ໝວດທີ່ຂຶ້ນຕົ້ນດ້ວຽຕົວ "ຕ"

 

  • ຕະກຽງຊີວິດ
    ທັມມະຊາດເພິ່ນສ້າງ ແປງທາງໃຫ້ທຽວທ່ອງ
    ເປັນຄັນຄອງແຕ່ຄັ້ງ ໂບຮານພໍ້ ພົບເຫັນ
    ເປັນປະເດັນຫົວເຣື້ອງ ສອນກັນ ໃຫ້ສືບຕໍ່
    ຫວັງໄດ້ພົບຊາພຂໍ້ ພຸທໂທເຈົ້າ ໄດ້ສັ່ງສອນ
    ເກີດເປັນ ທາຕສີ່ຕັ້ງ ມະໂນນັຍ ສືບ ປ່ອງ
    ປັນຈະຂັນທ໌ ສືບເຊື້ອ ເປັນຄົນໄດ້ດັ່ງໝາຽ
    ເກີດເປັນຊາຽຍິງລ້ວນ ສເມີກັນໂດຽດັ່ງ
    ປຽບດັ່ງພຽງ ຕໍ່ໄວ້ ສືບເຊື້ອ ເຜົ່າພັນທ໌
    ຊີວິດພຽງ ຕະກຽງນ້ອຽ ຄອຍເວລາກັບຄືນຖີ່ນ
    ຫາກສີ້ນດັບມອດເຊື້ອ ເຫຼືອຄ້າງຄ່າຄົນ
    ສາລະວົນຄາວມື້ ໃຈແຕ່ງ ສັງຂານຂັນທ໌
    ວັນຄືນລັບ ລ່ວງເລີຽໄປສີ້ນ
    ສຸກທຸກແທ້ ຄວາມຈິງຫາກບໍ່ປ່ຽນ
    ມີແຕ່ວຽນແລ່ນເຂົ້າ ລໍມື້ສິຕ່າວຕາຽ
    ບໍ່ໄດ້ໝາຽວ່າຍັ້ງ ພັນຂວບປີປາຽ
    ຊາຽ ຍິງ ເຮົາ (ຄົງ) ບໍ່ເອົາເກີນຮ້ອຽ
    ຄອຽຫາເຫຼັ້ນ ສ້າງກັມເກີດກໍ່
    ໃຫ້ເປັນບໍ່ແຫ່ງຮ້າຽ ພາຽຊ້ອຽຫາກເຫັນ
    ເວນກັມນີ້ ເຍື້ອໃຍໃຈຈ່ອງ
    ສືບໃຍຍາງ ດີຊົ່ວໄວ້ ໄປໜ້າ ບໍ່ ເຊົາ.
  • ຕາສະອອນຜັກບົ້ງ ຢາກເດັດລົງປຸງແຕ່ງ
    ເຫຼືອແຮງເຮັດຈັ່ງໃດ ຢາກໄດ້ດີກວ່ານີ້ ບໍ່ມີແຫຼ້ວຢູ່ປ່າເຂົາ
    ຈຳເປັນລຸກແຕ່ເຊົ້າ ຫີວຫອດແນວກິນ
    ຍາກວຽກຫຼາຍຈົນວິນ ເມື່ອຍຄີງຄວາມລ້າ
    ວ່າຊິຂໍແພງຫຼ້າ ໃຫ້ໄດ້ມາປຸງແຕ່ງ
    ຊິໄດ້ຮັກໄດ້ແພງ ຫາໃສ່ແລງໃສ່ເຊົ້າ ຕາບເທົ້າຊົ່ວຊີວັງ.
  • ຕຳນານ ເຂົ້າ ເຜືອກ ມັນ ກອຍ
    ເຂົ້າ ເຜືອກ ກອຍ ມັນ ນັ້ນ ມີຕຳນານທີ່ປັ້ນກໍ່
    ຮຽມນີ້ໄປພົບພໍ້ ເຫັນຈານໄວ້ ໃສ່ໃບລານ
    ເປັນຕຳນານ "ແມ່ໂພສົບ"ເຈົ້າ ຂຽນ"ໂຕທັມ"ໄດ້ເຫັນອ່ານ
    ແປເປັນລາວໄວ້ໃຫ້ ຜູ່ຢາກໄດ້ເຣື່ອງຄະດີ

    ຕັ້ງແຕ່ກີ້... ເຂົ້າມີ ປີກບິນໄດ້ ເຊາະແຊ່ວເວຫົນ
    ຣືສີ ປູມຜຍາ ອັນເຊີນມາ ພາຽໃຕ້
    ຫວັງເອົາ ໄປສືບສ້າງ ສາສນານຳຕໍ່
    ໃຜມີກວຽນແກ່ລໍ້... ເອົາທໍ່ໃດກະໄດ້ ບໍ່ບົກໄຮ້ຂາດເຂີນ

    ເທື່ອນັ້ນ... ຫາກວ່າມີແມ່ໝ້າຽ... ຄຽດຊັງຫຼາຽ ເລົາຫາບເມື່ອຽ
    ຫາບຈັ່ງໃດກະຢູ່ເລື້ອຽ ບໍ່ມີມື້ຮ່ອມເຊົາ

