ໝວດທີ່ຂຶ້ນຕົ້ນດ້ວຽຕົວ "ຟ"

  • ຟ້າຊິຝົນ ຟ້າກໍຂາວ ດາວກໍແຈ້ງ ຟ້າຊິແລ້ງ ຟ້າມືດຟ້າມົວ.
  • ຟ້າບໍ່ແຈ້ງ ທົງແສງສຸຣິຍາດ
    ປະຊາຣາຊເດືອດຮ້ອນ ແຂງຂ້ອນທຸກໃຈ
    ທຽນສືບໄຕ້ ກະບອງສ່ອງບໍ່ມີເຫັນ ສານໍ
    ຫຼືວ່າເປັນກັມເວຣ ສົ່ງມາເມືອງບ້ານ
    ຂຸນການກວ້າງ ເສນາຫຼວງແຕກຜ່າຽ
    ສັພພະສິ່ງເຮັ່ງຮ້າຽ ໂຮມຕ້ອນຕໍ່ຕີ
    ບັນພະການກ່ອນກີ້ ເສພສູ່ເມືອງສນຸກ
    ບໍ່ຮ່ອນມີທວາຽທຸກ ທັ່ງໂຖມຖລາລ້ຳ
    ຫຼືວ່າກັມສນອງແໜ້ນ ແດນສຣວງສນອງຕອບ
    ຜິດບໍ່ຊອບດັ່ງເຄົ້າ ເລີຽສຸມເຂົ້າດັ່ງໄຟ...
  • ຟ້າມືດຄື້ມ ຝົນຫຼັ່ງເທລົງ
    ອ້າຽຢືນງົງ ຄອຽທາງ ຄືດຮອດນາງ ຜູ່ໄກບ້ານ
    ຢາກມາຈາ ດອມຕ້ານ ແຕ່ຈົນໃຈ ຍ້ອນໄກຫ່າງ
    ຄຶດຮອດນາງ ສູ່ມື້ ຄືເປັນໄຂ້ ບໍ່ສວ່າງຫາຽ
    ຄຶດນຳຫຼາຽ ຄຶດນຳ ຫົວໃຈອ້າຽ ນອນດາຽ ນ້ຳຕາຫຼັ່ງ
    ອຸກອັ່ງ ເຮຮ່ຳໄຫ້ ເປັນບ້າປ່ວງຜູ່ດຽວ

 

  • ຟ້າຮ່ຳຮ້ອງ ໃຈຮ່ວນຄນິງຫາ
    ເມຄາໄຫຼ ທັ່ງໂຖມໂຮມທ້ອນ
    ນອນໃນຫ້ອງ ມະໂນໃນໝອງໝົ່ນ
    ມື້ສືບມື້ ຄນິງນ້ອງຫ່ວງຫາ

    ສຸດຂອບຟ້າ ໂຂງເຂດແດນໄກ
    ອາລັຍຮັກ ຮ່ຳຮອນນອນດີ້ນ
    ຖວິນໃຈຄາຂ້ອງ ໝອງກາຍເຫຼືອງລ່າ
    ເຂົ້າແລະນ້ຳ ກິນໄດ້ກະບໍ່ລົງ.
  • ຟັງເອົາເດີ້ນ້ອງສາວຫຼ້າ ແນວຜຍາຈາສົ່ງ
    ໃຜປະສົງຜູ້ຫຼໍ່ລ້ຳ ໃຫ້ນຳເວົ້າກ່າວຈາ
  • ຟັງເອົາຖ້ອນ ແມ່ສອນລອນ ຊ້ອນຂຶ້ນໃໝ່
    ເຈົ້າຍັງເປັນໄກ່ນ້ອຽ ບໍ່ທັນຮູ້ຮ່ອມແຫຼວ

    ແຊວໆຮ້ອງ ວັຍຄນອງນ້ອງນຸ່ງ
    ບາດວ່າທ້ອງອຸ້ງປຸ້ງ ມັນຊິຫຍຸ້ງເມື່ອລຸນ.
  • ຟັງແຕ່ສຽງສຳນຽງເວົ້າ ພໍຢາກເອົາເປັນຄູ່
    ເຄີຽກິນເຂົ້າຮ່ວມພາ ກິນປາຮ່ວມຕ້ອນ ສະອອນແທ້ແນ່ຈິງ .
  • ຟັງຂໍ້ຄວາມຄຳເວົ້າ ພໍຢາກເອົາເປັນຄູ່
    ເວົ້າຊົງຊິໄດ້ຍູ້ ກັນເຫຼັ້ນບາດເມື່ອນອນ.
  • ຟັງຄຳເວົ້າ ສາວນາງສັງມາມ່ວນ
    ມາຫອມຫວນອູດເອົ້າ ມະໂນອ້າຽອີ່ມເອມ
    ຈິຕກະເສມສເມີແກ້ວ ແນວມະນີໃສສ່ອງ
    ອ້າຽມາພົບນາດນ້ອງ ພະອວນເຈົ້າຄ່ອງຄື

