ໝວດທີ່ຂຶ້ນຕົ້ນດ້ວຽຕົວ "ນ"

 

  • ນ້ຳຕາລິນຢາດຍ້ອຽ ກອຽໃຈນາງຕ້ອງພາກແມ່
    ຫົວໃຈແດດັ່ນດີ້ນ ເໝືອນສີ້ນເມື່ອຽແຮງ
    ໃຈສແລງຍາມຕ້ານ ໄຫວ້ວານພໍ່ກັບແມ່
    ສອງເຂືອເຖົ້າລ້ຽງແຕ່ ມື້ເກີດມາແຕ່ກີ້ ບໍ່ມີມື້ໄດ້ພັກເຊົາ
    ໃຫ້ເຈົ້າເນົາໃນບ້ານ ຟັງຄຳຂານ ຍາມຍາຍວ່າ
    ໃຫ້ເຈົ້າເປັນແກ້ວຕາ ຄອຽຟັງຄຳກ່າວຕ້ານ ຢ່າດື້ດ້ານໃຫ້ເຊື່ອຄວາມ ເດີ້ລູກແມ່ເອີ້ຽ

  • ນາງເອີ້ຍ... ໃຫ້ອ້າຽຈາປາກຕ້ານ ໂວຫານຖແລງກ່າວ
    ຢ່າຊິຊົງຟັ່ງຟ້າວ ສຳຫາວອ້າຍໜ່າຍຊັງ

    ພໍມີແຮງຕໍ່ຕັ້ງ ເຕີມຕື່ມໃຫ້ລືມອຸກ
    ຂໍຈານຳພໍລືມ ທຸກທີ່ທັງພະທັຍຫ້າວ
    ພໍລືມຄາວໃຈທໍ້ ໂອນໍຢ່າແຂງຂົ່ມ
    ຢ່າຟ້າວຈົ່ມເຫັ່ງຮ້າຍ ພໍໃຫ້ອ້າຽອຸ່ນກະໃຈ ແດ່ທ້ອນ.

  • ນາງເອີ້ຽ... ຄຶດຮອດເຈົ້າ ຫງອຽເຫງົາເສົ້າບໍ່ຊວ່າງ
    ໄດ້ແຕ່ນັ່ງໂສກເສົ້າ ກິນເຫຼົ້າເປັນໝູ່ຍຸງ ນາງເອີຽ

  • ນາງເອີຽ... ພຽງແຕ່ຫຼຽວເຫັນໜ້າ ທາແປ້ງຂາວມາເປີ່ນເວີ່ນ
    ທ່າທາງເຂີນຍີ້ມໃຫ້ ສົນໃຈອ້າຽແລ້ວແນ່ນອນ.

  • ນາງບໍ່ໄດ້ເສແສ້ງ ແກ້ງກ່າວຈາຂານ
    ຜຍາມີມານານ ຊ່ອຽສານເອົາໄວ້
    ໃຫ້ໄທເຮົາບໍ່ລືມຖີ້ມ ປະເພນີຄອງເກົ່າ
    ນາງຈຶ່ງມາວ່າເວົ້າ ນຳເຈົ້າຊ່ວຽຊູ.

  • ນາງນີ້
    ເນົາຫົນຫ້ອງ ຫໍທອງພິບພະອາດ
    ວາດສນາມາພົບພໍ້ ສິໄດ້ຈໍ້ໄລ່ໜີ ແທ້ນໍ
    ບຸນເຮົາມີ ເຄີຽພຽນສ້າງ ຜລາທານທຽວຍູ້ສົ່ງ
    ກົກສາຽແນນປົ່ງດົ້ວ ຍັງພົວກ້ຽວບໍ່ຈາງ
    ຄຳຮັກນາງຍັງເຄີຽເວົ້າ ສິແຕ່ງເອົາກະເຄີຽວ່າ
    ສິເປັນປູ່ເປັນຍ່າ ເປັນລູງຕາພ່ຳປ້າ ຄຳເວົ້າຢ່າປ່ຽນແປງ ເທາະນາ
    (ບໍ່ມື້ນີ້ຫຼືມື້ໜ້າ ນາງຄາເຍັບສາດໝອນ ຊິນໄໝຄອນແພວາ ຕຽມສົມມາ ອິແມ່ອ້າຽ ເລີຽຫ່າງຫາຽໄປຫຼາຍມື້)
    ຫົວໃຈຖືຮັກກອດກ້ຽວ... ໃຈຮັກດຽວຕໍ່ອ້າຽ  ບໍ່ໝາຽປີ້ນປ່ຽນໃຈ ດອກນາ

  • ນາງນີ້ ກ້ຽງນອກເນື້ອ ທາງໃນກະກ້ຽງກ່ອງ
    ໃສຍອງໆຄືໜ່ວຽແກ້ວ ແນວສິຂຸ້ນກະບໍ່ມີ ຢ້ານຫຼາຽເດ້...
    ຢ້ານແຕ່ທາງຝ່າຽອ້າຽ ກ້ຽງຫາກກ້ຽງແຕ່ນອກ ທາງໃນເປັນໝາກເດື່ອ
    ກ້ຽງແຕ່ໃນໃສແຕ່ເນື້ອ ດູກດູ້ມີໝູ່ໜອນ
    ຢ້ານມາຊອນໃຫ້ນາງສູ້ ຢ້ານມາຊູໃຫ້ນາງເຊື່ອ
    ບາດອ້າຽເບື່ອຄຳເວົ້າ ສິເຫຼົ່າຮ້າງຫ່າງເຫີນ ...ບໍ່ນໍ້