    ເລົາເລີຽເອົາໄມ້ຄານຟາດ "ໂພສົບ"ຂາດລົງ ແລ້ວແຕກມຸ່ນ
    ອັນວ່າ ເຂົ້າໃບບຸນ... ແຕກກະເດັນມຸ່ນສ້ຽງ ບິນໄປແລ້ວກະເລົ່າຕາຽ
    ຕາຽຕົກຢູ່ຊຸ່ມນ້ຳ... ເລີຽເກີດເປັນຍັງເຂົ້າ...
    ຂຽວຄືເທົາໝູ່ເຮົາໄດ້ຄອນກ່ຽວ
    ສ່ວນຕາຽຕົກຢູ່ດອນ.. ເກີດເປັນ "ມັນ"ຂຽວປົ່ງອົ້ວ ລົງຫົວໃຫ້ກົ່ນກິນ
  • ຕຳຣາຫາເບິ່ງ ຜູ້ຊາຍດີ
    ມື້ນີ້... ຂ້ອຽຈັກບອກ ໃຫ້ຮູ້ ຜູ້ສລາດ ຄົນຊາຽ
    ຫາກວ່າ ບຸນ ໃຜມີ ກໍ່ຈັ່ງຫຼົງ ພອຽພໍ້
    ມັນຫາກເລິງ ເລິງພໍ້ ຊາຽຊາມ ຊາຕຊົ່ວ ຫຼາຽແລ້ວ
    ອັນວ່າ ຜູ່ສລາດຮູ້ ຫາໄດ້ ແຕ່ລະຄົນ ນັ້ນແລ້ວ
    ... ຊາຽໃດ ນອນສຖານຫ້ອງ ເຮືອນຕົນ ມີວາທ
    ວຽກສ້າງໄວ້ ໄຂແກ້ ສືບໄປ
    ຍາມເມື່ອ ວົງສາເຊື້ອ ທາງໄກ ມາຮອດ
    ມັນກໍ່ປູ ສາດໄວ້ ຈຳໃຫ້ ນັ່ງເທິງ
    ແລ້ວຈຶ່ງ ຈາປາກຕ້ານ ຕາງແມ່ ມານດາ
    ມັນກໍ່ທຳ ກະບວນເໝືອນ ພໍ່ເຮືອນ ໃຈກວ້າງ
    ມັນກໍ່ ຫວນ ຫາ ເຫຼັ້ນ ພໍຫວນ ຫາເມື່ອ
    ບໍ່ແມ່ນ ໄປສູ່ມື້ ແຫງນໜ້າ ຕໍ່ໃຜ
    ມັນບໍ່ມີ ສະຫງວນກົ້ວ ຍິງຊາຽ ຝູງໜຸ່ມ
    ກໍ່ຫາກ ນຳຜູ່ເຖົ້າ ຮຽນຮູ້ ຮີດຄອງ
    ຍາມເມື່ອ ສັງໂຄເຈົ້າ ສແດງທັມ ໄຂສູຕ
    ມັນກໍ່ໃຈ ອ່ອນນ້ອມ ມະທູຊ້ອຽ ສະຫວາດຢຳ
    ຝູງໝູ່ ຍິງຊາຽຂື້ນ ເຮືອນມັນ ບໍ່ ມີ ຂາດ
    ເຫຕວ່າ ຊາຽໜຸ່ມນ້ອຽ ຄວາມຮູ້ຫາກມີ
    ເປັນທີ່ ຫວັງສຸກຍ້ອນ ແນວນາມ ເຊື້ອຊາຕ ອິຫຼີແລ້ວ
    ຝູງໝູ່ ໄທຕ່າງດ້າວ ສງວນສູ້ ຈົ່ມຫາ
    ຍາມເມື່ອ ເຖົ້າແກ່ເວົ້າ ມັນຫາກຄ່ອຽ ຟັງສງັດ
    ພໍເມື່ອ ກະບວນສຸດ ເມື່ອລຸນ ຈັ່ງຈາຕ້ານ
    ຕາມແຕ່ ຄວາມຮູ້ໜ້ອຽ ເຫັນຄອງ ເວົ້າຄ່ອງ
    ຝູງໝູ ເຖົ້າ ແກ່ເວົ້າ ຍໍຍ້ອງ ສູ່ຄົນ...
    ໃຫ້ຄ່ອຽຟັງ..ເດີ້... ນັນທານ້ອຽ ສເນຫາ ແຍງຮຸບ ເຈົ້າເອີຽ
    ອັນວ່າ ຄັນບໍ່ເປັນ ປໂຍດແທ້ ໃຈເຈົ້າ ຢ່າກະສັນ
    ອັນວ່າ ແນວຂອງລ້ຳ ຄູນເຮືອນ ມັນຫາຍາກ
    ຊາຽຜູ້ ນັກປຣາດຮູ້ ຫາໄດ້ ແຕ່ລະຄົນ
    ຍິງໃດໄດ້ ຜົວຂວັນ ຜູ່ປະເສີດ
    ເປັນແຕ່ ກຳເນີດເບື້ອງ ບຸນສ້າງ ແຕ່ຫຼັງ
    ຍິງໃດໄດ້ ຜົວຊົມ ຄົນຊົ່ວ
    ເປັນແຕ່ ບາບກ່ອນພຸ້ນ ປະສົງຕັ້ງ ແຕ່ງມາ
    ເປັນດັ່ງ ແຍງເງົາແກ້ວ ດູກະບວນ ໃຜຄ່ອງ
    ຄັນວ່າ ຄົນຮູບຮ້າຽ ເງົານັ້ນ ກະດັ່ງກັນ ນັ້ນແລ້ວ
    ຟັງເອົາເດີ້... ນັນທານ້ອຽ ທິດາ ໃຫ້ ຈຳຈື່
