ໝວດທີ່ຂຶ້ນຕົ້ນດ້ວຽຕົວ "ລ"

  • ລາ
    ບຸນເອີ້ຽ...ບຸນຂອງຮຽມມັນນ້ອຽ ຊາຽພອຽສິໄດ້ຫ່າງ
    ສິໄດ້ໄລລະຮ້າງ ຄາວນີ້ສິຫ່າງລາ
    ລາເດີ້ພວກພີ່ນ້ອງ ພໍ່ແລະແມ່ທັງຫຼາຽ
    ທັງຍິງຊາຽອາວອາ ສິຫ່າງລາລະຄາວນີ້
    ຄອຽຢູ່ດີທຸກຖ້ວນໜ້າ ຜູ່ເຄີຽຈາເວົ້າຕໍ່
    ຂໍໃຫ້ສຸກຢູ່ລົ້ນ ສບາຽບ້າງຄູ່ສູ່ຄົນ

    ບໍ່ຢາກພັດພາກເວັ້ນ ກະຈຳເປັນສິໄດ້ຫ່າງ
    ບໍ່ຢາກພັດພາກຂ້າງ ເຖີງຄາວຮ້າງສິຫ່າງໜີ
    ດຽວນີ້... ແສນເຕັມທີຄວາມຍາກ ບໍ່ຢາກວ່າໃຫ້ມັນຫຼາຽ
    ເປັນບໍ່ຕາຽ... ພໍທົນທຸກ ອັ່ງມະໂນໂສເອົ້າ
    ເລີຽສິເອົາສາຊ້ຳ ນຳທາງໄປສາໄວໄວ່
    ເຮັດຈັ່ງໃດນໍເທື່ອນີ້ ບໍ່ຢາກຮ້າງກະຮ່າງລາ
    ບໍ່ຢາກປະໜີໜ້າ ກາລເວລາກະມາຜ່ານ
    ທໍຣະມານຄັກແທ້ ແຕ່ໄກໜ້າບາດຫ່າງຫາຽ
    ເສັຽດາຽວັນຫຼັງພຸ້ນ ເຫັນກັນນັ້ນດ້າມເທື່ອ
    ເຫຼືອໃຈເດ້... ມາເຫັນກັນເທື່ອລະນ້ອຽ ພໍມ້ອຽແຕ່ຄຶດເຫັນ

    ໂອນໍ... ສຸດທີ່ໂອຽແລ້ວພັດໂອ້ ບຸນຫ່າງໂຕໄປ
    ຄວາມຫວັງໄລລາລັບ ຫວ່າງໃຈກະໄກວເນີ້ງ
    ເທື່ອນີ້... ຄືຈັ່ງໝີ ໄກຮັງເຜີ້ງ ຄືປາເຄິງສິໄກໂຕ່ງ
    ຍຸງທອງໄລລາດົງ ຄົງບໍ່ຈວນຈວບພໍ້ ສິຮາມຮ້າງຫ່າງກັນ

    ມັນສິລາເຜືອກນ້ອຽ ຫົວກອຽສິຈາກປ່າ
    ໝາສິລາເຂົ້າປັ້ນ ກະສັນພໍ້ແອ່ວກິນ
    ຫີນສິລາພູຖ້ຳ ພູເຂົາໄດ້ຈຳຫ່າງ
    ໜ່າງສິລາເຊືອກຝັ້ນ ຟານເກັ້ງໝູ່ກວາງ

    ວ່າໂອນໍ... ສວນຂີງ ສິໄກສວນຫວ້ານ ຢ້ານໜີໄປເປັນທາງໃໝ່ ສາລະນໍ
    ມັ່ງເມີຽໄກຈາກໂຄກ ພານສິໂສກຢູ່ຈັ່ງໃດ
    ຄືດັ່ງ ໄຫສິໄກໝໍ້ ທໍຢາສິໄກຂ່ວນ
    ຄືຈັ່ງ ຣາມມະສວນ ຈວນສິລາຈາກເຈົ້າ ສີດາໄທ້ມ່ອມພະນາງ

    ຄືດັ່ງໄພຫຍ້າຮ້າງ ສິຮ້າງຮ່າງດອກທາງຖຽງ
    ຕະກຽງໄລລາດັບ ເພາະນ້ຳມັນໝົດກ້ຽງ
    ສຽງຈາໄກສຽງປາກ ຍາກຫຼາຽເດ້ບາດສິຫ່າງ
    ທາງແຮ່ງໄກທັງພັດເຍີ້ນ ຮຽມຂໍເອີ້ນສັ່ງລາ

    ຕົກໄກຕາບໍ່ເຫັນໜ້າ ທຽວຫາກັນມັນລຳບາກ
    ຝາກແຕ່ຄວາມຮັກໄວ້ ໃຫ້ຄອຽເວົ້າຂ່າວຖາມ
    ຍາມນີ້... ພໍເມື່ອຣາຕຣີຂ້ອນ ເດີກອອນຊອນ ແຮ່ງອິດອ່ອນ
    ເວົ້າບ່ອນຕອນຈາກພາກ ນ້ຳຕາຍ້ອຽຍ່າວໄຫຼ

