ໝວດທີ່ຂຶ້ນຕົ້ນດ້ວຽຕົວ "ຈ"

 

  • ຈະເຣີນສຸກຜູ້ອ່ານກອນ ຈະເຣີນພອນຜູ້ອ່ານເນື້ອ ເຄືອຜຍາວາຈາຕໍ່
    ແມ່ນຈັກຮູ້ບໍ່ນໍ໊ ໄທເມືອງໄຊ ຊື່ນີ້ ນາມເນື້ອໜໍ່ຂແນງ
    ຄັນບໍ່ຈັກສິໄດ້ແຈ້ງ ຖແລງຕໍ່ພໍໃຫ້ເຫັນ
    ວ່ານີ້ເປັນຊາວເມືອງ ຖິ່ນເໜືອຮຽນຮູ້
    ມີທັງຄູບາເຈົ້າ ຊາວນະຄອນແລະບ້ານອື່ນ
    ຄົນໄທດຽວຫຼັ່ງວື້ນໆ ຮຽນຮູ້ພ່ຳພິຈາຣ
  • ຈະເຣີນພອນ ເປັນທີ່ຕັ້ງ ໃຫ້ຟ້າວຝັ່ງກະທຳທານ
    ເຮົາຜູ່ເປັນລູກຫຼານ ວຽກງານໃຫ້ພຽນເຍື້ອນ
    ໄກຮັງເຮືອນບໍ່ເຫັນໜ້າ ສອງຍາຍຕາພໍ່ກັບແມ່
    ມາສືກສາກະແລ້ວແຕ່ ມາເຮັດການຮັບຈ້າງ ຢ່າໄລຮ້າງກໍ່ກຸສົນ

    ສຸກລື່ນລົ້ນ ຫຼືທົນທຸກກັບຊາຕາ
    ຢ່າຊູລືມພົງສາ ຖີ່ນຖານສຖານເຊື້ອ
    ຊີມຣົສມັງສັງຖ້າ ຢ່າລືມເກືອຖີ້ມປາແດກ
    ແຍກແບ່ງຊຸມແບ່ງຊັ້ນ ສິລືມບ້ານເກົ່າໂຕ

    ຕົກກະເທີນວ່າໄດ້ໂກ້ ຕົບແຕ່ງແຍງກະຈົກ
    ຢ່າລືມໝົກປາຊີວ ບາດວ່າຫີວກິນແກ້
    ເປັນຄົນລາວສາວແສ້ ຕ້ອງໃຫ້ທານປະກອບກໍ່
    ບໍ່ແມ່ນຂໍດອກພີ່ນ້ອງ ເອີ້ນມາຊ້ອງໃສ່ກັນ

    ມັນບໍ່ແມ່ນປາກຈັ້ນ ເວົ້າກັນມ່ວນພໍນວນຫູ
    ໄຂປະຕູຊູໃຈ ບໍ່ຫ່ວງໃຍໃຈແປ້ວ
    ຫາກໃຈບາງຄືແກ້ວ ຮັບຮອງແຫຼ້ວຕ້ອງແຕກບິ່ນ
    ຊົນນະບົດທ້ອງຖີ່ນ... ທົ່ວດີນແດນ ຢ່າມິດຈ້ອຽ ຫຼາຽໜ້ອຽຊ່ອຽຖນອມ

    ສິບນີ້ວຂໍ ປະນົດນ້ອມ ຕາງທູບແທນມາລາ
    ເອີ້ນເອົາຊາວເຮົາມາ ຊ່ອຽຫາຫົນໄວ້
    ໃຈໃຫ້ປອງຜອງແຜ້ວ ແນວທາງພຸທທະບາດ
    ມາຕັກບາດແລະຢາດນ້ຳ ນຳພ້ອມພ່ຳກັນ

