ໝວດທີ່ຂຶ້ນຕົ້ນດ້ວຽຕົວ "ຣ"

  • ຣະດູກາຽຫຼາຽບົດບັ້ນ ສາຽສັມພັນນັບມື້ແກ່ນ
    ນັບມື້ແນນຈ່ອງນ້າວ ຜລາຫ້າວຕ່າວສເນີ

    ຜຍາກອນບ່ອນສິເພີ້ ຄນິງແມ່ມານດາດຽວ
    ສຽວອຸຣານ້ຳຕາໄຫຼ ບາດຫ່າງໄກຕາເຈົ້າ
    ຄຶດຮອດເດ້ ຄຶດຮອດມານດາເຖົ້າ ບົວຣະບັຕຕັດສາຽແຮ່
    ຕັ້ງແຕ່ລອດໂຕ່ງສີ້ນ ຈົນມາຮອດມື້ນີ້ ລູກເປັນໜີ້ນັບບໍ່ຖອງ

    ຟັງສຽງຟ້າຮ່ຳຮ້ອງ ກ້ອງເຂຕບົວລະພາ ພຸ້ນເຢີ້
    ມາໃຫ້ຫົນຫວນຄຶດ ຫ່ວງຄາເມບ້ານ
    ປານນີ້ສາຽໃຈຂ້ອຽ ສິສອຽວອຽນັ່ງຈັບເຈົ່າ
    ສອດສາຽຕາຫາລູກເຕົ້າ ຜູ່ຍັງເຂົ້າຮ່ຳຮຽນ

    ພຽນໃຈໝາຍມາດມຸ້ງ ປະກອບກໍ່ການສືກສາ
    ບໍ່ແມ່ນໄປໄລລັບ ດອກແມ່ເອີຽອວນນີ້
    ເວລາມີສິຢາມຢ້ຽມ ສາຽໃຈຮຽມພຣະຄຸນພົ້ນລົ້ນຂມ່ອມ
    ນ້ອມໃຈສົ່ງຝາກໃຫ້ຟ້າ ມາເຫັນໜ້າແມ່ເຮົາ

    ຢາກມາຄານໃສ່ເຈົ້າ ແລ້ວກົ້ມກາບລົງຕັກ
    ໂອບສອງແຂນດ້ວຽຄວາມຮັກ ຫຼັ່ງນ້ຳຕາບູຊາພ້ອມ
    ສິບນີ້ວອັນຊຸລີນ້ອມ ຕາງທຽນຕາງທູບ
    ໝູບກາບເຈົ້າ ຍາຍເຖົ້າອີ່ແມ່ຕົນ

    ຄຸນແມ່ມີມາກລົ້ນ ເສັງສັ່ງປັດຕະພີ
    ມາກກວ່າວາຣີຫຼວງ ຖ່ວງກະແສແສນຟ້າ
    ພັນນະພາແສນຖ້ານ ຈັກກະວານລ້ານໂລກລຸ່ມ
    ຈຸ້ມໃສ່ກັນປັ້ນແໜ້ນໆ ເອົາມາຕັ້ງສັ່ງບໍ່ເຖີງ

    ເຖິງສິເອົາຈັນເຈົ້າ ຕ້ອມເຂົ້າເຊີ່ງດວງດາວ
    ຊາວເອົາແນວໃດມາ ສິຊັ່ງຊາບໍມີແລ້ວ
    ເຊືອກພັນແກນວ່າແສນໝັ້ນ ສາຽສັມພັນລູກກັບແມ່
    ແຮ່ງໝັ້ນດີບໍ່ມີແປ່ ແມ່ທີ່ຮັກລູກເຕົ້າ ເຈົ້າຂ້ອຽໃຫ້ຄິດດູ

    ແມ່ນສິມີໝື່ນຊູ້ ກີ້ງກ່ອມກາມມະຄຸນ
    ຢ່າສິລືມແທນຄຸນ ແບ່ງບຸນມານດາດ້ວຽ
    ຕົກຄາວຣວຽໄພ້ເບັ້ຽ ຖນອມເມັຽສິເສັຽແມ່ (ເຮົາເດ)
    ສັງຂາຣານັບມື້ແກ່ ຄັນແມ່ນລູກບໍ່ລ້ຽງ ສິໄປເຕື້ອງຕໍ່ຜູ່ໃດ

    ລ້ຽງລູກໄວ້ ກະຫວັງເພີ່ງກິນແຮງ (ນັ້ນແລ້ວ)
    ລູກມາແໜງຊັງສາ ແມ່ສິໂທມະນາກັ້ນ
    ອຸກກະສັນນ້ຳຕາຍ້ອຽ ຫາຄົນອອຽມີແຕ່ປ້ອຽກັບແຊ່ງ
    ໂອ້ຽ... ປານຫົວອົກຖືກແບ່ງ... ທໍຣະພີແທ້ລູກຫຼ້າ ສິຫວັງຂ້າແມ່ນີ້ຫຼື