  • ນາງນີ້ ຄຶດນຳອ້າຽ ແລງງາຽ ຈົນຮອດຄ່ຳ
    ຄຶດອ່ຳລ່ຳຮອດເຊົ້າ ປາເຂົ້າບໍ່ແບ່ງບາຽ
    ຄຶດນຳຫຼາຽ ຈົນຫີວຮ້ອນ ບໍ່ຍອມນອນ ຢ້ານຝັນກ່ຽວ
    ຈົນຜອມຫ່ຽວ ຈ່ອຽລີບ ຄົນສິຈີບ ກະເລົ່າຈາງ

  • ນາງນີ້ຕ່າວຄືນບ້ານ ສຖານບ່ອນແດນດິນ
    ໃຈຖວິນຄວາມຫຼັງ ຈັ່ງໄດ້ມາຫາອ້າຽ
    ໃຈນາງໝາຽມາຊົ້ນ ກົກກະໂດນ ຕົ້ນເກົ່າ
    ໃຈຢາກມາຫາເຈົ້າ ພໍໄດ້ເວົ້າວ່າຄຶດເຖິງ
    ແສນຣຳພຶງໃຈຢ້ານ ອ້າຽພີ່ມີສອງ
    ໄກສອງຕາ ສິຫາເມັຽມາຊ້ອນ
    ຄວາມອອນຊອນຍັງຄືກີ້ ບໍ່ມີທາງເປັນອື່ນ
    ບຶນເຂົ້າມາຮອດບ້ານ ແລ້ວທາງອ້າຽສິວ່າໃດ໋

  • ໜາວ
    ຕົກມາ ເດືອນສາມຄ້ອຽ ຫຼວງປູ່ຄອຽ ປັ້ນເຂົ້າຈີ່
    ເຂົ້າຈີ່ໂຍມຜັດ ຈີ່ແຕ່ເຊົ້າ ຫຼວງປູ່ເຖົ້າ ເຊັດນ້ຳຕາ (ແນວບໍ່ມີແຂ້ວ ເນາະ...)
    ໂອ້ຽ... ນ້ອງເອີ້ຽ ຫົວລົມໜາວມາເຖິງແລ້ວ ໃຈຊາຽກະໂດຽດັ່ງ ກັນແລ້ວນ້ອງກະໜາວ ອ້າຽກະໜາວຈ້ອຽໆ ໃຈຣະຫ້ອຽຄຶດນຳ ອຸດົມໄຊຝ່າຽກ້ຳ ເດືອນສາມເນົາ ຄືໜາວຫຼາຽ ກວ່າປີກ່ອນຊາຽນອນ ຄົດຄີ່ຄູ້

  • ນັບແຕ່ ມື້ພໍ້ເຈົ້າ ໂສມເສລາ ສີສະອາດ
    ພໍປານຢາດແຕ່ຟ້າ ສິໜ້າກະຜ່ອງໃສ
    ເຈົ້າຜູ່ສາຽໃຈຫຼ້າ ຂວັນຕາມາຊ່າງກ່າວ
    ວ່າທາງບ່າວອ້າຽພີ້ ໜີໜ້າໜ່າຽສະອາງ ແທ້ນໍ
    ຮູ້ຢູ່ບໍ້... ວ່າທາງອ້າຽ ຄນຶງຫຼາຽຫວນຫາໝ່ອມ
    ຄິດຮອດຈອມມິ່ງນ້ອງ ຈົນໝອງມ້ອຽເມື່ອຽມະໂນ
    ມີແຕ່ໂສກີເສົ້າ ຄວາມເຫງົາເຂົ້າມາຜ່າ
    ຄິດຫາຕັ້ງແຕ່ນ້ອງ ມອງຫາຕັ້ງແຕ່ເຈົ້າ ແລງເຊົ້າສ່ອງແຕ່ທາງ
    ບໍ່ຫານວາງຄວາມເວົ້າ ກະຍ້ອນບ່າວເປັນຄົນຈົນ
    ໄດ້ແຕ່ຈຽມໃຈທົນ ທຸກທະວີທະວາຍຮ້ອນ
    ຢ້ານແຕ່ ມອນບໍ່ສົມມ້ອນ ຢ້ານແຕ່ຖຽງນາດອນ ບໍ່ສົມຊ້ອນເຮືອນຫຼັງໃຫຍ່
    ອຸປປະມັຍຄືດັ່ງໜອງບວກນ້ອຽ ຊີວສ້ອຽບໍ່ຊື່ນຊົມ
    ກະເລີຽຈົມແຕ່ກັບເສົ້າ ເຫງົາບໍ່ມີມື້ສິຫວ່າງ
    ກະຄິດຮອດແຕ່ນຳນາງ ບໍ່ເບີຽບາງຫ່າງໄດ້ ພ່ອງນອນໄຫ້ຍ້ອນຄິດເຖິງ

  • ນັບແຕ່ ອ້າຽໄກນ້ອງ ທົນໝອງນອນປ່ຽວ
    ຈິດພີ່ ຍັງກ່ຽວຝັ້ນ ພັນກ້ຽວກ່ຽວນາງ

  • ນັບແຕ່ ອ້າຽໄລຮ້າງ ເຫີນຫ່າງນາງນອນ
    ມີແຕ່ ໝອນໝູນຄຽງ ຄູ່ຄຽງພະອວນອ້າຽ
    ໃຈພີ່ ຊາຽຄິດຮອດນ້ອງ ນວນລະອອງທຸກເຊົ້າຄ່ຳ
    ກັມຫຍັງມາແລ່ນຕ້ອງ ພານ້ອງໃຫ້ຫ່າງໄກ ເດ້ນໍ

  • ນ້ອງເອີ້ຽ ໃຫ້ເຈົ້າອົດສາຫຍ້ຳ ກິນຂີງຕາງຂ່າ
    ກິນນ້ຳທ່າຕາງນ້ຳອ້ອຽ ປີໜ້າຈັ່ງຊິຫວານ.