    ດຽວນີ້ ປີສິລາເຄືອກ້ວຽ ມວຽເອີຽ.. ສິລາຫວດ
    ກັບນວດສິຈາກລາ... ກະຕ່າພູທັງໝາກ... ເຂົ້າກາກໄກຈາກເລົ້າ ໄກ່ນ້ອຽໃຫ້ຄ່ອຽຄອຽ
    ຄືດັ່ງຫອຽລານ້ຳ ສະມຸດໃຫຽ່ທະເລຫຼວງ
    ກວາງສິໄລລາລະ ປ່າພົງດົງໄມ້
    ໄຖສິລາຈາກນ້ຳ ນາທາມສິລາຫ່າງ
    ໝາກຂ່າງໄກຈາກເຊືອກ ຕີໄດ້ກະບໍ່ຫັນ
    ໝາກທັນໄກໝາກຄໍ້ ໝາກມີ້ໜີໄກມ່ວງ
    ບ່ວງສິລາຈາກຖ້ວຽ ແຈ່ວຈ້ຳປົ່ນກະປູ
    ໜູສິລາໄກຜົ້ງ ດົງເລົາສິລາເຫຼົ່າ
    ຮຽມສິລາຈາກເຈົ້າ ຝາກເວົ້າແຕ່ຜຍາ
    ຮຽມຂໍລາແລ້ວເທື່ອນີ້ ສວັດດີເດີ້ທຸກທ່ານ
    ສຸກສຳຣານມ່ານແມ້ງ ຢ່າມີແຫ້ງລ່າສີ
    ຄອຽຢູ່ດີເດີ້ເຈົ້າ ໃຫ້ເວົ້າມ່ວນນວນຫົວ
    ຢ່າໄດ້ມີຄວາມກົວ ໝູ່ມານຢ່າມາໃກ້
    ຢ່າມີເຈັບມີໄຂ້ ຫວັດໄອໃຫ້ເຫີນຫ່າງ
    ຢ່າມີພັຍບຽດຂ້າງ ໃຫ້ສຸກສ້າງຊື່ນສົມ
    ຢ່າມີລົມພານຕ້ອງ ໝອງໃຈໃຫ້ໄລລ່ອງ
    ເນົາໃນຫ້ອງແຫ່ງກວ້າງ ຕົນເຈົ້າໃຫ້ຢູ່ດີ
    ຄາວນີ້ ມັນຫາກໝົດກະບວນບັ້ນ ຈຳໜີບໍ່ຂໍຢູ່
    ໄກລະນໍໝູ່ເຈົ້າ ສິໄກແລ້ວຄ່ອຽລາ
    ຄືດັ່ງປາລານ້ຳ ນາທາມສິລາບວກ
    ຮວກສິໜີຈາກແລ້ວ ຫວີງສິສ້ອນກະບໍ່ມີ
    ນິດທິຕັງເອວັງໄວ້ ໃຜມາໃຫ້ໄດ້ອ່ານ
    ອາວະສານຈົບສີ້ນ ສິລາແລ້ວດອກອວ່າຽລົງ ໂອລະນໍ...

  • ຫຼ້ານາງເອີ້ຽ...
    ເກົ້າແກ່ນໄມ້ ສິບແກ່ນໄມ້ ຄະນິງນຳແຕ່ໄມ້ດູ່ ຕົ໋ວລະນາງ
    ສິບໝື່ນສາວ ຊາວໝື່ນຊູ້ ຄະນິງນ້ອງແຕ່ຜູ່ດຽວ
    ຄັນວ່າຝົນຕົກຍັງຮູ້ເອື້ອນ ນອນກາງຄືນຍັງຮູ້ຕື່ນ
    ຄວາມຮັກອ້າຽຕໍ່ນ້ອງ ມີແຕ່ໄຫຼແລ່ນຂື້ນ ບໍ່ມີມື້ສິເສື່ອມຖອຽ
    ທະເລຫຼວງຈັ່ງອ້າຽ ຫາເຮືອກາຽກະທັງຍາກ
    ເກາະແກ່ງກ້ອນ ຫີນຂ້ອງກະບໍ່ມີ

  • ຫຼ້ານາງເອີ້ຽ...
    ເຈົ້າຜູ້ຄວາມຜຍາລົ້ນ ເຕັມໂກນໄມ້ບາກ
    ຝາກຄວາມຫວານຈ້ອຽໆ ຄຳຣົມເຈົ້າຊ່າງມ່ວນຫຼາຽ
    ແມງວັນຕາຽຍ້ອນນ້ຳເຜີ້ງ ຢ້ານອ້າຍຕາຽຍ້ອນຕົກຫຼົ່ມ
    ຕົກຄາຣົມນາດນ້ອງ ຄອງຖ້າແລ້ວເປົ່າດາຽ
    ຕົວະໃຫ້ອ້າຍ ຟັນເຮືອໄວ້ຄອຽທ່າ
    ຕົວະໃຫ້ອ້າຽຫວ່ານກ້າ ເອົາໄວ້ຖ້າຫ່າຝົນ
    ກາຍໄປດົນກະຫຼາຽມື້ ຢ້ານຄວາມຫວານເປັນຂົມຂື່ນ
    ຫວານກ້ວຽດີບ ເຖິງສິຄັ້ນໜ່ຽງແລ້ວ ເອົາໄປຕົ້ມກະບໍ່ຫວານ

