ໝວດທີ່ຂຶ້ນຕົ້ນດ້ວຽຕົວ "ບ"

  • ບາບ່າວທ້າວ ເຖິງຄາວໜີຈາກ
    ນ້ຳຕາພາກປິ່ນເປື້ອງ ປະເທືອງແກ້ມປິ່ມປາງ
    ສາວພະນາງເຄີຽເອື້ອ ເຫຼືອໃຈເດ້ສິວ້າເຫວ່
    ສັງມາເຊຊັດຊ້ຳ ໄກກ້ຳມິ່ງສມອນ

  • ບ້ານຂ້ອຽ
    ສມັຍຄັ້ງເກົ່າພຸ້ນ ຕອນເມືອງເຮົາຍັງເຢັນຊຸ່ມ
    ຕາມຫ້ວຽຊຸມແມ່ນ້ຳ ໃສແທ້ຕລອດປີ
    ຄົນສມັຍກ່ອນກີ້ ຫາກິນຢູ່ກັນສນຸກ
    ໂຣຄາໂພຍພັຍທຸກ ໃຊ້ສມຸນໄພແກ້
    ຕໍ່ມາແລເຫັນເຄົ້າ ຄວາມຈເຣີນປະເທສເພີ່ນ
    ຄົນເລີ້ມຟັນປ່າໄມ້ ທີ່ເຄີຽຊົ້ນເພີ່ງເຢັນ
    ເຂົາຫາກເຫັນຣາຽໄດ້ ຜົລກຳໄລທັມມະຊາຕ
    ສ້າງໂຮງເລື່ອຽເລາະບ້ານ ຜານຖີ້ມແທບບໍ່ເຫຼືອ
    ດົງນັ້ນຄືປ່າໄມ້ ກວ້າງໃຫຍ່ໃນສຖານ
    ນັ້ນເປັນພຽງຕຳນານ ເລົ່າຂານໃຫ້ຫຼານຮູ້
    ຫົວພູເປັນຫົວໂລ້ນ ຄົນຖາງຂຸດກົ່ນ
    ຂົນເອົາຫີນພ່ອງໄມ້ ທະລາຽລ້າງອັ່ງຂາຽ
    ສັຕປ່າຕາຽມະລາຽຖີ້ມ ສູນເສື່ອມບໍ່ມີເຫັນ
    ທັງໝູ່ກວາງແລະຟານ ລູກຫຼານບໍ່ເຫັນຮູ້
    ເຫັນແຕ່ພູຫົວໂລ້ນ ຄົນເອີຽເອີ້ນດົງປ່າ
    ບອກແຕ່ຫຼານລູກຫຼ້າ ຄາວພຸ້ນ ເປັນປ່າດົງ

  • ບ່າວພີ່ຊາຽ ມາວອນເວົ້າ ຜຍາເຮົາກະເວົ້າມ່ວນ
    ເພິ່ນເຊີນຊວນອ້າຽນ້ອງ ມາລອງເວົ້າຕໍ່ກອນ
    ນາງສະອອນນຳອ້າຽ ຫວານຄົມຄາຽແທ້ນໍ້ເພິ່ນ
    ຈັກວ່າໂດຽບັງເອີນ ຫຼືວ່າ ເພີນຫຍັງແຫຼ້ວ ໃຫ້ແຊວເວົ້າວ່າມັກແຮງ

  • ບໍ່ເຄີຍ ກໍລອງຫຼິ້ນ ບໍ່ເປັນກໍລອງເບິ່ງ
    ບຸນບໍ່ເຄີຍປັ່ນບ້າງ ຊິລອງຫຼິ້ນຮ່ອນຊາຍ

  • ບໍ່ເຄີຽຕິຖແລງຫຼອກ ຕົວະນາງໃຫ້ໃຈຊື່ນ
    ພະລາດລືນໝື່ນແລ້ວ ປະຖີ້ມເປົ່າດາຽ

  • ບໍ່ແມ່ນຊາຽ ເວົ້າກ້ຽວ ຜ້າກະຕ່ຽວ ເໜັບແອວ
    ບໍ່ໄດ້ແຊວເກີນຄຳ ຢ້ານຖລຳກັມຕ້ອງ
    ມາເປັນພີ່ ເປັນນ້ອງ ສອງທາງ ຕາງໝູ່
    ຂໍໃຫ້ຄິດ ຮຸ່ງຮູ້ ຮຽມນ້ອງ ຜູ່ສວຍ

  • ບໍ່ແມ່ນ ຕິຖແລງເວົ້າ ຈັບເຄົາຄວາຽໃຜມາຜູກ
    ບາດເຮັດຕົກລູກແລ້ວ ຄວາຽນ້ອຽຊິແລ່ນນຳ ແມ່ມັນແລ້ວ.

  • ບໍ່ແມ່ນ ຕິຖແລງເວົ້າ ເອົາເສົາລົງໃສ່ຫຼຸມຊື່ໆ ບໍ່ນໍ້
    ບໍ່ແມ່ນຕົວະຫຼອກລໍ້ ໃຫ້ໝານ້ອຽຢຽບໄຟ.

  • ບໍ່ໄດ້ ເວົ້າເຫຼັ້ນໆ ເປັນຕຳນານຄືເພິ່ນວ່າ
    ຄືຈັ່ງຂູລູນາງອົ້ວ
    ຄືຜາແດງນາງໄອ໋
    ຊາດນີ້ບໍ່ໄດ້ນ້ອງ ຕາຽຖີ້ມອ້າຽບໍ່ແໜງ
    ຢ້ານຫຼາຽເດ້... ຢ້ານຫົວໃຈຫ່ຽວແຫ້ງ ບາດຂີງແຄງສິແທງໜໍ່
    ບາດວ່າ ຮູ້ເມື່ອຂ້າງ ວ່າຂີງຊ້າງສິປົ່ງໃບ
    ຢ້ານແຕ່ໃຈ ເຈົ້າລ້ຽວ ລົມລວງເວົ້າມ່ວນ
    ຕົວະອ້າຽຮັກຫ່ວງແລ້ວ ຫາທາງເຈີ້ຽເຈີດໜີ

  • ບໍ່ໄດ້ ໄລລາຊີ້ນ ໜີໄປກິນປາແດກອື່ງ
    ບໍ່ໄດ້ລະຕ່ອນຊີ້ນ ໄປກິນກ້ອຽອ່ອມກະແຕ ດອກນາ.

  • ບໍ່ໄດ້ ໄລລືມຖິ້ມ ກະໂດນໂພ່ນນາຂຽວ
    ບໍ່ເຄີຽ ຫຼຽວສາວໃດ ຕັ້ງແຕ່ໄກນາງນ້ອງ
    ຢາກເມືອເດ... ກັບເມືອຂ້ອງ ສັມພັນຮັກເກົ່າ
    ຢາກເມືອເຫັນໜ້າເຈົ້າ ແລງເຊົ້າໄດ້ນັ່ງຄຽງ

  • ບໍ່ໄດ້ຕິຖແລງຫຼົ້ມ ເອົາຄາຣົມມາໂປຽຫວ່ານ
    ບໍ່ໄດ້ຫວານຢອກເຫັ້ນ ຕົວະໃຫ້ເຕັ້ນໃສ່ຕົມ
    ທຸກຄາຣົມວາດເວົ້າ ເອົາອອກຈາກໃນ
    ບໍ່ເຄີຽຕົວະຍັງໃຜ ລ່າຽພາງພຽງຄັ້ງ
    ຢ້ານແຕ່ນາງທາງພີ້ ຊິພາທີໃຫ້ໝື່ນ
    ພະລາດລືນໝື່ນລົ້ມ ຈົມດີ້ນດ່າວລົງ.

