໝູນຢອກເວົ້າ ທາງເຈົ້າ ຢ່າສິລືມ
    ອາທິດແຈ້ງ ມາຈົນໃຈໃຫ້ຈົດຈໍ່
    ອ້າຍນີ້ນັ່ງພໍ້ວໍ້ ວຽນເວົ້າຫວັ່ງເວ

    ຄິດຮອດດວງດອກດົ້ວ ພົ້ວຊອນຊົມຊື່ນ
    ຜູ່ໃດນາ ໄດ້ແຕ່ນອນສະອື້ນ ສະອອນອ້າງບໍ່ອາຍ
    ລົມຜ່າງຜ້າຽ ພັດຜ່ານພໍຜີວເຜີນ ແທ້ນາ
    ຕົກກະເທີນທາງທຽວ ທ່ຽວໄປແປນປ້ອງ
    ແນມຫານ້ອງ ນວນລະອອງອ້ອຍອິ່ນ
    ກິນກະກິນບໍ່ໄດ້ ລະເມີໄຫ້ຮ່ຳຫາ.
  • ອາຣຸນເບີຍເບີກຟ້າ ແສງສ່ອງທະຣັງສີ
    ສັກກຸນີໂບຍບິນ ພາກຮັງຍາມເຊົ້າ
    ຈິຕຄນິງນຳເຈົ້າ ນວນນາງນຸທະນາດ
    ນະພາກາດສະວ່າງແຈ້ງ ໃຈອ້າຍຫ່ວງຫາ

    ແນມເບິ່ງສຸດຂອບຟ້າ ກ້ຳຝ່າຍຫໍຣະດີ (ທິດຕາເວັນຕົກສ່ຽງໃຕ້)
    ແສນໂສກີດວງຈິຕ ຮ່ຳຮອນສະອອນໂອ້
    ວາໂຍຕ້ອງ ກາຍາໜາວສະເມ່ນ
    ມະໂນເຊັນອັ່ງເອົ້າ ເຫັນໜ້າຜູ້ຢູ່ໄກ ແທ້ນໍ
  • ອຸດົມຊັຍໃຫ້ໄປຫຼິ້ນ ເຂຕຖິ່ນດິນອາສັຍ
    ບາດແວ່ໄປແວ່ມາ ຢ່າລືມມາຢາມຢ້ຽມ.
  • ອ້າຽເອີ້ຽ...
    ເງິນຄຳຂອງຄ່າລ້ຳ ຫຼາຽຣາຄາບໍ່ທຽມທໍ່
    ໃຈຕໍ່ຊາຽໝາຽໄວ້ ວັນມື້ບໍ່ປ່ຽນແປງ
    ນາງສິແຍງແວ່ນແກ້ວ ຂຽນຕາທາປາກ
    ເສື້ອໝາກບ່ຽງສິຕັດພ້ອມ ຊອມຖ້າອ້າຽມາໝ່າຽຂໍ
    ຢ່າໃຫ້ລໍຈົນເກີ້ ຄືກະເຊີຖ້າກະຕ່າ
    ຢ່າໃຫ້ຖ້າຢູ່ນານ ຢ່າໃຫ້ປານປານ້ອຽ ລໍນ້ຳສິຫຼັ່ງໄຫຼ ນັ້ນເນີ້

  • ອ້າຍເອີ້ຍ...
    ເຈົ້າຢ່າວາງໃຈໃຫ້ ໃຜໄປຄອງຄອບ
    ໃຫ້ເຈົ້າມອບໃຫ້ນ້ອງ ຄອງໄວ້ແຕ່ຜູ້ດຽວ
    ຢ່າໄດ້ໄປຫຼອກລ້ຽວ ກ້ຽວໃສ່ສາວໃດ.

  • ອ້າຽເອີ້ຽ
    ເດືອນເມສາສິຜ່ານພົ້ນ ຄົນນໍ້ຄົນສັງບໍ່ອວ່າຍ
    ບໍ່ຄິດຮອດຄວາຍບັກຕູ້ ໂຕນອນຖ້າຢູ່ທົງນາ
    ບໍ່ຄິດຮອດຕາກ້າ ບ່ອນເຄີຽຫວ່ານນໍ້ເຄີຽໄຖ
    ບໍ່ຄິດຮອດຄົນໄກ ຜູ່ອ້າຽໄລລືມແລ້ວ
    ແຊ່ວເຊີ່ນໄປເມືອງຟ້າ ເລີຽລືມນາບ່ອນເຄີຽຫວ່ານ
    ບໍ່ຄຶດຮອດນົງຄານ ຜູ່ເຝົ້ານາຣໍຖ້າອ້າຽ ໄປແລ້ວບໍ່ຕ່າວຄືນ ນໍ້ພີ່ເອີ້ຽ

  • ອ້າຽເອີ້ຽ...
    ເຖິງສິໄກຈາກນ້ອງ ສິຄອຽຄອງທຸກບາດຍ່າງ
    ເຖິງແມ່່ນຊູ້ຕ່າງບ້ານ ສິມາຽມ້າງແມ່ນບໍ່ມີ

  • ອ້າຽເອີ້ຽ
    ເພິ່ນວ່າປາຄໍ່ຕ້ອນ ບໍ່ຄອງໄດ້ເຮັດປາແດກ
    ແຂກຕ່າງບ້ານ ບໍ່ຄອງໄດ້ເຮັດຜົວ ດອກອ້າຽເຮີ້ຽ.

  • ອ້າຽເອີ້ຽ...
    ເວົ້າກັນມາກະຫຼາຽມື້ ຖືໄມຕຣີກະຫຼາຽເຫຼົ່າ
    ເວົ້າທັງເກົ່າໃໝ່ພ້ອມ ສິຍອມແທ້ບໍ່ແວ່ໜີ ພີ່ເອີ້ຽ
    ນ້ຳຊີໄຫຼມາຫຼາຽຫ້ວຽ ຄວາຽທຽວລົງຈົນເປັນທ່າ
    ຝູງໝູ່ນົກຫາປາ ຈົນເປັນວັງທ່ານ້ຳ ມູລກະດ້າມດັ່ງກັນ
    ນາງນີ້ໃຈໝາຽໝັ້ນ ເຖິງຫຼາຽວັນບໍ່ເປັນອື່ນ
    ຢ້ານແຕ່ຟືນມ່ອມອ້າຽ ໄຟໄໝ້ເທື່ອຫຼັງ ນັ້ນແລ້ວ

 

  • ອ້າຍເອີ້ຍ...
    ແມ່ນໃຜໆກໍມາຍ້ອງ ພາກັນມອງຈ້ອງໃຈໃສ່
    ວ່າໂຕນ້ອງງາມຫຼາຍ ແມ່ນໃຜເຫັນກໍຢາກໄດ້ ແຕ່ໂຕອ້າຍພັດເລົ່າຊັງ
    ເປັນອິຫຍັງບໍ່ສົນນ້ອງ ຫັນໄປມອງຈ້ອງຜູ້ອື່ນ
    ບໍ່ມາຮັກມາແຊມ ແຖມຍັງແອບເວົ້າພື້ນ ຝືນເວົ້າໃສ່ພະອວນ
    ຄວງມວນສາວມາເຫຍາະເຍີ້ຽ ເມີນເສີຽແທ້ລະພີ່
    ຮູ້ບໍ່ນໍນ້ອງນີ້ ຊິຕາຽແລ້ວຍ້ອນຮັກແຮງ

    ບໍ່ຕ້ອງມາເຮັດແກ້ງ ສແດງທ່າທຳເສີຽ
    ຄືບໍ່ເຄີຽຈາກັນ ເຮັດປານບໍ່ເຄີຽແທ້
    ອ້າຽບໍ່ແລມາເວົ້າ ໄປຈີບສາວຜູ່ເຂົາເກັ່ງ
    ນ້ອງບໍ່ເສັງດອກເຈົ້າ ເຊີນອ້າຽເວົ້າກ່າວສະບາຽ

    ຄວາມເຈັບໃຈນ້ອງຍອມສູ້ ຊິທົນຢູ່ກັບຄວາມເຈັບ
    ນ້ອງຂໍເກັບຄວາມຫຼັງ ຣະຫວ່າງເຮົາເອົາໄວ້
    ເກັບໃນໃຈເອົາໄວ້ໜີ້ ຫາກບໍ່ມີອ້າຽກະຊ່າງ
    ເຖິງຊິເໝິດຫົນທາງ ແຕ່ກໍຍັງບໍ່ທໍ້ ຂໍພຽງໄດ້ແຄ່ຮັກຊາຽ.

  • ອ້າຽເອີ້ຽ...
    ແມ່ນບໍ່ນໍ້ຄຳອ້າຽເວົ້າ ແກມກະເບົາກິນແລ້ວຫວິ່ງ
    ຄີງບໍ່ມີເສື້ອຜ້າ ສິຄ່ອຽຄ້ຳໃສ່ໜາວ... ບໍ່ນໍ້
    ແມ່ນບໍ່ນໍ...ຄືຈາເວົ້າ ເສົາມີໂກນຫຼືວ່າບໍ່
    ໜໍ່ສິແທງແໜງສິຊ້ອນ ຫັກມ້ຽນແລ້ວໄປ່ນໍ້
    ແມ່ນບໍ່ນໍ້... ປໍເປັນປ້ອງ ແມ່ນບໍ່ນໍ້... ໜອງເປັນໂພນໝາກເດື່ອ
    ແມ່ນບໍ່ນໍ້... ເກືອເປັນໝູ່ໜອນນ້ອຽ ຫອຽເປັນໄດ້ສ່ຽວນົກຍາງ
    ຄັນແມ່ນ ສັຈຈັງໝັ້ນ ຂັນອາສາສິມາສູ່
    ຢ່າໃຫ້ຢູ່ດີ້ໆ ຢ່າໃຫ້ລີ້ດ້ານໆ ຢ່າໃຫ້ຄານໄລ້ໆ ຢ້ານນອນໄຫ້ໃສ່ແຕ່ໝອນ...

  • ອ້າຽເອີ້ຽ...
    ຄັນແມ່ນຄືອ້າຽເວົ້າ ຢ້ານເລົາບໍ່ອອກແໜງ
    ໜໍ່ແຄງບໍ່ອອກໜໍ່ ເຄືອເຂົາຮໍສິຈືດຈ້ານ ຫວານຈ້ອຽບໍ່ນໍ
    ຢ້ານແຕ່ທາງຊາຽເຫຼັ້ນ ລົມເຢັນມາເວົ້າໃສ່
    ຄ່າດອງນ້ອງບໍ່ຫຼາຽ ອ້າຽສິໝາຽປ່ຽນປີ້ນ ຜິນຮ້າງຫ່າງພະອວນ
    ຢ້ານແຕ່ຍົກມືກັ້ນ ບັງຝັນອ້າຽສິບັ່ນ
    ຕົວະບາດນີ້ ຕົວະບາດນັ້ນ ໃຫ້ຝັນພໍ້ບ່າວພີ່ຊາຽ
    ຢ້ານອ້າຽຂວ້າມຫຼາຽໄມ້ ທຽວໄຕ່ມາຫຼາຽຂົວ

  • ອ້າຽເອີ້ຽ...
    ຄັນແມ່ນເປັນຄືອ້າຽເວົ້າ ຄັນສິເອົາຄືອ້າຽວ່າ
    ຢາກກິນປາຢ່າຄາເນື້ອ ຢາກກິນເກືອຢ່າຄາຂ່າ
    ແພງບໍ່ແພງກະຕ້ອງຫາ ມາບໍ່ມາກະຕ້ອງຊື້ ທາງນ້ອງນີ້ບໍ່ຂີນ...
    ບໍ່ເຄີຽມີ ວ່າຂີງຊ້າງ ທາງໜໍ່ລັກມີແໜງ
    ຂີງແຄງລັກມີໜາມ ໃບງາມແຕ່ຫົວກຸ້ນ
    ບຸນມາເຫຼືອມຫຼ່ຳບັ້ນ ບຸນມາທັນຈັ່ງພໍ້ພີ່
    ບາດເວົ້າມາດີໆ ນາງສິໄລ່ລົງຕ້ອນ ຄືຊີວຂ້ອນຈ້ອນໃສ່ດາງ...