    ຄຶດໃຫ້ຕົກ ຮ່ອມແລ້ວ ຍາມນັ້ນ ຈັ່ງຄ່ອຽເອົາ...
  • ຕາມໃຈເຈົ້າ ສິເອົາໃຜກະຕາມຊ່າງ
    ວ່າແຕ່ເຈົ້າຖີ້ມພຸ້ນ ມາພີ້ບໍ່ວ່າສັງ.
  • ຕາມໃຈແຂ້ ສິກິນຫີນກະຕາມຊ່າງ
    ປາຫາກມີຢູ່ແທ້ ສິກິນໄມ້ກະຊ່າງໃຜ.
  • ຕາມໃຈຊ້າງ ສິກິນບົ້ງກະຕາມຊ່າງ
    ຄັນແມ່ນບົ້ງບໍ່ເອື້ອ ສິກິນຫຍ້າກໍ່ຊ່າງຕາມ.
  • ຕາມໃຈນ້ຳ ໄຫຼໄປໃສກໍ່ຕາມຊ່າງ
    ເຫັນແຕ່ນ້ຳລ່ອງໃຕ້ ສິໄຫຼຂຶ້ນແມ່ນບໍ່ມີ.
  • ຕາມໃຈນ້ຳ ທີ່ໄຫຼເວີນກະມີຢູ່
    ບໍ່ແມ່ນແຕ່ສິລ່ອງໃຕ້ ເວີນຂຶ້ນກໍ່ຫາກມີ.
  • ຕາມໃຈອ້າຽ ເໝິດກາຽສິຍອມມອບ
    ຄັນແມ່ນເຊື່ອອ້າຽໄດ້ ໃຈນ້ອງສິມອບນຳ.
  • ຕາມໃຈອ້າຽ ສິເປັນຕາຽກະບໍ່ວ່າ
    ວ່າແຕທາງອ້າຽລ້ຽງ ຕົວນ້ອງສິຄ່ອຽຕາມ.
  • ຕົກກະເທີນ...
    ໄປຄ້ອງຊ້າງ ຊິເອົາຈົນໄດ້ຂີ່ ມາແລ້ວ
    ຕົກກະເທີນວ່າເວົ້າ ຊິເອົາເຈົ້າເຂົ້າຮ່ວມເຮືອນ.
  • ຕົກກະເທີນ...
    ໄປໜ້າ ຫາກິນແຕ່ໜອງໃໝ່
    ໜອງເກົ່າມີບໍ່ແພ້ ແສນຊິບ້ອນກໍບໍ່ງົມ.
  • ຕົກກະເທີນ...
    ວ່າໄດ້ຫຍ້ຳ ຢ່າຄາຽຄຳບາດເຫັນຕ່ອນ
    ເຫັນຂອນຢ່າວ່າແຂ້ ສິຍັກແຍ້ຂຶ້ນໃສ່ເຮືອ
    ຄັນເຫັນເສືອແມ່ຮ້າຽ ລີງລາຽເຊື່ອງໄວ້ກ່ອນ
    ໃຈເຢັນເຢັນຢ່າຟ້າວຮ້ອນ ກະຕ່າຽເຕັ້ນຕື່ນຕູມ
    ຄ່ອຽໆຄຸມເດີ້ເຈົ້າ ຄ່ອຽຄ່ອຽທາວຢ່າປະປ່ອຽ
    ສາວນ້ອຽໃຫຽ່ເພີ່ນສິປ້ອຽ ສາວສ່ຳນ້ອງເພີ່ນສິເຂີນ ຊັ້ນດອກຫວ້າ...
  • ຕົກກະເທີນ...
    ໄດ້ໂຕນນ້ຳ ສິຂໍລົງວັງໃຫຍ່
    ຕົກກະເທີນໄດ້ຂື້ນໄມ້ ປາຽບໍ່ພໍ້ກະບໍ່ເຊົາ
  • ຕົກກະເທີນໄດ້ກິນເຫຼົ້າ ຄັນບໍ່ເມົາກະບໍ່ຢູ່
    ຕົກກະເທີນໄດ້ເປັນຊູ້ ສາແລ້ວກະບໍ່ໄລ ດອກນາ
  • ຕົກກະເທີນ...
    ລົງລາຍມ້ວນ ບໍ່ເປັນບຸງກໍເປັນຕ່າ
    ບໍ່ເປັນຊ້າຜ້າອ້ອມ ໃຫ້ເປັນຂ້ອງໃສ່ປາ.
  • ຕົກກະເທີນ...
    ວ່າໄດ້ປ້ຳ ຊິນຳຮອນໝົດທຸກງ່າ
    ຕາບໃດພ້າບໍ່ບ່ານ ຂວານບໍ່ບ້ຽວ ຈຳບ້ອງແມ່ນບໍ່ເຊົາ.
  • ຕົກກະເທີນ...
    ວ່າໄດ້ກຳຄໍແຂ້ ບໍ່ວາງມືໃຫ້ມັນຟາດ
    ຕົກກະເທີນໄດ້ກຳຄໍກະທ້າງ ບໍ່ວາງໃຫ້ແກ່ຜູ້ໃດ.
  • ຕົກກະເທີນ...
    ວ່າໄດ້ກຳແຂນແລ້ວ ບໍ່ມີວາງໃຫ້ຄົນອື່ນ
    ມີແຕ່ຕັ້ງຕໍ່ທື້ນ ດຶງເຈົ້າເຂົ້າບ່ອນນອນ
    ອ້າຽນີ້ຄິດຮອດນ້ອງ ເນື້ອຜ່ອງລະອອງສີ
    ສວັດດີເດີ້ແຟນ ແມ່ນເພາະບຸນຄຸນອ້າຽ