  • ນ້ອງເອີ້ຽ ໃຫ້ເຈົ້າອົດສາຫຍ້ຳ ກິນຂີງຕາງຂ່າ
    ອົດສາເວົ້ານຳບ່າວຜູ້ຂີ້ຮ້າຽ ຊຳຊາພໍ້ບ່າວຜູ່ດີ.

  • ນ້ອງເຮີ້ຍ ອັນວ່າ ເບື້ອງຫຼັງອ້າຍ ແສນພັນອ້າຍຕັດຂາດ
    ອ້າຍຫາກຕັດຂາດຂັ້ນ ຟັນແລ້ວຈຶ່ງຄ່ອຍມາ.

  • ນ້ອງເອີ້ຽ...
    ບຸນສິມາ ຜັດກັມຊ້ອນ ຄວາຽສິນອນຜັດງົວແລ່ນ
    ແລນສິລົງທ່ານ້ຳ ຜັດແຂ້ບ້ອນຢູ່ບໍ່ເຊົາ ນີ້ແລ້ວ
    ຊາຍນີ້ ໄລລາຫ້ອງ ຫໍທອງໄປຫາທ່ຽວ
    ທັງໄປກ່ຽວພີ່ນ້ອງ ຈຶ່ງລາຫ້ອງຫ່າງນາງ
    ທາງໃຈ ໝາຽມາໃກ້ ກັມໃນໆ ຜັດກ້ຽວກ່າຽ
    ບຸນບໍ່ຫຼາຽເລີຽຈາກນ້ອງ ໄປຊ້ຳບໍ່ສັ່ງລາ
    ຄຳນ້ອງ ວ່າຢ້ານອ້າຽ ໝາຽປອງ ເຫຼັ້ນທາງໃໝ່
    ເບິ່ງໃຍບົວທົ່ວກ້ານ ບໍ່ຫານເວັ້ນຫ່ວງໃຍ
    ຄິດຮອດໄທ ຊາວບ້ານ ບໍ່ອາຈຄ່ອງຄືອວນ
    ມວນປະຊາທັງພົບ ປັຕຕະພີທັງດ້າວ
    ສາວສມອນມວນແມ້ງ ບໍ່ດາແພງພຽງອຸ່ນ
    ງາມລະມຸນອຸ່ນເອື້ອເຈືອຈີ້ມອີ່ມໃຈ

  • ນາງເອີ້ຽ...
    ຊາຍນີ້ ຢ້ານແຕ່ວາຈານ້ອງ ປອງທາງມາປ້ອນປ່າຽ
    ຊາຍຢ້ານທອງເຫຼັ້ນເບົ້າ ໄຫຼເຂົ້າບໍ່ແມ່ນຄຳ... ນີ້ແລ້ວ

  • ນ້ອງໃໝ່
    ວ່າໂອນໍ...
    ສວັດດີພີ່ນ້ອງ ພໍ່ແລະແມ່ ໃຜກະດາຽ
    ສາທຸຊົນຍິງຊາຽ ຢາກໝ່າຽຖາມ ຢາມຢ້ຽມ
    ອະຫັງຮຽມ "ຄົນຫົວປູ້" ສິຕມີຄູ ຮູ້ບໍ່ປ່ອງ
    ຄັນບ່ອນໃດ ບໍ່ຖືກຕ້ອງ ເຕີມແຕ້ມໃຫ້ຕື່ມແຖມ ແນ່ເດີ
    ລາງເທື່ອ ອົກຕົກເພີ້ ຣະເມີຍ່າງ ຍາມຟາງຕາ
    ສຸດສະຕິ ປັນຍາ ບໍ່ຫຼ່ຽນໄຫຼ ຫະທັຍປື້
    ດຳພໍປານ ສີໝື້ ມືດຄຸມຈິຕ ຄິດບໍ່ຖີ່
    ບໍ່ຫ້າວຫັນ ທັນແຕ່ກີ້ ເຣີ້ມ ຫຼວມ ຫຼຸ້ຍ ຫຼ່ຽມຜຍາ
    ປາກບໍ່ເຄີຽ ເກ່ງກ້າ ກະຟາງຟ່າວ ຈາວຈາງ
    ກັບສະລັດ ປັດວາງ ຫ່າງຜຍາ ກະຊ່າງຫຼົງ ໂຄງເຄົ້າ
    ມື້ນີ້ ຫຍິບມາເວົ້າ ຖາມໄທເຮົາ ເຈົ້າທຸກສ່ວນ
    ຈັກສິມ່ວນ ຫຼື ບໍ່ມ່ວນ ຄັນແມ່ນ ຕົກບໍ່ຮອດຜົ້ງ ໃຫ້ແຖມທ້າຽ ຈ່າຽເຕີມ
    ຫຼານໄດ້ມາ ກໍ່ເຣີ້ມ ກອງກັ່ນ ວັນນະສິລປ໌
    ມິຕໝໍແຄນ ແຟນໝໍພິນ ທ່ອງຖະຫວິນ ທຸກແລງເຊົ້າ
    ມາ ມາ ເດີ້... ມາໂຮມເຕົ້າ ໄທເຮົາບໍ່ຮູ້ຫຼ່າຽ
    ຈົກ "ຜຍາ" ອອກມາຈ່າຽ ໝາຽເຖິງຄວາມຄຶກຄື້ນ ເຣີງຣື້ນຊື່ນສະອອນ
    ຄິດວ່າ ຄົງສິໄດ້ຍ້ອນ ຊ່ອຽກັນປ່ອນ ເປັນແຮງເຊັຽ
    ຢ່າສູ່ເສັຽຊຸມແຊງ ແຫ່ງລາວສິ ວານເອີ້ນ
    ຂໍຮຽນເຊີນ ເຕີນຄຳຕ້ານ ຂານຜຍາ ຢ່າຊ້ານານ ດຽວນີ້ກັນດີກວ່າ
    ຈັ່ງຊີ້ຕີ້... ຈັ່ງຊີ້ຕວ່າ ຈັ່ງສິຫົວຍີ້ມແຍ້ມ ມາໂຮມແຕ້ມ "ແຕ່ງຜຍາ" ພີ່ນ້ອງເອີ້ຽ...