    ໂບຮານວ່າ...
    ຫຼາຽຄົນຝັ້ນ ປໍປ່ານກະຍາວໄກ
    ຫຼາຽຄົນພາຽ ຊ່ອຽເຮືອບໍ່ຄາແກ້ງ
    ຫຼາຽຄົນແພງຖນອມລ້ຽງ ສີລທັມສິຍ້ຳຕໍ່
    ພວກທ່ານ ເປັນຜູ້ກໍ່ ພໍ່ແມ່ຜູ້ສືບໄວ້ ຄົງສິໄດ້ຮຸ່ງເອງ

    ໃຫ້ມັນເຈງເລງນ້ຳ ນະທີທານຈັກລ້ານແມ່ ພຸ້ນເດີ້
    ໃຫ້ມັນໃສສ່ອງເຫຼື້ອມ ພໍປານແກ້ວໜ່ວຽພິທູນ
    ໃຫ້ມັນນູນໂຈ້ໂກ້ ຄົນບໍ່ໂຫ່ສັທທາໃສ
    ທານທໍ່ໃດກະຕາມລະ ຊນະອະກຸສົນແລ້ວ
    ອານິສົງທີ່ທານແກ້ວ ເງິນທອງຂອງລ້ຳຄ່າ
    ສຸກບໍ່ມີມື້ຫຼ່າ ອາຍຸຍືນບໍ່ປ່ວຽໄຂ້ ບໍ່ໄປໄໝ້ຢູ່ອະບາຽ
  • ຈັ່ງສິຂໍບອກອ້າຽ ພໍ່ແລະແມ່ລູງອາ
    ໃຫ້ມາ ບຳເພັນບຸນ ຮ່ວມຄູນບຸນນີ້
    ໃຜຜູ່ຍິນກອນນີ້ ຢາກມີບຸນໃຫ້ຟ້າວໃສ່
    ຕື່ມປັຈຈັຍເຕີມສັທທາພີ່ນ້ອງ ປອງລ້ວມຮ່ວມຖວາຍ(ຖະຫວາຍ) ທ່ານເອີ້ຽ...
  • ຈານຳນ້ອງ ປະຄອງຈາຜຍາສົ່ງ
    ຝາກໄປຂົງເຂດກວ້າງ ເກີນກ້ຳແກ່ວໄກ

    ຈຶ່ງໄດ້ຂຽນສົ່ງໃຊ້ ກອນຮ່ຳຄຳຜຍາ
    ຝາກເຖິງນວນການດາ ຫ່າງຫາໃຫ້ຫວນພໍ້
    ຜູ້ເຄີຽຈາສັບສໍ້ ໂອນໍແສນຄຶດຮອດ
    ໄດ້ແຕ່ກອດແຜ່ນພື້ນ ຢືນໄຫ້ຮ່ຳໄຮ.
  • ຈາບ່ອນບັ້ນ ຫັນໃສ່ໃນລີລາ
    ເປັນຜຍາຄຳກອນ ໃສ່ສູນທອນລີລາດ
    ພູມີນັກປຣາດເຈົ້າ ບໍ່ໃຫ້ເສົ້າສູນເສືື່ອມ
    ຮຽມຂໍວອນວິ່ງໄຫວ້ ປະຊາເຊື້ອຊ່ວຽສງວນ.
  • ຈາຢອກເຫຼັ້ນ ພໍໄດ້ສ່ວງກະໃຈຈິດ
    ລາງເທື່ອຫາຽມະໂນຄິດ ຄັ່ງຄາເວລາເອົ້າ
    ເຈັບໃນຊວງແສນເສົ້າ ເຫງົາໃນບໍ່ໄຂບອກ
    ມ່ວນແຕ່ນອກໜ່ວງນ້າວ ໃນນັ້ນບໍ່ຊ່າງເຜີຽ

