ໝວດທີ່ຂຶ້ນຕົ້ນດ້ວຽຕົວ "ປ"

  • ປາດຸກມີເກັດ
    ເພັຊເປັນກົ່ວ
    ຜັກບົ່ວເປັນຕົ້ນອ້ອຽ
    ຫົວກອຽເປັນຫົວຂ່າ
    ປາສິໜີຈາກນ້ຳ ທາງອ້າຽກະບໍ່ໄລ
  • ປາບໍ່ມີສັງສິເວົ້າ ໜອງເທົາເພິ່ນສິວ່າ
    ກາໄດ້ກິນເຫຍື່ອແລ້ວ ແຫຼວສິເຈີ້ຽເຈີດລາ ບໍ່ນໍ
    ຢ້ານແຕ່ພໍ້ແລ້ວໄດ້ຮ້າງ ສາວນາງສິໄດ້ໄຫ້
    ຢ້ານບ່າວພໍ້ກໍໄມ້ ເຄືອເຄົ້າບໍ່ຫ່ວງນຳ...
  • ປາບໍ່ຫາ ມາສິໄດ້ກິນແກງ
    ແປ້ງບໍ່ທາ ໜ້າສິນວນຂາວຜ່ອງ
    ກອງບໍ່ຕີ ມາສິດັງໄກກ້ອງ
    ຄ້ອງບໍ່ຕີ ລືສິເນົາໃນຫູ
    ຊູ້ບໍ່ພ້ອມ ຄືສິໄດ້ປະຜົວ
    ງົວບໍ່ເສັຽ ມາສິໄດ້ຕັດກໍໄຜ່
    ໄຂ່ບໍ່ທັນຝັກ ຊ່າງສິໄປຕຳເຂົ້າປຽກ
    ວຽກບໍ່ເອົາ ມາສິເຫັນກ້ອນຄຳ
    ເວນບໍ່ນຳກັມບໍ່ຕ້ອງ ຄືສິສ່ອງເຫັນທາງ
    ບຸນບໍ່ເຄີຽຄິດບໍ່ເຄີຽສ້າງ ຊ່າງອ່າວໂອ້ເມືອງສວັນ ພີ່ນ້ອງເອີ້ຽ
  • ປາກຈັ່ງໃດ ໃຈກະຈັ່ງຊັ້ນ ພັນທະນັງເວົ້າຕໍ່
    ບໍ່ໄດ້ກິນເຄືອເຂົາຮໍ ທີ່ມັນຂົມປາດປ້ຽງ ມາເວົ້າຕໍ່ພີ່ຊາຽ.
  • (ຫຼ້ານາງເອີ້ຽ)
    ປາກຈັ່ງໃດໃຈຈັ່ງຊັ້ນ ສິບໍ່ປ່ຽນແປຜັນ
    ຄວາມສັມພັນຍັງຄົງເດີມ ຫ່ວງຫາແຕ່ນາງນ້ອງ
    ຢ່າໃຫ້ຄອງຄອຽຖ້າ ໃຫ້ຄືນມາ ພໍໃຫ້ອ້າຽຫາຽສວ່າງ ແນ່ເດີ້
    ຢ່າໃຫ້ເປັນປ່ວງບ້າ ລະເມີຖ້າຢູ່ຜູ່ດຽວ
    ຂຽວເອີ້ຽ... ເຈົ້າຜູ້ຂຽວໃບກ້ວຽ ແມ່ນອ້າຽເຖິງຄາວຊວຽບໍ້ ນາງນ້ອງຈັ່ງບໍ່ຕ່າວ
    ຕົວະໃຫ້ອ້າຽປວດຣ້າວ ຄອຽເຈົ້າທຸກຄ່ຳຄືນ
    ແມ່ນຝືນໃຈໃຫ້ຫາຽເສົ້າ ວ່າຢ່າຄຶດຮອດເຂົາເດີ້ ໃຈເຈົ້າໃຫ້ສົດຊື່ນ
    ຝືນຫົວໃຈກະບໍ່ໄດ້ ນອນໄຫ້ຢູ່ຖຽງ...ຫຼ້າເອີ້ຽ
  • ປີເກົ່າຢ້າຍ ປີໃໝ່ຊິມາເຖິງ
    ມາຮ່ຳເພິງທວນຄິດ ເຊິ່ງຄຳເຄີຽເວົ້າ
    ວ່າຮອດຍາມຂາຍເຂົ້າ ໂຮມລານອ້າຍຊິແຕ່ງ
    ແຕ່ວ່າສາວນາງແພງ ມາຊິແໜງໜ່າຍໜ້າ ເລີຍເລົ່າລາຈາກບ້ານ ຈົນປານນີ້ບໍ່ຕ່າວຄືນ
    ໃຫ້ອ້າຍນັ່ງສະອື້ນ ຂືນຂົ່ມແຄມລານ
    ອັນວ່າງານຊິກິນດອງ ເລີກໄປໄລແລ້ວ
    ສຽງແຊວໆເພິ່ນກິນລ້ຽງ ພຽງສລອງດອກປີໃໝ່
    ສ່ວນໂຕອ້າຍເຫຼືອໃຈ ໄດ້ແຕ່ເຮຮ່ຳໄຫ້ ເຮຮ້ອງພ່ອງນ້ຳຕາ.
  • ປີໃໝ່ມາຮອດແລ້ວ ແນວບໍ່ດີໃຫ້ກາຽຜ່ານ
    ຂໍໃຫ້ທຸກທຸກທ່ານ ຈັກກະວານໂລກກວ້າງ ສຖານທ້ອງທົ່ວແດນ
    ໃຜຂາດແຄນຄົນຊ້ອນ ໃຫ້ຖືກບ່ອນສຸກຂີ
    ໃຫ້ມັ່ງມີເງິນທອງ ໃຫ້ສົມປອງທຸກດ້ານ
    ໃຈສມານຮັກໝັ້ນ ຜູກສັມພັນໃຫ້ໝັ້ນແກ່ນ
    ໃຫ້ມີແຟນຄົນຜູ້ຮູ້ ໃຫ້ໄດ້ຊູ້ແມ່ນຜູ່ໄຄ
    ເດີນທາງໄປເໜືອໃຕ້ ໄປທາງໃດຢ່າໝອງໝົ່ນ
    ຂໍເບື້ອງບົນສົ່ງຍູ້ ຊູຄ້ຳໃຫ້ສົ່ງເສີມ ນັ້ນທ້ອນ.
  • ປີໃໝ່ມາຮອດແລ້ວ ໃຫ້ເບີຽເບີກກະເສມສານ
    ສະຫຼິງຄານຄະນານັບ ຊັພສິນໃຫ້ເຫຼືອໃຊ້
    ຢ່າໄດ້ມີຄວາມໄຂ້ ເຈັບເປັນໄດ້ເອັນປ່ວງ
    ປວງໝູ່ແນວຢາກໄດ້ ໃຫ້ສົມດ້າມດັ່ງປະສົງ