    ສຸກສ່ຳບາຽບໍ່ນໍຫຼ້າ ຂວັນຕາຜູ່ຮູບຄ່ອງ
    ຫົວໃຈອ້າຽສີ່ຫ້ອງ ມອບໃຫ້ນ້ອງນຶ່ງດຽວ.
  • ຕົກກະເທີນ...
    ວ່າໄດ້ສູ້ ບໍ່ຖອຽຫຼັງໃຫ້ເຂົາຫຍຽບ ດອກນາ
    ຕາຽກໍ່ໃຫ້ຕາຽໜ້າພຸ້ນ ເພີ່ນຈັ່ງຍ້ອງວ່າຫານ
    ຕົກກະເທີນ ເປັນພານແລ້ວ ໝານບໍ່ໝານກະອອກປ່າ
    ສິລ່າໄດ້ຫຼືບໍ່ໄດ້ ໄປເຖິງໝ້ອງປ່ອງໝາຽ
    ຄັນໄດ້ເປັນເສືອແລ້ວ ລາຽບໍ່ລາຽເຂົາກະຕູ່
    ຄັນບໍ່ໄດ້ເປັນຄູ່ນ້ອງ ທາງອ້າຽແມ່ນບໍ່ໜີ
    ສິເປັນຮ້ອຽ ຫຼືພັນປີ ບໍ່ມີໜ່າຽ
    ສິລົບເມືອໄປຂາຽເຂົ້ານ້ອຽ ຕຽມໄວ້ເປັນຄ່າດອງ...
  • ຕົກກະເທີນ...
    ວ່າສິໄປສາແລ້ວ ບໍ່ມີແນວສິດຶງຢູ່
    ຄົນສິຮູ້ ຊູ້ສິຮ້າງ ຕາຽຖີ້ມກະຊ່າງມັນ
  • ຕົກໄດ້ ລົງທຶນຄ້າ ເສັຽດາຍທຶນ ມັນຊິແມ່ນ
    ຂ້າຄວາຍ ຫາກເສັຽດາຍໝາກເຜັດນ້ອຍ ຊິໄປກ້ອຍກັບອິຫຍັງ.
  • ຕົກມາໜາວປີນີ້ ດວງຣືດີອ້າຍໄຫວຫວັ່ນ
    ຍາມຍິນສຽງໄກ່ຂັນ ຊາວມືໄປຂ້າງໆ ມາຄືວ້າງເປົ່າແປນ
    ຢາກໄດ້ແຟນ ມາເນົາໃກ້ ຫົວໃຈຄືຊິອຸ່ນ
    ຄັນໄດ້ແກ້ມຈຸ່ນພຸ່ນ ຄັນບຸນມີ ໄດ້ນອນໃກ້ ຄືຊິໄດ້ອຸ່ນຄີງ.
  • ຕົກຣະທົມຂົມເສົ້າ ໄດ້ເອົາເງົາອ້າຍເປັນໝູ່
    ທຸກປານໃດກໍຊິສູ້ ພຽງພື້ນຜູ່ດຽວ
    ອົດສາຫຼຽວເນີອ້າຍ ໝາຍຜ່າວາສນາ
    ບຸບເພເພິ່ນສ້າງມາ ໃຫ້ພໍ້ກັນພຽງນີ້
    ໃຫ້ພີ່ຊາຍດີໄດ້ ຢ່າມີໄພກ້ຳກ່າຍ
    ເຖິງໂຕນ້ອງຊິເປົ່າດາຽ ຊິບໍ່ຄາຍຮັກເຈົ້າ ຈຶ່ງຂໍເວົ້າວ່ານຳ ນີ້ແລ້ວ
  • ຕົວະຮັກບໍ່ໄດ້ເວົ້າ ອົກຊິເນົ່າໂນມໃນ
    ບໍ່ໄດ້ໄຂວາຈາ ອົກຊິເພພັງມ້າງ
    ຮັກບໍ່ຈາງລາງເລື້ອນ ກະວຽນໜີເຫີນຫ່າງ
    ຄັນແມ່ນພັງຈັງສ້າງ ຄືຊິມ້າງແຕ່ດົນ ແທ້ແລ້ວ.
  • ຕົວຂອງອ້າຍ ບໍ່ແໜງໜ່າຍຄວາມຊົມ
    ບໍ່ເຄີຽຂົມໃຈຈິຕ ຄິດແຂງແຍງແຈ້ງ
    ໃຫ້ຊີ້ແຈງນຳດ້ວຽ ຄຳໃດຍັງບໍ່ຄ່ອງ
    ປອງໃຫ້ຊາຍເນັ່ງເນີ້ງ ຄືນໄດ້ໃຫ້ຊື່ຕົງ
  • ຕີຫຼັງ ດ້ວຽໄມ້ແສ້ ແບມືມາລູບໄຫຼ່
    ແສນຊິໃຊ້ນ້ຳອ້ອຍ ອອຍໄດ້ກໍບໍ່ລືມ.
  • ຕັ້ງໃຈ ຈານຳນ້ອງ ຄອງຄອຍແຕ່ຂັນໄກ່
    ມັກບໍ່ມັກກໍໃຫ້ເວົ້າ ບໍ່ເອົາອ້າຍບໍ່ວ່າຫຍັງ.
  • ຕົກຫວ່າງຍຸກ
    ຮຽມຂໍວາຈາຕ້ານ ຂານກ່າວພາສາກອນ
    ມາຮ່ຳຮອນຄວາມທຸກ ອຸກກະໃຈໃນຄວາມເວົ້າ
    ຄືດຂື້ນມາພາໃຈເສົ້າ ແນວຄົນເຮົາມາເປັນຕ່າງ
    ເດີນກັນຄົນລະທາງ ຍ່າງໜີທັມມະເຈົ້າ ລືມເຄົ້າແຕ່ກ່ອນມາ