  • ບໍ່ໄດ້ ຕິຖແລງເວົ້າ ລໍ້ໃຫ້ເຫງົາແລ້ວປະປ່ອຽ
    ຫວັງແຕ່ຄອຽສູ່ຊ້ອນ ພະນາງນ້ອງຢູ່ຄຽງ

  • ບໍ່ໄດ້ ຖາມບໍ່ໄດ້ເວົ້າ ໃຈເຮົາບໍ່ຫວນຫ່າງ
    ບໍ່ເຄີຽຈາງຄຶດພໍ້ ຢາກເກາະກ້ຽວກ່ຽວກັນ
    ຄວາມສັມພັນຍັງຄົງທີ້ ຄວາມຫວັງດີຍັງຄືເກົ່າ
    ແສງເງົາທອດແຜ່ນຟ້າ ຄຶດເຫັນໜ້າເຈົ້າດັ່ງເດີມ
    ເກັບຝັນເຕີມໃນໃຈອ້າຽ ຢອດຮັກຫຼາຽ ປ້ານຄຳຫ່ວງ
    ໃຈນຶ່ງດວງມີແຕ່ເຈົ້າ ຍາມບໍ່ເວົ້າກະຮັກຫຼາຽ
    ຄິດບໍ່ວາຽວັນເວັ້ນ ຢາກຝັນເຫັນມື້ຮ້ອຽເທື່ອ
    ຂື້ນເມືອເໜືອກະຄຶດພໍ້ ລົງໃຕ້ກະຄຶດເຖິງ

  • ບໍ່ໄດ້ໜີໄກໜ້າ ຍັງຄືຟ້າຝົນເກົ່າ
    ຄອຽຕິດຕາມວ່າເວົ້າ ຊາຽເຈົ້າຫາກບໍ່ສົນ
    ໜີໄປຊົ້ນ ຫົນທາງໄກ ບໍ່ໄດ້ຂ່າວ
    ຫຼອຽມາຕ້ອຽໃຫ້ຫ້າວ ແລ້ວຕ່າວຖີ້ມບໍ່ຫ່ວງຫຼັງ
    ນາງເອົາໃຈຕໍ່ຕັ້ງ ນາງຄິດນຳສູ່ບາດຍ່າງ
    ແນວກັນຖິນບໍ່ໄດ້ສ້າງ ຄືວາງໃຫ້ເພິ່ນແຮ່ໄປ.

  • ບໍ່ໄດ້ ໜີໄກໜ້າ ຄິດຮອດຫາຢູ່ຄືເກົ່າ
    ບາງມື້ຍາກກ່ຽວເຂົ້າ ຄຳເວົ້າຈື່ງຫ່າງຫາຍ
    ບໍ່ໄດ້ກາຽໄປໜ້າ ຫາກິນປາດອກຄືເພິ່ນ
    ແຕ່ຊິໄກກໍ່ເອີ້ນ ໃຈນັ້ນບໍ່ຫ່າງກັນ
    ຍາກຍ້ອນເຮົາຕ່ຳຕ້ອຽ ໄດ້ແຕ່ຄອຽຈອບສ່ອງ
    ໄດ້ແຕ່ມອງເລາະບ້ານ ສະຖານຫ້ອງບ່າວແວງ
    ໝົດເຫື່ອແຮງຮົນເຮົ້າ ເວົ້າຈາກະທັງເມື່ອຽ
    ແມ່ນຊິເວົ້າຢູ່ເລື້ອຽໆ ສາວບໍ່ເຕື້ອງຕໍ່ນຳ
    ເລີຍເກັບງຳຣະກຳເສົ້າ ບໍ່ຫານເອົາອອກມາວ່າ
    ຂໍອາພັຍທີ່ບໍ່ຈາ ກະຍ້ອນວ່າເປັນຈັ່ງເວົ້າ ຄືເຈົ້າໄດ້ຮ່ຳຮອນ.

  • ບໍ່ໄດ້ ນ້ອງຊາຕນີ້ ໜີບວດເປັນສົງ
    ທົງສິກຂາ ຢູ່ກຸຕິນອນແລ້ງ.

  • ບໍ່ໄດ້ນ້ອງຊາດນີ້ ຊິໜີໄປບວດເປັນສົງ
    ທົງສິກຂາ ຢູ່ກຸຕິນອນແລ້ງ
    ເອົາໃຫ້ຫົວໂຄຽແຫ້ງ ຍາມແລງຕັກນ້ຳຈຸ່ມ
    ໃຫ້ມັນຊຸ່ມຢູ່ເລື້ອຽ ຄວາມແຫ້ງບໍ່ໃຫ້ມີ.

  • ບໍ່ໄດ້ມາສັກ ສອງສາມມື້ ຄືຈັ່ງວ່າເປັນປີ
    ຣາຕຣີຮາມແຮມເດືອນ ໃຈພີ່ຊາຍອຸກເອົ້າ
    ເຈົ້າຢ່າໄລລືມສ້ຽວ ທາງທຽວທີ່ເຄີຍຍ່າງ
    ຫົວໃຈຄົງອ້າງວ້າງ ຄັນນາງນ້ອຍບໍ່ກ່າວຈາ
    ຄັນຄຳຈາຍັງບໍ່ຄ້ອງ ຕາມຄັນຄອງນ້ອງຊ່ອຍເບິ່ງ
    ໄປເຫິງເຫິງຫາກຊິຮູ້ ວ່າຊາຍນັ້ນເຝົ້າເບິ່ງແຍງ.

  • ບໍ່ໄດ້ ມາຈັກສອງສາມມື້ ຄືຈັ່ງວ່າເປັນປີ
    ຄັນແມ່ນໜີແຮມເດືອນ ເຜື່ອນໃຈຄົງອຸກເອົ້າ
    ເຈົ້າຢ່າໄລລືມລ້ຽວ ທາງທຽວທີ່ເຄີຽຍ່າງ
    ໃຈພີ່ຊາຍອ້າງວ້າງ ຄັນນາງນ້ອງບໍ່ວ່ານຳ
    ແນວຄຳຈາຍັງບໍ່ຄ້ອງ ຕາມຄອງນ້ອງຊ່ອຍເບິ່ງ
    ໄປເຫິງໆຫາກຊິຮູ້ ຊາຍນັ້ນເຝົ້າເບິ່ງແຍງ.

  • ບໍ່ໄດ້ ຫວານແຕ່ທາງນອກ ທາງໃນກໍ່ໃສແຈ່ມ
    ນ້ຳຕານແກມນ້ຳອ້ອຍ ຕົວຂ້ອຍກໍ່ດັ່ງດຽວ.

  • ບໍ່ໄດ້ ຫວານລວງລີ້ນ ເອົາຄາຣົມລວງຫຼອກ
    ອອກຈາກໃຈສີ່ຫ້ອງ ໃຫ້ເຫັນແທ້ແມ່ນຈິງ
    ຍິງຢູ່ໃນໂລກນີ້ ບໍ່ອາດທໍ່ທຽມເຖິງ
    ບໍ່ມີໃຜປຽບປານ ສ່ຳພະນາງພໍນ້ອຽ
    ງາມພໍປານນາງຟ້າ ອິນທາປັ້ນແຕ່ງ
    ແຍງບ່ອນໃດກະບໍ່ແລ້ວ ບໍ່ມີຮູ້ອີ່ບໍ່ເປັນ.

  • ບໍ່ສົມໃຫ້ກົ້ມໃສ່
    ບໍ່ໃຫຍ່ໃຫ້ປາດແປະ
    ບໍ່ແລໃຫ້ຫຼຽວເບິ່ງ ແນ່ເດີ້

  • ບໍ່ມີ ເສັຽສັງຍ້ອນ ທຳນຽມຄ່າຄຳປາກ
    ບໍ່ເສັຽຄຳຄ່າລ້ານ ຄັນນາງຕ້ານຕໍ່ພີ່ຊາຍ.

  • ບໍ່ມັກ ກໍໃຫ້ນ້ອງລົມຫຼີ້ນ ເຫງົານອນຕາງສວ່າງ
    ບາງທີເປັນພີ່ນ້ອງ ເມືອໜ້າສ່ອງບໍ່ເຫັນ.