    ເລີຽເອົາຄຳອິງອ້າງ ວາງກອນກ້ຽວກ່າຽ
    ພໍສ່ວງອຸກທຸກຮ້າຽ ທີ່ແຮງຮ້ອນຮຸ່ມໃຈ ແທ້ແລ້ວ.
  • ຈາກຖີ່ນຖານ ແຫ້ງແລ້ງ
    ຈາກໝາກເຜັດ ໝາກແຕງ
    ຈາກຜັກຂະແຍງ ໜານຜັກບົ່ວ
    ຈາກຄອກຄວາຽ ຄອກງົວ
    ຈາກໝາກຖົ່ວ ຮາງຜັກແປ້ນ
    ຈາກແຄນນ້ອຽທີ່ເຄີຽເປົ່າ
    ຈາກຄອກໄກ່ ໃຕ້ລ່າງເລົ້າ ມາຕາມເຈົ້າ ກັບຕ່າວເມືອ ນີ້ແລ້ວ
  • ຈາກຫົວໃຈທີ່ເກັ່ງກ້າ ເຂັ້ມແຂງມາແຕ່ປາງເກົ່າ
    ອຸປປະສັກໜັກເບົາ ທຸກເຣື່ອງຣາວໃຫຍ່ນ້ອຽ ມາເປັນຮ້ອຽກະບໍ່ແຄຣ໌
    ບໍ່ເຄີຽແອອິດອ້ອນ ແອອ່ອນບໍ່ເຄີຽພົບ
    ເຄີຽປະສົບວຽກການ ຄຸກຄານບໍ່ເຄີຽທໍ້
    ເປັນຫຍັງນໍ... ຄາວນີ້ ຢູ່ດີດີຜັດລ້າຫຼ່ອຽ
    ບໍ່ເຄີຽຖອຽກະຖອຽ ບໍ່ເຄີຽຄອຽກະໄດ້ຖ້າ ບໍ່ເຄີຽລ້າຜັດເມື່ອຽລົງ

    ຢືນທ່ຽງຕຼົງຍັງບໍ່ໄດ້ ໃຈປັ່ນຫັນເກັບ
    ເຈັບຊ້ຳເໜັບໃນແຝງ ເໝີດແຮງທະເລລົ້ມ
    ເຈັບຣະບົມຈົມກັບເສົ້າ ຍ້ອນເຮົາບໍ່ສົມເພີ່ນ
    ສາວຜູ້ແກ້ມເປີ່ນເວີ່ນ... ເພີ່ນຜັດມີຄູ່ຄ້ອງ ເນົາຫ້ອງປ່ອງມໂນ
    ຫ້າມໃຈໂຕ ບໍ່ທັນຈ້ອຽ ຈັກຫຼອຽຮັກແຕ່ຍາມໃດ
    ບໍ່ໄລລາງຈາງຈິຕ ຄິດຄນິງບໍ່ວາຽເວັ້ນ
    ຄິດເຫັນເລີຽຊືມເສົ້າ ຍອມໃຫ້ເຂົານັ້ນທຸກຢ່າງ
    ອ້າຽຂໍຍອມຫຼີກທາງ ບໍ່ຂັດຂວາງແລ້ວລະຫຼ້າ ໄປສານ້ອງໄປຮັກເຂົາ
    ຄຳອວຽພອນກ່ອນຈາກເຈົ້າ ວ່າໃຫ້ຮັກເຂົາຫຼາຽ
    ຢ່າໄດ້ກາຽເປັນຜິດ ຮັກຢ່າພັງຄືອ້າຽ
    ສິຈາກໄປໄກພົ້ນ ໄກຈາກຄົນປົນຄຳດ່າ
    ຫົງບໍ່ອາຈຄູ່ກາ ໝາສິມາເນ່ງໂນ້ມ ຊົມຟ້າວ່າບໍ່ຄື ນີ້ແລ້ວ
  • ຈຳຈາກເຈົ້າ ແລ້ວເລົ່າເລີຽຈາກທີ່
    ແສນໂສກີໂສກເສົ້າ ຄາວສິຮ້າງຫ່າງນາງ