  • ຫຼ້ານາງເອີ້ຽ...
    ໃນຫົວໃຈບໍ່ເຄີຽວ້າງ ບໍ່ມີຫວ່າງສິບາງບົກ
    ນ້ຳຕາຕົກຍາມນອນ ຮ່ຳຮອນແຕ່ນຳເຈົ້າ
    ແຕ່ຫາກອົດເອົາໄວ້ ແມ່ນສິຄິດຮອດຫຼາຽ ຂາດໃຈດີ້ນດັ້ນດັ່ນ
    ນອນກໍຝັນ ກາງວັນກໍຄຶດຮອດ ຕລອດມື້ບໍ່ຊ່ວງຫາຽ

    ຄິດຮອດຫຼາຽ ຄິດຮອດວັນຂ້າງໜ້າ ຍາມເມື່ອເຈົ້າຈາກລາ ນ້ຳຕາຊາຽຊິໄຫຼຫຼັ່ງ
    ອ້າຽຫ້າມໄວ້ກະບໍ່ຟັງ ຊັງເຈົ້າຂອງເຮັ່ງຮ້າຽ ຫ້າມຫຼາຽຄັ້ງຍັງລື່ນຄວາມ

    ຈົນໃຈບວມຟົກຊ້ຳ ຄວາມເຫງົາງຳ ເຂົ້າມາຕຳ ມາຕອກຍ້ຳຄວາມໝອງໝົ່ນ
    ຄິດຮອດຄົນບາງຄົນ ຈົນກິນນອນບໍ່ໄດ້ ມາເປັນຮ້າຽທຸກປະເດັນ

    ຍາມກາງເວັນກະຄິດພໍ້ ຄິດແທ້ນໍ...ລໍເຈົ້າສິກາຽຜ່ານ
    ລໍຄນິງສົງສານ ເຈົ້າສິທານປ່ອນໃຫ້ ພໍໃຈປື້ມແຕ່ລະວັນ

    ເຖິງຄວາມຈິງສອງເຮົານັ້ນ ສິເປັນພຽງຄວາມຝັນ ບໍ່ດື້ດັນຝືນລິຂິດ
    ຂໍພຽງສາຽໃຍຈິຕ ໃຫ້ຄິດເຖິງແດ່ເຈົ້າ ຍາມວ້າງໃຫ້ສັ່ງຄວາມ... ແດ່ເດີ້.

  • ຫຼ້ານາງເອີ້ຽ...
    ເປັນນຳຄຶດຮອດເຈົ້າ ຈັ່ງໄດ້ຕ່າວມາຫາ
    ເປັນນຳໃຈພາຄວນ ຈຶ່ງດຸ່ງມາທາງພີ້
    ຄິດຮອດສີສມອນຫຼ້າ ຈັ່ງຄືນມາໝ້ອງເກົ່າ
    ເປັນນຳຄິດຮອດເຈົ້າ ຈັ່ງໂງໂຄ້ງຕ່າວມາ

    ຍາມແຫງນຄໍເບິ່ງຟ້າ ເຫັນເມກແລ່ນເຫຼັນຫຼັນ
    ເຫັນພະຈັນດວງງາມ ແລ່ນຕາມດາຣານ້ອຽ
    ລົມວອຽໆພັດລ້າ ໃຈຜວາພາສັ່ນ
    ຄຶດຮອດເຈົ້າເທົ່ານັ້ນ ຈັ່ງໂງໂຄ້ງຕ່າວມາ

  • ຫຼ້ານາງເອີ້ຽ...
    ເຈົ້າຜູ້ຈົບຈັ່ງຊີ້ ເຈົ້າຜູ້ງາມຈັ່ງຊີ້
    ພໍຢາກຈູງແຂນເຂົ້າເຮືອນຫໍນໍ້ລອງເບິ່ງ
    ປິດປະຕູຂ້າງນັ້ນ ປິດປະຕູຂ້າງນີ້ ແລ້ວເອົາຂີ້ໄລ່ທາ

  • ຫຼ້ານາງເອີ້ຽ...
    ຄັນແມ່ນນ້ອງຮັກອ້າຽ... ໃຫ້ນາງຕຽມຫໍ່ຜ້າ ລົງເຮືອນສາໄປນຳພີ່ ເດີ້ນາງເດີ້
    ສິພາໜີແມ່ເຈົ້າ ຊິພາເຂົ້າສູ່ວຽງ
    ພຽງໃຈນາງມາດມຸ້ງ ນຳພີ່ແຕ່ຄົນດຽວ
    ຢ່າຊູຫຼຽວແລໃຜ ຊາຽດຽວຄືອ້າຽ
    ພາກັນໄປຫາຂື້ນ ເອົາຣົຖເມຄີວຂົນສົ່ງ
    ໃຈປະສົງຕໍ່ຕັ້ງ ຫວັງແລ້ວບໍ່ໜ່າຽໜີ
    ຢ່າຊູຄຶດພຸ້ນພີ້ ໃຫ້ນາງປ່ອຽວາງໃຈ
    ຊາຽສິພາຍິງໄກ ຈາກໄລໄປໜ້າ
    ຂໍສັນຍາ ບໍ່ໄລເຈົ້າ ຫວັງສິເອົາເຈົ້າຊ້ອນບ່ອນ
    ບໍ່ໃຫ້ທຸກໃຫ້ຮ້ອນ ເງິນໃຊ້ຈ່າຽບໍ່ໄຫວ
    ແມ່ນວ່າເຈົ້າຢາກໄດ້ ແນວໃດບໍ່ມີວ່າ
    ແມ່ນເດືອນດາວຢູ່ຟ້າ ສິຫາໃຫ້ອ້າຽບໍ່ຂີນ ຄຳແພງເອີຽ...