  • ບໍ່ມັກອ້າຍ ຊັງຫຼາຍຢ່າຟ້າວດ່າ
    ບາດວ່າເປັນແມ່ຮ້າງ ຍັງຊິເວົ້າເອີ່ຍຫາ

  • ບໍ່ຢາກໄກໄປຈາກໜ້າ ຫຼືເລີກລາໄປໄກຫ່າງ
    ບໍ່ຢາກລາພາກຂ້າງ ຫຼືໜີຊົ້ນກົ່ນຫາຽ
    ເຫດວ່າ ຊີວາອ້າຽ ຂອງຊາຽເໝິດຄຸນຄ່າ
    ຫຼີກວິວາໃຫ້ເຈົ້າ ກັບເຂົານັ້ນຜູ່ຄູ່ກັນ
    ສ່ວນວ່າໂຕອ້າຽນັ້ນ ຕັດສັມພັນບໍ່ຫຍຸ້ງກ່ຽວ
    ເຖິງວ່າໃນໃຈດຽວ ຍັງມີພຽງຮັກເຈົ້າ ກະຍອມເວົ້າວ່າເອີ່ຽລາ

  • ບໍ່ຢາກພັດພາກເວັ້ນ ເວນກໍ່ຈ່ອງຈຳໜີ
    ບໍ່ຢາກໄກນາຣີ ກໍ່ເລົ່າມີເວນຕ້ອງ
    ມາສນອງນຳຍູ້ ຊູໄປໃຫ້ປະປ່ອຍ
    ວາສນາຄົນພອຍ ຄັນບໍ່ຄອຍຄາດໄດ້ ແສນຊິໃກ້ກໍ່ເລົ່າໄກ.

  • ບໍ່ຢາກເວົ້າພື້ນຮ້າຍ ສະຫາຽເກີຟັງກ່ອນ
    ຕົກຖືກຕອນກ່າວຕ້ານ ຂານຖ້ອຽຄ່ອຽຟັງ
    ຈັກວ່າເປັນຫຍັງແທ້ ໃຈຮຽມຫາກມາຕ່າງ
    ເປັນກະເວີ້ງກະວ້າງ ຄືໄຂ້ຊ່ວງບໍ່ເປັນ
    ຄິດເຫັນຄົນເຄີຽເວົ້າ ເຫງົາໃຈບໍ່ມີຊ່ວງ
    ອຸກອັ່ງຊວງຫ່ວງຫ້າວ ເນົາເນື້ອບໍ່ສບາຽ
    ເທິງຢາກອາຽເທິງຢາກກ້າ ຕີນມືຊາລ້າລ່ອຽ
    ຄອຽແຕ່ຍາມຊິພໍ້ ມາຄືຮ້າງຫ່າງໄກ ແທ້ນໍ.

  • ບໍ່ຢາກລາຈາກ
    ປາຊິໄກວັງນ້ຳ ຄຳເອີຽຊິເອີ້ນສັ່ງ
    ຊັ່ງຊິໄກໝາກໂຕ້ນ ຄົນຊິໄຫ້ແອ່ວນຳ
    ຄຳຊິໄກສາຽສ້ອຽ ກອຽມັນຊິລາປ່າ
    ໝາຊິລາເຂົ້າປັ້ນ ກະສັນໃຫ້ແອ່ວນຳ

    ປູປາຊິລາຍັງນ້ຳ ເຂົ້າກ້ຳຊິລາໜອງ
    ບົວທອງຊິລາບຶງ ບ່າວພີ່ຊາຽຊິລານ້ອງ
    ໜອງຊິລາຍັງນ້ຳ ນາທາມຊິລາທົ່ງ
    ຜົມປົ່ງລາງ່ອນໂດ້ນ ຫວີຊິຊົ້ນບ່ອນໃດ

    ນັບມື້ໄກກັນແລ້ວ ຫົວເຮືອຊິລາຝັ່ງ
    ດອກສມັ່ງລາຈາກຕົ້ນ ຟານເອີຽຊິລາໜ່າງ
    ໝາກຂ່າງໄກໝາກກິ້ງ ຊິງຊິໄຫ້ຕໍ່ນົກທາ

    ກາຊິໄລໄກ່ນ້ອຽ ອ້ອຽຊິຫ່າງຮາມສວນ
    ດວນດັນຫອມ ຊິລາກໍໄກຕົ້ນ
    ຝົນຊິລາຍັງຟ້າ ປູປາຊິລາບວກ
    ຮວກຊິລາແມ່ນ້ຳ ນາງນ້ອຽຄ່ອຽຢູ່ດີ

    ປີຊິລາກ້ວຽ ຄວາຍບັກເລຊິລາທົ່ງ
    ດົ້ງຊິລາໝູ່ມ້ອນ ສວນມອນຊິລາຈໍ່
    ປໍຊິລາເຊື້ອກອ້ອງ ຄວາຍນັ້ນຄ່ອຽຢູ່ດີ

    ສີຊິໄລລາໜ້າ ບາທາຊິລາເກີບ
    ເສີີບຊິລາປີ່ແອ້ ແຄນໄດ້ຂຸ່ຍຊໍ

    ນໍຊິລາຍັງຊ້າງ ເສືອສາງຊິລາປ່າ
    ສາຊິລາປ່າຫຍ້າ ກວຽຊິລາຊ້ວນ ທວນຊິລາຫຍ້າ ຝາເຮືອນທັງດວດ ຕິບນວດລາກະເຊົ້າ ບອກປູນນັ້ນຄ່ອຽຢູ່ດີ.
    (ຜາແດງ)

  • ບໍ່ອອນຊອນ
    ຊັງຫຍັງຫຼ້າ ສັງບໍ່ຈາເວົ້າຕໍ່ ພີ່ຊາຽນໍ້
    ໃຫ້ຕຣອມໃຈກະດໍ້ ສິຂໍເວົ້າບໍ່ຢາກອາຽ
    ເດືອນສາມ-ສີ່ ທີ່ໝາຽພໍ້ ພໍ່ແມ່ເພິ່ນ-ໄປຈາຂໍ
    ນາງຜັດຍໍຄຳຂານ ວ່າວຽກງານບໍ່ທັນພ້ອມ
    ຮອດເດືອນຫົກກະຍອມຖ້າ ເດືອນເຈັດມາກະຣໍຢູ່
    ຈົນວ່າປູ່... ເຂົ້າພັນສາສິອອກແລ້ວ ບຸນເຂົ້າສລາກກະເລົ່າກາຽ
    ບຸນກະຖີນສິລແຮ່ງໃກ້ ໃຜກະມາຕຽມແຫນແຫ່
    ເຫຼືອແຕ່ອ້າຽແລະນ້ອງ ບໍ່ມີໝ້ອງສິແຫ່ໄປ
    ຄຽດອັນໃດໃຫ້ອ້າຽ... ຫຼືມີໃໝ່ໃຈເປັນສອງ
    ປ່ອຽໃຫ້ຊາຽຄອງຫາ ໝ່າເຂົ້າຄອຽພອຽອິດເອື້ອນ
    ສຸດອ້າຽຂຽນສານໃຫ້ ຫຼາຽ ຈ.ມ. ກະມິດຢູ່
    ຕູ່ຫຼູ່ເອີ້ຽ... ເຈົ້າຜູ້ພົ້ວດອກຫວ້ານ ໄປບານອ້າ... ບັກຫ່າໃດ
    ເຮັດອ້າຽຕຣອມໃຈໄຂ້ ໄດ້ໄຫ້ຮ່ຳຄະນິງຫາ ນຳນໍ້
    ຫຼົງວາຈາຂອງນາງ ຊ່າງກະທຳນຳອ້າຽ
    ໄປທາງໃດກະໄປຖ້ອນ ບໍ່ອອນຊອນເຈົ້າຄືເກົ່າ
    ບໍ່ໄດ້ຄິດຕໍ່ເຈົ້າ ໃຫ້ເວຣເຂົ້າແຈກຫາ... ດອກເດີ້

  • ບາດຊິໄດ້ ບິນມາຄືນົກຮູກ
    ຈັບແຂນຜູກຈ່ອງນ້າວ ຊາວຄົ້ວຄວ່າເອົາ
    ຫຽັບພາເຂົ້າ ຂັນເອົາໃຫ້ມັນຮອດ
    ນັ່ງຕລອດລຽບຂ້າງ ແກະກ້າງຕ່ອນປາ.