    ຄົບກັນພຽງພໍ້ໜ້າ ຈັກສິວ່າແນວໃດ
    ຄວາມໃນໃຈຂອງຄົນ ບໍ່ອາຈເດົາເອງໄດ້
    ຢ່າໃສ່ໃຈໃນຄວາມເວົ້າ ມະໂນເຮົາສິພອຽດ່າງ
    ຄວາມເວົ້າຄົນມີຫຼາຽຢ່າງ ມີເວົ້າດີເວົ້າຮ້າຽ ຢ່າໄປເຕື້ອງຕໍ່ຄຳ

    ຄືໂບຮານເພີ່ນວ່າ...
    ເພີ່ນວ່າ ຍຸກຕົ້ນໄມ້ ໃບບໍ່ປົ່ງຍາມຝົນ
    ກະຍ້ອນຄົນທຽວຕັດ ຈັ່ງເກີດພູຫົວໂລ້ນ
    ບາດຍາມຝົນຕົກມາໃຫ້ ຈັກປ່າໃດ ໃບສິປົ່ງ
    ເວົ້າກັນແບບຕຣົງໆ ປ່າບໍ່ເຫຼືອເສືອບໍ່ຊົ້ນ ກະຄົນແທ້ຜູ່ກະທຳ

    ກາຽເປັນຍຸກຂາດນ້ຳ ທາມຂາດປ່າ ນາຂາດຝົນ
    ຄົນຂາດເຂີນທັມມະ ບໍ່ຄຳນຶງຄວາມຢ້ານ
    ຍຸກຄົນພານເປັນເຈົ້າ ຍຸກຊາວເມືອງຖືກດູໝີ່ນ
    ຕົກຍຸກຄົນລືມສີລ ດີແຕ່ປາກ ຢາກແຕ່ເວົ້າ ສິເອົາພ້ຽນຫາກປ່ຽນໄປ

    ຕົກຢູ່ໃນຍຸກຮ້າຽ ໄຟໄໝ້ໝຸ່ນລາມເຜົາ
    ຍ້ອນຄົນເຮົາເອ່ນອຽງ ບ່ຽງຄຳສອນໄປຄົນດ້ານ
    ສະຖານະການກະເລີຽລົ້ນ ວົນຈາກດີໄປເປັນຊົ່ວ
    ຄົນຫວາດກົວທົ່ວແຄວ້ນ ແດນດ້າວຈັ່ງຜວາ

    ຕົກຫວ່າງຍຸກ ນ້ຳຈາກຟ້າ ລົ້ນອັ່ງຖັງໂຖມ
    ຫຼັງຄາຈົມທາຣາ ປ່າພົງດົງໄມ້
    ຖືກທຳຣ້າຽໄປເສັຽສີ້ນ ເຫຼືອແຕ່ດີນ ສີ້ນພັນນ໌ປ່າ
    ບາດຝົນເທັ້ງລົງມາ ປ່າບໍ່ມີກັ້ນນ້ຳ ທາມບໍ່ມີປ່າໄມ້ ຄົນຈັ່ງໄຫ້ຊວ່າແຊວ