  • ນ້ອງໃໝ່
    ພີ່ນ້ອງເອີ້ຽ... ເພີ່ນວ່າສາຽແນນນ້າວ ຜລາຍາວຍູ້ໃສ່
    ໄດ້ມາພໍ້ພີ່ນ້ອງ ວັນນີ້ຈັ່ງອຸ່ນຊວງ
    ຢ່າຟ້າວຕື່ນຟ້າວທ້ວງ ແປກຕ່າງສົງສັຍ
    ວ່າແມ່ນໃຜເດ້ນໍ ສົ່ງຜຍາມາອ້ອນ
    ຈເຣີນພອນທຸກຖ້ວນໜ້າ ສັທທາຄົນລາວເຮົາ ບໍ່ລືມບ້ານລືມສ່ອງ
    ຍັງຕາມຮີດຕາມຄອງ ປະເພນີຮີດເຄົ້າ ໂບຮານເຖົ້າເພີ່ນສອນ
    ຍັງແພງກັນເປັນກຸ່ມກ້ອນ ບໍ່ໄດ້ອ່ອນກຳລົງໃຈ
    ໄທລາວເຮົານີ້ນໍ ບໍ່ແມ່ນຂໍໃຜຊົ້ນ
    ຄົນລາວເຮົາຍັງໝັ້ນ ສັທທາເຮົາບໍ່ຕີບຕັນ ຮີດຄອງບ້ານຍັງສານຕໍ່
    ໂບຮານເພີ່ນໄດ້ກໍ່ ເຮົາຊ່ອຽກັນສືບໄວ້ ຮັບຮອງໄດ້ຍ່ອມຈເຣີນ
    ເອີ້ນໃຫ້ລຸກປຸກຮ້ອຽ ໃຫ້ມາຊ່ອຽກັນສານ
    ເປີດຕຳນານຄຳຜຍາ ປັນຍາພູມຄອງເຄົ້າ
    ລູກຫຼານເຮົາຢ່າໄລຖີ້ມ ຮ້ອງສະຕິງລືມຂອງເກົ່າ
    ຢ່າໄດ້ລະຮີດເຄົ້າ ຄອງເຖົ້າເພີ່ນສິຍັນ

  • ນ້ອງກະ ທຸກຍາກໄຮ້ ໄຫ້ຮ່ຳນຳຫາ
    ໃຈອາວອນວຽນຊາຽ ຜ່ານມາກະຫາຽຈ້ອຽ
    ຄອຽຫຼາຽຄືນຝັນເພີ້ ລະເມີຫາແຕ່ອ້າຽພີ່
    ໃຈອາຣີຫ່ວງອ້າຽ ຢ້ານຊາຽປີ້ນປ່ຽນໄປ
    ອ້າຽເອີ້ຽ...
    ຂ່າວວ່າໄປຮັບຈ້າງ ຖາງນາ ກ່ຽວເຂົ້າໃໝ່
    ໃນຫົວໃຈຝ່າຽນ້ອງ ປະຄອງອ້າຽບໍ່ລ່າຽລາ
    ເປັນວາຈາຕັ້ງໝັ້ນ ຫຼືຕົວະກັນ ເບາະອ້າຽພີ່
    ຕົວະມື້ນັ້ນມື້ນີ້ ຢ້ານມາລີ້ແລ້ວລັກໄປ ແທ້ນໍອ້າຽ

  • ນ້ອງກໍ່ ປຽບດັ່ງກາດຳນ້ອຽ ບິນເວີນຢູ່ເວີນເວີ່ນ
    ຕົກກະເທີນມັກອ້າຍ ໃຈຫ້າວຢູ່ຈັ່ງລົມ
    ຢ້ານບໍ່ສົມຍັງອ້າຍ ຊາຍງາມສິບບ້ານຊ່າ
    ປາຖນາຕໍ່ຄຳ ຢາກຢູ່ນຳຄ່ຳເຊົ້າ ຂໍເຝົ້າຢູ່ຈັ່ງເງົາ.

  • ນ້ອງກໍ່ ຢາກຈານຳອ້າຽ ແຕ່ງານຫຼາຽວຽກດຶງຈ່ອງ
    ໄດ້ແຕ່ຈ້ອງມ່ອງຜ້າຽ ກອນອ້າຽຈ່າຽຜຍາ.

  • ນ້ອງຊິ ໄລລືມຖີ້ມ ຄືຈອກຢູ່ກາງແຊງ
    ນ້ອງຊິໄລລືມຖີ້ມ ຄືແຕງຢູ່ກາງໄຮ່
    ບາດວ່າກິນໝາກແລ້ວ ຊິໄລຖີ້ມຕັ້ງແຕ່ເຄືອ.