 

  • ອ້າຽເອີ້ຽ...
    ຄັນແມ່ນ ໃຈປະສົງສ້າງ ທາງໄກກະໃກ້ກ່ອງ
    ໃຈປະສົງນາດນ້ອງ ສາແລ້ວຢ່າສິໜີ
    ປັຕຕະພີແຜ່ນດິນກ້ອນ ບໍ່ອາວອນນ້ຳສິຂາດ
    ວາສນາສິມາພໍ້ ຢ່າຄາຂໍ້ແຕ່ຄ່າດອງ... ດອກນາ

  • ອ້າຽເອີ້ຽ...
    ຄັນແມ່ນ ໃຈປະສົງຊ້ອນ ນອນໃນນຳນ້ອງອ່ອນ
    ຄັນໃຈ ອ້າຽຢາກມາຢູ່ຊ້ອນ ນຳນ້ອງຢ່າຄຶດຫຼາຽ
    ທາງກົກ ນາງສິບໍ່ໃຫ້ລ່າຽ ທາງປາຽນາງສິບໍ່ໃຫ້ລື່ນ
    ຍາກແຕ່ບຶນນຳອ້າຽ ບໍ່ໝາຽປີ້ນໃສ່ຜູ່ໃດ... ດອກນາ

  • ອ້າຽເອີ້ຽ...
    ຄັນສິຊ້ວນອວນນ້ອງ ເງິນທອງນ້ອງບໍ່ວ່າ
    ຫາບກະຕ່າມາກະໄດ້ ສິໄປເອ້ແຕ່ງຕາມ
    ຢ້ານຕົວະໃຫ້ໃສ່ເຫຼົ້າ ຕົວະເຂົ້າຖ້າແປ້ງສ່າ
    ຕົວະນາງປະໝ່າແປ້ງ ແລງແລ້ວບໍ່ກັ່ນເອົາ.

  • ອ້າຍເອີ້ຍ...
    ຄັນອ້າຍແຂ້ນອັ້ງປັ້ງ ມາຄືອັ່ງໃນໃຈ
    ນາງຢາກໄປຊູນຄີງ ຢາກມາອີງຄຽງໃກ້
    ວ່າຈັ່ງໃດເດ້ອ້າຍ ມັກຊາຍຫຼາຍຢ່າຟ້າວວ່າ
    ແມ່ນບໍ່ເປັນຮ້າງມາ ກະຢາກມາແວ່ກ້ຽວ ຄືນລ້ຽວທ່ຽວຢາມ.
  • ອ້າຽເອີ້ຽ...
    ຄົກຕ່າງໄມ້ ຍ້ອນພຽນຂຸດຄັນຕອກສີ່ວ
    ຫີວອາຫາຣຕ່າງລ້ຽງ ເກືອທ້ອງຈັ່ງຢູ່ມາ
    ວາສນາສິມາສ້ວຽ ຣວຽຫຼືຈົນກະບໍ່ເກື່ອງ
    ຫວັງສິຢູ່ຄຽງຄ້ຳ ນຳອ້າຽບໍ່ໜ່າຽລາ
    ກິນປູປາຕາງໜ້າຊີ້ນ ນອນລ້ຽງຮີ້ນຕາງງົວໃຫຽ່
    ຍ້ອນຮັກໃຜບໍ່ທໍ່ອ້າຽ ບໍ່ໝາຽເວັ້ນແວ່ທາງ
    ແມ່ເລົາວາງໃຈໄວ້ ຫວັງສບາຽໃຫ້ເນື້ອອຸ່ນ
    ເງິນທອງພູນພຽນສ້າງ ນາງສິຣໍອ້າຽ.. ບໍ່ໜ່າຽໄລ ດອກເດີ້ອ້າຽ

  • ອ້າຽເອີ້ຽ...
    ຄິດຢາກກິນປາຊີວສ້ອຽ ປູຫອຽຢ່າຄອຽລ່ຳ
    ຄິດສິ ຄຳໝີນ້ອຽ ຢ່າຄອຽກົ້ມມຸດຕົມ
    ຄິດສິງົມປາຂ້ອນ ຂອນຂວາງກະກຳກ່ອນ
    ຄິດສິນອນກ່ອມນ້ອງ ທອງກ້ອນໃຫ້ກໍ່ກອງ ນັ້ນເນີ້

  • ອ້າຽເອີ້ຽ...
    ຄອງຖ້າຕັ້ງແຕ່ເຈົ້າ ແນມທາງໃດກໍດາຽເປົ່າ
    ປີນີ້ນາງຈົນເຖົ້າ ຄອງເຈົ້າບໍ່ຕ່າວມາ
    ຄືສິໄກໄປໜ້າ ທາງແຍກພາຂນານຕໍ່
    ບໍ່ເປັນຫຍັງດອກນໍ້ ຄັນອ້າຽຫາກສຸກສົມ
    ອ້າຽບອກຢູ່ຈົ້ນໆ ບໍ່ລືມຄວາມນ້ອງສັ່ງ
    ພາຽຫຼັງມາລຶບລ້າງ ບໍ່ໝາງເອີ້ນເອີ່ຽດີ
    ດົນ... ດົນທີພໍ້ໜ້າ ລ້າຫຼັງມາປີກາຽຜ່ານ
    ສົມພານນ້ອງບໍ່ກວ້າງ ຄອງອ້າຽກໍ່ເປົ່າດາຽ.

  • ອ້າຽເອີ້ຽ...
    ສຽມບໍ່ຄົມ ເພິ່ນໃຫ້ໃສ່ດ້າມໜັກ
    ຮັກບໍ່ຫຼາຽຢ່າສິມາຽລາຮ້າງ
    ຮັກຫ່າງແໜ້ນ ຂີ້ຍາງແທນມາຢາຕ່າ
    ຕ່າຫ່າງຕອກ ພອກຮັກຊ້ຳນ້ຳບໍ່ໄຫຼ... ຕົ໋ວລະອ້າຽ
    ຢ້ານແຕ່ໄຊຍາອ້າຽ ທ້າງບໍ່ຫຼາຽແຕ່ກົ້ນຮົ່ວ
    ປາໄຫຼເຂົ້າລົ້ວໆ ງົວນ້ອຽກະບໍ່ເຫຼືອ
    ຢ້ານມີເມັຽຢູ່ຊ້ອນ ດອກມອນ ຊ້ອນ ດອກຂ່າ
    ຫຼືເມັຽ ປະຖີ້ມໄວ້ ສັງມາໄດ້ໃສ່ຜຍາ

 

  • ອ້າຽເອີ້ຽ...
    ຊ້າງຕໍ່ຊ້າງ ພາຽສານເອົາພັງຕໍ່
    ໄມ້ຕໍ່ໄມ້ ຂັງຂໍ້ຈັ່ງແມ່ນແນວ
    ແຫຼວເຫຼັ້ນຟ້າ ບໍ່ກິນກາໝູ່ປີກເວີ່ນ
    ມີແຕ່ເຊີ່ນຄາບຫຍຸ້ມ ຫຍຸມຊູດຮູດໄກ່ດິນ
  • ອ້າຽເອີ້ຽ...
    ຍາມຕາເວັນບໍ່ຫ້າວ ຄືໃຈສາວຄຶດຕໍ່
    ຄຶດຮອດຊາຽນັ້ນນໍ້ ທີ່ເຄີຽໄດ້ຕ່າວຫາ
    ແສງຕາເວັນເທິງຟ້າ ບໍ່ລາລົງເລີກຫຼົ່ນ
    ແຕ່ວ່າໃຈຂອງຄົນ ສັບສົນວົນຈັ່ງອ້າຽ ອາຽເອົ້າພ່ອງກະຫາຽ
    ໂອເດ້...ຍາມແສງເພັນຕາເວັນກ້າ ເຄີຽຄິດຫານາງນ້ອງບໍ່
    ລືມຊັ້ນບໍ້ ຄຳວ່າເວົ້າ ສິເອົາແທ້ແຕ່ໃຈນາງ
    ແມ່ນໃຜນໍ້ໄດ້ຄຽງຂ້າງ ຍາມອ້າງວ້າງພາງໝອງໝົ່ນ
    ສາວຄົນຈົນຄືຈັ່ງນ້ອງ ໄດ້ແຕ່ຈ້ອງເບິ່ງຫາ.
  • ອ້າຽເອີ້ຽ...
    ນາງນີ້ ປຽບຜະອວນອ້າຽ ເປັນໄມ້ກ່າຽກັບຂົວ
    ປຽບເປັນງົວທຽມກວຽນ ອ່ຽນຕົມຝົນຟ້າ
    ປຽບດາຣາເປັນອ້າຽ ຫົວໃຈນາງເປັນແສງອ່ອນ
    ຄັນອ້າຽກະພິບ ນາງສິຕິດອ້ອນຕ້ອນ ໄວ້ຮຽງຊ້ອນຢູ່ບໍ່ເຊົາ
    ອ້າຽເປັນເສົານາງສິເປັນຂື່ຕັ້ງ ອ້າຽເປັນຫຼັງ ນາງສິເປັນບ່າໄຫຼ່
    ອ້າຽເປັນໄຫນາງສິເປັນປາແດກບັ້ງ ຂັງໄວ້ບໍ່ໃຫ້ລາ
    ຢ້ານແຕ່ວາຈາລໍ້ ຕົວະລາພາກໜ້າພໍ່
    ຢ້ານອ້າຽມາຫຼອກລໍ້ ພໍໃຫ້ເຫຼັ້ນເປັນໝູ່ລາ...ແທ້ນໍ
  • ອ້າຽເອີ້ຽ...
    ນ້ອງກະທຸກຍາກໄຮ້ ໄຫ້ຮ່ຳນຳຫາ
    ໃຈອາວອນອວນຊາຽ ຫຼາຽວັນກະຈາງຈ້ອຽ

  • ອ້າຽເອີ້ຽ...
    ນ້ອງນີ້ແຈ້ງຄືດາວ ຂາວຄືຟ້າ ໃສງາມຄືໜ້າແວ່ນ
    ແປນມືມາຮັບຕ້ອນ ເຊີນຖ້ອນຜູ່ປະສົງ

  • ອ້າຽເອີ້ຽ
    ນ້ອງນີ້ນາ ປຽບໃສ່ແລ້ວ ອ້າຽກັບນາງຄົນລະວາດ
    ປາຖນາຢາກຮ້ວມ ທຽມອ້າຽຫາກບໍ່ສົມ
    ເຈົ້າຜູ້ພົ້ວດອກອົ້ມ ຊິດົມກິ່ນແສນຫອມ
    ດອກພະຍອມຫອມໄກ ກິ່ນກາຽໃນດ້າວ
    ແຕ່ວ່າສາວນາງນ້ອງ ແນວດອກດິນມັນຕ້ອຽຕ່ຳ
    ສ່ຳດອກຫຍ້າຄ່າກໍ່ໄຮ້ ບໍ່ສົມອ້າຽໄດ້ແຕ່ມອງ.