  • ບາດຮ່າ ບຸນເຄີຽສ້າງ ຜລານາງເຄີຽໄດ້ຮ່ວມ
    ຄັນແມ່ນ ຄາດໄດ້ຮ້ວມ ໄປແລ້ວກໍ່ຕ່າວຄືນ

  • ບ້ານອ້າຽບໍ່ມຸງຫຍ້າ ຫຼັງຄາເປັນຄຳຫຼໍ່
    ເສົາເຮືອນທໍ່ຕານຕົ້ນ ເງີນຄຳລົ້ນເອົາເຮັດໄຫ ພຸ້ຕວ່າ

  • ບ່າວຜູ້ດີທີ່ໄກບ້ານ ຢ່າລືມຊານເຮືອນເກົ່າ
    ຢ່າລືມຜູ້ນັ່ງເຝົ້າ ແລງເຊົ້າຈົ່ມຫາ.

 

  • ປັນຫາ ສຽວສວາດ
    ຊາຽຄົນນື່ງ ຊື່ວ່າສັພພະເຫຼົ່າຫຼາກ ຂວານຖາກ ບໍ່ມີ ຫອນ
    ຈອນຟອນ  ບໍ່ ມີຫາງ ລາກຂີ້ດິນ ຈຳກົ້ນ
    ຊາຽນັ້ນ ແບກພ້ານ້ອຽ ຖ້ວມບ່າ ບັງຫູ
    ຄົມມັນບັງ ທໍ່ຄູ ຄັນຕ້ອນ
    ມັນກະຍອງ ແຍງເຂົ້າ ຟັນງູ ຂາດທ່ອນ
    ປຸ້ນທ້ອງຂາດ ຍັງແຕ່ສັນຫຼັງ
    ມັນກະໄປຟັນເອົາ ໄມ້ກາງກໍ ລຳປ່ຽວ
    ມາເຮັດໜ້າ ນ້ອຽນ້ອຽ ຂາສັ້ນຄ່າວາ
    ເບັດສື່ແລ້ວ ວາງໄວ້ ຜັດເລົ່າໂງ
    ມັນໄປ ຕັດປ່ານປຽດ ມາປັ່ນເປັນສາຽ
    ປ່ານນັ້ນ ກົກມັນເທົ້າ ທໍຣະນີພາຽລຸ່ມ
    ປາຽຍັ່ງຂື້ນ ເມືອງຟ້າ ຮອດພຣົມ
    ສົມໃຈທ້າວ ໃຈຍາວຂໍ້ຫຼໍ້
    ມັນຫາກຂາວ ສິ່ງໝໍ້ ດຳປື້ ສິ່ງປູນ...
  • ບຸນເຂົ້າສລາກ (ບຸນເຂົ້າສາກ)
    ຂໍສາທົກຍົກກອນຊີ້ ປະເພນີຮີຕເກົ່າ
    ເລົ່າເຣື້ອງຕັ້ງແຕ່ເຄົ້າ ສຳເນົາພື້ນຖິ່ນສຖານ
    ເປັນຕຳນານຕະກາລພຸ້ນ ປວັດບຸນຂອງເດືອນສິບ
    ຂໍຍົກຫຍິບນິທານທັມ ນ້ອມນຳມາເຜີຽແກ້
    ແຜ່ຜາຽໃຫ້ໂລກຮູ້ ຕາມຮູທີ່ຮຽມອ່ານ
    ເປັນຫຼັກຖານຈາຮີຕ ຮີຕເຄົ້າແຕ່ເກົ່າຫຼັງ

    ຂໍພິວາທະຕັ້ງ ຍັງຄຸນພຣະໄຕຣຣັຕນ໌
    ພອນພິພັດ ປົກເກດເກົ້າ ກວມກຸ້ມແຜ່ຜາຽ ນັ້ນທ້ອນ
    ຍໍມືນົບນອບໄຫວ້ ປິຕຸເຣສພຣະມານດາ
    ທັງຄູບາອາຈາຣຍ໌ ໂປຣດປະທານຄອງອໍ້
    ແມ່ນຕິດຂັດຂັງຂໍ້ ຂໍໃຫ້ມີທາງສ່ອງ
    ຂໍໃຫ້ແລເຫັນປ່ອງ ຂໍໃຫ້ມອງເຫັນສົ້ນ ບາດຍາມຄົ້ນດັ້ນຜຍາ

    ບັດນີ້... ຊິໄດ້ພັນນະນາເຣື່ອງ ທີ່ເລົ່າຂານນານມາ
    ມີບຸຕຕາ ກະດຸມພີ ບິດາຕາຽວາຽຊົນແລ້ວ
    ເຫຼືອແຕ່ແມ່ມິ່ງແກ້ວ ກວມກຸ້ມເກສ ຂມ່ອມ
    ຜູ້ຖນອມກ່ອມຕຸ້ມ ອອຍອຸ້ມໃຫ້ໃຫຍ່ມາ

    ຄາວບຸຕຕາພັນສາຖ້ວນ ສົມຄວນສົມຣົດແຕ່ງ
    ແມ່ຈັດແຈງແຕ່ງລູກໃພ້ ຫວັງໃຫ້ຄູ່ຮຽມ
    ຖານະທຽມທົງທ້າວ ສວຽງາມສາວໜຸ່ມ
    ບໍ່ຜິດແປກລ່ວງລ້ຳ ສອງກ້ຳພ່ຳສເມີ

    ແຕ່... ທຸກຄົນ ໃນໂລກນີ້ ຍັງມີສິ່ງທີ່ເຂີນຂາດ
    ບໍ່ອາດຄົບຖີ່ຖ້ວນ ໃຜນັ້ນກໍດັ່ງກັນ
    ພັນລະຍາທ້າວນັ້ນ ເກີດເປັນໝັນບໍ່ມີບຸຕ
    ຊິສິ້ນສຸດສູນສືບສາຽ ຈື່ງໄດ້ໝາຽຍິງໃໝ່ຊ້ອນ
    ພໍໄດ້ຊອນເລີຽຫຼົງກ້າວ ປະເມັຽເກົ່າໃຫ້ເຫງົາຈິຕ
    ນາງເລີຽຄິດຣິສຍາ ພ່ຳພັນນະນານ້ຳຕາຍ້ອຽ....


    "ໂອ້.. ພີ່ເອີ້ຽ.. ນ້ອງນີ້ຄອຽຄອງຖ້າ ພັສດາບໍ່ມາແຫວ່
    ໄປຫຼົງແຊ່ຊົມເມັຽນ້ອຽ ປ່ອຽໃຫ້ນ້ອງນັ່ງເຫງົາ
    ລືມເມັຽກົກເມັຽເຄົ້າ ໄປຫຼົງສາວຂື້ນໃໝ່
    ຊ່າງອວ່າຽໃຈໃຫ້ຂະເຈົ້າ ໃຫ້ສາວເຖົ້ານີ້ນັ່ງຊຶມ
    ໝົດຊາກຮັກອ້າຽບໍ່ປຶ້ມ ຊ້ຳມາຕື່ມໃຫ້ໃຈເຈັບ
    ຄືຈັ່ງເໜັບໜາມແທງ ຖັ່ງໃນມໂນເນື້ອ
    ຄອຽເສດເຫຼືອຮັກຈາກອ້າຽ ໃຈດວງດຽວມາປັນແບ່ງ
    ເຈັບປວດແຮງອິດອ່ອນລ້າ ພໍປານຟ້າຜ່າສມອງ
    ເມື່ອສຸດທົນຈຳເປັນຕ້ອງ ຫາປ່ອງສນອງຕອບ
    ລືມຜິດຊອບຊົ່ວຮ້າຽ ກຳເນີດຮ້າຽຝ່າຽມາຣ...
    ເຮົານີ້ເປັນເມັຽເຄົ້າ ຊິເອົາຍັງອຸບາຽ ໝາຽມາຈະລໍ້ອ່ອຽ
    ກຳຈັດນາງເມັຽນ້ອຽ ໃຫ້ມອດມ້ອຽມໍຣະນາ... ກ່ອນແລ້ວ.."

