ໝວດທີ່ຂຶ້ນຕົ້ນດ້ວຽຕົວ "ທ"

 

  • ທາງອ້າຽສ້າງຂວາແປ້ນ ນ້ອງກະບໍ່ເຄີຽນຳ
    ທາງອ້າຽສ້າງຂວາຄຳ ນາງກະບໍ່ມາໄຕ່
    ບາດວ່າບ່າວໄທໄກ ສ້າງແຕ່ຂົວໄມ້ອໍ້ ຕໍໄມ້ແຕ້ ມີແຕ່ສ້ຽນສິຄ່ອຽຄານ ໄປຊັ້ນບໍ້
  • ທ້າວຄຳຫຼ້າເອີ້ຽ...
    ອັນວ່າ ຄົນເຮົານີ້ ຍ່ອມຕ້ອງມີ ຜູ້ມາໃໝ່
    ບໍ່ມີໃຜ ເຖົ້າຄ້າງບ້ານ ດອມເຈົ້າ ພວກໝູ່ຫຼານ
    ອັນຕຳນານ ເມືອງບ້ານ ຕ້ອງແປປ່ຽນ ເປັນໄປ
    ໃນຕຳນານ ຄຳສອນ ຍ່ອມປ່ຽນໄປ ຕາມເຄົ້າ
    ເຮົາຕ້ອງ ເອົາມາເຫຼັ້ນ ຂຽນກັນ ເອົາໄວ້ຕໍ່
    ຍຶດແນວຜຍາ ຖິ່ນເຊື້ອ ໃຫ້ເຫຼືອໄວ້ ແກ່ໝູ່ຫຼານ

    ເອົາຄວາມເປັນໄປ ຂອງເມືອງບ້ານ ທຽບຕຳນານສານກໍ່
    ຊວນກັນກໍ່ ຄຶດໄວ້ ຄົງມີແທ້ ຜູ່ສິເຫັນ
    ເຈົ້ານັ້ນ ຍັງໜຸ່ມນ້ອຽ ໃຈຄອຽກໍ່ຄຳຜຍາ
    ເຫັນເຈົ້າມາຂີດຂຽນ ເປີດປະເດັນລົງໄວ້
    ຫວັງເປັນໄທລາວເຊື້ອ ເດີນຕາມປະສົງສົ່ງ
    ຍູ້ຜຍາໃຫ້ຕ່າວໂຄ້ງ ຄືນແທ້ສູ່ລາວ

    ຄົງຊຳນານດອກຫຼ້າ ຄຳວ່າຜຍາຂຽນ
    ໃຫ້ຄ່ອຽຮຽນພຽນຈາ ສງ່າງາມຄົງໄດ້
    ໃຫ້ແຕ່ໃຈປະສົງຕັ້ງ ເປັນພະລັງເສີມສົ່ງ
    ເຈົ້ານັ້ນຄົງແຕ່ງໄດ້ ຜຍາແທ້ຕາມແງ່ເດີມ

    ດີແລ້ວລະ ທີ່ເຈົ້າເຣີ້ມ ມາເຕີມສົ່ງ ຄຳຜຍາ
    ຄົນຫາກຍວງແຍງເຫັນ ຍ່ອມສິເຂັນໃຈຍູ້
    ສິຄອຽຊູເຈົ້າຂື້ນ ຊ່ອຽເຫຼືອເສີມແຕ່ງ
    ເຮັດມື້ນັ້ນມື້ນີ້ ຄາວໜ້າຄົງມ່ວນຫູ

    ໃຫ້ເຈົ້າເອົາຄຳເວົ້າ ປັຈຈຸບັນເຮົາ ມາສານກໍ່
    ຕໍ່ເປັນຄຳບອກໄວ້ ຕາມໃຈເຈົ້າ ກໍ່ປະສົງ
    ພຽງໃຫ້ເອົາຮີດບ້ານ ຮີດເມືອງ ເປັນແປວປ່ອງ
    ເປັນທຳນອງ ພື້ນບ້ານ ສຖານແທ້ ຖີ່ນເຮົາ

    ໃຫ້ເຈົ້າເອົາ ໃຈຕັ້ງ ໃຫ້ຫວັງຕໍ່ ວິຖີຄິດ
    ໃຫ້ລິຂິຕ ຂຽນຄຳ ກໍ່ເປັນ ຜຍານ້ອຽ
    ໃຫ້ເຈົ້າຄອຽອ່ານເນັ້ນ ໃນປະເດັນ ທີ່ເຫັນຕ່າງ ເອົາເດີ້
    ວາງເປັນຄອງເງື່ອນເຄົ້າ ຈຶ່ງລອງເວົ້າກໍ່ຂຽນ