  • ອ້າຽເອີ້ຽ...
    ນ້ອງນີ້ ຫວັງຄຽງຂ້າງ ຮ່ວມທາງບໍ່ຂີນເບື່ອ
    ສິຂໍເປັນຕ່ອນເນື້ອ ນຳຊ້ອນຮ່ວມສອງ
    ນາງນີ້ ເນົາຫົນຫ້ອງ ສາວນາຜູ້ໜ້າກ່ຳ
    ວາສນາຕ່ຳເຕັ້ຽ ເຄືອຕ້ອງແລ້ງແຫຍ່ງຜັກຂົມ
    ຢ້ານບໍ່ສົມອວນເຈົ້າ ເງົາໝາກນາວຜູ້ຕົ້ນໃຫຍ່
    ເບິ່ງແຕ່ໃບກວມຕົ້ນ ຮົ່ມສິຊົ້ນກະຫ່າງກັນ ອ້າຽເອີ້ຽ...
    ຄັນອ້າຍສັຈຈັງໝັ້ນ ສິຮັກກັນເປັນແປ້ນຮ່ວມ
    ຢາກຫັກສ້ວມຮ່ວມນ້ອງ ສິຄອງອ້າຽບໍ່ໜ່າຽລືມ... ດອກນາ

  • ອ້າຽເອີ້ຽ...
    ນາງນັ່ງຟັງຊາຽຕ້ານ ຈາຫານໃຫ້ໃຈສວ່າງ
    ຄຶດຫ່ວງນຳພີ່ອ້າຽ ຢ້ານລາຽປີ້ນປ່ຽນແນວ
    ອ້າຽເອີ້ຽ... ດິນບໍ່ໄຫຼຂື້ນຟ້າ ດາຣາຈົມດິນແກ່ນ
    ເຄືອຜັກແວ່ນເກີດເປັນຕົ້ນ ຮັກຊາຽລົ້ນບໍ່ປ່ຽນແປງ

  • ອ້າຽເອີ້ຽ...
    ນ້ອງຮັກອ້າຽ ໝາຽໃຈໄວ້ຫວັງເພິ່ງ
    ເຫິງຕໍ່ເຫິງຈັ່ງມາພໍ້ ຢ້ານກໍກ້ວຽອອກໜ່ວຽລາຽ
    ນາງນີ້ຄິດຕໍ່ໜ້າ ຢ້ານອ້າຽມາຕົວະເປັນຕ່າງ
    ນາງນີ້ຄິດຕໍ່ຊ້າງ ຢ້ານມາມ້າງເປັນໝູ່ແມວ... ແທ້ນໍ

  • ອ້າຽເອີ້ຽ...
    ບໍ່ແມ່ນວ່າໃຈກວ້າງ ທະເລຫຼວງທ່າໃຫຽ່
    ເຮືອໃບກະໄຫຼແລ້ວ ເຮືອແກວກະໄຫຼເຂົ້າ
    ເຮືອສະເພົາກະມາທ່າ
    ບາດສິວ່າແພນ້ອງ ຢ້ານຄາຂ້ອງແຕ່ແກ່ງຫີນ ... ບໍ່ນໍ້
    ຄັນອ້າຽເວົ້າທ່ຽງແທ້ ລ່ອງແພໃຫ້ຮອດຝັ່ງ
    ຢ້ານແຕ່ນັ່ງປາກຈ້ອຽ ເຫັນປານ້ອຽສິໂດດນຳ...

 

  • ອ້າຽເອີ້ຽ...
    ບຸນສິມາ ຜັດກັມຊ້ອນ ຄວາຽສິນອນງົວຜັດແລ່ນ
    ແລນສິລົງທ່ານ້ຳ ແຂ້ຜັດບ້ອນຢູ່ບໍ່ເຊົາ
    ນາງນີ້ ໄລລາຫ້ອງ ຫໍທອງໄປຫາທ່ຽວ
    ທັງໄປກ່ຽວພີ່ນ້ອງ ໄດ້ລາຫ້ອງຫ່າງພີ່ຊາຽ
    ໃຈນີ້ ໝາຽຢາກໃກ້ ກັມໃນໆ ຜັດກ້ຽວກ່າຽ
    ບຸນບໍ່ຫຼາຽເລີຽຈາກອ້າຽ ໄປຊ້ຳບໍ່ສັ່ງລາ
    ຄຳອ້າຽວ່າຢ້ານນ້ອງ ຄີງທອງເຫຼັ້ນທາງໃໝ່
    ເບິ່ງເອົາໃຍບົວກ້ານ ບໍ່ຫານເວັ້ນຫ່ວງໃຍ
    ຄິດຮອດໄທ ຊາວບ້ານ ບໍ່ຫານຄືພີ່ນ້ອງອຸ່ນ
    ຄືດຮອດຊຸມບ່າວອ້ອນ ຈົນໃຈຮ້ອນບ່ອນສິນອນ

  • ອ້າຽເອີ້ຽ...
    ນາງຢ້ານວາຈາອ້າຽ ຫຼາຽທາງມາປ້ອນປ່ອງ
    ນ້ອງຢ້ານທອງເຫຼັ້ນເບົ້າ ໄຫຼເຂົ້າບໍ່ແມ່ນຄຳ...

  • ອ້າຍເອີ້ຍ...
    ຢ່າມາຕິແຖລງເວົ້າ ເອົາເລົາມາຈັກຕອກ
    ບາດຮ່າປອກລອກລ້ຽວ ຊິຫຼົງສ້ຽວໃສ່ມື ເຈົ້າເດ...

 

  • ອ້າຽເອີ້ຽ...
    ວາສນານາງມາພໍ້ ໄມ້ລຳປໍຢູ່ສວນເພີ່ນ
    ຕົກກະເທີນສິຂໍນ້ອງ ສ່ຳສອງລ້ານນີ້ບໍ່ແພງ... ດອກນາ
    ນາງນີ້ ຫວັງເພີ່ງໜ້າ ຍ້ອນວາຈາມາຕິດບ່ວງ
    ຄຶດຮັກຫຼາຽ ຈັ່ງໄດ້ໝາຽເຂົ້າບ້ວງ
    ທາງມີກວ້າງຕໍ່ກວ້າງ ບໍ່ໝາຽມົ້ມວ່າສິໜີ...ດອກນາ

  • ອ້າຽເອີ້ຽ...
    ຫວານແຕ່ນອກ ທາງໃນມັນສິເຫີ່ມ ແມ່ນລື
    ຫວານທາງໃຈນອກເພີ່ມ ເຕີມສູ້ຈັ່ງແມ່ນຫວານ... ຕົ່ວເນາະ
    ຜຍານາງຈາຕ້ານ ຫວານຄາຣົມອົ້ມແກມແກ່ນ
    ຫົວໃຈາຍູ້ສົ່ງແໜ້ນ ໄວ້ແທນເບື້ອງຝັ່ງຫະທັຍ ຕົ່ວອ້າຽ
    ອ້າຽເອີ້ຽ... ຢ້ານແຕ່ທາງຝ່າຽອ້າຽ ໝາຽຫົວໃຈໄວ້ຊົ້ນຮົ່ມ
    ກ້ວຽທະນີບົ່ມມ້ຽນ ໜ່ຽງເຫຼັ້ນແລ້ວບໍ່ກິນ...

  • ອ້າຽເອີ້ຽ...
    ອ້າຽນັ້ນ ເນົາຫົນຫ້ອງ ເຮືອນທອງສຖານທ່າ
    ຢ້ານແຕ່ປະຊູ້ໄວ້ ມາແລ່ນຕ້ອນໃສ່ແຕ່ຕໍ
    ນ້ອງນີ້ ແນວໝາກແຄ້ງ ເຄືອແຂງບໍ່ກ້ຽວກໍ່
    ຫຼືວ່າພໍ່ບັກນ້ອຽ ບໍ່ມາຫ້ອຽເຫຼື່ອມໃບ

  • ອ້າຽເອີ້ຽ...
    ນ້ອງນີ້ ໃຈປະສົງໄມ້ ຈັ່ງໄດ້ໄລ່ທຽວຫາ
    ນາງນີ້ ໃຈປະສົງປາ ຈັ່ງໄດ້ຫາແຫຕ້ອນ
    ຢ້ານແຕ່ທາງອ້າຽສ້ອນ ຕ້ອນປາໄວ້ແຈຝັ່ງ
    ບາດສິນັ່ງລົງເຫຼັ້ນ ລືມແລ້ວໄປແອ່ວມອງ ... ເດ້ນໍໍ້

  • ອ້າຍເຮີ້ຍ
    ອ້າຍວ່າອ້າຍ ບໍ່ມີເມັຽຊ້ອນ ເຊີງແພສັງມາກ່ານ
    ຫຼືວ່າລູກອ້າຍດ້ານ ຫຼານອ້າຍດື້ ເຊີງຜ້າຈຶ່ງກ່ານກາງ.

  • ອ້າຽເອີ້ຽ...
    ຮັກກັນແຮງແພງກັນໄວ້ ຮົ້ວໄຮ່ກະບໍ່ຫາຽ
    ຮັກກັນຫຼາຽສາຽແນນຄັກ ຫຼັກນາບໍ່ເສັຽພ້ອມ
    ຮັກກັນເຫຼັ້ນ ຢອກໄປຕາງພໍ້ໃໝ່
    ຮົ້ວໄຮ່ນາເຫຼົ່າກວ້າງ ສິເສັຽຖີ້ມເປົ່າດາຽ ເຈົ້າເອີ້ຽ
    ນ້ອງນີ້ຮັກຊາຽໄດ້ ຫວັງພີ່ຊາຽມາເປັນຄູ່
    ມາອິດູໜ້າອ້າຽ ໝາຽເວົ້າເອົາລັກໜີ... ບໍ່ນໍ້
    ລູກມີພໍ່ໜໍ່ມີເຈົ້າ ກໍເລົາກະມີຮາກ
    ຢາກສິໄດ້ນາດນ້ອງ ຄ່າດອງນັ້ນຢ່າສິຕິ ນັ້ນເນີ

 

  • ອ້າຍກໍ ເວົ້າຢອກເຫຼັ້ນ ຕົວະຄົນ... ໃຫ້ຫຼົງເຊື່ອ ຊັ້ນແລ້ວ
    ເມັຽບໍ່ມີຢູ່ບ້ານ ນອນແລ້ງເປົ່າດາຍ
    ວ່າຊິຂາຍນາເຮື້ອ ຫາເມັຽມາທຽມຄູ່
    ຜູ່ບຸນຊູຈັ່ງເຈົ້າ ຢາກມາເວົ້າກ່າວຂໍ.

  • ອ້າຍກ່າວອ້າງ ອິງແອບຄຳກອນ
    ແນວທາງສອນ ສົ່ງສານສມານແມ້ງ
    ແປງກອນແກ້ ແປສັບສລັບສອດ
    ຍໍຍົກຍອດສ່ອງສ້ອຍ ຍາມຖ້ອຍທ່ອງຄຳ

    ຍົກກ່າວຊ້ຳ ກະວີວາດວາທະສິນ
    ຄວາມຖວິນຫວນຫາ ສົ່ງມາມະໂນນ້ອມ
    ຈອມໃຈອ້າຍ ພາຍໄກອາລັຍຫ່ວງ
    ເຈົ້າຜູ່ດວງດອກສົ້ມ ບໍ່ມີມົ້ມຈົ່ມຫາ.

 

  • ອ້າຽຂໍເປັນກຳລັງໃຈໃຫ້ ສູ້ໄປຢ່າຫຼົດຫຼ່າ
    ນ້ອງເປັນຍິງເກ່ງກ້າ ອົດທົນໄວ້ຫາກສິດີ
    ອ້າຽນີ້ບໍ່ໄດ້ຄິດພຸ້ນພີ້ ມີນ້ຳໃຈໃຫ້ທຸກຢ່າງ
    ຄົນຢູ່ຮອບໆຂ້າງ ເຂົາຫວນຮູ້ຍ້ອງວ່າດີ

  • ອ້າຽຂໍ ຖາມຂ່າວເຂົ້າ ນາໜອງນ້ອງເບິ່ງແນ່
    ປີກາຽໄດ້ສີ່ຮ້ອຽຫ້າຮ້ອຽ ປີນີ້ໄດ້ທໍ່ໃດ.

  • ອ້າຽຄື ນົກເຈົ່າຈັ້ງ ລຽບຝັ່ງແຄມສະ
    ຜັດແຕ່ເຫັນປາມາ ກະຢາກກິນຈົນດີ້ນ
    ເຫັນແຕ່ນົກເຕັນເຕັ້ນ ບິນລົງກິນກ່ອນ
    ນົກເຈົ່າແຫງນເບິ່ງຟ້າ ນ້ຳຕາຍ້ອຽອາບດິນ.

 

  • ອ້າຽສິ ເມືອຂາຽເຂົ້າ ທີ່ຍັງເຫຼືອຈົນປັດຂອດ
    ສິຢອດກະປຸກໄວ້ ຣໍມື້ສິສູ່ຂໍ
    ຍັງບໍ່ພໍດອກນ້ອງ ໃຫ້ຄອງຄອຽຖ້າອ້າຽແນ່ ເດີ້ນາງ...
    ຢ່າຊູ່ແລລ່ຳຊູ້ ເຮັດຕາຫວານໃສ່ຄົນອື່ນ
    ມີເປັນໝື່ນແສນລ້ານ ທາງເຖົ້າສິສູ່ຂໍ... ດອກນາ

  • ອ້າຽສິໄປຖືກແຮ້ວ ສາຽໄໝຍ້ອມນ້ຳຄັ່ງ ຜູ່ໃດເດ້
    ອົດພໍມາຖືກແຮ້ວ ສາຽຝ້າຽນ້ອງປັ່ນມາຽ ແດ່ທ້ອນ ບ່າວຜູ່ດີເອີ້ຽ

  • ອ້າຽຊິ
    ຖາມຂ່າວເຂົ້າ ເຂົ້າຜັດຢູ່ໃນນາ
    ອ້າຽຊິ ຖາມຂ່າວປາ ປາຜັດຢູ່ໃນນ້ຳ
    ອ້າຽຢາກ ຖາມຂ່າວນ້ອງ ວ່າມີຜົວແລ້ວຫຼືໄປ່
    ຫຼືວ່າມີແຕ່ຊູ້ ຜົວຊ້ອນແມ່ນບໍ່ມີ.