    ຮຽມຂໍຈົງໃຈເວົ້າ ນຳເຮົາຈັກສະໜ່ອຽ
    ວັນປີເດືອນເຄື່ອນຄ້ອຽ ເໝີດຂ້ອນສິປ່ຽນໝູນ

    ໃຈຫາກເກີດວ່າວຸ້ນ ຢ້ານແພງຮັກບໍ່ຄືນຫຼັງ
    ຢ້ານເຈົ້າປ່ຽນປະດັງປີ ບໍ່ຫຼີ່ຫຼິງຄວາມເຄົ້າ
    ຢ້ານເດ້ນໍ... ຢ້ານແຕ່ຕົວຮຽມເສົ້າ ຂຽນຜຍາມາຮ້ອຽເທື່ອ
    ຢ້ານເຈົ້າເບື່ອ... ບໍ່ອ່ານຊ້ຳ ເປັນຂອງນ້ອຽຄ່າບໍ່ຫຼາຽ

    ຢ້ານເດ້ນໍ... ຢ້ານເຈົ້າກາຽຂວ້າມ ຮີດແຕ່ເກົ່າຄອງຫຼັງ
    ຢ້ານເຈົ້າ ພັງເພຫັກ ບໍ່ລ່ຳຫຼິງຄອງບ້ານ
    ຢ້ານບໍ່ສົນຄຳເຖົ້າ ຢ້ານບໍ່ເອົາຄຳປູ່ຍ່າ
    ລູງຕາສອນຕອບໂຕ້... ປະໂທ້...ຢ້ານບໍ່ຊວ່າງໃຈ

    ຢ່າຊູ ໄລລືມຖີ້ມ ມູນມັງຊຸມແຊງເກົ່າ ເຮົາເນີ້
    ຂອງມັນມີແຕ່ເຄົ້າ ໃຫ້ເສີມສ້າງຄູ່ລາວ
    ຢ່າຊູ ລືມລ່ວງລ້າວ ຂອງເກົ່າທີ່ເຮົາມີ
    ຄັນຫຼາຽຈົບຄົບປີ ໃຫ້ດັ່ງເດີມຢ່າວາຽມ້າງ
    ເຖິງມີທາງຫຼາຽເສັ້ນ ເດີນຄົນທາງກະຕາມຊ່າງ
    ເຖິງສິຢູ່ຕ່າງບ້ານ ເຫັນໜ້າໃຫ້ໄຖ່ຖາມ

    ອະຫັງແລະອ້າຽນ້ອງ ກ້ຳຝ່າຽອຸດົມໄຊ
    ຂໍປະນົມມືນົບ ຈົບກະສຽນວຽນເກົ້າ
    ຂໍເຈົ້າ ອາຍຸ ໝັ້ນ ພັນປີຢ່າຄ້ອຽອ່ຽງ
    ວັນນະ ຄຽງຜ່ອງແຜ້ວ ສີໜ້າໃຫ້ລື່ນໃຜ
    ສຸຂະ ໃນໂລກໃຕ້ ໃຫ້ຕຸ້ມຫໍ່ ຍໍຄີງ
    ພລະ ຈິງໃຫ້ຢູ່ດີ ເຫື່ອແຮງໃຫ້ໂຮມເຈົ້າ.... ເດີ້ທ່ານເດີ້

    (ກເສມສານຕ໌ = ຊື່ນໃຈ, ຊື່ນບານ, ເບັ່ງບານ ໜ້າຊື່ນຕາບານ
    ສະຫຼິງຄານ = ສິ່ງໃຫ້ເກີດຄວາມຮັກ ຄວາມໄຄຣ່..
    ປະດັງ = ປຣະດັງ = ມາຕິດໆ ພ້ອມໆກັນ)