    ພໍແຕ່ໄດ້ວ່າແລ້ວ ເລີຽລົງຈາກເຮືອນຕົນ
    ຫຍິບຢາຝົນຟ້າວດ່ວນຫາ ເຮືອນພັນລະຍາ ຜູ້ເປັນນ້ອຽ
    ເຮັດເປັນສອຽວອຽໜ້າ ວາຈາອ້ອຽອິ່ນ
    "ແມ່ນຢູ່ກິນສບາຽບໍ້  ບໍ່ມີຂໍ້ຂາດເຂີນ ແດ່ລື
    ພີ່ດຸ່ງເດີນມາຫານ້ອງ ດ້ວຽໃຈຈ່ອງຈຳນົງໝາຽ ນາງເອີ້ຽ
    ເຮົາຮ່ວມຊາຽຄົນດຽວກັນ ສ້າງສັນສັມພັນໄມຕຣີໄວ້
    ຄັນເມື່ອໃດນາງຫຼ້າ ຖືຄັນພາໃຫ້ບອກພີ່
    ມີຢາດີຊິໃຫ້ນ້ອງ ຮັບຣອງເຮື່ອງສັພພະຄຸນ
    ເປັນຢາຄູນຄວນຄ້ຳ ບຳຣຸງຄີງບໍ່ໃຫ້ຫຼ່າ
    ບຳຣຸງ-ພາພຽບພ້ອມ ຖນອມຄຸ້ມສູ່ຂນານ
    ຍາມຍິງມານທ້ອງໂຍ້ ຄວາມໂສພາຊິລ້າຫຼ່ອຽ
    ຄວາມງາມຖອຽຖົດເຂົ້າ ເອົາຢານີ້ເຂົ້າຊ່ອຽຊູ
    ເຈົ້ານັ້ນຜູ້ງາມພ້ຽງ ພຽງສາວສວັນແຕ່ງ
    ໃຫ້ເຈົ້າແພງຄວາມງາມໄວ້ ຢ່າຊູໃຫ້ຫຼ່າຖອຽ.. ເດີ້ນາງເດີ້"

    ບັດນີ້ ມາຮອດບັ້ນ ພັລລະຍາຫຼວງມາລໍ້ອ່ອຽ
    ຢາແທ້ງລູກໃຫ້ເມັຽນ້ອຽ ສຳອອຽເອື້ອນເອີ່ຽຄວາມ
    ເປັນໄປຕາມກັມສ້າງ ເມັຽນ້ອຽນາງບໍ່ຮູ້ຫຼ່ຽມ
    ບໍ່ໄດ້ຕຽມທ່່າຕໍ່ສູ້ ຫວນຮູ້ຮ່ອມອຸບາຽ
    ລູກຕາຽແທ້ງໃນທ້ອງ ຕັ້ງສອງຄາວຈັ່ງຄຶດຮ່ຳ
    ເປັນຍ້ອນກັມຍິ່ງຍວດ ໃຫ້ໝໍຕຣວດເບິ່ງກ່ອນນາ..

    ໝໍຕຣວດແລ້ວບອກພ້ອມ ເປັນຍ້ອນຢາທີ່ກິນກ່ອນ
    ເຂົ້າບັ່ນທອນໃຫ້ລູກແທ້ງ ຈຶ່ງຈາແຈ້ງແກ່ກະໃຈ
    "ອຸກຫະທັຍທີ່ຫຼົງຫຼົ້ມ ໄປຫຼົງເຊື່ອຄວາມຫວານ
    ຫຼົງຊາບຊ່ານຣືທັຍ ຫຼົງໄຫຼນຳຄຳລໍ້
    ແກ້ງຍົກຍໍຕໍແຫຼປີ້ນ ຫຼົງຖວິນນຳຄຳມ່ວນ
    ລໍ້ໃຫ້ກິນນ້ຳງ້ວນ ແຊມຊ້ວນສິ່ງເບື່ອເມົາ

    ຕັ້ງສອງຄາວທີ່ເຮົາແທ້ງ ລູກແດງແດງມໍຣະນາດ
    ຊີວາວາດດ່າວດີ້ນ ສູນສິ້ນແມ່ນບໍ່ຍັງ
    ຍ້ອນວ່າຟັງຄວາມເວົ້າ ຫູເບົາເຊື່ອຄົນງ່າຽ
    ລູກມາຕາຽແມ່ຫົວປູ້ ບໍ່ຫວນຮູ້ຮ່ອມການ
    ນັບແຕ່ ມື້ນີ້ນັ້ນ ຄັນຖືຄັນຊິປິດເຊື່ອງ
    ບໍ່ບອກຂ່າວເລົ່າເຮື້ອງ ເຖິງເບື້ອງຜູ້ໃຈມານ...

    ວັນຄືນຜ່ານການລ່ວງພົ້ນ ດົນເດືອນຈົນທ້ອງແກ່
    ທ້ອງເຄີຽແປກະເຣີ່ມປ້າງ ທີ່ບັງໄວ້ກະພົ້ນເຜີຽ
    ເມັຽຫຼວງເລີຽເລົ່າຮູ້ ເຫັນຮ່ອມກະບວນຄັນຣ໌
    ຕ້ອງຈັດການມາຣຫົວຂົນ ລູກຂອງຄົນອີ່ນາງນ້ອຽ
    ບໍ່ອາຈປ່ອຽໃຫ້ລອຽໜ້າ ຄວາມອິດສາມາບັງບຽດ
    ຄວາມຄຶດຄຽດປິດທາງແຈ້ງ ດ້ວຽແຮງຮ້າຽຣິສສຍາ
    ຈຶ່ງເອົາຢາວ່າຜີບອກ ອອກປາກອິ່ນາງຄັນຣ໌
    ຫວັງສັງຫານບຸຕຕາ ໃນຄັນ-ພາ ໃຫ້ສູນສິ້ນ
    ເມັຽນ້ອຽກືນກິນລົງທ້ອງ ຂອງສແລງເຣີ້ມຜແລງຣິດ
    ແນວຢາພິດມີຣິດຮ້າຽ ລູກຕາຽດີ້ນອັ່ງອຸທອນ
    ຊ້ຳມານອນຕາຽຂວາງທ້ອງ ຖີ້ມແມ່ທໍຣະມານ
    ແມ່ໄດ້ຫັນໃຈປາ ດວງວິນຍານຊິດິບດີ້ນ
    ດ້ວຽດວງຈິນຕ໌ມຸ້ງໝັ້ນ ອາຖິດຖານດ້ວຽອາຄາຕ
    ແຮງພຍາບາທຂອງຜູ່ຂ້າ ເກີດຊາຕໜ້າຊິເອົາຄືນ
    ສຸດຈະຝືນຄົນໃຈຮ້າຽ ນາງເມັຽໃຫຍ່ຜູ່ໃຈໂຫດ
    ຂໍລົງໂທສມັນຊາຕໜ້າ ວິນຍານຂ້າຂໍຈ່ອງເວຣ..

    ເລີຽເກີດເປັນຄູ່ຄ້ຳ ເວຣນຳຈິຕອະຖິດຖານ
    ຜູ່ຕາຽມານທ້ອງກົມ ກັມສ້າງສົມເປັນແມວຮ້າຽ
    ສ່ວນເມັຽຫຼວງໄປບໍ່ມົ້ມ ຜົວຮູ້ປົມທີ່ນາງກໍ່
    ມີດບັ່ນຄໍຄົນໃຈຮ້າຽ ໃຫ້ຕາຽດີ້ນສິ້ນຊີບຊົນ
    ດວງກະມົນວິນຍານເຈົ້າ ກາຽມາເຂົ້າຢູ່ນຳໄກ່
    ພໍອອກໄຂ່ມາແລ້ວ ແມວຮ້າຽກະຫ່ອນກືນ
    ບືນໄປຮອດສາມຄັ້ງ ແມວກໍຍັງບຽດບັງຕໍ່
    ຫຍ້ຳຮອດຄໍແມ່ໄກ່ແກ້ວ ຊິສິ້ນແລ້ວຈັ່ງວາວອນ

    ສາທຸທ້ອນ ຊາຕນີ້ຂ້າ ໄດ້ເກີດມາເປັນໄກ່
    ແມວມາໄລ່ກິນໄຂ່ສິ້ນ ທັງກິນຂ້ອຽຜູ້ອ່ອນແຮງ
    ເດຊະແຮງ ອະຖິດຖານະຕັ້ງ ຍັງສັມປຣາຍະພົພໃໝ່
    ຂໍຜູ່ຂ້າເກີດໄດ້ ຢ່າພ່າຽແພ້ໃຫ້ແກ່ມັນ...