  • ອ້າຽສິ
    ໜີໄປໃສໄດ້ ແນວຫົວໃຈຢູ່ນຳອຸ່ນ
    ບຸນຜລາສົ່ງໃຫ້ ຫົວໃຈອ້າຽຊຸ່ມເຢັນ
    ເປັນຍ້ອນໃຈຮັກໝັ້ນ ນຳນາງທຸກເຊົ້າຄ່ຳ
    ໂລກບໍ່ເພແຕກມ້າງ ຍັງຮັກເຈົ້າຢູ່ດັ່ງເດີມ

  • ອ້າຽຍັງ ຄົງຄອຽຖ້າ ເຈົ້າສິມາເຊັດໃຈຊຸ່ມ
    ມໍຣະສຸມຊອກຊ້ຳ ຫວັງນ້ອງໄດ້ເບິ່ງແຍງ
    ໃຫ້ຮັກແພງກັນເດີ້ຫຼ້າ ອ້າຽບໍ່ປະໃຫ້ເປັນຕ່າງ
    ຢ້ານແຕ່ທາງຝ່າຽນ້ອງ ລວງລໍ້ໃຫ້ຄຶດນຳ
    ໃຈທີ່ເຄີຽຊອກຊ້ຳ ຄວາມຣະກັມໝອງໝົ່ນ
    ຢາກຫາຄົນຊ່ອຽແກ້ ແລຂ້ອຽໃຫ້ພັກເຊົາ

 

  • ອ້າຽນີ້
    ເກິດເຫດຮ້ອນ ນອນແນບມີສນິດ
    ໃນອາຣົມຄວາມຄິດ ຫ່ວງຫາຜວາພໍ້
    ເລີຽຢາກຂໍໄຂແຈ້ງ ຍໍສແດງຜຍາຫຍ່ອຽ
    ທຸກວັນຄືນຄ່ຳຄ້ອຽ ໃຈລະຫ້ອຽຄຶດນຳ ແທ້ແລ້ວ

  • ອ້າຍນີ້
    ເປັນດັ່ງ ເຮືອສະເພົາຄ້າ ບໍ່ໜີຟອງແກ້ງໃຫຍ່
    ອ້າຍຊິເບັດໃສ່ເຝືອນ ອ້າຍຊິເບືອນໃສ່ກ້ອນ
    ອ້າຍຊິຍ້ອນໃສ້ແກ້ງ ຕຳແລ້ວຈັ່ງຊິຖອຍ.

  • ອ້າຍນີ້
    ເປັນດັ່ງ ໄມ້ ໂງເງບໍ່ເປັນແອກ
    ຄົດກໍຄົດແຕ່ຕໍ ງໍກໍງໍແຕ່ໄມ້ ຕົວອ້າຍທ່ຽງທັມ.
  • ອ້າຍນີ້
    ເປັນດັ່ງ ກວຽນສາລີຮ້າງ ບໍ່ມີງົວທຽມແອກ
    ຄວາຍບໍ່ທຽມແກ່ໃຫ້ ກວຽນຄ້າງໂຄກຊະເທີນ.

  • ອ້າຍນີ້ ເປັນດັ່ງ ຄວາຍບັກເລ່ເຖົ້າ ຫາກິນແຕ່ຫຍ້າອ່ອນ
    ຫຍ້າແກ່ມີບໍ່ແພ້ ບັກເລເຖົ້າບໍ່ກິນ.

  • ອ້າຍນີ້
    ເປັນດັ່ງ ຄວາຍບັກດຳນ້ອຍ ຫຼົງຮອຍພາກແມ່
    ນ້ອງບໍ່ຫຼົກຫຍ້າປ້ອນ ນ້ອງບໍ່ຖອນຫຍ້າລ້ຽງ ຄວາຍນ້ອຍສ່ວນຊິຕາຍ.

  • ອ້າຍນີ້
    ເປັນດັ່ງ ບົວບານບ້າງ ກາງສະພັງບໍ່ມີຄູ່
    ຄັນແມງຜູ່ ຫາກບໍ່ມາຊ່ວຍຊ້ອນ ບົວຊິຄ້າງເຄິ່ງວັງ.

  • ອ້າຍນີ້
    ເປັນດັ່ງ ປາເຂັງຂ້ອນ ໃນນະທີນ້ຳເຂີນຂາດ
    ຝົນບໍ່ຕົກຢາດໃຫ້ ຕາຍແລ້ງແດດເຜົາ.

  • ອ້າຍນີ້
    ເປັນດັ່ງ ຜັກຈອກນ້ຳ ຮາກຍັ່ງບໍ່ເຖິງດິນ
    ມີແຕ່ເວີນໄປມາ ກະບໍ່ມີເພືອຍຄ້າງ
    ຄັນແມ່ນໄຫຼໄປຄ້າງ ເຟືອຽລຸ່ມເພິ່ນກະຖາງ
    ວ່າສິຂໍຝາກນ້ອງ ໃຫ້ເອົາເຂົ້າຮ່ວມນອນ.

  • ອ້າຍນີ້
    ເປັນດັ່ງ ໝາດຳນ້ອຍ ແຫງນຄໍຢູ່ກ້ອງລ່າງ
    ນາງບໍ່ຖີ້ມກ້າງໃຫ້ ໝານ້ອຍສ່ວນຊິຕາຍ.

  • ອ້າຍນີ້
    ເປັນດັ່ງ ມົດແດງເຝົ້າ ອຳພາມີ້ມ່ວງ
    ກິນກໍກິນບໍ່ໄດ້ ທະລອນຕຸ້ມຕັ້ງແຕ່ໃບ.

  • ອ້າຽນີ້
    ເປັນດັ່ງ ອາຊະນັຍມ້າ ເດີນທາງຫີວຫອດ
    ມາພໍ້ນ້ຳສ່າງແກ້ວ ໃນຖ້ຳກະສ່ອງດາຽ
    ກາຽໄປແລ້ວ ຜັດຄືນມາກົ້ມສ່ອງ
    ກິນກະກິນບໍ່ໄດ້ ເລັຽລີ້ນຢູ່ເປົ່າດາຽ.

  • ອ້າຍນີ້
    ເໝືອນດັ່ງ ນົກເຕັນເຕັ້ນ ສະເດັນລົງເອົາກ່ອນ
    ນ້ອງນັ້ນເໝືອນດັ່ງນົກເຈົ່າຈັ້ງ ຄອຍລ້າຢູ່ດາຍ.

  • ອ້າຍນີ້
    ເວົ້າແລ້ວເອົາ ສົນເຄົາແລ້ວຈຶ່ງຂີ່
    ປີ້ງຈີ່ແລ້ວ ສຸກລ້ວນຈຶ່ງຄ່ອຍກິນ.

  • ອ້າຍນີ້
    ແນວນາມນ້ອຍ ໝາກຫອຍນາໜ້າຕ່ຳ
    ແມ່ນຊິຕັດໄມ້ຄ້ຳ ແສນຊິປ້ຳໄມ້ຍູ້ ຊູຂຶ້ນກໍບໍ່ສູງ.

  • ອ້າຍນີ້
    ແນວນາມແບ້ ຫາກິນໄກຖິ່ນ
    ມາພົບພຸ່ມໝາກເຂືອ ມາພົບເຄືອໝາກແຄ້ງ
    ມາພົບແຊງໝາກພ້າວ ຄາວນີ້ແມ່ນບໍ່ໜີ.

  • ອ້າຽນີ້
    ໄກກໍ່ໄກຕັ້ງແຕ່ໜ້າ ທຽວໄປມາບໍ່ໄດ້ຫ່າງ
    ໃຈຂອງອ້າຽກໍ່ຢູ່ໜີ້ ຄວາມຮັກອ້າຽກໍ່ຢູ່ໜີ້ ໄກເຈົ້າແຕ່ຮ່າງຄີງ.

  • ອ້າຍນີ້
    ໃຈປະສົງສ້າງ ທາງບໍ່ມີກໍ່ໄດ້ສ່າວ
    ບາດທາງມີຈຶ່ງໄດ້ຟ້າວ ມາເວົ້າຕໍ່ພະນາງ
    ເຈົ້າຢ່າໄລລືມລ້ຽວ ທາງທຽວບ່ອນເຄີຍຍ່າງ
    ໃຈຊາຍເປັນອ້າງວ້າງ ຄັນນາງນ້ອງບໍ່ວ່ານຳ.

  • ອ້າຽນີ້
    ໃຈປະສົງຊ້ອນ ນອນເຮືອນເຂົ້າຊົ້ນຮົ່ມ ນຳແລ້ວ
    ໃຈປະສົງນາດນ້ອງ ທາງອ້າຽຈັ່ງແລ່ນຫາ
    ອັນວ່າ ແພຜືນຜ້າ ທັງສີ້ນໄໝແພວາ ແມ່ອ້າຽທໍໄວ້ຢູ່
    ພໍຢາກໄປສູ່ຂໍນາດນ້ອງ ມື້ແລງນີ້ໃຫ້ສວ່າງໃຈ
    ຕິແຕ່ທາງຝ່າຽອ້າຽ ຄາງແຄງຍັງຫຼາຽຢ່າງ
    ຢ້ານແຕ່ນ້ອງລໍ້ໃຫ້ ເຕະໄມ້ຄຸບຕໍ
    ຄິດຕໍ່ໄຮ່ ຢ້ານແຕ່ໄດ້ຫຍ້າຄາ
    ຄິດຕໍ່ນາ ຢ້ານແຕ່ໄດ້ຫຍ້າແຝກ
    ຄັນນາແຫກຖືກໄມ້ ໄຖສິມ້າງມຸ່ນເພ
    ຢ້ານແຕ່ໂຊເຊລົ້ມ ຫຼົງຄາຣົມເວົ້າອ່ອຽ
    ໄປຮອດເຮືອນ ຜັດສິເຫັນແຕ່ພໍ່ບັກນ້ອຽ
    ຂັນໝາກອ້າຽ ສິເອົາຫ້ອຽໄວ້ບ່ອນໃດ

  • ອ້າຍນີ້
    ຄືດັ່ງແຂ້ຢູ່ນ້ຳ ລອຍຄໍພົ້ນແຕ່ປາກ
    ຍາກນຳຕາລິ່ງຄ້ອຍ ຊັນເນີ້ງກ່າຍບໍ່ເຖິງ
    ເຫິງນານຫຼາຍ ບໍ່ພານພໍ້ ລອຍຄໍຈອບແຕ່ຝັ່ງ
    ຫວັງແຕ່ໂຕເພິ່ນລົ້ມ ໄຫຼລື້ນມື່ນລົງ.

  • ອ້າຽນີ້
    ຄືດັ່ງໄຊຫຼັງຫຼ້າ ບໍ່ໝານປາຄືເພິ່ນ
    ໃຜບໍ່ມາເວີ່ນເວົ້າ ໃຈເຝົ້າຢູ່ຊູ່ວັນ.