    ນັບແຕ່ມື້ ເກີດໃຫຍ່ເປັນຊາຍ
    ບໍ່ເຄີຽກາຽພານພົບ ຜູ່ໃດຄືນ້ອງ
    ຄືດັ່ງທອງຄຳລົ້ນ ເມືອງຄົນມນຸສໂລກ
    ໂຈກໂຫຼກໃຕ້ລຸ່ມຟ້າ ບໍ່ມີແທ້ທັດທຽມ

    ອ້າຽຫາກ ຈຽມໃຈແທ້ ບໍ່ຫານແວເຂົ້າມາກ່ຽວ
    ໄດ້ແຕ່ ທຽວເລາະຈ້າຽ ສາຽຮົ້ວຮ່ອມຮາວ

    ບໍ່ສະຫາວຊິມາເຫຼັ້ນ ຢ້ານນາງເຫັນແລ້ວເປີດໜ່າຽ
    ມັກແຕ່ ດ້ວຽຄວາມອາຽ ບໍ່ຫານມາປາກເວົ້າ ນຳເຈົ້າເພິ່ນຜູ່ດີ.
  • ຟັງຄຳຕ້ານ ຂານຄຳບົນບອກ
    ສັບພະຊອກຫຍອກຍ້ອນ ໃນເນື້ອສະເມັ່ນຄີງ

    ເຈົ້າຜູ້ປີງໃນນ້ຳ ນຳຫາແຕ່ດູດເລືອດ
    ໂຕສະໜຽດແມ່ນອ້າຍ ໝາຍຊ້ຳບໍ່ອິດູ

    ເຈົ້າຜູ້ຄູຄັນນາຮ້າງ ຫາແຕ່ທາງປະປ່ອຍ
    ຄອຍຖ້າເປັ່ງແຕ່ນ້ຳ ບໍ່ເຫຼືອໄວ້ອັ່ງນາ

    ປາກໍ່ເລີຍເຂີນຂ້ອນ ຄັນນາເຂີນຂາດ
    ຊາດວ່າເຄີຍຢູ່ນ້ຳ ຜັດເຫຼືອໄວ້ແຕ່ຕົມ.
  • ຟັງສຽງ ຊາຽຈາຕ້ານ ຫວານກະເບົາເຂົ້າມາໃສ່
    ຢາກມາຫຽັບສວນມອນ ຢາກມາຊອນສວນມີ້ ຢາກມາລີ້ຮ່ວມພະນາງ
    ອ້າຽເອີ້ຽ...
    ຄັນອ້າຽຮັກນ້ອງແທ້ ແພໄໝໃຫ້ມາຫົ່ມນາງສິຂົ່ມໄມ້ໜາມ
    ນາງສິຮານໄມ້ເປົ້າ ຖ້າເຈົ້າວພີ່ຊາຽ
    ຄັນເປັນຄືຈັ່ງຄຳອ້າຽ ສິບໍ່ໝາຽຊົ້ນຜູ້ໃໝ່
    ສິຂໍໄໝຕ່າງບ້ານ ສິຂໍຫວ້ານຕ່າງຕົ້ນ ມານອນຊົ້ນໃສ່ເຮືອນ...
  • ຟັງນາງຈາປາກເວົ້າ ສັງມາຫວານແທ້ນໍ໊ອຸ່ນ
    ບຸນຜລາສົ່ງຍູ້ ສວັນໃຫ້ສົ່ງມາ
    ອ້າຽນີ້ປາຖນາສ້າງ ຮ່ວມທາງທຽວທ່ອງ
    ຢາກເປັນທອງແຜ່ນແທ້ ໂຮມເຂົ້າເປັນແຜ່ນດຽວ

    ຄັນແມ່ນຈິງຄືຈັ່ງເວົ້າ ອ້າຽນີ້ປາຖນາຫ້ອຽ ນຳຮອຽທຸກບາດຢ່າງ
    ອ້າຽນີ້ ປາຖນາຢາດນ້ຳ ນຳນ້ອງຄູ່ສູ່ຍາມ