  • ນ້ອງນັ້ນ ເກີດຝ່າຽກ້ຳ ສຖານຖິ່ນແດນໃດ
    ຂໍຈົ່ງໄຂວາຈາ ບອກມາຍັງອ້າຍ
    ເຖິງຮຽມເປັນຄົນຮ້າຍ ພາຍໃນໃສສ່ອງ
    ມາພົບເຫັນນາດນ້ອງ ທຽວຈ້ອງຍ້ອນມັກແຮງ.

  • ນ້ອງນັ້ນ ເໝືອນດັ່ງດາວ ຂາວຢູ່ຟ້າ ລອຽເລື່ອນເດືອນຫງາຍ
    ກະຕ່າຽໂຊໂຕຜອມ ບໍ່ຍ່ອມທຽມຈັນເຈົ້າ.

  • ນ້ອງນັ້ນ ຄືດັ່ງບຸບຜາໄມ້ ມາລາເຫີຍກິ່ນ
    ບໍ່ມີໃຜເບິ່ງສິ້ງ ຫຼິງຍ້ຽມລ່ຳແລ.

  • ນ້ອງນັ້ນ ຄິດຮອດອ້າຍ ນອນບໍ່ອີ່ມເຕັມຕາ
    ຍາມໃດຕື່ນຂຶ້ນມາ ກະຄິດເຫັນແຕ່ອວນອ້າຍ
    ຄິດນຳຫຼາຍ ຄິດແຕ່ນຳຄຳຕ້ານ ຄຳຫວານໆມາຕ້ານຕໍ່
    ປາຖນາພົບພໍ້ ຊິຫວານແທ້ແມ່ນຈັ່ງຄຳ.

  • ນ້ອງນັ້ນ ມາຖາມອ້າຽ ວ່າຊາຽກິນຫຍັງແດ່
    ອ້າຽຄົນທຸກແດ່ນແດ້ ກິນແຕ່ເຂົ້າບ່າຍເກືອ
    ບໍ່ອາດກິນຊີ້ນເນື້ອ ເຟືອໃຝ່ໄຂໝູ
    ກິນປົ່ນປູປານາ ແມງດາແກມກຸ້ງ
    ນອນຕົບຍຸງໄຮຮີ້ນ ຫາກິນຕາມສະພາບ
    ຕັກນ້ຳຫາບບ່າແປ້ວ ແນວຄວາມຮູ້ພີ່ບໍ່ສູງ.

  • ນ້ອງນີ້ ເບັດໃສ່ແກ້ງ ຊ້ຳພັດຖືກຫົວດອນ
    ເບັດໃສ່ຊາຍນອນພອຍ ຊ້ຳພັດມີເມັຽຊ້ອນ.

  • ນ້ອງນີ້ ເປັນດັ່ງເຮືອຄາແກ້ງ ເສົາປະດົງຄຸງຫາດ
    ຫາຜູ້ຄິດຊ່ອຽແກ້ ໃຫ້ຫາຽຮ້ອນກະບໍ່ມີ.

  • ນ້ອງນີ້ ເປັນດັ່ງຜ້າ ແພສະໃບຜືນເກົ່າ
    ອ້າຽຫາກຕູ້ມຫໍ່ແລ້ວ ຊິໄລຖີ້ມບໍ່ແໜງ.

  • ນ້ອງນີ້ ເວົ້າຈິງແທ້ ສິບຊາຕຊິຂໍປອງ
    ຄັນບໍ່ໄດ້ປອງເມືອງຄົນ ນ້ອງຊິປອງເມືອງຟ້າ
    ----
    ບໍ່ໄດ້ແກ້ວອຸ່ນຫຼ້າ ມາຊ້ອນແມ່ນບໍ່ຍອມ.

  • ນ້ອງນີ້ ແຈ້ງຄືດາວຂາວຄືຟ້າ ໃສງາມຄືໜ້າແວ່ນ
    ແບນຝາມືຮັບຕ້ອນ ເຊີນທ້ອນຜູ້ປະສົງ.

  • ນ້ອງນີ້ ແນວນາມເຊື້ອ ກາດຳເຊື້ອຕ່ຳ
    ມັນບໍ່ສົມສ່ຳເຊື້ອ ພຍາຊັ້ນຊາຕສູງ

  • ແນວວ່າ ໂຄງບໍ່ສົມແຮ້ງ ແກງປາບໍ່ສົມບ່ວງ
    ແມ່ນສິຕັກຕ່ອນໄດ້ ກໍ່ຍັງລ້ຽວຫຼູດລົງ

    ແນວວ່າ ກົງບໍ່ສົມຍັງຝ້າຽ ໄໝລາວບໍ່ສົມແຫຼ່ງ
    ແມ່ນສິຈັບຕ່ອງປັ້ນ ກະຍັງຝັ້ນໃສ່ກັນ
    ອານບໍ່ສົມຍັງມ້າ ອາຊະນັຍ ບໍ່ສົມຫິ່ງ
    ຊິງບໍ່ສົມໄກ່ອົ້ນ ແສນສິຫ້າງກະບໍ່ຄາ

  • ແນວວ່າ ປາບໍ່ສົມຫ້ວຽ ໜີໄປວັງໃໝ່
    ໄຊບໍ່ສົມປາກຕ້ອນ ປາສິບ້ອນຫ່ອນໜີ.

  • ນ້ອງນີ້ ກ້ຽງປານໄຂ່ ໃສປານແກ້ວ ແນວຄຳບໍ່ເຄີຽຫຼໍ່
    ໜໍ່ສິຊອນໜອນສິຊອກ ປອກສິຫຸ້ມ ຕຸ້ມນ້ອງກະບໍ່ມີ
    ຢ້ານແຕ່ທາງອ້າຽພີ້ ໄຊຫຼີ່ຫວີງແຫ
    ແນແຕ່ທຽວທາງເດີນ ດັກເວີນສ່ຽງຊ້ອນ
    ໜອງນ້ຳຂ້າມ ຫວີງມອງລົງຫວ່ຽງ
    ສຽງເບັດບັ້ງຂັງຂ້ອງ ປາຄໍ່ຄຳ...