  • ຫຼ້ານາງເອີ້ຽ...
    ຊາຕທີ່ເປັນຄຳແທ້ ບໍ່ມີແວກາຽເປັນກົ່ວ
    ຄັນບົວຫຼວງ... ກາຽເປັນບົວຂີ້ແບ້ ແຜ່ນດີນມ້າງ ມຸ່ນທະລາຽ
    ກໍຫວາຽເປັນຫຍ້າປ້ອງ ນົກຍຸງທອງເປັນກາເຖື່ອນ
    ອ້າຽບໍ່ເຄີຽລະເລືອນ ສັງສິລວງຫຼອກລໍ້ ໃຫ້ນາງນ້ອງເຊື່ອຄຳ

    ຢ້ານຫຼາຽເດ້...
    ຢ້ານແຕ່ບຸນອ້າຽໜ້ອຽ ບຸພະກັມສິດຶງຈ່ອງ
    ບໍ່ຄາດໄດ້ໝ່ອມນ້ອງ ນາງຫຼ້າໄດ້ຫ່າງເຫີນ
    ຫຼ້ານາງເອີ້ຽ ສັງບໍ່ໄປເກີດຢູ່ກ້ຳ ນຳຊາຽ ກ້ຳບ້ານພີ່
    ຊ່າງມາເກີດຫຼັບຂອນ ຊ່າງມານອນລັບລີ້ ຊ່າງມາເກີດຢູ່ໜີ້ ຕາອ້າຽສ່ອງບໍ່ເຫັນ

  • ຫຼ້ານາງເອີ້ຽ...
    ດວງຕາເວັນ ບໍ່ຂື້ນທາງທິດຕາເວັນຕົກ
    ຄົກບໍ່ເປັນທ່ອນໄມ້ ຫົວຂີງໄຄບໍ່ເປັນແຝກ
    ເອົາຫຽັງແລກ ອ້າຽບໍ່ເອົາ...
    ຢ້ານແຕ່ຕຣອມໃຈເສົ້າ ໂສການ້ຳຕາຫຼັ່ງ
    ຢ້ານແຕ່ເໝີດຄວາມຫວັງ ທາງແມ່ນາງເຫຼົ່າຮ້ອງ ຄ່າດອງເຈົ້າບໍ່ລົດເລີຽ
    ລູກສາວເພິ່ນຜູ້ງາມ ຕາມຍັງມີຄວາມຮູ້ ຊູຕາຕະກຸນເພິ່ນ
    ເລີຍຕົກຫວ່າງກະເທີນ ຟັງຄ່າດອງເພິ່ນເອີ້ນ ເຂີນຂ້ອນບ່ອນສິໄປ
    ຈິງໃຈ ມີເຫຼືອລົ້ນ ແຕ່ຄວາມຈົນເຂົ້າມາຜ່າ
    ໜ້າຕາຄືຈັ່ງມ້າ ອ້າຽກັບຫຼ້າຊ່າງຕ່າງກັນ ແທ້ນໍ

  • ຫຼ້ານາງເອີ້ຽ...
    ອ້າຽນີ້ ເປັນຈັ່ງນາໃຮ່ໂຫຼ້ງ ປະສົງແຕ່ກ້າອ່ອນ
    ກ້າແກ່ມີບໍ່ແພ້ ນາໂຫຼ້ງກະບໍ່ເອົາ
    ຄືຈັ່ງຄວາຽບັກເລ່ເຖົ້າ ທາວເອົາແຕ່ຫຽ້າອ່ອນ
    ຫຽ້າແກ່ມີບໍ່ແພ້ ຄວາຽເຖົ້າຫຍ້ຳບໍ່ໄຫວ...

    ເວົ້າພື້ນຄວາມທ່ຽງໝັ້ນ ສັຈຈັງບໍ່ມີແຫວ່
    ຄັນບໍ່ເອົາແທ້ໆ ບໍ່ແວເວົ້າໃຫ້ເມື່ອຽຄາງ
    ຄິດຕໍ່ນາງຢາກຄຽງຊ້ອນ ນອນຮ່ວມຄຽງໝອນ
    ອອນຊອນນຳຄວາມຈາ ຄິດຫາແຕ່ນຳນ້ອງ
    ຈິດໃຈປອງບໍ່ທໍ້ ກົກບໍ່ງໍປາຍບໍ່ແຫວ່
    ບໍ່ແມ່ນໜູ ບໍ່ແມ່ນແງ້ ສິມີທ້າງປ່ອງແປວ

  • ຫຼ້ານາງເອີ້ຽ...
    ອ້າຽນີ້ໃຈປະສົງຊ້ອນ ຢາກນອນເຮືອນຊົ້ນຫົ່ມ ນຳແຫຼ້ວ
    ໃຈປະສົງນາດນ້ອງ ທາງອ້າຽສິແລ່ນຫາ ແພຜືນຜ້າ ສ

  • ຫຼ້ານາງເອີ້ຽ
    ອ້າຽນີ້ແນວນາມເຊື້ອ ກາດຳສກຸນຕ່ຳ
    ມັນບໍ່ສົມສ່ຳເຊື້ອ ພຍາຊັ້ນຊາຕສູງ