  • ອ້າຽນີ້
    ຄືດັ່ງບຸບຜາດົ້ວ ບົວບານດອກເຫີຽກິ່ນ
    ບໍ່ມີໃຜເບິ່ງສິ້ງ ຕານ້ອຽກໍ່ບໍ່ຫຼຽວ
    ຄືດັ່ງສາຂາໄມ້ ໂພໄຮບໍ່ມີໜ່ວຽ
    ໝາກບໍ່ມີຢູ່ຕົ້ນ ກາອ້ຽງກະບໍ່ຕອມ
    ແນວວ່າຜູ້ຍິງນີ້ ຄືກັນກັບດອກເດື່ອ
    ຊາຽບໍ່ຫັກໄມ້ແໝ້ນ ດອກດົ້ວບໍ່ຫຼົ່ນລົງ
    ຄືພຣະຈັນເທິງຟ້າ ດາຣາຄຽງຄູ່
    ຊາຽຊິເຮຮ່ຳໄຫ້  ບໍ່ມີໄດ້ແຈ່ມຈັນ
    ອ້າຽຄືກາດຳປີ້ ທຽມຫົງມັນຊິຄ່ອງ ກັນລື
    ເປັນດັ່ງ ແສງຫິ່ງຫ້ອຽ ບໍ່ໃສແຈ້ງດັ່ງພຣະຈັນ ນັ້ນແລ້ວ
    ຄົນບໍ່ສົມກັບສົ້ງ ກາງເກງບໍ່ສົມວາດ
    ຄືຈັ່ງຄວາຽຕູ້ເຖົ້າ ບໍ່ສົມເຈົ້າຜູ້ແອກໄຖ ນັ້ນແລ້ວ

  • ອ້າຽນີ້
    ຄືດັ່ງປາເຂັງຂ້ອນ ໃນວັງນ້ຳເຂີນຂາດ
    ຝົນບໍ່ຕົກຢາດຢ້ອຽ ກາແຮ້ງສິຕອດກິນ
    ຄືດັ່ງນາເຂີນນ້ຳ ຝົນຕົກແຮງບໍ່ໂຫ້ງງ່າຽ
    ຝົນຕົກແຮງຈົ້ນໆ ໄຫຼໄປໂຫ້ງແຕ່ບວກຄວາຽ

  • ອ້າຽນີ້
    ຄຶດຕໍ່ເຈົ້າ ເອົາແນ່ບໍ່ມີວາງ
    ອ້າຽນີ້ຄຶດຕໍ່ນາງ ວ່າງໃດຊິເອົາອ້າຽ.

  • ອ້າຽນີ້
    ຄຶດຮອດນ້ອງ ໄດ້ແຕ່ມອງຈ້ອງຮູບຖ່າຽ
    ຄິດຮອດຫຼາຽສູ່ມື້ ທາງອ້າຽຢູ່ບໍ່ເປັນ.

  • ອ້າຽນີ້
    ຄຶດຮອດນ້ອງ ໃຈອ້າຽໝອງໃຈອ້າຽໝົ່ນ
    ຮ້ອນຮົນນຳແຕ່ເຈົ້າ ກິນເຂົ້າກະບໍ່ລົງ.

  • ອ້າຽນີ້
    ຄຶດຮອດນ້ອງ ນອນບໍ່ອີ່ມເຕັມຕາ
    ຜວານຳຄວາມຮັກ ຈ່ອຽເຫຼືອງຈົນໄຂ້
    ຍ້ອນວ່າທາງໃຈອ້າຽ ຄຶດຫ່ວງຫຼາຽ  ຊາຍຄນິງຄິດຮ່ຳ
    ເຊົ້າຈົນຄ່ຳຄິດພໍ້ ແລງຄ້ອຽຈົ່ມຫາ.

  • ອ້າຍນີ້
    ຄອຍຫານ້ອງ ນົກກະທາຄອຍປວກ
    ຄືດັ່ງຮວກຢູ່ນ້ຳ ຄອຍຖ້າຫ່າຝົນ.

  • ອ້າຽນີ້
    ຕອມຈິດຕັ້ງ ມະໂນໃນຂັນທາຕ
    ຄືດັ່ງອົກຊິແຕກມ້າງ ເຫັນນ້ອງຕ່ອນສເນ
    ທຽມດັ່ງກາເຫັນກ້ວຽ ສຸກເຫຼືອງສແວງຕອດ
    ແສນຊິຫວານແຊບຊ້ອຽ ກາເຕັ້ນແຊ່ວກິນ.

  • ອ້າຍນີ້
    ບໍ່ແມ່ນແນວແຫຼວປີ້ ຊິໄປບຽດຝູງກາ
    ບໍ່ແມ່ນແນວຣາຫູ ຊິບຽດບຽນພຣະຈັນເຈົ້າ.

  • ອ້າຽນີ້
    ປາຖນາຫ້ອຽ ນຳຮອຽທຸກບາດຍ່າງ
    ປາຖນາຢາດນ້ຳ ນຳເຈົ້າທຸກຮົ່ມໂພ.

  • ອ້າຽນີ້
    ບໍ່ຄືໄຊຫຼັງຫຼ້າ ບໍ່ໝານປາຖືກແຕ່ອ່ຽນ
    ຍາມຝົນຖືກແຕ່ນ້ຳ ຍາມແລ້ງຖືກແຕ່ລົມ
    ໃສ່ໄຊໄວ້ ເທີ່ງໂພນຖືກແຕ່ເຕົ່າ
    ສິບໍ່ຈາປາກເວົ້າ ນຳອ້າຽແນ່ບໍ່ນໍ້

  • ອ້າຽນີ້
    ບໍ່ມີໜີຈາກເຈົ້າ ຄືນົກເຈົ່າສິໄກໜອງ
    ນົກຍຸງທອງສິໄກດົງ ຫ່ອນຣືສີສິໜີໄດ້
    ແມ່ນສິໄປໃສແທ້ ກະຄົງຄືນໝ້ອງເກົ່າ
    ນົກເຈົ່າໜີຈາກນ້ຳ ດິນສິແຫ້ງໄຫງ່ຜົງ
    ນົກຍຸງທອງໄກດົງກວ້າງ ບໍ່ຫຼຽວຄືນຟ້າສິຜ່າ
    ພີ່ຊາຽໄກນ້ອງຫຼ້າ ບໍ່ມາຍ້ຽມຫ່າສິກິນ
    ຄັນແມ່ນຊິນຊາຕາໃຫ້ ສິຂົນທອງມາຕົບແຕ່ງ
    ນາງເອີ້ຽ ອ້າຽສິນັບເງິນພັນ ອ້າຽສິຜັນແບ້ງຮ້ອຽ
    ຂົນແຫວນແລະສ້ອຽມາສູ່ຂໍ ພຸ້ນແລ້ວ

  • ອ້າຽນີ້
    ປອດອ້ອຽຊ້ອຽ ສເມີອ້ອຽກາງກໍ
    ກາບກະບໍ່ຫໍ່ ໜໍ່ນ້ອຽກະບໍ່ຊອນ ຊູ້ບໍ່ຊ້ອນ ເມັຽອ້າຽກະບໍ່ມີ.

  • ອ້າຽນີ້
    ປອດອ້ອຽຊ້ອຽ ສເມີໄຜ່ກາງກໍ
    ບໍ່ເຄີຽພານພາພົບ ຜູ່ສິມາຄຽງຊ້ອນ
    ສເມີມອນໃບຍອດ ໃຜສິມາຄຽງຄູ່
    ສເມີໄມ້ດູ່ຕົ້ນ ມອດສິໝົ້າກະບໍ່ມີ
    ເມັຽບໍ່ທັນມີຊ້ອນ ລູກຊອນບໍ່ມາກ່ຽວ
    ຄົນມາທຽວເລາະຫຼີ້ນ ຍັງຣໍເຈົ້າຢູ່ລະນາງ

  • ອ້າຍນີ້
    ປຽບດັ່ງນ້ຳສ້າງກວ້າງ ໃສຊວ່າງເຢັນດີ
    ແສນຊິມີຄົນຕັກ ກະບໍ່ໂກນບົກແຫ້ງ
    ຈັກບໍ່ລົງລະແລ້ງ ແລງງາຍບໍ່ມີຕ່າງ
    ແມ່ນຊິກິນອາບລ້າງ ບໍ່ມີຮູ້ຂາດເຂີນ.

  • ອ້າຍນີ້
    ປຽບດັ່ງຜັກຈອກນ້ຳ ຮາກຍັ່ງບໍ່ເຖິງດິນ
    ໄຫຼເວີນໄປເວີນມາ ກໍ່ບໍ່ມີຂວາຍຄ້າງ
    ວ່າຊິຂໍຄຽງຂ້າງ ຕັກພະນາງຊິໄດ້ບໍ່
    ດຳຄໍໍ່ລໍ່ຄືຈັ່ງອ້າຍ ຕາຊ້າຍໃຫ້ລ່ຳມອງ ແດ່ເດີ້.

  • ອ້າຽນີ້
    ປຽບດັ່ງຜັກຫົມຫ້ຽນ ກາງທາງຢ່າຟ້າວຍ່ຳ
    ບາດຫ່າຖອດຍອດຂາວ ບາດຫ່າທາວຍອດຂຶ້ນ ຍັງຊິໄດ້ກ່າຽເກີນ.

  • ອ້າຽນີ້
    ປອດອ້ອຽຊ້ອຽ ສເມີດັ່ງກົບໄຮ ພຸ້ນລະ
    ບໍ່ໄປໃສມາໃສ ເຂົ້າແຕ່ໄຮດັກລີ້
    ບໍ່ໄດ້ມີສອງຊ້ອນ ນອນຮຽງໃຜດອກອຸ່ນ
    ເປັນຈັ່ງບຸນ ຈັ່ງໄດ້ມາພົບນ້ອງ ຄອງໄດ້ວ່ານຳ
    ຢ້ານແຕ່ ທາງຝ່າຽນ້ອງ ຫວານຄາຣົມໃຫ້ມົດໄຕ່
    ຕົວະໃຫ້ຈົກກິ່ງໄມ່ ນຳໂກນໄມ້ສິພໍ້ງູ

  • ອ້າຍນີ້
    ພັນທະນັງແຄ້ນ ຄາຊວງບໍ່ມີຊ່ວງ ຫຼາຍເດ້
    ພາຍໃຈຄຶດຄັ່ງແຄ້ນ ນຳນ້ອງເມື່ອຽມະໂນ
    ນັ່ງນອນໄດ້ແຕ່ເພີ້ ລະເມີຝັນເປັນບ້າປ່ວງ
    ນ້ອງບໍ່ຜາຽໂຜດອ້າຽ ປາງແຄ້ນສ່ວນຊິຕາຽ

    ແນວວ່າຄົນຂີ້ຮ້າຽ ຫຼົງຮັກແຕ່ທາງດຽວ
    ແມ່ນຊິທຽວມາຈາ ຮອດບໍ່ຫຼຽວພໍນ້ອຽ
    ແສນຊິອອຽຄຳອ້າງ ບໍ່ມີທາງຊິຈາຕໍ່
    ຍ້ອນວ່າພໍສ່ຳນີ້ ໃຜເດ້ຊິລ່ຳມອງ.

  • ອ້າຍນີ້
    ມາເຫັນໜ້າ ຢາກວາຈາຕ້ານຕໍ່
    ອ້າຍຢາກຖາມຈໍ້ໆ ໂຕນ້ອງຊື່ຈັ່ງໃດ
    ແມ່ນຢູ່ໄກຫຼືໃກ້ ເທື່ອໄດ້ແວະໄປຫາ
    ເທື່ອແມ່ນບຸນນຳພາ ວາສນານຳຍູ້
    ເທື່ອເປັນຄົນເຄີຽຮູ້ ກັນມາແຕ່ປາງກ່ອນ
    ຫຼອນເລົ່າເລີຽພົບພໍ້ ຄາວນີ້ຈິ່ງຄ່ອຽຖາມ.

  • ອ້າຍນີ້
    ມາເຫັນນ້ຳວັງໃສຄຶດຢາກອາບ
    ຢ້ານແຕ່ເງືອກນັ່ງເຝົ້າ ໃນນ້ຳສ່ອງບໍ່ເຫັນ.

  • ອ້າຍນີ້
    ມີແຕ່ປາຖນາຫ້ອຍ ນຳຮອຍຊູບາດຢ່າງ
    ປາຖນາຫຽາດນ້ຳ ນຳນ້ອງສູ່ຮົມໂພ.

  • ອ້າຽນີ້
    ຢາກມາເຫຼັ້ນ ມາເຫັນກັນພໍໄດ້ມ່ວນ
    ພໍເຊີນຊວນມ່ວນເວົ້າ ດອມເຈົ້າສູ່ແນວ.

  • ອ້າຽນີ້
    ຢ້ານແຕ່ນ້ອງເກັບດອກຫວ້ານ
    ບ້ານເພິ່ນມາບານ ຄືສິບໍ່ພາຽທໍເກັບ ດອກກະຈຽວຮີມຮົ້ວ.