    ພໍແຕ່ຕາຽຈາກຊາຕນັ້ນ ແມ່ໄກ່ເກີດເປັນເສືອ
    ແມວເປັນແນວນາມກວາງ ຈ່ອງເວຣກັນບໍ່ຈົບສິ້ນ
    ເສືອກໍ່ກິນລູກກວາງນ້ອຽ ຕາຽຮອຽກັມເກົ່າ
    ພໍກິນເໝີດລູກເຕົ້າ ເລີຽກິນເຈົ້າແມ່ສມັນ
    ເປັນເສກເຊັ່ນນີ້ນັ້ນ ຫຼາຽກັນລະປະ ໂບຮານວ່າ
    ອຸປປະມາຄືດັ່ງແມວກັບໜູ ຄືດັ່ງງູຄູ່ຈອນຟອນ
    ກາເປັນເວຣກັບນົກເຄົ້າ ເວຣເຫງົ້າຈ່ອງກັນ

    ອາວະສານະການຈໍ້ ຂໍເລົ່າຕໍ່ຕິດຕາມ
    ຍາມເມື່ອເວຣຈອງເວຣ ອ່ານໄປບໍ່ສຸດເຣື່ອງ
    ອັນວ່າ ເສືອເຫຼືອງພໍແຕ່ຕາຽຈາກຊາຕນັ້ນ  ໄດ້ຫັນມາເກີດໃໝ່
    ເປັນທິດາ ຕະກຸນໃຫຽ່ ນາມະ ກຸນທິດາ ໃນຊາຕນີ້ ມີພ້ອມທຸກສິ່ງສັນ
    ນາງກຸລະທິດາວ່ານັ້ນ  ຫຼັງແຕ່ງງານພໍສົມຄູ່
    ສອງກະຢູ່ສົມສືບສ້າງ ຈົນນາງນ້ອງທ້ອງໃຫຽ່ມາ
    ຍ້ອນເວລາໄປຫາເນື້ອ ນາງສມັນແຕ່ກາລກ່ອນ
    ຫຼັງມ້ວຽມໍຣະນະຍ້ອນເສືອຮ້າຽ ເວຣຈ່ອງໃຫ້ໄດ້ພົບກັນ
    ກັມບັນດານເກີດຊາຕນີ້ ເປັນຍັກສິນີຢູ່ໃນປ່າ
    ເນົາພະນາຫາຕ່ອນຊີ້ນ ຈອບກິນເນື້ອມນຸສຄົນ
    ເກີດບັນດົນມີຄົນເວົ້າ ໄດ້ຟັງຂ່າວແລ້ວເຄືອງຈິຕ
    ດ້ວຽແຮງພິສ ຣິສຍາ ທີ່ນຳພາແຕ່ກາລພຸ້ນ
    ເວຣກັມໝູນນ້ອມນຳກ້ຽວ ເກາະກ່ຽວກັນຫຼາຽຊາຕ
    ແຮງພຍາບາທຄຽດແຄ້ນ ໃຫ້ອຸກແໜ້ນອັ່ງມໂນ
    ເກີດເປັນໂກທາກ້ຽວ ເດີນທາງທຽວ ຢືນ ນອນ ນັ່ງ
    ມາຄິດຊັງນາງອັ່ນນີ້ ຈຳຕ້ອງຈີ້ຟ້າວຍ່ອງໄປ... ສາແລ້ວ

    ພໍແຕ່ໄດ້ວ່າແລ້ວ ເລີຽໂອມອ່ານພຣະຄາຖາ
    ດ້ວຽຣິດທາມົນຂັງ ກັບກາຽຮ່າງເປັນຄົນຈ້ອຽ
    ເພສພຽງນົງນາງນ້ອຽ ໜ້າສອຽວອຽຄືເພື່ອນເກົ່າ
    ນາງກຸລທິດາແຈ່ມເຈົ້າ ບໍ່ຫວນຮູ້ຮ່ອມອຸບາຽ
    ເດີນທາງໄປສເນີໜ້າ ທຳທ່າມາຢາມໝູ່
    ຫວັງຄ້ຳຊູຍາມເຈັບທ້ອງ ປະຄອງຄ້ຳບໍ່ຫ່າງຄີງ
    ແນວນາມຍິງສຫາຽແທ້ ບໍ່ແຊເຊືອນບາດຍາມຍາກ
    ອຸປປະຖາກຊ່ອຽຄ້ຳ ຍາມລ້າໄດ້ຊ່ອຽແຮງ
    ພໍໄດ້ແບ່ງເບົາບ້າງ ຄັນນາງເກີດລ້າຫຼ່ອຽ
    ບາດຍາມມີລູກນ້ອຽ ຊິຄອຽອູ້ມປ່ຽນມື  ວ່າຊັ້ນ

    ກຸລທິດາ ຟັງຄວາມເວົ້າ ຍັກໃນເງົາເນົາຮ່າງໝູ່
    ນາງບໍ່ຫວນຮ່ອມຮູ້ ເຖິງເລ້ ຫຼ່ຽມກະບວນ
    ນາງຈຶ່ງຊວນໃຫ້ຢູ່ບ້ານ ຊົ້ນຮົ່ມຊາຍຄາ
    ຈົນເວລາຄັນຣ໌ເຖິງ ຣະດູເດືອນຊິເຄື່ອນຄອດ
    ພໍແຕ່ ທາຣະໂກ ລອດ ຫຼຸດພົ້ນອຸທອນແມ່
    ຍັກກໍແປປ່ຽນປີ້ນ ກິນລູກນ້ອຽບໍ່ຍັງ
    ຈົນເຖິງສອງຄາວຄັ້ງ ນາງກຸລທິດາຈຶ່ງຮູ້ຮ່ອມ
    ບໍ່ຍິນຍອມໃຫ້ລູກມ້ວຽ ຕາຽດ້ວຽຍັກສິນີ

    ນາງຈຶ່ງໜີໄປຊົ້ນ ຫຼົບສົ້ນອີ່ນາງຍັກ
    ໄປພັກພິງຄາເມ ຮ່ອມເຮືອນສາມີເຄົ້າ
    ແລ້ວກໍເນົາໃນຫັ້ນ ຈົນວ່າຄັນຣ໌-ພາແກ່
    ຈຶ່ງໄດ້ຄອດລູກນ້ອຽ ງາມຊ້ອຽພ່ຳຣະອໍໍ

    ພໍຫຼາຽເດືອນຜ່ານພົ້ນ ຍັກກະວົນຫາຂ່າງ
    ຮູ້ເຣື່ອງຣາວຂ່າວບ່ອນຊົ້ນ ກໍເລີຽດົ້ນດຸ່ງໄປ
    ນາງກຸລທິດາກໍໄດ້ ຊວນຜົວກັບບ້ານເກົ່າ
    ໂອບອູ້ມເອົາລູກນ້ອຽ ຕາມຕ້ອຽດຸ່ງເດີນ
    ຍ່າງເພີນໆມາເຖິງເບື້ອງ ສະໂບກຂໍຣະນີ (ສະດອກບົວ)
    ມີຣະຫວ່າງກາງທາງ ຍ້ອນກັມວາງເວຣກ້ຽວ
    ໄດ້ນ້ອມໜ່ຽວນາງຫຼ້າ ກາຍາເກີດຮ້ອນຮຸ່ມ
    ບອກໃຫ້ຜົວອຸ້ມລູກຖ້າ  ສ່ວນຫຼ້າລົງສວ່າຽຄີງ
    ຕາຜັດສິງຫຼິງເຫັນໜ້າ ຍັກສານາງໃຈຊົ່ວ
    ຄວາມຢ້ານກົວຍັກຮ້າຽ ອຸ້ມລູກໄດ້ ຟ້າວແລ່ນໜີ...