    ແນວວ່າໂຄງບໍ່ສົມແຮ້ງ ແກງປາບໍ່ສົມບ່ວງ
    ແມ່ນສິຕັກຕ່ອນໄດ້ ກະຍັງລ້ຽວຫຼູດລົງ
    ແນວວ່າກົງບໍ່ສົມຝ້າຽ ໄໝລາວບໍ່ສົມສ່ອງ
    ແມ່ນສິຈັບຕ່ອງບັ້ນ ກະຍັງຝັ້ນໃສ່ກັນ
    ອານບໍ່ສົມຍັງມ້າ ອາຊະໄນບໍ່ສົມຫິ່ງ
    ຊິງບໍ່ສົມໄກ່ນ້ອຽ ແສນສິຫ້າງກະບໍ່ຄາ
    ປາບໍ່ສົມຍັງຫ້ວຽ ມວຽຜົມບໍ່ສົມໄຫຼ່
    ໄຊບໍ່ສົມປາກຕ້ອນ ປາສິບ້ອນກະເລົ່າໜີ

  • ຫຼ້ານາງເອີ້ຽ...
    ອ້າຽນີ້ ແນວນາມແບ້ ຫາກິນແຕ່ໃບອ່ອນ
    ໄດ້ມາພົບຕ່ອນຊີ້ນ ສາແລ້ວບໍ່ຢາກໄປ
    ເຫັນເຈົ້າ ຫາບຕ່າເນື້ອ ສິເອືອບເກືອຫຼືວ່າບໍ່
    ຂໍຊື້ແລ້ວບໍ່ຂາຽ ຂໍກິນດາຽກະບໍ່ໃຫ້ ສິເອົາໄມ້ລັດຕີ ທໍ່ນັ້ນແຫຼ້ວ

    ອ້າຽປຽບດັ່ງຟືມ25 ໜາບໍ່ໜາຕ່ຳໄດ້ຮອດຜ້າຫົ່ມ
    ຕ່ຳໄດ້ຮອດພົມໄໝ ທັງໃຍສັງເຄາະພ້ອມ ທາງອ້າຽຫາກບໍ່ສົນ
    ຕົກກະເທີນວ່າໄດ້ຕ່ຳຫູກແລ້ວ ຂໍໃຫ້ໄດ້ເປັນໄໝ ບໍ່ຢາກໄດ້ແນວຜ້າອື່ນ
    ຕົກກະເທີນວ່າສິມີຄູ່ຊ້ອນ ຂໍເປັນນ້ອງແຕ່ຜູ່ດຽວ ຄຳແພງເອີ້ຽ...

  • ຫຼ້ານາງເອີ້ຽ...
    ອ້າຽມາຄິດ ອິດູຕົນໝາກເຂືອແຫຼ້ ຢາກຄານເຄືອນຳໝາກຖົ່ວ
    ບາດໝາກຖົ່ວຄານຂື້ນຄ້າງ ໝາກເຂືອນ້ອຽສິເນົ່າຕາຽ
    ອ້າຍນີ້ກາດຳນ້ອຽ ແນມຫົງຜູ່ສງ່າ
    ຢ້ານແຕ່ຟ້າຜ່າແລ້ງ ໄກແທ້ຕ່າງພັນ
    ປຽບກິ່ງທອງ ໃບໝາກພ້າວ ສອງຄົນເຮົານ້ອງກັບພີ່
    ຄືງ່າໝາກມີ້ກັບໃບຫຍົກ ຄົກທອງຄຳສາກໄມ້ແຕ້ ຫຍັງແຫຼ້ວສິຄູ່ຄວນ

    ຫາກວ່າຂາດ ຄຸນນະທັມ ປະຈຳຈິຕ
    ຂາດຄວາມຄິດ ອິດສຣະ ສະນຸກໃຈ
    ຫາກຂາດຮັກ ຂາດສັທທາ ພາຫົວໃຈ
    ຊີວິຕຄົນ ຈະຢູ່ໄດ້ ຢ່າງໃດກັນ

    ຫາກຄວາມຮັກ ເປັນຄືດວງດອກໄມ້ ສິແປງປູກພຽນປະດັບ
    ຈະປັບດິນຖນອມຮັກ ຈັກໃສ່ປຸ໋ຍຫົດນ້ຳ
    ດອກຮັກງາມ ບໍ່ມີແລ້ງ ແຫງໂຮຽລົງຫ່ຽວ
    ໃຈທຽວ ຈົດຈໍ່ຈ້ຳ ນຳດົ້ວດອກດວງ

    ຫາກມີ ເຄືອກອດກ້ຽວ ໂນ້ມດອກລົງມາ
    ຮຽມຈະ ຂຸເຂົ່າຫຼົກ ໝູ່ເຄືອຊຸມນັ້ນ
    ບໍ່ໃຫ້ແມງມັນຕ້ອງ ດອກດວງເຈົ້າໝອງໝົ່ນ
    ບໍ່ໃຫ້ດອກຮັກຊ້ຳ ມີແປ້ວບ່ອນໃດ

    ແລ້ວສິເຮັດຮ່ອມຮົ້ວ ເສົາແກ່ນມາຝັງ
    ດາງຂຽວມາດຶງຄຶງ ລຽບແຄມຫັນແໜ້ນ
    ສວນ... ຄັນບໍ່ມີຮາວຮົ້ວ ໄກ່ກາສິຫຍຽບຍ່ຳ
    ເຮືອນ... ປະຕູບໍ່ປິດງັບໄວ້ ຄົນສິລົ້ວລ່ວງເຮືອນ