    ອັນບຸນຄຸນໝື່ນຕື້ ລ້ຽງລູກໃຫຍ່ເປັນຄົນ
    ໃຫຍ່ແລ້ວວາຈາຖຽງ ດ່າກວນຊວນປ້ອຽ
    ພອຽບໍ່ຫວນເຫັນພໍ້ ໃຜເດ້ນໍອູ້ມໃສ່ອູ່
    ຢູ່ມາເປັນລູກເຕົ້າ ຄຸນເຖົ້າຊ່າງບໍ່ມີ

    ຟັງເອົາເດີ້ບ່ອນນີ້  ລູກແກ້ວກິ່ງຍິງຊາຽ
    ພະຄຸນຫຼາຽເຫຼືອແສນ ແມ່ແທນທວງໄວ້
    ເພິ່ນຕາຽໄປ ບໍ່ທັນແທນຄຸນເຖົ້າ ໜີ້ຂອງເຮົາສິຜັດຜ່ອນ
    ລ້ຽງເປັນຄົນບໍ່ໄດ້ຍ້ອນ ພໍເອົາຄ້ອນທຸບໃຫ້ຕາຽ

    ແມ່ນໃຜ-ໃຜກະໄດ້ ສິນ້ອຽໃຫຍ່ອາວຸໂສ
    ຄຸນພະມານດາໂຕ ດັ່ງໂພໄຮໃບດົກດົ້ວ
    ຢ່າໃຫ້ຕັນຫາກົ້ວ ມົວອະບາຽຝ່າຽກິເລສ
    ມັນສິເຜດຊ້ຳດອກເຈົ້າ ເປັນຜີເຝົ້າເປົ້າແລະໂພງ

    ເອີ້ນໃຫ້ລຸກ ປຸກໃຫ້ໂຄ້ງ ສຳນຽງສົ່ງຜຍາສອນ
    ອຸທາຫອນ ອຸປະມາ ຝາກຫາບຸຕຕາໄວ້
    ວ່າໃຫ້ແທນຄຸນໄທ້ ມານດາເຮົາເຖົ້າສິຈົ່ມ
    ຢ່າໃຫ້ຂົມຂື່ນຂ້າວ ພາກັນຟ້າວໄຖ່ຖອນ

    ນືກພາບຍ້ອງ ແຕ່ອ້ອນອອກມານດາດູ
    ຄັນບໍ່ກູນາຜາຽ ຢ້ານແຕ່ຕາຽແຕ່ດົນແລ້ວ
    ຄິດເປັນແມວບາດຍາມໜູກິນມ້ອນ ຄິດເຫັນຄຸນມານດອນ ບາດຫາມເຖົ້າເຂົ້າໄປປ່າ
    ແມ່ນສິຄິດກະຢ່າ ແສນສິວອນວ່ອນເວົ້າ ເຈົ້າບໍ່ແທນມື້ນີ້ ສິເປັນໜີ້ຮອດມື້ຕາຽ ພຸ້ນແລ້ວ ພີ່ນ້ອງເອີ້ຽ...

    (ອັນຊຸລີ = ການປະນົມມື ກາບໄຫວ້)(ວາຣີ = ນ້ຳ)(ນະພາ = ຟ້າ)(ໂທມະນາ = ການຍິນດີໃນສ່ວນບຸນ) (ອຸທາຫອນ = ຕົວຢ່າງທີ່ຍົກຂື້ນມາອ້າງໃຫ້ເຫັນ)
  • ຣະວັງເຮືອພາຫຼົ້ມ ຈົມລົງວັງກະແສໃຫຍ່
    ຜັດຊິໄດ້ນັ່ງໄຫ້ ງອຍໄມ້ຂີ່ຂອນ.
  • ຣະວັງຄົນແປກໜ້າ
    ໃຫ້ຣະວັງຄົນແປກໜ້າ ເຂົາສິມາຫຼອກຕົ້ມ ຫຼົງຄາຣົມເຂົາງ່າຽໆ
    ບາງຄົນມາຂາຽຂອງ ຕາເຂົາມອງພຸ້ນພີ້ ຫຼຽວຈ້ອງໝ້ອງສິເອົາ
    ພໍເຂົາໜີໄປແລ້ວ ເຖິງຍາມຄົນນອນ ເຂົາຜັດຍ້ອນຄືນມາໃໝ່
    ລັກເອົາແນວທີ່ເຂົາຈອບເບິ່ງໄວ້ ໄປຂາຽຈ້ອຽກະຊ່າງເປັນ ... ຄົນເອີຽ