  • ນ້ອງນີ້ ຂໍໝາຍໝັ້ນ ພັນທະນັງແຕ່ນຳພີ່
    ມີແສນຊາຍກ່າວຕ້ານ ໂອມນ້ອງກໍບໍ່ເອົາ.

  • ນ້ອງນີ້ ຄິດຮອດອ້າຽ ຊາຽຄົນດີຢູ່ຄືເກົ່າ
    ເຊົ້າ-ແລງ-ງາຍ ຄຶດໄດ້ ໃຈນ້າວຈ່ອງດຶງ

  • ນ້ອງນີ້ ຄອງຄອຽອ້າຽ ຫຼາຽວັນຈັ້ນຈົນຈົ່ມ
    ມີແຕ່ ລົມພັດພ້າວ ໜາວແລ້ວພີ່ບໍ່ມາ
    ນາງນີ້ ຄອງຄອຽຖ້າ ການເວລາມາແຖມຖ່າຽ
    ກາຽແຕ່ວັນແລະມື້ ໃຈນ້ອງນັ້ນບໍ່ລືມ

  • ນ້ອງນີ້ ດີໃຈເດ້ ດີໃຈເດ... ຊາຽໄດ້ມາຖາມຂ່າວ
    ແຕ່ວ່າທາງຝ່າຽອ້າຽ ສບາຽບ້າງແດ່ບໍ່ນໍ.

  • ນ້ອງນີ້ ທຸກຍາກໄຮ້ ປາກກ່ຳກິນມັນໝົກ
    ຄັນບໍ່ກິນໝົກມັນ ປາກບໍ່ດຳມຸມເມົ້າ.

  • ນ້ອງນີ້... ທຸກຍາກຮ້າຍ ເຮັດນາຫຼາຍຈົນໜ້າກ່ຳ
    ຢາກເວົ້ານຳມ່ອມອ້າຽ ກະອາຽເຈົ້າກ່າວຂວັນ.

  • ນ້ອງນີ້ນ້າ
    ກາງຄືນຝັນ ກາງວັນເສົ້າ ໂຣກຄວາມເຫງົາ ເຂົ້າມາຈ່ອງ
    ໃຈຈອບມອງ ເບິ່ງອ້າຽ ພໍໄດ້ ວ່າບໍ່ເຫງົາ
    ແມ່ນຢູ່ໄກ ບໍ່ລືມເຈົ້າ ອັນຮັກເຮົາ ບໍ່ເຄີຽຫ່າງ
    ໄກຫົນທາງ ໃຈຢູ່ໃກ້ ບໍ່ເຄີຽໄດ້ ດອກຫ່າງກັນ
    ຄວາມສັມພັນ ຫົວໃຈໝັ້ນ ແມ່ນໄກກັນ ຍັງຄືເກົ່າ
    ຍັງຄຶດຮອດ ຕັ້ງແຕ່ເຈົ້າ ໃຜມາເວົ້າ ກະບໍ່ສົນ
    ສິອົດທົນ ເອົາຈົນໄດ້ ຣໍຄືນໄປ ໄດ້ກອດພີ່
    ໃຫ້ເຊື່ອນາງ ນ້ອງຄົນນີ້ ບໍ່ມີໄດ້ ດອກປ່ຽນໄປ
    ຍັງຮັກຢູ່ ກໍ່ແຕ່ອ້າຽ ແມ່ນຢູ່ໄກ ຍັງໝາຽຮ່ວມ
    ຝາກຂໍ້ຄວາມ ດອກຄຳນີ້ ຍັງມີອ້າຽ ຢູ່ສເມີ ນີ້ແລ້ວ

  • ນ້ອງນີ້ ປອດອ້ອຍຊ້ອຍ ສເມີດັ່ງຕອງຕັດ
    ພັດແຕ່ເປັນຍິງມາ ຍັງບໍ່ມີຊາຍກ້ຽວ
    ພັດແຕ່ສອນລອນຂຶ້ນ ບໍ່ມີເຄືອຊິກ້ຽວກຸ່ມ
    ນັບແຕ່ເປັນພຸ່ມໄມ້ ເຄືອຊິກ້ຽວກໍບໍ່ມີ.

  • ນ້ອງນີ້ ປຽບດັ່ງໄມ້ ລຳດຽວດົງປ່ຽວ
    ບໍ່ມີເຄືອກອດກ້ຽວ ລຳດົ້ວດ່ຽວດາຍ.

  • ນ້ອງນີ້ ປຽບດັ່ງໄຊຫຼັງຫຼ້າ ບໍ່ໝານປານຳເພິ່ນ
    ຍາມຝົນຖືກແຕ່ນ້ຳ ຍາມແລ້ງຖືກແຕ່ລົມ.

  • ນ້ອງນີ້ ພັດແຕ່ເປັນແມ່ນ້ຳ ຊົລລະທານຍາວຍ່ານ
    ຍັງບໍ່ມີພໍ່ຄ້າ ທຽວຂື້ນລ່ອງລົງ.

  • ນ້ອງນີ້ ຟືມຊາວຫ້າ ສແວງຫາແຕ່ໄໝຍອດ.

  • ນ້ອງນີ້ ມາຄອຽອ້າຍ ຄອຽມາຫຼາຽຈົນວ່າຄ່ຳ
    ຄຳວາຈາຊ່າເວົ້າ ຕົນເຈົ້າວ່າຊິມາ.