    ມັນຫາກເກີດຂື້ນແລ້ວ ແນວຍຸກ ຄົນໃຈມົວ
    ຍຸກຫົວ ໝົດຄວາມຄຶດ ອຶດປັນຍາຕັນຫາກຸ້ມ
    ປຽບຊຸມບົວໃນນ້ຳ ເກີດນຳຕົມໃຕ້ນັ້ນເນົ່າ
    ເປັນອາຫານປາເຕົ່າ ເໝືອນດັ່ງຄົນຖືກຕູ້ມ ຕັນຫາຫຸ້ມບໍ່ດີ

    ຕົກຫວ່າງຄົນຍຸກນີ້ ຢາກມີລື່ນບັນດາສັກ
    ຍ້ອນບໍ່ຈັກຄວາມພໍ ຕໍ່ເຕີມແຕ່ທາງໄດ້
    ບໍ່ວ່າໃຜ ດອກເດີ້ເຈົ້າ ກະຄືກັນຢາກໄດ້ລື່ນ
    ຝືນຄວາມໂລບບໍ່ໄດ້ ໃຈລ້ຽວກ່ຽວໂກງ

    ເວົ້າອອກມາໂປ້ງໆ ແຕ່ໃຈຄົດບໍ່ມີຫຼັກ
    ບອກວ່າເຮົາຈົງຮັກ ພັກດີບໍ່ມີບ໊ຽວ
    ຫຼຽວຫາຄວາມດີໄວ້ ໃນໃຈແຈ້ງຈໍ່
    ຄົດຫຼືງໍພໍເວົ້າໄດ້ ແຕ່ໃຈແທ້ສ່ອງບໍ່ເຫັນ

    ເຫັນກົດເກນເປັນຂອງເຫຼັ້ນ ເວົ້າຄວາມຍາວສາວຄວາມຕໍ່
    ຄວາມບໍ່ພໍຍ້ອນຢາກໄດ້ ແມ່ນໄຟໄໝ້ກະສ່ວນຍອມ
    ຄັນສິເວົ້າໃຫ້ຕ້ອມ ໜາຽຄວາມວ່າຄົນລືມຄຸນ
    ຄຶດນຳທຶນເປັນຫຼັກ ບໍ່ຊັກນຳກັມມົ້ວ
    ເລີຽເມົາມົວແຕ່ນຳໄດ້ ປຽບຂາຽໄຟໃຫ້ໄໝ້ພໍ່
    ຖືກບໍ່ນໍ້ຂໍ້ນີ້ ຜະອວນຂ້າວ່າຖແລງ (ຍັງມີຕໍ່)

    ຍຸກຕໍ່ໄປ.. ຍຸກໃຈຄົນສິແລ້ງ ຍ້ອນແຄ້ນຄັ່ງນຳເງິນຕຣາ
    ສແວງຫາເງິນຄຳ ມນຸສທັມລືມກ້ຽງ
    ຄິດແຕ່ພຽງທາງໄດ້ ວິທີໃດກະຕາມແຕ່
    ຂໍແຕ່ໄດ້ເງິນມາ ວິທີຫາສິຊົ່ວຮ້າຽ ໂສຫາໄດ້ບໍ່ໃສ່ໃຈ

    ຍຸກຕໍ່ໄປ ປາສິໄດ້ ໄລ່ສວບແມວໂພງ
    ຄົນຂີ້ໂກງມາກມາຽ ວຸ່ນວາຽສິຫຼາຽລົ້ນ
    ຍ້ອນໝູ່ຄົນໃຈຮ້າຽ ທຳລາຽພວກເຜົ່າ
    ປຽບເຕົ່າ ປາຢູ່ນ້ຳ ສິໄລ່ປ້ຳສວບແມວ

    ຍຸກຕາເວັນລົງແລ້ວ ບໍ່ມີອ່ວຽຄືນກັບ
    ອັສສະດົງລົງລັບ ບໍ່ຕ່າວຄືນມາແຈ້ງ
    ຍຸກແຫ່ງແສງພຣະທັມເສົ້າ ເພາະຄົນເຮົາບໍ່ເຕື້ອງຕໍ່
    ລູກຂ້າແມ່ຕີພໍ່ ຍິງຂົ່ມຊາຽອ້າຽນ້ອງ ໄຟສິຕ້ອງແຜດເຜົາ

    ຕົກຍຸກຄົນມັກເວົ້າ ມາພໍ້ພົບບັນຈົບກັນ
    ປານຝົນຕົກຂີ້ໝູໄຫຼ ຄົນຈັ່ງໄລມາພໍ໊
    ພວກສໍພໍມັກຍໍຍ້ອງ ເວົ້າພື້ນໂຕໂສຄວາມເພີ່ນ
    ສີລຂໍ໊ສີ່ຖືກເມີນ ເວົ້າຄວາມຈິງບໍ່ໄດ້ ຍາມເຈົ້າກ່າວຂານ

    ຍຸກຂອງດີນສິຫ່າງບ້ານ ສຖານທີ່ເຄີຽອາສັຍ
    ຍ້ອນຕ້ອງໄປຫາເງິນ ຕ່າງເມືອງຈົນລືມບ້ານ
    ຫ່າງເຮືອນຊານທີ່ເຄີຽຊົ້ນ ຫ່າງໄກຄົນໄກຖີ່ນ
    ປຽບຄືດີນຫ່າງບ້ານ ເຮືອນຊານຊົ້ນແມ່ນບໍ່ມີ