  • ອ້າຽນີ້
    ຢ້ານຕັ້ງແຕ່ ກົກບໍ່ເຕື້ອງ ສິຕີງຕາຽຕັ້ງແຕ່ງ່າ
    ຢ້ານແຕ່ງ່າບໍ່ເຕື້ອງ ສິເຫຼືອໄວ້ຕັ້ງແຕ່ໃບ ນີ້ແລ້ວ
    ຄິດຕໍ່ອ້ອຽ ຢ້ານອ້ອຽເກີດເປັນເລົາ
    ຄິດຕໍ່ເລົາແຄມຂອງ ຢ້ານເຫຼົ່າເປັນກໍໄຄ້
    ຄິດຕໍ່ໃສວັງນ້ຳ ຢ້ານຄວາຽກວນໃຫ້ນ້ຳຂຸ່ນ
    ຄິດຕໍ່ນ້ອງອຸ່ນຫຼ້າ ຢ້ານຄາຊູ້ໝື່ນຄົນ ນັ້ນແລ້ວ

  • ອ້າຽນີ້
    ຫຼຽວເຫັນສົ້ມ ກຳເກືອແລ້ວເລືອໃສ່
    ບາດວ່າມາຮອດແລ້ວ ແນວສົ້ມຜັດຢູ່ສູງ
    ຄັນຊີ່ບັກ ຊ້ຳຜັດບໍ່ມີຂວານ
    ຄັນຊີ່ຮານ ຊ້ຳຜັດບໍ່ມີພ້າ
    ມີແຕ່ມີດຄົມກ້າ ມີແຕ່ພ້າຂີ້ຫຼື້ມ ຟັນໄດ້ກໍ່ບໍ່ຖອງ.

  • ອ້າຍນີ້
    ວຽນຫານ້ອງ ຄືຄວາຍວຽນແຫຼ່ງ
    ມີແຕ່ປິ່ນຄວ້າງໆ ທາງເຂົ້າແມ່ນບໍ່ມີ.

  • ອ້າຽນີ້
    ອຸກອັ່ງເອົ້າ ແສນໂສກໃນມະໂນ
    ວັນທີ່ໂສກາທຸກ ອຸກພະທັຍຝັນເພີ້
    ນອນລະເມີເຖິງນ້ອງ ນວນລະອອງຈັນທະແຈ່ມ
    ແນມແຕ່ດວງດອກອົ້ວ ຂວາຊ້າຍໃຫ້ຜ່ອນຄາຽ.

  • ອ້າຽໜີກາຽໄປຫຼາຽມື້ ບໍ່ເປັນຄືດອກຄົນຊ່າ
    ຄຳສັນຍາບອກໄວ້ ບໍ່ເຄືຽມ້າງລົບເລືອນ
    ຄຳຫວານໆເຕືອນໃຈຍ້ຳ ຄຳເປັນຄຳ ບໍ່ໄດ້ກາຽເປັນຫີນແຫ່
    ຮັກກະຍັງເປັນຮັກແທ້ ບໍ່ແປປີ້ນເປັນຮັກລວງ
    ກັບມາທວງສັນຍາໄວ້ ໄປທຳງານຮັບຈ້າງເພີ່ນ
    ຊອກຫາເງິນຈົນໜ້າແຫຼ້ ແຄຣ໌ເຈົ້າແຕ່ຜູ່ດຽວ
    ໄປກ່ຽວເຂົ້າຮັບຈ້າງ ຢ້ານຄຳນາງນ້ອງເປັນອື່ນ
    ຄ່ຳຫຼືຄືນຕັ້ງຕໍ່ເຈົ້າ ຢາກໄປຫາຕັ້ງແຕ່ເຈົ້າ ແລງເຊົ້າເຝົ້າແຕ່ນາງ

  • ອ້າຍນັ້ນ
    ຄິດຮອດເຈົ້າ ໃຈເຫງົາໄດ້ອົດອ່ອນ
    ນັ່ງຮ່ຳຮອນຮຸ່ມຮ້ອນ ໃຈສະທ້ອນທັ່ງເທ
    ຄິດນຳຫຼາຍແທ້ເດ້ ບໍ່ອາຈເດ່ມາດົມດອມ
    ໄດ້ແຕ່ຊອມຊົງໝາຍ ມ່າຽມຽງມອງເຈົ້າ
    ບໍ່ຮ່ອນຫານຍັບເຂົ້າ ໄປເນົາໃນຈົງໃຈຈອດ
    ແຄ່ຄຶດຮອດຫ່ວງນ້ອງ ນາງນ້ອຍຈຶ່ງອ່ອຍເອີນ.

  • ອ້າຽນັ້ນ
    ຄິດຮອດນ້ອງ ນ້ອງກະຮູ້ຢູ່ເຕັມອົກ
    ໄດ້ແຕ່ຍໍມືຍົກ ຄິດຫາບໍ່ລາເລື້ອນ
    ເປັນຈັ່ງໃດອວນອ້າຽ ສ່ຳບາຽດີ ຢູ່ແນ່ບໍ່
    ທາງພີ້ຕັ້ງຕາຣໍ ຄອຽຫາຢູ່ພໍ້ວໍ້ ຣໍອ້າຽສິຕ່າວຄືນ.

  • ອ້າຍນັ້ນ
    ມີສາວຊ້ອນ ແລ້ວຍັງຊອນເວົ້າສາວອື່ນ
    ນ້ອງນີ້ເກືອບໝື່ນລົ້ມ ຫຼົງຫຼົ້ມຂົ່ມຂືນ.

  • ອ້າຽບໍ່ແມ່ນ ໄຊຫຼາຽທ້າງຫວັງປາຫຼາຽປ່ອງ
    ເວົ້າທາງເຮືອນແຫ່ງຫ້ອງ ກະບໍ່ຄືຂ້ອງໃສ່ປາ

  • ອ້າຽບໍ່ ມີຕົ້ນກ້ວຽ ຈັ່ງໄດ້ທ່ຽວຫາຕອງ
    ມັນບໍ່ມີພໍສອງຈັ່ງໄດ້ມາວຽນນ້ອງ.

  • ອ້າຍບໍ່ ຫານປຽບໄດ້ ແມງຜູ່ພຸມມະຣິນ
     ແຄ່ແມງວັນຫາກິນ ເນົ່າຄາວແຄມພື້ນ
    ບໍ່ອາດຝືນດົມດົ້ວ ພົວພວງດວງດອກ
    ຄັນຊິສັພພະຫຼອກເຫຼັ້ນ ໂຕນເຕັ້ນຢ້ານເພິ່ນຊັງ
    ແນວບຸບຜັງມາລາໄມ້ ຫອມໄກກຸ້ມກິ່ນ
    ແມງວັນໄຕ່ນຳດິນ ບໍ່ສະຫາວອວດໂອ້ມ ໄປໂຊມຊ້ອນຕ່ອນດີ.

  • ອ້າຽຜູ້ ຄີງກົມກ້ຽງ ຟັງສຳນຽງສິລາຈາກ
    ນາກສິລາຝັ່ງນ້ຳ ນະທີກວ້າງຝັ່ງຂອງ
    ກອງສິລາຈາກບັ້ນ ສຽງຊໍແລະແຄນປີ່
    ອ້າຽສິໜີຈາກນ້ອງ ໃຫ້ຍາອ້າຽວ່າຢູ່ດີ
    ຍາມສິໜີຈາກບັ້ນ ພາກກັນໄປໃຫ້ໄກຫ່າງ
    ຫ່າງກະຫ່າງແຕ່ຊ້ວນ ຜະອວນອ້າຽນັ່ງໃຈ
    ບໍ່ມີວັນລືມໄດ້ ໄກກັນເວລາຫ່າງ
    ແຕ່ວ່າໃຈຍິ່ງອ້າງ ເນົາໃກ້ບໍ່ຫ່າງໄກ.

  • ອ້າຍຜູ້ ງາມທ່າມຟ້າ ເທວະດາກະບໍ່ທໍ່
    ໄດ້ແຕ່ລໍ້ນ້ອງເຫຼັ້ນ ເຫັນຊັ້ນວ່າຜູ່ງາມ
    ໂຕອ້າຍຜູ້ຫຼໍ່ລ້ຳ ໃຈບໍ່ດຳຄືນ້ອງວ່າ
    ໃຫ້ອ້າຍມາຮຽງຫໍ ຂໍໃຫ້ມາແຕ່ງນ້ອງ ຫໍຫ້ອງເບິ່ງກ່ອນນາ.

  • ອ້າຍມາ ແຂ້ນອັ້ງປັ້ງ ສເມີດັ່ງຫົວກອຍ
    ຕັ້ງແຕ່ຄອຍຫົວມັນ ກະບໍ່ມີສຽມຊ້ວນ
    ວ່າຢາກຊວນໂຕເຈົ້າ ເອົາໄປໝົກແດ່
    ພໍໄດ້ແຜ່ພີ່ນ້ອງ ລູງປ້າແຈກປັນ

  • ອ້າຽມັກນ້ອງ ມັກທັງກົກຜົມດຳ
    ມັກທັງລຳຄີງສວຍ ໜ່ວຽຕາຄືແກ້ວ
    ແອວບາງລ້ຳ ລຳຂາຄີ້ວກົ່ງ
    ມັກທັງຊົງວາດເວົ້າ ຂອງເຈົ້າຄູ່ສູ່ອັນ.

  • ອ້າຽຢາກ
    ຂໍເຕືອນນ້ອງ ສາວລາວຜູ້ພັດຖີ່ນ ນາງເອີຽ
    ໂສມຖວີນນາດນ້ອງ ໄກບ້ານຫ່າງເມືອງ
    ມາທຳງານຕໍ່ສູ້ ຢູ່ເມືອງຫຼວງກວ້າງໃຫຍ່
    ໃຈຢ່າຝັກໄຝ່ເຫຼັ້ນ ຄິດເຫັນເຈົ້າພໍ່ແມ່ຮຽມ ແດ່ທ້ອນ
    ຮູ້ຈັກຈຽມໂຕເຈົ້າ ສາວເອີຽຢ່າຫຼົງລື່ນ
    ຢ່າຝືນຄຳເພິ່ນເວົ້າ ສອງເຖົ້າໄດ້ສັ່ງມາ
    ຈຳເອົາເດີ້ນ້ອງຫຼ້າ ຢ່າມົວທ່ຽວເພີນຫຼາຽ
    ຍາມພົບເຫັນເຊີງຊາຽ ຮີ່ນຕອງແດ່ເດີ້ນ້ອງ
    ຊາຽເຂົາໝາຽປອງເຈົ້າ ຄັນຈິງໃຈກະໄຄແນ່
    ຢ້ານແຕ່ໄດ້ເຈົ້າແລ້ວ ແຈວດັ້ນດ່ວນໜີ ນັ້ນແລ້ວ

  • ອ້າຍຢາກ
    ຫຍັບບ່ອນບ້ານ ຮຽງຮ່ວມເຄຫາ
    ອ້າຍຢາກຫຍັບຖຽງນາ ມາຮ່ວມຮຽງນຳນ້ອງ.

  • ອ້າຍຢາກ
    ຕາຍເປັນເສື້ອ ດຳໝາກເກືອ ໃຫ້ນ້ອງນຸ່ງ
    ເປັນຄົນໄດ້ກ່ອມເນື້ອ ເປັນເສື້ອໄດ້ກ່ອມຄີງ.

  • ອ້າຽຢາກ
    ຖາມຂ່າວນ້ອງ ຖາມເຂົ້າໄຮ່ຜືນໜາ
    ຖາມຂ່າວນ້ອງ ຖາມຂ່າວນາຜືນກວ້າງ
    ຍັງຄ່ອຽສວຽລວຽເຂົ້າ ຮວງຍາວເມັດຖີ່ ບໍ່ນໍ
    ຍັງຄ່ອຽສຸກເຮື່ອເຂັ້ມ ເຫຼືອງກຸ້ມທົ່ວທົ່ງນາ ຢູ່ບໍ້

  • ອ້າຽຢາກ
    ຖາມຂ່າວນ້ຳ ຖາມຂ່າວຍັງປາ
    ຢາກຖາມເຖິງຂ່າວນາ ເມັດຮວງທັງເລົ້າ
    ອ້າຽຢາກຖາມຂ່າວເຈົ້າ ມີຜົວແລ້ວຫຼືບໍ່
    ຫຼືວ່າມີແຕ່ຊູ້ ຜົວຊິຊ້ອນຫາກບໍ່ມີ.