    ອີກບໍ່ຊ້າ...
    ຜຍາເຈົ້າ ຄົງສິໄຫຼລື້ນເລື່ອນ
    ຂຽນໄດ້ເໝືອນຄ່ອງແຄ້ວ ແວວລ້ຳມ່ວນຫູ
    ໃຊ້ຄອງຄູ ຫຼັກຈຳໄວ້ ເດີ້ນ້ອງໃໝ່ໃຫ້ປະສານ
    ສືບຕຳນານເມືອງເຮົາ ເກົ່າຫຼັງຜຍາເຄົ້າ
    ໃຫ້ເປັນກົກເປັນເຫງົ້າ ມໍຣະດົກເຮົາ ຄວນຮັກຫໍ່
    ສືບຕໍ່ເມືອເມື່ອຫຼ້າ ເໝືອນເຄົ້າກ່ອນຫຼັງ
    ໃຫ້ເຈົ້າເອົາໃຈຕັ້ງ ເພື່ອຫວັງກໍ່ ວິຖີທັມ
    ເພື່ອວ່າກັມບັນດົນ ເຈົ້າກໍ່ຄົງ ຂຽນດີໄດ້
  • ທີ່ອ້າຽບອກເລີກນັ້ນ ທາງເຫດຜົນຫາກຫຼາຽຢູ່
    ບໍ່ແມ່ນມີໃໝ່ຊ້ອນ ແຕ່ໂຕອ້າຽບໍ່ຄູ່ຄວນ
    ຢາກໃຫ້ນາງສຸກລ້ວນ ກັບເພິ່ນຜູ່ມາຫຼັງ
    ຜູ່ເພິ່ນມີເງິນເຕັມຖັງ ຢູ່ດູແລໄດ້
    ທາງພີ່ຊາຽສິຂໍລີ້ ໃຫ້ສຸກຂີບໍ່ຢາກຖ່ວງ
    ຂໍອຳລາດວງສມອນນາດນ້ອງ ຊາດໜ້າຈັ່ງວ່າກັນ
  • ທຸກຊ້ຳເຖົ້າ ໃຜເດ້ນໍພໍຊິເອົາເປັນສ່ຽວ
    ຢູ່ຄົນດຽວລ້າລ້າ ແຂ້ວກະຮ້າງຍ່າງກະເຊ
    ຂາກະເປຄາງກໍ່ວ້ຳ ຄວາມຈຳບໍ່ຄືເກົ່າ
    ຮ່າງກາຽເຮົາຫ່ຽວແຫ້ງ ແຮງນ້ອຽຈ່ອຽໂຊ

    ຍ່າງກະພໍໂຊ້ເຊ້ ເຊໂຊມ້ອຍເມື່ອຽ
    ຕາເຄີຽ ໃສສ່ອງແຈ້ງ ດຽວນີ້ຜັດມືດມົວ
    ຫົວ ຍິ້ມ ຄືຮ້ອງໄຫ້ ຂີ້ຮ້າຽຫຼາຽຈົນໝາຕື່ນ
    ນອນ ນັ່ງ ຢືນ ລຸກ ຍາກ ລຳບາກຮ້າຽກວ່າແຕ່ຫຼັງ

    ຫູກະຟັງບໍ່ຮູ້ເຣື່ອງ ລູກຫຼານເຄືອງຈົນຮ້ອງໃສ່
    ຮ້າຽໃຫ້ ເຮົາຄູ່ມື້ ຄືເຮົານັ້ນບໍ່ແມ່ນຄົນ
    ຄັນແມ່ນຈົນຊ້ຳເຖົ້າ ແຮ່ງທຸກຫຼາຽກວ່າໝູ່
    ຊິກູ້ເງິນກະບໍ່ໄດ້ ເຈົ້າໜີ້ຢ້ານບໍ່ຄືນ

    ຢ້ານບໍ່ຍືນຊິໃຊ້ໜີ້ ຊິເສັຽເງິນສູນເປົ່າ
    ເມົາມົວໝອງໝຸ່ນມ້າງ ສອາງເອື້ອນເອື່ອຽສລາຽ
    ຄັນຢູ່ດີບໍ່ເຈັບໄຂ້ ກະຍັງວ່າພໍໄຄ
    ໄດ້ອາສັຍຕີນມື ເລາະຫາງານຈ້າງ
    ພໍໄດ້ເງິນມາຊື້ ເຜັດເກືອປາແດກປົ່ນ
    ຜູ່ເຖົ້າ ຄົນໜີໜ້າ ລູກຫຼານຮ້າຽບໍ່ຢູ່ນຳ