    ສວນນີ້... ມີຫຼາຽພັນຊາດເຊື້ອ ດວງດອກມາລາ
    ກຸຫຼາບ ເຂັມ ຈຳປາ ພຸດເປັນພວງພັນດົ້ວ (ດົ້ວ=ອອກດອກ ຊໍ່ດອກ)
    ກິ່ນຫອມ... ເຮັດໃຫ້ຫວນຫາຊູ້ ທາງໄກສຸດເຂຕ
    ດອກຫອມເດິກ... ຫອມຈົນຮອດຍາມເຊົ້າ ຊົມແລ້ວບໍ່ຢາກເຊົາ

    ຄວາມຮັກ... ຫາກຫອມຄືດອກໄມ້ ບໍ່ສູນກິ່ນເກສອນ
    ຫອມຢູ່ທຸກຄືນວັນ ເດືອນ ປີ ບໍ່ມີສີ້ນ
    ດອກເກົ່າຂຸໂຮຽຮ້າງ ຕາມດິນເດັຽຣະດາດ ກະດາຽແລ້ວ
    ຍັງມີ ດອກໃໝ່ຊ້ອນ ຊອນຂື້ນຖ່າຽແຖມ

    ຮຽມສິ ຮັກສາໄວ້ ບຸພພະຊາດນານາ
    ໄວ້ເພື່ອ ບູຊາພຣະ ຮ້ອຽພວງພັນເອ້
    ໄວ້ເພື່ອ ເຕືອນສຕິຕັ້ງ ໃຈຮຽມໃຫ້ສັດຊື່
    ເພື່ອຮັກ... ເພື່ອຄວາມດີເມືອໜ້າ ໃຫ້ຍາວໝັ້ນຕໍ່ໄປ

  • ຫຼາຍເວລາຫຼາຍມື້ ສັງມາຄືປາລາບວກ
    ຜັກລວກລືມແຈ່ວຈ້ອຍ ລືມຂ້ອຍແລ້ວໄປ່ນໍ.

  • ລາງເທື່ອສິດກັບໄດ້ ເປັນຄູສອນສັ່ງ ກໍມີ
    ລູກໄພ່ບ້ານ ພັດສອນທ້າວທ່ານພະຍາ

  • ລູກສິດີຫຼືຮ້າຽ ພໍ່ກັບແມ່ເປັນຄົນຫັດ
    ມີແຕ່ເຮືອນບໍ່ມີວັຕ ເຣື່ອງຈເຣີນບໍ່ເດີນກ້າວ
    ບໍ່ວ່ານາງຫຼືທ້າວ ສາສນາຢ່າປະປ່ອຽ ເຮົາເນີ້
    ຄັນບໍ່ໄດ້ເຮັດໜ້ອຽ ກໍ່ຂໍໃຫ້ໄດ້ເຮັດຫຼາຽ

    ຕັ້ງໃຈຟັງແນ່ນ້ອງອ້າຽ ຢ່າຮ້າຽຈົ່ມຄູຍກັນ
    ມາເຖິງຕອນສຳຄັນ ສິແຜ່ຜາຽຂຍາຍເວົ້າ
    ດີໃຈນຳຝູງເຈົ້າ ທາງສິລທານ ໄດ້ສ້າງກໍ່
    ຜູ່ສລາດວາດພໍ້ ສິເຫັນຂໍ້ໜໍ່ແໜງ

    ບ້ານເມືອງເຮົາບໍ່ແຫ້ງແລ້ງ ທັງນ້ຳທ່າອາຫານ
    ລ້ຽງລູກຫຼານທັງເນຣພະ ບໍ່ລະໄລດີໃຈດ້ວຽ
    ໃຜວ່າສາສນາເຮົາສ້ວຽ ຮຽມຂໍທວຽວ່າບໍ່ແມ່ນ ດອກເດີ້
    (ສາຽສັດທາຍັງໝັ້ນແກ່ນ) ທັງໜຸ່ມສາວແລະຜູ່ເຖົ້າ ໃຜສິເວົ້າກະຊ່າງຕາມ ພີ່ນ້ອງເອີ້ຽ

  • ລົມພັດໃບຕອງກ້ວຽ ພ້າວໄຜ່ໃບກອງ
    ເຍື້ອນເຂົ້າເດືອນສິບສອງ ປ່ຽນຣະດູການພົ້ນ
    ເໝິດໜ້າຝົນແລ້ວນໍເຈົ້າ ສາຽລົມໜາວພັດວີ່ໆ
    ບໍ່ທັນມີຄູ່ຊ້ອນ ຊາຽຊິກ້ຽວກະບໍ່ມີ

    ໜາວເຕັມທີລົມພັດຍູ້ ສາວຄອຽຄູ່ມາຄຽງສອງ
    ຊາຽໝາຽປອງກະບໍ່ເປັນ ລົມແຮ່ງເຢັນຫຼາຽແທ້
    ຫາຊາຽແວມາເວົ້າ ມາຂໍເອົາມິດຊີ່ລີ່
    ຫຼືຕິນ້ອງຂີ້ຮ້າຽ ຊັ້ນເບາະອ້າຽຈຶ່ງບໍ່ຫຼຽວ.