    ຕົກມາໃນຍຸກນີ້ ກອງໄຟໃຫຍ່ບໍ່ມີສີ
    ລຸກບໍ່ມີແສງເຮືອງ ມີແຕ່ພຽງຄວາມຮ້ອນ
    ປຽບຄືຕອນໂກທາຮ້າຽ ໄຟໃນໃຈສິໝົກໝຸ່ນ
    ຄວາມກາຣຸນສິມອດກ້ຽງ ມີພຽງແທ້ຕັ້ງແຕ່ສູນ

    ໃນຫົວໃຈເຈົ້າສິວຸ້ນ ເຄືອງຂຸ່ນໂກທາ
    ອຸປປະມາຄືກອງໄຟ ໄໝ້ຢູ່ກາງຕາເວັນແຈ້ງ
    ບໍ່ມີແສງໄດ້ໄໝ້ ຫົວໃຈຄົນໃຫ້ພັງໝຸ່ນ
    ແຕກເປັນຈຸນໝຸ່ນມ້າງ ທະລາຽລ້າງຫ່າງເພ

    ອີກຢ່າງໜຶ່ງ... ປຽບຍຸກຄົນມັກເອ້ ມັກແຕ່ງແຍງກະຈົກ
    ແຕ່ທາງໃນ... ໃຈພໍປານນາຣົກ ຮົກພໍປານນາເຮື້ອ
    ມັນບໍ່ເຫຼືອຫຍັງແລ້ວ ແນວຄົນງາມແຕ່ທາງນອກ
    ປອກເຂົ້າໄປໃຫ້ແຂ້ນ ໃນແກນແທ້ຜັດເນົ່າເໝັນ

    ມັນຫາກເປັນຈັ່ງຊີ້ ໄຟບໍ່ຮຸ່ງເຮືອງສີ
    ຄົງບໍ່ມີອັຕຖາ ປໂຍດຫຍັງໃຫ້ຄົນໃຊ້
    ເປັນແຕ່ພຽງໄຟໄໝ້ ບໍ່ມີແສງປະກາຽສ່ອງ
    ຄົນຍຸກນີ້ເດີ້ພີ່ນ້ອງ ສິເປັນບັ້ນດັ່ງກ່າວມາ ແທ້ເດ.
  • ຕົ້ນໄມ້ ໃຫຍ່ບໍ່ມີຜີ ສາວຜູ້ດີບໍ່ມີຊູ້ ຕົນອ້າຽບໍ່ເຊື່ອຄົນ.
  • ຕົ້ນໄມ້ ໃຫຍ່ບໍ່ມີຜີ ສາວຜູ້ດີບໍ່ມີຊູ້ ທໍຣະນີຊິອົກແຕກ
    ຕາແຮກກິນໄກ່ຕົ້ມ ຊິງົມລ້ຽງຢູ່ເຮັດຫຍັງ.
  • ຕົວຮຽມນີ້ ນັບແຕ່ເປັນໜອງຂຶ້ນ ທະເລຫຼວງບຶງເບີກ ພີ່ເຮີ້ຍ
    ຮວກບໍ່ມີຊິຕີນ້ຳ ຊີວກຸ້ງບໍ່ລ່ອງລອຍ
  • ຕົວຮຽມນີ້ ປຽບດັ່ງແມ່ນ້ຳນ້ອຍ ບໍ່ຄືແມ່ກະແສສິນ
    ຫົງບໍ່ບິນມາລົງງ ສ່ຳຕະຄອງໜອງນ້ອຍ
    ຕົວຮຽມນີ້ ປຽບດັ່ງໂພສີສ້ອຍ ສັກກູນາກໍບໍ່ແກວ່ນ
    ບໍ່ຄືຈິກແກ່ນຫຼ້ອນ ບໍ່ຄືຂອນແກ່ນແກ້ ບໍ່ຄືຍອດດໍ້ແດ້ ຫົງນ້ອຍກໍບໍ່ລົງ.

  • ຕອງຕັດ ຍັງມີສົ້ນ ໄໝສົນຍັງມີເງື່ອນ
    ເຊີນນ້ອງປົງເງື່ອນໄວ້ ໝາຍໝັ້ນບ່ອນຊິເອົາ.

 

  • ຕ້ອນຮັບແລະທັກທາຽ
    ເຮົາຫາກແນວນາວເຊື້ອ ແຊງໝາກນາວສີຫວານເຫວີ່
    ຄອບວ່າຕົ້ນຕ່າງຕົ້ນ ຄວາມສົ້ມຈຶ່ງຕ່າງກັນ
    ຮຽມຂໍວາຈາອ້ອນ ຕ້ອນຮັບທ່ານມາຊົມ
    ຂໍປະນົມມືນົບ ກ່າວຜຍາຈາພ້ອມ
    ສິບນີ້ວອັນຊຸລີນ້ອມ ເໜືອສຽນຕາງທຽນທູບ
    ໝູບກາບແລ້ວ ຄຸນແກ້ວໜ່ວຽພຣະຕັຍ