  • ນ້ອງນີ້ ຢາກມີຊູ້ ທຽວທາງນຳ ຍາມວ້າງເປົ່າ
    ນາງຢາກມີບ່າວເວົ້າ ຍາມເສົ້າຊ່ອມຊູ
    ເສັຽແຕ່ຊູ້ນາງນ້ອງ ເນື້ອທອງຍັງບໍ່ເກີດ
    ນອນສະເດີດຊູ່ມື້ ລະເມີໄດ້ ກໍ່ບໍ່ເຫັນ
    ເປັນຍ້ອນເວນເຂັນຮ້າຽ ບ່າວມາໝາຽ ກໍ່ໝ້າຽໝ່າງ
    ຍ້ອນວ່ານາງເລືອກຫຼາຽ ຫຼືວ່າຊາຽເຈົ້າຊູ້ ນາງດູແລ້ວຜັດບໍ່ສົນ.

  • ນ້ອງບໍ່ ມີລືມໄດ້ ອາຫານເກົ່າທີ່ເຄີຽກິນ
    ຜັກຕ່ຳນິນຜັກແພວ ແຈ່ວຍຳກະຈຳໄດ້
    ນ້ອງບໍ່ເຄີຽລືມຊ້ຳ ທຳນຽມບ້ານເຄີຽຢູ່
    ຍັງຄຶດຮອດສູ່ມື້ ຝັນພໍ້ຢູ່ສູ່ຄືນ ອ້າຽເອີ້ຽ...
    ບາງມື້ຢືນມອງຟ້າ ຫັນຕ່າວຄືນສຖານ
    ຢ້ານອ້າຽລືມຄຳຈາ ຮັກນາງແຕ່ຄາວພຸ້ນ
    ຢ້ານແຕ່ບຸນຂອງນ້ອງ ບໍ່ສົມພໍຊິໄດ້ຮ່ວມ
    ຢ້ານແຕ່ຄວາມຮັກນ້ອງ ເປັນຂອງເຫຼັ້ນບ່າວພີ່ຊາຽ.

  • ນ້ອງຜູ້ ເຊື້ອຊາດນ້ຳ ກວ້າງໃຫຍ່ວັງເລິກ
    ອ້າຍຢາກລົງລອຍຊົມ ໃຫ້ຊ່ວງໃຈຫາຍຮ້ອນ.

  • ນ້ອງຜູ້ ເຊື້ອຊາດນ້ຳ ສ້າງໃຫຍ່ໃສເຢັນ
    ໃຜຊິເປັນຄົນຕັກ ມ່ອມພະນາງໄປຊ້ອນ.

  • ນ້ອງຜູ້ ເຊື້ອຊາດໄມ້ ລຳຍາວຂາວຊື່
    ຄັນຊິໃຫ້ອ້າຍຊື້ ພັນລ້ານກໍຊິເອົາ.

  • ນ້ອງຜູ້ ເຊື້ອຊາດຊ້າງ ຫາກິນແຕ່ຮຽວໄຜ່
    ອ້າຍນີ້ເຊື້ອຊາດມ້າ ກິນຫຍ້າແທບດິນ.

  • ນ້ອງຜູ້ ຄຳແດງເຂັ້ມ ສີເຄັມນ້ຳຄັ່ງ
    ແມ່ນຊິຂັງແຊ່ນ້ຳ ພັນມື້ກໍບໍ່ຈາງ.

  • ນ້ອງຜູ້ ທຽວທາງເວີ້ງ ໃຫ້ຖືທິງບັ້ງໃຫຍ່
    ເຊົາຮົມບົກ ຍັງຊິໄດ້ຊ່ວຍໜ້າ ຮົ່ມຫວ້າຊ່ວຍຄີງ.

  • ນ້ອງຜູ້ນ້ອຽ ບໍ່ຮູ້ຮ່ອມປັນຍາ
    ບໍ່ແມ່ນຊາວນາວາ ຊິສ່ອງເຫັນແລວນ້ຳ
    ເຈົ້າຜູ້ໄໝຄຳຝັ້ນ ໃນຂັນບໍ່ເຫັນເງື່ອນ
    ສັງມາຊຸກເຊື່ອງມ້ຽນ ໃນນັ້ນສ່ອງບໍ່ເຫັນ.

  • ນ້ອງວ່າ ຄິດຮອດອ້າຽ ອ້າຽກໍດັ່ງດຽວກັນ
    ບໍ່ຫ່າງຫັນຜັນໄປ ຜູກໃຈແຕ່ນຳນ້ອງ
    ສັນຍາສອງ ເຮົາເຄີຽໝັ້ນ ຈາກັນອ້າຽຍັງຈື່
    ແມ່ນວ່າ ວັນປ່ຽນມື້ ຍັງຖືໝັ້ນບໍ່ຫວັ່ນໄຫວ
    ຄວາມຈິງໃຈຝັງແໜ້ນ ຄືດວງແສນແສງປະທີບ
    ງາມດັ່ງກີບໝູ່ໄມ້ ມາລາກ້ານກ່ອງສີ
    ຄວາມຫວັງດີເຕັມຕື້ງ ຄວາມຄິດເຖິງ ເກີນຂນາດ
    ສຸດສວາດກ່ອມກິ້ງ ຄນິງເຈົ້າຢູ່ບໍ່ວາຽ ນັ້ນແລ້ວ.

  • ນ້ອງວ່າ ນ້ອງບໍ່ມີຊູ້ ຂົນຄີ້ວສັງມາລາ ຂົນຕາສັງມາຍໍ່
    ຫຼືນ້ອງໄຫ້ຕໍ່ຊູ້ ແຄມຮົ້ວປ່າໝາກເຍົາ.