    ເດຊະບຸນປາງກ່ອນກີ້ ໜີເຂົ້າສູ່ເຊຕະວັນ (ຊື່ຂອງວັຕແຫ່ວໜຶ່ງ)
    ເຂົ້າຖິ່ນຖານອາຣາມສົງ ພຣະພຸທອົງຊົງຍັ້ງ
    ທົງບົດບັງກາຽນາງຫຼ້າ ກັບບຸຕຕານ້ອຽອ່ອນ
    ຍັກບໍ່ຮ່ອນເຫັນໄດ້ ຈຶ່ງຖາມໄທ້ພຸທທະອົງ

    ພຣະພຸທທະອົງຊົງສແດງໃຫ້ ຝັກໃຝ່ໃນທັມມະ
    ໃຫ້ຍັກລະບາບເວັ້ນ ເວຣຂ້ອງເລີກຈ່ອງກັນ
    ຊົງບອກການແຕ່ກ່ອນກີ້ ມີກັມນຳຈ່ອງ
    ວັຖຖະວົນວຽນຂ້ອງ ນຳຄ້ອງບໍ່ສວ່າງຊາ
    ຍົກຄາຖາສແດງອ້າງ ເປັນຕົວຢ່າງບາງຕອນ
    ຊົງສັ່ງສອນສັພພະສັຕ ພຣະສູຕຕຣັດ... ສອນຊີ້

    "ນະຫິ ເວເຣນ ເວຣານິ ສມຸມນຸຕິທ ກຸທາຈະນັງ
    ອະເວເຣນ ຈະ ສມຸມນຸຕິ ເອສະ ທະມຸໂມ ສົນນຸຕຕະໂນຯ"
    (ໃນກາລະໃດໆ ເວຣທັງຫຼາຽໃນໂລກນີ້ ຍ່ອມບໍ່ຣະງັບດ້ວຽເວຣເລີຽ
    ກໍ່ແຕ່ຍອມຣະງັບໄດ້ ດ້ວຽຄວາມບໍ່ມີເວຣ ທັມມະຂໍ້ນີ້ ເປັນຂອງເກົ່າ)

    ເທດສນາພຸທໂທແຈ້ງ ປານແສງສ່ອງສວ່າງ
    ວິຖີທາງທີ່ມືດໝົ້ນ ເລົ່າເລີຽພົ້ນອົນທະການ
    ອະພັຍທານທັງສອງເບື້ອງ ຄວາມຂຸ່ນເຄືອງແລະແຄ້ນຄັ່ງ
    ພໍໄດ້ຟັງທັມມະເຈົ້າ ຄວາມມຸມເມົ້າກໍ່ສວ່າງຫາຽ
    ພຣະພຸທໂທຊົງສອນໄວ້ ໃຫ້ຫາຽໂກດເຄືອງກັນ
    ສ້າງສັມພັນໄມຕຣີ ເພື່ອຍຸຕິເວຣກັມກ້ຽວ
    ສອງກະໜ່ຽວນຳນ້ອມ ຍອມອະພັຍໃຈກະສວ່າງ
    ປານວ່າດວງສຸຣີໂຣຈ ໂຜດແສງແຈ້ງແຫ່ງຫະທັຍ
    ຍັກສິນີກໍ່ເລີຽໄດ້ ສັງຮອມໃຈຖວາຍບາທ
    ຂໍນຸຍາດພຣະອົງເຈົ້າ ຂໍເຂົ້າເຝົ້າຮັບສິລ
    ອົງມຸນິນທ໌ຍິນສຽງຮ້ອງ ຊົງສັ່ງກຸລທິດາ (ມຸນິນທ໌=ຊື່ມົງຄົນ, ຊື່ເສີມ)
    ເຈົ້າຈົ່ງພາຍັກສິນີ ໄປຢູ່ເຮືອນນຳດ້ວຽ... ຯຯ

    ຂໍອວ່າຽລົງຍົນຍໍ້ ຫຍໍ້ເຣື່ອງລົງລັດ
    ຂໍນຸຍາຕຕັດຕອນ ອ່ອນລົງລາໄດ້
    ຊິຂໍໄຂພໍພຽງຫຍໍ້ ພັນນະນາເຮັດໃຫ້ໝໍ່
    ນາງກຸລທິດານັ້ນນໍ້  ໄດ້ຍົກຍໍນາງຍັກໄວ້ ໃຫ້ເນົາຊົ້ນແມ່ນຢູ່ຖຽງ
    ຕາມພໍພຽງເນົາຖຽງນ້ອຽ ຄອຽເບິ່ງນາ-ເຝົ້າໄຮ່
    ນາງກຸລທິດາກະໄດ້ ຄອຽສົ່ງເຂົ້າແລະນ້ຳ ຊູຄ້ຳຍັກສິນີ
    ຍັກກໍ່ຫາກມີມົນກ້າ ຣິດທາອັນແຂງແກ່ງ
    ແມ່ນປີໃດຝົນແຮງ ຫຼືປີໃດຝົດຫຼ້າ ຟ້າແລ້ງແຈ້ງສຫາຽ
    ຍ້ອນວ່າຫວນຮູ້ດີ ເຫຕຮ່ອມທາງການຝົນ
    ວ່າຊິວົນວຽນຕົກ ນ້ອຽຫຼາຽໃນປີນີ້
    "ຄັນຝົນບໍ່ມີ ໃຫ້ເຈົ້າເຮັດນາລຸ່ມ
    ຄັນຝົນຊຸ່ມ  ໃຫ້ເຈົ້າຍັບຍ້າຽຍ່າງ
    ເຮັດນາທາງໂຄກເຍີ້ນ ເຂີນຂ້ອນບ່ອນຊິຄວນ... "

    ນາງກຸລທິດາໄດ້ຊ້ວນ ກະທຳການຕາມກ່າວ
    ກໍ່ເລົ່າເລີຽໄດ້ເຂົ້າ ຈົນຂາງເລົ້າບໍ່ເອ່ນກາງ
    ສ່ວນວ່າທາງໄທບ້ານ ໂຈດທ໌ຂານເຊັງຊ່າ
    ຖາມໄຖ່ຄວາມເປັນມາ ມີຕຳຣາຫຍັງເຈົ້າ ຈັ່ງໝານເຂົ້າສູ່ປີ..
    ກຸລທິດາເລີຽແຈ້ງ ຖແລງກ່າວຄວາມຈິງ
    ທີ່ໄດ້ພິງອາສັຍ ຍັກສຫາຽພາຽພຸ້ນ
    ຄອຽຄ້ຳຈຸນໜຸນເອື້ອ ທິດທາງໝ້ອງແວ່
    ຊຸມໄທບ້ານກະເລີຽແຫ່ ເຮັດນາຕາມຄຳເວົ້າ ເລີຽໝານເຂົ້າແມ່ນສູ່ຄົນ

    ພໍໜ້າຝົນວົນມາກ້ຽວ ຕົ້ນເຂົ້າຂຽວເປັນອຸ່ມທຸ່ມ
    ພວກໝູ່ຊຸມໄຜ່ບ້ານ ຈາຕ້ານຊິແຕ່ງທານ
    ເພື່ອອະພິນັນທະນາການເຈົ້າ ຍັກສີນີຄຸນໃຫຽ່ (ບຸນຄຸນ)
    ບອກຝົນຟ້າສັ່ງໄດ້ ໃຫ້ໝານເຂົ້າຊູ່ປີ
    ຕ່າງກໍ່ມີເຂົ້ານ້ຳ ທັງໂພດຊ໌ນ ພາເຫວີຽ
    ທັງຂອງຫວານຂອງຄາວ ກໍ່ກອງປານພູນ້ອຽ
    ຍັກກໍ່ຄອຽປັນໄວ້ ແບ່ງໄປເປັນຫຼາຽທ່ອງ
    ເຮັດກອງທານພຣະເຈົ້າ ພຣະສົງເຈົ້າຍົກຖວາຽ
    ເລີຽເອົາເລກໝາຽໄວ້ ຂຽນໃສ່ກອງທານ
    ຍໍທານຖວາຽພຣະສົງ ຕາມແຕ່ອົງຊິຈັບໄດ້
    ຄວາມເປັນໄປມາຈັ່ງຊີ້ ປະເພນີເຣີ່ມກໍ່
    ບຸນເຂົ້າສາກນີ້ນໍ ຄືສລາກພັກນັ້ນ ຈຳໄວ້ແນ່ສູ່ຄົນ..