    ຍາມເຮົາຍັງໜຸ່ມນ້ອຽ ໃຫ້ຄອຽພຽນທ້ອນເງິນແນ່
    ເງິນນັ້ນ ເປັນສ່ຽວແທ້ຊູຊ້ວນ ໄດ້ສູ່ຍາມ ແທ້ແລ້ວ
  • ທຸກຍາກໄຮ້ ກິນໄກ່ຕາງອາຫານ
    ທຸກບໍ່ມີເຮືອນຊານ ຢູ່ບັງກະໂລນ້ອຽ.
  • ທຸກຍາກໄຮ້ ປາກກ່ຳກິນມັນໝົກ
    ຄັນບໍ່ກິນໝົກມັນ ປາກບໍ່ດຳປານນີ້.
  • ທຸກບໍ່ມີເສື້ອຜ້າ ຝາເຮືອນດີ ພໍລີ້ຢູ່
    ທຸກບໍ່ມີເຂົ້າຢູ່ທ້ອງ ນອນລີ້ ຢູ່ ບໍ່ເປັນ
    ໃຜສິເຫັນຂົດໄສ້ ທາງໃນ ນົກຂີ້ຖີ່
    ໃຜສິເຫັນສ່ອງຊີ້ ໃຈຄົນນັ້ນ ແມ່ນບໍ່ມີ
    ແມ່ນສິຕິຖແລງເວົ້າ ຍາກສິເອົາ ມາເຊື່ອ
    ຍ້ອນຂ້ອຽເບື່ອບ່ອນເວົ້າ ທີ່ເຂົານັ້ນວ່າກັນ
    ອັສສະຈັນໃຈແຂ້ ແວ ຫາ ຊີ້ນຕ່ອນ
    ຫາສວບຫຍັງບໍ່ໄດ້ ປາກອ້າ ຢູ່ເດີ່ນດິນ
    ອັນວ່າຄວາມຍາກນີ້ ເພີ່ນຫາກວ່າ ມີຫຼາຽ
    ຍິງຫຼືຊາຽຫາກມີ ບໍ່ລື່ນກັນ ໂດຽດ້າມ
    ຍ້ອນຫຼົງກາມເມົາມົ້ວ ທຳຕົວ ຕາມຢ່າງ
    ຖີ້ມແນວທາງ ຄອງເພີ່ນສ້າງ ເມືອງບ້ານ ກະຕ່າງຫຼັງ

  • ທຸກປານໃດກໍ່ຊິໝົ້ນ ໜາມສົນກະຊິຜ່າ
    ປ່າຂີ້ອົ້ນແກມຫຽ້າ ຊິເອົາພ້າຄ່ອຽຖາງ.

  • ທຸກມື້ນີ້ ເກີດເຫຕຮ້ອນ ແຮງຫຼາຽຜູ້ຂ້າວ່າ
    ອັນສາວລາວນັ້ນນາ ຫັນໃສ່ຜ້ານ້ອຍໆ ຄອງຮີດໃຫ້ເຊື່ອມສູນ

    ເປັນຕາຊູນເດ້ນ້ອງ ຂອງດີຢູ່ໃນຫໍ່
    ຊ່າງເອົາມາຫຼອກລໍ້ ໃຫ້ໝາວໍ້ແລ່ນນຳ
  • ທຸກຄ່ຳຄືນວັນມື້ ໂຊສາຽບື ອວດຜູ້ບ່າວ
    ເຫັນຂາຂາວນຸ່ງສັ້ນ ຫັນກົ້ນໃຫ້ບ່າວມອງ
    ບໍ່ເໝາະສົມເດີ້ນ້ອງ ຂອງດີເຮົາ ໃຫ້ເຈົ້າຫໍ່ ແດ່ເນີ້
    ຢ່າຊິນຳອອກລໍ້ ໃຫ້ໝາວໍ້ແລ່ນຕຳ.
  • ທິບເອີ້ຽ... ທິພພະເລີດລ້ຳ ໃນໂລກໂລກາ
    ແສນໂສພາ ພ່ຳພຽງທວາຽໄທ້
    ທິພພະອວນລະອໍໄດ້ ມະໂນໝາຽມວນມິ່ງ
    ສັພພະສິ່ງໂລກກວ້າງ ບໍ່ເກີນກ້ຳສ່ຳນາງ.
  • ທັມມະຊາຕຕົກແຕ່ງໄວ້ ສາມຢ່າງ ຊີວິຕຄົນ
    ຄ້າຽດັ່ງໄຕຼສິກຂາ ໃຫ້ຄິດເຫັນເດີ້ເຈົ້າ
    ເຮົາ ເຂົາ ຂ້ອຽ ຢ່າລືມລອຽ ໃຫ້ຄອຽເບິ່ງ
    ເຖິງບໍ່ຂຽນຂີດແຕ້ມ ແຊມໄວ້ກໍຫາກດີ