  • ອ້າຽຢາກ
    ຖາມຂ່າວນ້ອງ (ຖາມຂ່າວຟືມຊາວຫ້າ) ປະສົງສອດສົມກະສວຽ
    ຖາມຂ່າວມວຽຜົມດຳ ລູບມັນມວຽດົ້ວ
    ຖາມຂ່າວບົວບານບ້າງ ກາງສະພັງຕົ້ນປ່ຽວ
    ຍັງຄ່ອຽໄຂກາບຊ້ອນ ຫອມກົ້ວກິ່ນລະອອງ ຢູ່ບໍ້

  • ອ້າຽຢາກ
    ຖາມຂ່າວອ້ອຽ ປ້ອງຫ່າງລຳງາມ ນັ້ນນາ
    ວ່າຍັງມີເຄືອໜາມ ກ່ຽວພັນລະຍັງນ້ອງ.

  • ອ້າຽຢາກ
    ຖາມຂ່າວອ້ອຽ ອັນປ້ອງຖີ່ກິນຫວານ
    ຖາມຂ່າວຕານຕູມຕັດ ປາດງວງກິນນ້ຳ
    ຖາມຂ່າວຕອງປີກກ້ວຽ ເຄືອຄຳຕົ້ນຕ່ຳ
    ຫຼືວ່າກ້ວຽກາບແກ້ວ ຄວາຍເຂົ້າຍາດເຂົາ
    ຫຼືວ່າມີຄົນປ້ຳ ຮານຮອນກິນໝາກ
    ຂໍໃຫ້ນ້ອງຕອບຖ້ອຽ ພະອວນອ້າຽແອ່ວຖາມ.

  • ອ້າຽຢາກ
    ມາຂໍເວົ້າ ເຊົາເຮືອນຂໍເອື້ອນເອີ່ຽ
    ຢາກເປັນເຂີຽແມ່ເຖົ້າ ແລງເຊົ້າໄດ້ຊ່ອຽງານ
    ທາງວຽກ ອ້າຽບໍ່ຄ້ານ ຍ້ອນເຄີຽຜ່ານອຸປປະສັກ
    ສມັກເປັນໄທດຽວ ຜູກກຽວສັມພັນຊ້ອນ
    ຂໍເປັນມອນມາເກືອມ້ອນ ຂໍເປັນດອນປູກໝາກໂຕ່ນ
    ຂໍເປັນໂພນໝາກພິກນ້ອຽ ພໍຕ້ອຽບາດວ່າຫີວ

 

  • ອ້າຽຫາກ
    ໃຈປະສົງປ້ຳ ຍູງຍາງໄມ້ໃຫຍ່
    ຄັນແມ່ນພ້າບໍ່ບານ ຄັນແມ່ນຂວານບໍ່ເປ້ ໄມ້ບໍ່ເຊທ່າວລົ້ມ ອວນອ້າຽແມ່ນບໍ່ເຊົາ.

  • ອ້າຍຫາກ
    ຄອງຄອຍຖ້າ ວາສນາບຸນນູນສົ່ງ
    ໃຈປະສົງຢາກພໍ້ ແພງລ້ານຄ່າຄຳ

  • ອ້າຍຫາກຄິດອ້ຳລ້ຳ ນຳແຕ່ນາງດຽວ
    ບໍ່ອາດທຽວມາເຫັນ ຈັ່ງວ່າເວນກັມຕ້ອງ
    ຄິດພໍ້ສອງສເມີດ້ານ ຂານຄຳຄ້ອຍຄ່ຳ
    ພີ່ຍັງຈຳຈື່ໝັ້ນ ບໍ່ຜັນປີ້ນປ່ຽນໃຈ
    ເຄີຽຫາດວງດອກໄມ້ ມະໄລແຕ່ງແມງຕອມ
    ໃຫ້ເຈົ້າຊອມຊົມຊິດ ຕິດຕຶງກະໃຈແຈ້ງ
    ເອົາໄວ້ແຍງຕາງໜ້າ ຍາມເວລາໄກຫ່າງ
    ພໍໄດ້ຈາອວດອ້າງ ພະອວນເອື້ອນເອີ່ຍເຖິງ

    ລົມອວ່າຍເນີ້ງ ພັດວີ່ໆວີໃບ
    ພຶກສາໄຊລົມກັວຍ ງ່າງວຍລົມຕ້ອງ
    ເຫັນລະອອງເໝືອຍຍ້ອຍ ເປັນຮອຍໝອກແຜ່
    ພີ່ນີ້ຄິດຮອດແທ້ ຈຶ່ງມາແກ້ກ່າວຜຍາ.

  • ອ້າຍຫາກ
    ຄິດຮອດນ້ອງ ແກ້ວກ່ອງກອງສີ
    ນວນມະນີວັນໃສ ຫ່ວງໃຍຄນິງຢ້ຽມ
    ແຕ່ຫາກຈຽມໃຈຈ້ອນ ບໍ່ຫານຈອນໄປຈ້ວງຈາບ
    ຂໍແຕ່ຊາບຂ່າວຂໍ້ ກໍພໍແລ້ວອຸ່ນໃຈ.

  • ອ້າຽຫາກ
    ຄິດຮອດນ້ອງ ນິທທະເນັ່ງນອງເປີງ
    ແສນຮ່ຳເພິງຄະນິງຄິດ ຫ່ວງຊືມບໍ່ເປັນຮູ້
    ໂອນໍຊູ້ ຊູຊອນເຄີຽນອນແນບ
    ໃຈພີ່ແຈບຈອດແຈ້ງ ຖແລງຕ້ານຜ່ານຜຍາ.

  • ອ້າຍຫາກ
    ຄິດຮອດເຈົ້າ ຈຶ່ງຟ້າວດຸ່ງມາຫາ
    ແຕ່ວ່າຫົນທາງທຽວ ເພິ່ນໃສ່ໜາມຄາໄວ້
    ມັນຫາກຈົນໃຈອ້າຍ ຫົນທາງໄກມາບໍ່ຮອດ
    ບໍ່ແມ່ນດອດປາກເວົ້າ ຄືກີ້ເກົ່າຫຼັງ
    ຫຼືແມ່ນຊັງທາງອ້າຍ ເຈົ້າຕັດຢາຍໜາມໃສ່
    ຢ້ານອ້າຍໝາຍພົບພໍ້ ຫຼືນໍເຈົ້າວ່າຈັ່ງໃດ.

  • ອ້າຽຫາກ
    ຄຶດຮອດຫຼ້າ ຫວນຫາຄນິງຮອດ
    ຈິຕບໍ່ຈອດແຈບຍັ້ງ ທຸກຂັງຂ້ອນບ່ອນມະໂນ
    ສຸດອ່າວໂອ້ ພອຽພາກຄຳແຖລງ
    ເລີຽເລົ່າແປງກອນສານ ສົ່ງການໄກກວ້າງ
    ພໍໃຫ້ຊວງເຊົາຮ້າຽ ສກົນກາຽຄົງທີ່
    ຝາກວາຈີສົ່ງຊ້ອນ ກອນກວ້າງກ່າວຜຍາ ນີ້ແລ້ວ.

 

  • ອັນຄວາມ ຮັກຄວາມມັກມີບໍ່ແພ້ ຄອງຄອຍບໍ່ໄດ້ແຕ່ງ
    ຍ້ອນນາທົ່ງນັ້ນແຮ່ງນ້ອຽ ຂາຽເຂົ້າກໍ່ບໍ່ພໍ

  • ໂອນໍອ້າຍ ຮູບບໍ່ຫຼໍ່ພໍປານໃດ
    ບໍ່ມີໃຜຊິມາຫຼຽວ ເຊື່ອງຕາແນມຈ້ອງ
    ໄດ້ແຕ່ປອງແນມໜ້າ ເຫັນສາວມາໄດ້ລີ້ຢູ່
    ບໍ່ມີຜູ້ປາກເວົ້າ ນຳອ້າຍຜູ້ທຸກຈົນ.

 

  • ອັນວ່າ
    ເຄືອເຂົາກ້ຽວ ລາມດົງຕາມປ່າ
    ໃຜບໍ່ໄດ້ຊ່າຍ້ອງ ຫາເວົ້າຕັ້ງແຕ່ໂຕ.

  • ອັນວ່າ
    ແນວຄົນນີ້ ສັນດຽວກັນ ບໍ່ມີຕ່າງ
    ຂ້ອຍເພິ່ງເຈົ້າ ເຈົ້າເພິ່ງຂ້ອຽ ເລິງເລື້ອຽສືບມາ
    ບົວອາສັຍເພິ່ງນ້ຳ ປາເພິ່ງວັງຕົມ
    ໄພ່ກັບນາຽກະເພິ່ງກັນໂດຽດ້າມ
    ອັນວ່າເສືອສິງຊ້າງ ກວາງຟານອາສັຍປ່າ
    ປ່າອາສັຍສັຕສິ່ງຮ້າຽ ຈຶ່ງໜາແໜ້ນມືດມຸງ
    ເຮົາອາສັຍພວກພ້ອງ ນ້ອງນຸ່ງສຫາຽເກີ
    ເຂົາກໍ່ອາສັຍເຮົາ ຈິ່ງກໍ່ເປັນເມືອງບ້ານ
    ຊູ່ຄົນຈຶ່ງຊູ່ໄດ້ ອາສັຍກັນທຸກໝູ່
    ບໍ່ມີໃຜສິຢູ່ຍັ້ງ ທອນແທ້ຜູ້ດຽວ ຫຼານເອີ້ຽ

  • ອັນວ່າ
    ແນວເໝັນໝົ້ນ ມັນເໝັນກູຍທັງກະດູກ
    ຄັນອ້າຽຜູກຮັກຊ້ອນ ທຽມຂ້າງຢ້ານບໍ່ຫອມ.

  • ອັນວ່າ
    ແນວນາມແກ້ວ ທຽມຫີນຫ່ອນຊິແມ່ນ
    ອັນວ່າແຫວນຄ່າລ້ານ ທຽມສ້ອຽຫ່ອນຊິຄື.

  • ອັນວ່າ
    ການງານເກື້ອ ມີເງິນເຫຼືອດອກຄືວ່າ
    ບຸນຜະຫຼາສົ່ງໃຫ້ ຄູນຄ້ຳສູ່ແນວ
    ສຽງແຈວໆດັງວອນເວົ້າ ຂອງຜູ້ສາວບ້ານປ່າ
    ເປັນຜຍາສົ່ງໃຫ້ ສຳຄັນໄວ້ໃສ່ໃຈ
    ຄຳແມ່ສອນວອນເວົ້າ ຊຸມໝູ່ເຮົາຢ່າເປີິດໜ່າຍ
    ຄຳຕາຍາຍເພິ່ນເວົ້າ ສູເຈົ້າເບິ່ງດູ

    ໃຫ້ຮຽນຮູ້ ພໍ້ໝູ່ແດນໃດ
    ຢູ່ທາງໃດລະເດີ້ແຟນ ມາກ່ຽວແຂນສາຍແນນໄວ້
    ຢູ່ທາງໃດກໍຕາມຫຼ້າ ສຽງອຳພາຍັງຄຸ້ນຢູ່
    ບໍ່ເຫັນໜ້າບຸນຊູ ແມ່ນໄດ້ຊູ້ຕ່າງແດນ ແຟນຕ່າງດ້າວ ຊິເອົາໄວ້ບໍ່ພ່າຍໜີ.

  • ອັນວ່າ
    ຂອງຝາກນັ້ນ ອັນວ່າຄວາມສຳຄັນ ບໍ່ທໍ່ທັນໃຈຫ່ວງ
    ຂອງມີຄ່າຫຼາຽຫຼວງ ບໍ່ຄືດວງກ່ອມກິ້ງ ໃຈຈິງແທ້ຕໍ່ກັນ.

  • ອັນວ່າ
    ຈັນເພັງແຈ້ງ ບໍ່ທຽມແສງສຸຣິເຍດ ດອກເນີ້
    ແສງກະບອງໝື່ນເຫຼັ້ມ ........... ບໍ່ໃສແຈ້ງສ່ຳພຣະຈັນ ໄດ້ແລ້ວ
    ຄືດັ່ງແນວຫຼານຫຼ້ອນ ........... ບໍ່ປຸນປານເຈົ້າຍ່າ ຫັ້ນແລ
    ເດັກນ້ອຍພັນໝື່ນລ້ານ ........... ບໍ່ທຽມເທົ້າຍ່າດຽວ ທ່ານເອີຍ

  • ອັນວ່າ
    ສິບຜາຂັ້ນ ຫີນຜາຕັນກໍຊິສີ່ວ
    ຄັນແມ່ນສີ່ວບໍ່ໄດ້ ຊິເຊີນຟ້າຜ່າລົງ.