  • ນ້ອງຫາກ ປອງໝາຽອ້າຽ ຄືກະຕ່າຽໝາຽຈັນ
    ຄວາມຮັກມາພົວພັນ ຄືຊິຮັກກັນກັບອ້າຍ
    ນ້ອງບໍ່ມີຜົວຊ້ອນ ນອນນຳຈັກເທື່ອ
    ປຽບດັ່ງເຮືອຢູ່ຄ້າງ ພາຽຊິຈ້ຳແມ່ນບໍ່ມີ.

  • ນ້ອງຮັກອ້າຽ ແຕ່ຢາກອາຽບໍ່ກ້າບອກ
    ຢ້ານອ້າຽມາຫຼອກຕົ້ມ ໃຫ້ງົມນ້ຳເຂົ້າໝ່າແລງ

  • ໜອງບໍ່ກູນານ້ຳ ປູປາສິໄດ້ເພິ່ງ ໃສນໍ
    ບວກບໍ່ເຕື້ອງຕໍ່ນ້ຳ ຄວາຍເຖົ້າສິເກືອກຕົມ ໃສເດ້
    ເລີຽສິນອນດິນແຫ້ງ ບໍ່ດູໂຕນບັກຕູ້ດ່ອນ ແດ່ບໍ້
    ອົດສາແລລ່ຳຈ້ອງ ພໍໄດ້ອີ່ມກະໃຈ

  • ນອນຄົນກ້ຳ ຝັນເຫັນສະດຸ້ງຕື່ນ
    ພໍແຕ່ລຸກລ້າງໜ້າ ຄິດຮອດເຈົ້າຢູ່ບໍ່ລືມ.

  • ນົກເຂົາຕູ້ ພາກຄູ່ກະຍັງຂັນ
    ກາເວົາວອນ ພາກຮັງກະຍັງຮ້ອງ
    ບາດວ່າ ນ້ອງພາກອ້າຽ ຄຳດຽວບໍ່ໄດ້ສັ່ງ
    ຄັນບໍ່ເອີ້ນສັ່ງໃກ້ ກະໃຫ້ເອີ້ນສັ່ງໄກ.

  • ນົກເຂົາຕູ້ ພາກຄູ່ກະຍັງຂັນ
    ກາເວົາວອນ ພາກຮັງກະຍັງຮ້ອງ
    ບາດວ່າ ນ້ອງພາກອ້າຽ ຄຳດຽວບໍ່ໄດ້ສັ່ງ
    ຕັ້ງແຕ່ໄມ້ໃຫຽ່ລົ້ມ ກະຍັງເອີ້ນສັ່ງຕໍ.

  • ນົກເຂົາ ລົງກິນເຂົ້າ ຫົວນາເລົາ ນ້ອງບໍ່ໄລ່
    ແພງເອີຍ ບາດວ່າ ນົກປີດນ້ອຍ ສັງນ້ອງໄລ່ບໍ່ເຊົາ.

  • ນົກບໍ່ ຍິນດີດ້ວຽ ສາຂາບໍ່ມີງ່າ
    ສະບໍ່ມີດອກໄມ້ ຄະນາເນື້ອບໍ່ສງວນ.

  • ນົງນາງນ້ອງ ມີຄົນຈອງແລ້ວຫຼືໄປ່
    ຄົນຜູ້ໄຄຈັ່ງເຈົ້າ ມີຄົນເຝົ້າແລ້ວໄປ່ນໍ
    ຊາຕນີ້ມາພົບພໍ້ ໄດ້ຄິດຕໍ່ທາງໃຈ
    ຫຼືມີຄົນໃດມາ ຈ່ອງໃຈຮຽມເຈົ້າ
    ຄົນຕາເຫງົາຄືອ້າຽ ມີຄວາມໝາຍໄດ້ແດ່ບໍ່
    ຫຼືພໍພຽງພົບພໍ້ ໃຈເຈົ້າຫ່າງໄກ
    ຄັນສິໄດ້ຢູ່ໃກ້ ທາງໃຈປະສົງຕໍ່ ບໍ່ເດ
    ພໍປານລົມພັດພ້າວ ຕີຕ້ອງກະຢູ່ເສີຽ

  • ນົງພະນວນນາງນ້ອງ ຄີ້ວກ່ອງບໍ່ສົມສວນ
    ບ່າວພະອວນພີ່ຊາຽ ຈັ່ງບໍ່ມາຽແລນ້ອງ
    ວາສນານາງນ້ອງ ເຄືອເຖົາສິກ້ຽວກໍ່
    ຄົງບໍ່ທໍ່ບຸບຜາໄມ້ ຊຸມອົ້ມກິ່ນຈັນ

  • ນຸດຖະນາດນ້ອງ ນາງນຶ່ງໃນໃຈ
    ແສນສົງສັຍ ຫ່ວງຫາບໍ່ມີເວັ້ນ
    ຈາຄຳເຫຼັ້ນ ເຫັນລາຍຫາກຫຼາຍຫຼາກ ກໍ່ຈິງດອກ
    ສັພພະພາກກ່າວອ້າງ ເອີນເອື້ອນເອີ່ຍຄວາມ
    ເປັນດັ່ງຮ້ວມ ມາດານຶ່ງອຸທອນດຽວ ຄຳເອີຍ
    ບໍ່ໄດ້ທຽວພານພົບ ແຕ່ຫາກຝັນເຫັນພໍ້
    ໂອນໍເວັ້ນ ເວນກັມຈຳຈ່ອງ
    ພີ່ຢາກເຫັນໜ້ານ້ອງ ຄອງຖ້າເປົ່າດາຽ ແທ້ນໍ.