    (ນັບຕັ້ງແຕ່ເຣີ້ມຕົ້ນ ອົດສາທົນຜຍາແຕ່ງ
    ອົດສາແຍງກໍ່ຕັ້ງ ເອວັງນີ້ແມ່ນເມື່ອຽຫຼາຽ.. ທ່ານເຮີ້ຽ
    ຜູ່ຂ້າຂໍວອນໄຫວ້ ແດ່ອາດຍາທຸກໆທ່ານ
    ອ່ານບ່ອນໃດຜິດພ້ຽງ ສຳນຽງພາດໂປຣດອພັຍ
    ຄັນບ່ອນໃດບໍ່ຖືກຕ້ອງ ຜິດທຳນອງສັງວາດສ໌
    ຄັນແມ່ນຂາດເຂີນບ້າງ ຂໍທາງໄວ້ໃຫ້ຕໍ່ເຕີມ
    ຂໍໃຫ້ເສີມແຊມຊວ້ານ ຂບວນຄວາມທີ່ຂາດແຫວ່ງ
    ຂໍໃຫ້ແຍ່ງລ່ຳນ້ອງ ຜູ່ຂຽນໜ້ອຽຖ່ອຽຜຍາ...
    ຊິຂໍລາລົງແລ້ວ ນິດຖິຕັງເອວັງກ່ອນ
    ພໍຮອດຕອນໃໝ່ພຸ້ນ ຈັ່ງຫວນພໍ້ພົບກັນ ທ່ານເອີ້ຽ..)

    ( ຄຳແປ
  • ກັນ, ກັນລະປະ, ກັປ = ກາລະ ຮະຍະເວລາອັນຍາວນານ
  • ຄັນ, ຄັນຣ໌, ຄັນ-ພາ = ຕັ້ງຄັນ, ຕັ້ງທ້ອງ, ມານລູກ
  • ຄອດ = ອອກລູກ, ຄອດລູກ
  • ສາທົກ = ຍົກຕົວຢ່າງມາຊີ້ແຈງ
  • ສຳເນົາ = ຂັດລອກ, ບໍ່ແມ່ນຕົ້ນສບັບ
  • ສັມປຣາຍະພົພ = ຊາຕໜ້າ
  • ສມັນ = ສັຕສີ່ຕີນຊນິດໜຶ່ງ ຈຳພວກເນື້ອ ເຊັ່ນ ກວາງ, ຟານ..
  • ດວງຈິນຕ໌ = ຈິນຕະນາການ, ການຄິດ
  • ທາຣະໂກ = ເດັກນ້ອຽ
  • ພອນພິພັດ = ຊື່ເສີມດວງຂອງຄົນທີ່ເກີດວັນອັງຄານ
    )
  • ບຸນກຸສົນເຄີຍສ້າງ ເກີດມາໄດ້ຮ່ວມທາງ ນຳພະນາງດອກຄືວ່າ
    ຄົງເປັນຕາຊື້ນມື້ນ ຄືນເຊົ້າເກົ່າສະໜິມ
    ຄັນເຈົ້າໄລລືມຖິ້ມ ລືມໄປໃຫ້ເຂົາຊ່າ
    ຄືຈັ່ງມີດແລະພ້າ ຝົນໄດ້ກໍບໍ່ຄົມ
  • ບຸນບານ້ອຍ ຄົນພອຽໄດ້ພາກຖິ່ນ
    ມາຫາກິນຕ່າງບ້ານ ນານລ້ຳລ່ວງເຖິງ
    ຢູ່ມາເຫິງກະເລີຽພໍ້ ໂອນໍນຸດທະນາດ
    ແສນສອາດກ່ຳກ້ຽງ ຢາກຮຽງຊ້ອນຊື່ນຊົມ
    ເຈົ້າຜູ້ພົ້ວດອກອົ້ມ ອ້າຍຈົ່ມແຕ່ນຳຮຽມ
    ໃຈບໍ່ຈຽມຫຼົງມັກ ຮັກຊູທຽມຊູ້
    ແສນອົດຊູໃຈອ້າຽ ມະໂນໝາຍບໍ່ສົມມາດ
    ໃຈໝາຍມາດກະເລົ່າແລ້ງ ລາລ້າງລ່ອງໄຫຼ ແທ້ແລ້ວ.
  • ບຸນບໍ່ຄາດໄດ້ຊ້ອນ ນອນຄູ່ຄຽງກາຽ
    ສຸດທີ່ໝາຽປອງຮັກ ທໍ່ດິນກັບຟ້າ
    ຊິນຊະຕາຜລານ້ອຽ ບໍ່ຫວັງຄອຽໄດ້ເປັນຄູ່
    ອານິສົງບໍ່ສົ່ງຍູ້ ແມ່ນຊູຂຶ້ນກະບໍ່ເຖິງ
    ແຫງນຄໍເບິ່ງແຜ່ນຟ້າ ເຈົ້າມີຄ່າພຽງແສນ
    ກະຕ່າຽແຫງນຄໍນຳ ປຽບປະມັຍຄືອ້າຽ
    ມັກເຈົ້າຫຼາຽບໍ່ຫານກ້າ ເວທທະນາຄົນຕ້ອຽຕ່ຳ
    ຫຼົງຄິດນຳຢູ່ບໍ່ແລ້ວ ເປັນແປ້ວຢູ່ຫວ່າງໃຈ
    ຊາຕວ່າຄົນຂີ້ໄຮ້ ໂຕກ່ຳດຳກາ
    ວາສນາຄົນພອຽ ບໍ່ອາຈທຽມຫົງຟ້າ
    ໄດ້ແຕ່ພັນນະນາໂອ້ ແນວວ່າໂຕບໍ່ສົມເພິ່ນ
    ເກີນຄວາມຈິງໄປບໍ່ໄດ້ ຫາກມີແທ້ແຕ່ຝັນ.
  • ບຸນບໍ່ ເຄີຍເຂົ້າຖ້ຳ  ດຳໄປບໍ່ຮູ້ຊອດ
    ບຸນບໍ່ຮອດຍອດແກ້ວ ປີນຂຶ້ນກໍບໍ່ເຖິງ
  • ບຸນບໍ່ ເຄີຍຂີ່ຊ້າງ ຢ້ານແລ່ນສະເດັນຕົກ
    ບຸນບໍ່ເຄີຍຈົກຮູ ຍັ່ງລົງຊິຄາເງື້ອມ.
  • ບຸນບໍ່ເຄີຽສົມສ້າງ ຫຼາຽທາງຄວາມຍາກ
    ແສນລຳບາກບຽດເບື້ອງ ເຄືອງຂໍ້ມໍ່ໃຈ
    ສຸດວິສັຍແສນເສົ້າ ເຫງົາຊວງຊຶມຊາບ
    ເໝືອນດັ່ງອາບພິດຮ້ອນ ແຮງອ້າຽຫຸ່ມໄຟ.
  • ບຸນຜລາພາເສົ້າ ເວົ້າວອນກອນວ່າ
    ໜັກອຸຣາເຮັ່ງຮ້ອນ ບໍ່ຮອມຮູ້ຫ່າງຫາຽ
    ຄິດຮອດອ້າຽ ຊາຽກໍ່ອ່ອຽຄຳອວນ
    ຄຳຈາຫວນ ແຫ່ງຫອມບໍ່ມີຮ້າຽ
    ໂຕຊາຍນີ້ ວັນຄືນສະອື້ນໂອ່
    ແນວວ່າໂຕຕ່ຳຕ້ອຽ ຢາກຖອຽລ້າລ່າລົງ
    ໄກຟາກຊົ້ງ ຂົງເຂດຄາເມ
    ສັນໃດເຊມາພົບ ຈວບພານເຫັນພໍ້
    ຫຼືແມ່ນຊາຕາຫຍໍ້ ໂອນໍບຸປປະຊາດ
    ເວນບໍ່ຂາດຈາກເຈົ້າ ຈຳຕ້ອງຈ່ອງດຶງ.
  • ບຸນຫົວ ບໍ່ສົມບຸນຮົ້ວ ບຸນງົວບໍ່ສົມແອກ
    ບຸນຕາແຮກບໍ່ສົມໄກ່ຕົ້ມ ງົມລ້ຽງກໍບໍ່ກິນ.

 

  • ບົວບໍ່ ມີຫ່າງນ້ຳ ຫວັງຟູມເທົ່າຊົ່ວ
    ພຣະຈັນບໍ່ມີຜ່າງຂ້າງ ແຝງລ້ອມຫຼ່ຽມສະເມັນ.