    ຂໍສະໜຳລຳລຶກໄວ້ ເທົ້າຊົ່ວຊີວາຍັງ
    ຂອບພຣະຄຸນໃນແນວຫວັງ ທຸກພລັງແຮງໃຈເຈົ້າ
    ມາຖະແມ້... ມາໂຮມເຕົ້າ ນຳກັນທຸກຊັ້ນສ່ວນ
    ມາໂຮມກັນຊ່ອຽຊ້ວນ ກັນພ້ອມພ່ຳຂບວນ

    ແມ່ນແຕ່ລາວລ້ວນໆ ໃຫ້ເກາະກຸ່ມເປັນຊຸມແຊງ
    ຢ່າສະມີຫອງແຫງ ຫ່ຽວໂຮຽໂຊຽລ້ວງ
    ໄທອື່ນເຂົາສິພາກັນທ້ວງ ວ່າໄທເຮົາ "ບໍ່ເຂົ້າທ່າ"
    ໃຜລະນໍ້ ສິບໍ່ຢ້ານ ໄທບ້ານເພີ່ນຫຍັນ

    ໂອກາດດີ ມື້ນີ້ນັ້ນ ມາກອງກັ່ນ ກະວີການ
    ຈາກສະຕິ ປັນຍາຍານ ທີ່ອ່ອນເຍົາ ຍັງເບົາຕື້
    ຖາມຂ່າວສານ ຂອງວັນມື້ ເປັນແນວໃດ ໃຫ້ບອກແນ່
    ມີແນວໃດ ໃຫ້ຊ່ອຽແກ້ ຕູຂ້ອຽ ສິຊ່ອຽກັນ
    ອັນວ່າ ໂພສີສ້ອຽ ໃບບໍ່ດົກ ນົກບໍ່ແກວ່ນ
    ໝາກບໍ່ຫວານຈ້ອຽຈ້ອຽ ກາອ້ຽງບໍ່ລ່ຳແລ

    ມາທະແມ... ຢ່າໄດ້ຊ້າ ເຂົ້າມາຕໍ່ທຳນອງກອນ
    ສແດງວາດບົດອອນຊອນ ປ່ອນຜຍາມາແຖມທ້າຽ
    ມີແຕ່ດີບໍ່ມີຮ້າຽ ຍາມໄດ້ຟັງໃຈວອນຫວີ່
    ນີ້ລະຄືຂອງດີ... ບ້ານໝູ່ເຮົາເຈົ້າຂ້ອຽ ... ຟ້າວມາຕ້ອຽດອກຊ່ອຽຈຳ

    ສັກກະຣາດລ່ວງລ້ຳ ຫຼາຽຂວບຄາວຣະດູ
    ແຕ່ຜຍາຕຳຣາຄູ ບໍ່ຫ່າງຫູແຮມຮ້າງ
    ບົດປະພັນສັນສ້າງ ເປັນແນວທາງ ມີອີງອ້າງ ອີກຄືເກົ່າ
    ຂໍຕ້ອນຮັບໄທເຮົາ ຈ່າຽຜຍາມາມື້ນີ້ ຫວັງບ່ອນໜີ້ ທີ່ຮັກແພງ... ຫວັງແລ້ງຢູ່ບໍ່ນໍ...

 

  • ຕອນເຮົາ ຍັງໜຸ່ມແໜ້ນ ແຟນກະຫຼາຽເປັນຕາໜ່າຽ
    ໝູ່ກະຫຼາຽຄູ່ໝ້ອງ ລູກນ້ອງຫຸ້ມແຫ່ແຫນ
    ມີເງິນແສນເງິນລ້ານ ຫວ່ານໄປ ໃຜໃຜກະຮ້ອງສ່ຽວ
    ໄປທ່ຽວໃສກະຊຶ້ງ ສາວນ້ອຽແຫ່ແຫນ

    ຄ່າຂອງເປັນແຟນນັກຮ້ອງ ຕ້ອງແມ່ນເຮົາເປັນຄົນຈ່າຽ
    ຄ່າງົມສາວຂຶ້ນຫ້ອງ ເຮົາຕ້ອງຈ່າຽຄູ່ຄົນ
    ພໍເຮົາຈົນ ທຸກຄົນເລີຽໜີໜ້າ ເຄີຽມາຫາກະເລີ້ມຫ່າງ
    ອ້າງເມັຽ ອ້າງລູກນ້ອຽ ຫາຽຈ້ອຽໜ້າບໍ່ເຫັນ

    ໂທຣ໌... ຊວນໄປເລາະເຫຼັ້ນ ປະຕິເສດບໍ່ຍອມໄປ
    ຟັງມັນ ຈາຣະນັຍ ວຽກຫຼາຽ ເມັຽມັນໃຊ້
    ມີວຽກຫຼາຽ ຕາຍາຽເຖົ້າ ເກົາຫຼັງໃຫ້ເມັຽໃໝ່
    ໄປທ່ຽວນຳບໍ່ໄດ້ ຫາຽໜ້າເໝິດສູ່ຄົນ

    ຍາມເຮົາ ຈົນຄົນໜີໜ້າ ໃຜກະມາແໜງໜ່າຽ
    ເມັຽກະໄປຈາກຈ້ອຽ ແຖມຖິ້ມລູກນ້ອຽໃຫ້ປິ່ນປົວ