  • ອັນວ່າ
    ນ້ຳກວ້າງຕື້ນ ຢ່າຟ້າວຊື່ນໃຈສະ
    ຄັນວ່ານ້ຳຮອມເລິກ ໃຫ້ຮີບຖອນໃຈໄວ້.

  • ອັນວ່າ
    ນົງນາງນ້ອຽ ຄວາມສຳອອຽອ້ອຽອິ່ນ
    ຄືດັ່ງຢື່ນຢາດນ້ຳ ອາໂປປ້ອນປ່ອງໃຈ
    ຫວານໃນໆຄືຕານອ້ອຽ ມັນກອຽປະສົມຕື່ມ
    ຢ້ານແຕ່ເຕີມພິດງ້ວນ ພະອວນອ້າຽໃຫ້ຈຸ່ມຈົມ

  • ອັນຄາຣົມຄວາມເຫຼັ້ນ ຊາຍເຫັນກໍ່ມີມາກ
    ຫວານແຕ່ປາກຈ້ອຽໆ ໃຈນັ້ນຂຸ່ນມົວ.

  • ອັນວ່າ
    ບຸນເຄີຽສ້າງ ໄດ້ຮ່ວມທາງດອກຈັ່ງວ່າ
    ຄົງເປັນຕາຊຶ້ນມຶ້ນ ທຸກຄືນເຊົ້າເຈົ້າວ່າໃດ
    ຄັນເຈົ້າໄລເສັຽສ້ຽງ ໝ້ຽງຄົງກິນໃຫ້ເຂົາສ່າ
    ເປັນຄືມີດແລະພ້າ ຝົນໄດ້ກະບໍ່ຄົມ ນັ້ນແລ້ວ.

  • ອັນວ່າ
    ຜັກກັບຊີ້ນປົນກັນມັນຊິເບື່ອ ເປັນລື
    ອັນວ່າເຮືອກັບນ້ຳ ຂອງແທ້ຄູ່ກັນ.

  • ອັນວ່າ
    ຝັນຄືນນີ້ ຝັນດີຝັນຕ່າງ
    ຝັນວ່ານາງນາດນ້ອຍ ກັບຂ້ອຍໄດ້ແຕ່ງງານ
    ຝັນໄປຮອດມື້ນັ້ນ ຈັດງານໃຫຍ່ກິນດອງ
    ສລອງງານມົງຄົນ ໃຫຍ່ເກີນງານຊ້າງ
    ຍ້ອນວ່ານາງກັບອ້າຍ ຕົກລົງໃຈໃຫ້ເປັນຄູ່
    ຄິດເບິ່ງດູ້ໝູ່ເຈົ້າ ໃນເຣື້ອງເຣື່ອງຝັນ

    ກ່ອນວັນງານມື້ນັ້ນ ອ້າຍຫາກສົ່ງສານໄປ
    ທຸກທົ່ວດິນແດນໃນ ທົ່ວຄົນພາຍພຸ້ນ
    ໃຫ້ມາບຸນງານຄ້ຳ ຕາມທຳນອງຄອງເກົ່າ
    ໝໍແຄນເຮົາຢູ່ໃສ ມາໄວໆຢ່າຟ້າວ ຂໍແຮງເຈົ້າມາຊ່ອຍງານ.

  • ອັນວ່າ
    ຝົນຕົກ ກໍ່ຍັງຮູ້ເອື້ອນ ກົບກິນເດືອນກໍ່ຍັງຮູ້ອີ່ມ
    ບາດວ່າອ້າຍຮັກນ້ອງ ບໍ່ມີມື້ອີ່ມເປັນ.

  • ອັນວ່າ
    ລາຍຄົນນີ້ ມັນບໍ່ຄືລາຍຊ້າງ ເສືອສາງຊ້າງປ່າ
    ອະທິບາຍບໍ່ໄດ້ ໃຈນັ້ນສ່ອງບໍ່ເຫັນ.

 

  • ອັສສະຈັນ ໃຈຜູ້ຍິງເດ້ ເປັນຫຍັງສັງມາຕ່າງ
    ໃຈດວງດຽວແທ້ໆ ພັນຊູ້ກະບໍ່ເຕັມ.

  • ອັສສະຈັນ ງູເຫຼືອມອໍ້ ກະສັນຕາຍດອມຂຽດ
    ອັນວ່າ ຂຽດບໍ່ເອື້ອ ເຫຼືອມອໍ້ຫາກກະສັນ.

  • ອິດູຕົນ ເປັດນ້ອຍ ຢາກນອນຄອນນຳໄກ່
    ຕີນເປີ່ມເປິະເປີ່ມເປີ້ຍ ປີນຂຶ້ນພະລາດລົງ.

  • ອົ່ງຕົ່ງ ໝາກຂີ້ກາເຮີ້ຍ...ທາງໃນສັງມາຂົມແຂງຂື່ນ
    ບາດໝາກຂຽບໜ່ວຽຂີ້ຮ້າຍ ພັດຫວານຈ້ອຍຢູ່ໃນ.

  • ອົດສາທົນກິນເຂົ້າ ກັບເກືອໄປສາກ່ອນ
    ປາແດກມີກະຄ່ອຽຈ້ຳ ຊາມພໍ້ອ່ອມປາໂດ.

  • ອົດສາ ເວົ້ານຳຮົ້ວ ພົ້ວແພ່ງພາຍໜາມ
    ເທື່ອໄດ້ຈາຊາຍຮາມ ຮູບຮອຽເຮືອງຮູ້
    ອົດສາຊູຫວີງຮ້າງ ຊຳຊາເຫັນແຫຫ່າງ
    ອົດສາເວົ້າພໍ່ຮ້າງ ຕາງເວົ້າຜູ່ບ່າວແນວ.

  • ອົດສາລ້ຽງ ຄວາຽໂຊໄວ້ຖ້າຮ່າ
    ບາດວ່າຮ່າບໍ່ພໍ້ ຍັງສິໄດ້ໃສ່ໄຫ
    ເຮັດຈັ່ງໃດນີ້ແຫຼ້ວ ແນວລູກເຂີຽທຸກຍາກ ແມ່ເອີ້ຽ
    ຝາກແຕ່ຄວາມຮັກໄວ້ ເງິນຄ່າດອງເຈົ້າກະບໍ່ມີ
    ອ້າຽນີ້ເປັນຊາຽແທ້ ບໍ່ມີປົນຫີນແຫ່ ຫຼ້າເອີ້ຽ
    ຢາກເປັນເຂີຽແມ່ເຈົ້າ ອະພັຍຖ້ອນຫາກບໍ່ສົມ

  • ອົດສົງ ສານບັກເລເຖົ້າ ຄວາຽເຮົາໄດ້ແນ່
    ຄັນບໍ່ຫຼົກຫຽ້າຖວາຍ ຄັນບໍ່ບາຽຫຽ້າປ້ອນ ບັກເລເຖົ້າສ່ວນຊິຕາຽ.

 

  • ອອນຊອນເດຜູ່ຂ້າ ສິເປັນບ້າຍ້ອນຮັກນາງ
    ຄັນສິຢູ່ ຜູ່ດຽວກະອ້າງວ້າງ ຍາມສິນອນຕອນລຸກນັ່ງ
    ອຸກອັ່ງແໜ້ນອູດເອົ້າ ຮົົມຮ້ອນບ່ອນນອນ
    ເອົາຈັ່ງຊີ້ສາຫຼ້າ... ພໍ່ແມ່ອ້າຽກະລ້ຽງມາເພື່ອສິໃຫຍ່
    ລູກຜູ້ຊາຽກະບໍ່ໄດ້ ເອົາດິນໜຽວປັ້ນຕວ່າລະນາງ
    ແອວບາງໆ ຮ່າງນ້ອຽໆ ປາກບາງໆ ຄຳນາງຜູ້ຮູບຄ່ອງ
    ອ້າຽຂໍຕໍ່ຄ່າດອງ ໄດ້ບໍ່ຫຼ້າ ສອງພັນຫ້າໄດ້ບໍ່ນາງ
    (ຫຼົບກ່ອນຢ້ານຖືກສາກຕຳໝາກແມ່ເຖົ້າ ອິອິອິ)
    ອ້າຽສິຈ່າຽບໍ່ໃຫ້ຄ້າງ ເອົາເງິນວາງຕໍ່ໜ້າແມ່
    ຍ້ອນຮັກເຈົ້າແທ້ໆ ຈັ່ງຂໍເວົ້າຕໍ່ລອງ ....
    ເອົາຈັ່ງຊີ້ເນາະແມ່ເຖົ້າ ສອງພັນຫ້າຢູ່ກິນນຳຍ່າ
    ເຂົ້າບໍ່ໄດ້ຫາ ປາບໍ່ໄດ້ຊື້ ວຽກບໍ່ໃຫ້ເຮັດ ໃຫ້ນາງສບາຽຍາມລຸກນັ່ງ
    ເສື້ອຜ້າອ້າຽກະສິຊັກໃຫ້ ຫາຄືອ້າຽໄດ້ບ່ອນໃດ...ຮ່າາາໆໆໆ
  • ອອນຊອນເດ...
    ອອນຊອນເຈົ້າ ເອົາຄຳມາເວົ້າວ່າ
    ຄຳຜຍາຂ່າວຂໍ້ ມາກໍ້ສູ່ສາວ.
  • ອອນຊອນເດ..
    ອອນຊອນນົກເຂົາຕູ້ ພາກຄູ່ຍັງສັ່ງຄອນ
    ອອນຊອນໄມ້ພາກດອນ ກະຍັງເອີ້ນສັ່ງຕົ້ນ
    ອອນຊອນຄົນພາກຮ້າງ ຄຳດຽວບໍ່ເອີ້ນສັ່ງ
    ມີແຕ່ໄປວັ່ງຫວັ້ງ ສັງບໍ່ເອີ້ນສັ່ງຊາຽ
  • ອອນຊອນເດ...
    ອອນຊອນມະລີກ້ຽວ ຮຽວຮວງແກມຄູ່
    ພັນທະຄູ້ກ່າຽກ້ານ ແກມເປົ້າປ່າດວນ
    ຄັນທະເສນຊ້ວນ ຫວນຫອມຮັງແກມດອກຂ່ອຍ
    ສະມັ່ງເມີນກ່າຽກ້ານ ແກມແກ້ວກາບມະນີ
    ມີທັງອົ້ວດອກຊ້ອນ ແຊມກໍດອກກໍ່
    ກາຫຼົງລົມປີ່ນເປື້ອງ ປີວຊ້ອນດອກຊອນ
    ສຸດສະອອນມະລັຍລົ້ນ ຈຳປີປາຽປ່ຽວ
    ຫຼຽວໝູ່ມັນປ່າຊ້ອນ ແຊມກ້ານກິ່ນໄກ
    ມີທັງອິນທະຫວາຕົ້ນ ພວງພະຍອມແກມກິ່ງ
    ຫຼິງເບິ່ງພຸມມະເຣດດັ້ນ ດົມໄຊ້ຊອກລະອອງ
    ດຸດດັ່ງນົງນາດນ້ອງ ດວງຫອມດາຍເປົ່າ
    ຄວາມຄຶດແມງຜູ່ມີທໍ່ຟ້າ ສິໝາຽມ້າງກະດູກດອມ
    ແນວວ່າມາລາໄມ້ ດວງຫອມຮົດຮ່ວງ
    ໃຜຜູ້ເຊົາຮົ່ມໄດ້ ດົມແລ້ວບໍ່ຢາກໜີ
    ຜູ່ຈົບງາມຈັ່ງຊີ້ ທັງປັຕຕະພີຜືນແຜ່ນ
    ແສນສາວໃຕ້ລຸ່ມຟ້າ ຫາບໍ່ໄດ້ທຽບພະນາງ
    ອ້າຽສິທຳບຸນສ້າງ ສິລທານໂປຍຫວ່ານ ອິຫຍັງນໍ
    ຈັ່ງສິມີບຸນພໍ ໄດ້ມາເກາະກ່ຽວຂ້າງ ນາງນ້ອງອຸນມະໂນ ແທ້ແລ້ວ