  • ລົມພັດຕ້ອງ ຕອງຕາດຕານຕາວ
    ຄີງກາຽໜາວ ໜ່ວງໃນມະໂນເນື້ອ
    ເຟືອຜວຍຜ້າ ກາຍາກຸມກອດ
    ພໍໃຫ້ຮອດຮຸ່ງເຊົ້າ ສູນແຈ້ງສວ່າງໃສ

    ອ້າຽໜາວໃນອຸຣານີ້ ບໍ່ມີຜ້າຜືນຫົ່ມ ນາງເອີຽ
    ໜາວບໍ່ມີບ່ອນໝົ້ນ ໝາຽມື້ສ່ວງເຊົາ.

  • ລົມພັດຕ້ອງ ຕອງແກຢ້ານບໍ່ແວ່
    ລົມພັດຕ້ອງ ຕອງແຕ້ແວ່ບໍ່ນໍ
    ຢ້ານແມ່ນລົມລວງລໍ໊ ຕົວະໃຫ້ງົມນ້ຳເຂົ້າມ່າ
    ຕົວະໃຫ້ໄປຢ່າຊູ້ ມາແລ້ວຕ່າວບໍ່ເອົາ

  • ລົມລອຽ ພັດຜ່ານໜ້າ ກະເອນອ່ອນນອນຜວາ
    ລົມແລ້ງ ມາພານພັດ ສັ່ນທວງມະໂນອ້າຽ
    ຄິດຮອດ ສາຽຕາອ້ອນ ມາອອນຊອນເອົາເຕັມທີ່
    ຄິດຮອດ ຄາວກ່ອນກີ້ ທີ່ເຮົານັ້ນຮັກກັນ
    ແຕ່ວ່າ ຕອນນີ້ນັ້ນ ຣະດູປ່ຽນວຽນໄປ
    ສອງຫົວໃຈໄລລາງ ຊ່າງບໍ່ຄືຄາວນັ້ນ
    ອ້າຽກະສັນໃຈເສົ້າ ບາດນາງເອົາຄຳ"ລາກ່ອນ"
    ຟາດຫົວ ປານຖືກຄ້ອນ ທະລອນລ້ຳ ກະໜ່ຳຕີ
    ອ້າຽນີ້ ເຈັບປົ່ນປີ້ ຕີງ່ອນນອນຈັງ
    ຄວາມຫວັງ ທັງຄວາມຝັນ ກໍ່ເລົ່າພັງເພມ້າງ
    ບ່ອນເຄີຽ ຖາງທາງໄວ້ ໄດ້ໄປມາຫາສູ່
    ຄວາມທີ່ ມີຍອດຊູ້ ສັມພັນໝັ້ນແກ່ນດີ
    ບັດນີ້ ທາງຮົກເຮື້ອ ບໍ່ມີຜູ່ຄອຽຖາງ
    ມີແຕ່ສາງກັບເສືອ ບໍ່ຄືວິມານຈ້ອຽ
    ມີແຕ່ ສອຽວອຽໃຫ້ ບໍ່ມີໃຈຂຸດກົ່ນ
    ທາງເລີຽ ເປັນບ່ອນຊົ້ນ ເສືອຊ້າງຄ່າງລີງ
    ... ນີ້ລະ ເພີ່ນວ່າໄວ້ ບາດຍາມຮັກແພງກັນ
    ຕົ້ນຜັກຂົມຍັງຫວານ ຈັ່ງກິນຕານອ້ອຽ
    ບາດຊັງກັນ ບໍ່ໄດ້ຕ້ອຽ ເວົ້າດີນຳກະປານດ່າ
    ປິດປາກໄວ້ບໍ່ອ້າ ກະຫາເວົ້າວ່າບໍ່ດີ
    ເປັນຈັ່ງຊັ້ນຈັ່ງຊີ້ ຕິດ່າປານໝາໝູ
    ຊັງຮອດຫູຮອດຕາ ບໍ່ຢາກແນມນຳຈ້ອຽ
    ແສນສິອອຽອໍງໍ້ ພໍຄືເວົ້າໃສ່
    ຍາມເຂົາຊັງກະວ່າຮ້າຽ ບໍ່ເຄີຽຍ້ອງດອກວ່າດີ...

  • ລົມຫວີວໆ ພັດໃບເຂົ້າ ໃຈນາງໜາວຄຶດຮອດພີ່
    ສັນຍາໃຈກ່ອນກີ້ ນ້ອງນີ້ບໍ່ປ່ຽນແປງ
    ຍາມມື້ແລງຄິດເຫັນໜ້າ ນ້ຳໃນຕາພັດລິນຫຼັ່ງ
    ຄິດຮອດດອກຄວາມຫຼັງ ແຕ່ເຮັດຫຍັງກໍບໍ່ໄດ້ ຢາກຮ້ອງໄຫ້ບ່າຽນ້ຳຕາ.