    ຊີວິຕສາມທີ່ວ່ານີ້ ເປັນຊີວິຕຍ່າງຄັນຄອງ
    ທາງບ່ອນກວ້າງມາຮອມຫອງ ຄົດງໍບໍ່ເປັນເສັ້ນ
    ບໍ່ມີໃຜຫຼີກເວັ້ນ ຍາມມັນເປັນ ພຽງທາຕສີ່
    ຕ່າງກໍ່ຫຼີ່ລຽບເຂົ້າ ຊີວານັ້ນລ່ວງໄປ

    ເຖິງບໍ່ທຸກຍາກໄຮ້ ເຖິງວ່າຂາດແລງງາຽ
    ທຸກອຸກໃຈກະຍັງມີ ຊູ່ຄົນກະມີໄດ້
    ທຸກມາແລມາເຍື້ອນ ເໝືອນກັນທຸກຊັ້ນສ່ວນ

    ເຖິງສິທຸກຍາກແທ້ ເຈັບປວດກາຍາ
    ກະຍັງມີຄວາມສຸກ ສວ່າງໃຈໃສບ້າງ
    ທາງທີ່ຄືກັນແທ້ ທາງດຽວເປັນປ່ອງ
    ເປັນການຄືນສູ່ຫ້ອງ ຕາຽແທ້ຜູ່ດຽວ

    ບໍ່ມີໃຜຫຼີກພົ້ນ ກົນໄກທັມມະຊາຕ
    ວາສນາເຈົ້າຂ້ອຽ ຕ້ອງໜີຈ້ອຽດັ່ງກັນ
    ຢ່າໄດ້ຝັນເກີນຂໍ້ ຄວາມຈິງທັມມະຊາຕ
    ໃຫ້ສລາດຕໍ່ໄວ້ ກຸສົລສ້າງສົ່ງທາງ
    ຢ່າໄດ້ມົວຄິດມ້າງ ກັມກໍ່ເປັນທາງ
    ຢ່າໄດ້ມົວຫາກິນ ຈົນວ່າລືມຫຼົງເຄົ້າ
  • ທັມມະດາໂລກນີ້ ຄືໝາກປີ່ນບີນໝູນ
    ວັຕຕະຈັກວຽນວົນ ໝູ່ຄົນໄດ້ວຽນວ້າຽ
    ຕາເວັນສວາຽແສງຂື້ນ ຮອນຮອນອະຣຸນຮຸ່ງ
    ບໍ່ພໍຄາວກໍ່ສ້ຽງ ຣະອຽງໂຄ້ງອັສສະດົງ

    ເດືອນດາວຂື້ນ ແທນຕາເວັນ ເຫັນນວນຜ່ອງ
    ກໍ່ຍັງມີປ່ຽນປີ້ນ ແຮມຮ້າງມືດມົວ
    ອັນວ່າຕົວຕົນແທ້ ອະນິດຈັງ ບໍ່ໝັ້ນທ່ຽງ
    ມີແຕ່ທຸກບ່ຽງບັ້ນ ບີບຄັ້ນຈ່ອງເຂັນ
  • ທຸກປະເດັນ ໃນໂລກລ້ວນ ເຮົາບັງຄັບບໍ່ມີໄຫວ
    ໄດ້ດັ່ງໃຈບໍ່ຮ່ອນມີ ຫາຕົວຕົນ ບໍ່ພານພໍ້
    ສະອອນນໍ... ສະອອນທັມມະພຸທທະເຈົ້າ ເພີ່ນສອນເຮົາເໝີດທຸກຢ່າງ
    ຕັ້ງແຕ່ບາດຢ່າງເຍື້ອນ ລຸຮອດພຣະນິພານ

  • ທານ ສີລ ກ້ຳ ກັມມະຖານ ເກລາກິເລສ
    ເຫຕຈາກເຫຕ ເພີ່ນວ່າໄວ້ ໃສແຈ້ງກະຈ່າງແປນ
    ຍິນແຕ່ແຈນແວນຮ້ອງ ກ້ອງປ່າສະບາໄພ
    ລົມພັດໃບກວຍຮັງ ຫ່ວນຣະຄັງດັງກ້ອງ
    ອ້າຽເອື້ອຽນ້ອງ ດຽວດາຽໃຫ້ໃຈອຸ່ນ
    ຣະຣຶກເຖີງພຸທທະຄຸນ ທັມມະຄຸນຄ່າລ້ຳ ນຳນ້ອມເຂົ້າສູ່ໃຈ ແທ້ແລ້ວ