  • ຫຼັກສູຕຄູສອນໃຫ້ ຮຽນຫຼາຽປີ ສອບບໍ່ຜ່ານ
    ການບ້ານຄູມອບໃຫ້ ເຮັດບໍ່ໄດ້ທຸກວິຊາ
    ບາດວ່າ ເພສສຶກສາ ຄູບໍ່ເຄີຽສອນໃຫ້ ຮຽນຈົບໄວ ໄດ້ດີເດັ່ນ
    ນັກສຶກສາທຸກມື້ນີ້ ເປັນແນວນີ້ແມ່ນບໍ່ນໍ
    ຍາມຮຽນມາຕິດຮັກ ບໍ່ສົນໃຈວ່າສິແກ້ ໄປຫາແວ່ຕາມໂຮງໜັງ
    ຍາມຄູສອນບໍ່ຢາກຟັງ ຢາກນັ່ງນຳຊຸມສາວນ້ອຽ
    ຄອຽສົນໃຈແນ່ລູກຫຼ້າ ການສຶກສາອັນມີຄ່າ
    ແມ່ຂາຽນາສົ່ງເຈົ້າ ຮວມທັງເຂົ້າກະບໍ່ຍັງ
    ໃຫ້ເຈົ້າຟັງເອົາໄວ້ ເປັນອຸທາຫອນ(ຕົວຢ່າງທີ່ຍົກຂື້ນມາອ້າງໃຫ້ເຫັນ) ສອນເຈົ້າແນ່
    ຜູ່ເປັນແມ່ເດືອດຮ້ອນ ຫວັງເຈົ້າໃຫ້ຢູ່ເຢັນ
    ຢ່າສິມົວແຕ່ເຫຼັ້ນ ເຫັນຜູ້ຍິງເປັນເຣື້ອງໃຫຍ່
    ໃຫ້ໃສ່ໃຈຕໍ່ໜ້າ ສຶກສາໄດ້ສິຮຸ່ງເຮືອງ ລູກຫຼານເອີ້ຽ.

  • ຫຼັບຕາຊັງນັ້ນຫຼະ ເປັນພາສາແສດງອອກ
    ເຖິງບໍ່ບອກເພິ່ນກໍຮູ້ ວ່າໃຈເຈົ້າຄຶດຈັ່ງໃດ
    ພາສາໃຈ ອອກທາງໜ້າ ແນມສາຍຕາ ກະສ່ອງຊອດ
    ເຫັນຕລອດຮອດພື້ນ ໃຈເຈົ້າວ່າສ່ອງເຫັນ ພຸ້ນແລ້ວ.

  • ລ້ຽງຜູ່ເຖົ້າ ເອົາບຸນພໍໄດ້ຢູ່
    ລ້ຽງຜູ່ເຖົ້າ ເອົາແຂ້ວຄ່າບໍ່ມີ.

  • ລ້ຽງຊ້າງເຖົ້າ ຂາຽງາໄດ້ກິນຄ່າ
    ລ້ຽງຜູ່ເຖົ້າ ງາເຈົ້າຢູ່ໃສ.

  • ຫຼຽວເບິ່ງແນມຟາກຟ້າ ເມຄາກໍ່ໄຫຼລ່ອງ
    ຫຼຽວເບິ່ງຂອງຟາກນ້ຳ ໄຫຼເຂົ້າສູ່ທະເລ

  • ຫຼຽວເບິ່ງເຊໄຫຼເລື້ອຽ ລຳຂອງກໍ່ໄຫຼເອື່ອຽ
    ຫຼຽວເບິ່ງໜ້າເອື້ອຽນ້ອງ ພໍຢາກຮ້ອງຍ່ຽງກາ
    ພູເອີຽພູຜາກຸ້ມ ຝົນຄຸມຟ້າສີໃໝ່
    ເບິ່ງນ້ຳໄຫຼລັ່ງຂ້ອນ ປາບ້ອນຢູ່ແກ່ງຫີນ
    ສັງຊິຈາກໝູ່ເຈົ້າ ຍາມໃດນໍຊິພໍ້ໃໝ່
    ຈາກກໍ່ໄກ ໄປກໍ່ຍາກ ຊິພາກເຈົ້າເລົ່າໜີ
    ກັມເອີຽກັມມາຂ້ອນ ຍາມນອນຊິໄຫ້ໂຮ່
    ຫຼືແມ່ນກັມຂອງໂຕ ຫຼືແມ່ນໂພທິຍານໃຫ້ ກັມໃຊ້ແຕ່ຫຼັງ.

  • ຫຼຽວເຫັນໜ້າ ພໍປານເທວະດາ ຈາກຟ້າມານໍ້ພີ່
    ບ່າວຜູ້ດີດອກຈັ່ງເຈົ້າ ແມ່ນກິນເຂົ້າກັບອີ່ຫຍັງ
    ຊ່າງມາງາມເອົາກະດໍ້ ຄົນຮູບຫຼໍ່ນໍ້ແດນໃດ
    ເຈົ້າມາຄືງາມຫຼາຽ ຍ່າງກາຽມາພີ້
    ມີແລ້ວບໍ້ຄົນຊ້ອນ ເຜີຽວາຈາເວົ້າມາກ່ອນ
    ມາສະອອນຜູ່ຈັ່ງເຈົ້າ ວ່າຢາກເຂົ້ານັ່ງຮຽງ.

  • ຫຼຽວເຫັນໄຟລາມໄໝ້ ໃນໃຈອ້າຍອຸກອັ່ງ
    ຄິດແຕ່ນຳຄວາມຫຼັງ ຍັງຈຳຄວາມວ່າເວົ້າ ຄາວກີ້ກ່ອນມາ
    ໄດ້ແຕ່ຫຼຽວເບິ່ງຟ້າ ຍາມໃດນາ... ນ້ອງຊິຕ່າວ
    ມອງເຫັນດາວທຸກຄ່ຳເຊົ້າ ແລງເຊົ້າເຝົ້າຄະນຶງ.