    ຫຼັ່ງໆໄຫ້ ຊົນລະເນຕນອງຕົກ
    ອຸທົກທາຣາໄຫຼ ຫຼັ່ງຮວຽຮຳໜ້າ
    ລາໄລແລ້ວ ກັນລະຍາແກ້ວຕາພີ່
    ຍາມຮຽມໜີຈາກບ້ານ ໃຈສທ້ານຫວັ່ນກົວ
    ....ໜີຫ່າງກັນໄກ
    ສິໄດ້ໜີຮາມຫາຽ ຫ່າງສາຽໃຈນ້ອງ
    ຍ້ອນວ່າກັມເວນຂ້ອງ ຂນັງຊວງເຖິງຂນາດ
    ບຸບພະຊາດເກົ່າກ້ຽວ ອວນອ້າຽໃຫ້ຫ່າງນາງ
  • ຈຳຕ້ອງຫ່າງໄກໜ້າ ຊາຕາມາດຶງຈ່ອງ
    ຈຳຕ້ອງພັດພາກນ້ອງ ໜີໜ້າໃຫ້ຫ່າງເຫີນ
  • ຈຳປາຫອມຮ່ວງເຮົ້າ ຜັກກະເດົາພວມແຕກງ່າ
    ອິນທະຫວາອອກຊ້ອນ ຝົນຟ້າຊິລ່າຖອຽ

    ລົມວອຽໆຝ່າຽພີ້ ເດືອນປີໜີພົ້ນຜ່ານ
    ຣະດູການ ຝົນສັ່ງຟ້າ ຕຽມຜ້າພໍຫົ່່ມໜາວ.

    ຈັກວ່າລົມຫຼືແລ້ງ ຂຸມົດແດງລົງມາໃສ່
    ຈັກວ່າໄຂ່ງ່າມແງ້ງ ແດງຊ້ຳທົ່ວຄີງ.

    ຈິງບໍ່ນ້ອງ ນວນນາງນະວະນາດ
    ໃຈຊິຂາດເຄິ່ງຄ້ອຽ ໃຈມ້ອຽແໝ່ງໝາຍ

    ພີ່ຢາກອາຍອຸກເອົ້າ ແສນເຫງົາແງ້ນເງື່ອນ
    ຄຶດຕໍ່ເພື່ອນຜູ້ຢູ່ໃກ້ ພາຍພູ້ນກະພ່າຍໜີ

    ຕັ້ງແຕ່ກີ້ ເຄີຽຮ່ວມຄວາມສນຸກ
    ປັຈຸບັນມາທຸກ ທັ່ງທົນທຽວທໍ້
    ໂອນໍນ້ອງ ໝາຍປອງສັງເປັນອື່ນ
    ມີແຕ່ເຂົາກ່າວພື້ນ ພາຍພີ້ໃຫ້ພັ່ງເພ.
  • ຈິດກະສັນປ່ວງກຸ້ມ ຄນິງຮັກແສນໄກ
    ມະໂນໃນນຳເກາະ ກໍ່ພັນທະນັງກ້ຽວ
    ຫຼຽວເບິ່ງ ຄາວວາງເວັ້ນ ວັນຄືນຄວນຖີ່
    ຈິຕວີ່ວອນໜ່ຽວນ້ອມ ເຖິງຫຼ້າຜູ້ຢູ່ໄກ

    ຫຼືຈັກປຸນປຽບດ້າມ ໂດຽດັ່ງກຸມພັນ
    ຍາມເມື່ອສິນໄຊນຳ ມິ່ງອາຄືນບ້ານ
    ກຸມພັນຄຸງເຄືອງແຄ້ນ ໝອງພະທັຍຊືມໂສກ
    ເລີຽເລົ່າອົກແຕກມ້າງ ປາງນັ້ນຄອບນາງ.
  • ຈິດສະທ້ອນ ເປັນຫ່ວງດວງສະເຫນ
    ຫົວໃຈເພຫວນຫາ ຍາມຫ່າງລາໄລນ້ອງ
    ຈິດປະຄອງໃຈຕັ້ງ ຄວາມຫວັງສິມາຮອດ
    ຄືນຕ່າວຫາຍອດຊູ້ ຜູ້ທົນສູ້ຫ່ວຫາ
  • ຈົນກັບຣວຍ
    ທຸກເຮົາກະຍັງວ່າໄດ້ກິນເຂົ້າ ຄືເພີ່ນຄົນຣວຽ
    ບໍ່ໄດ້ຍາດຄວາຽກິນ ຫຍ້າຮີມໜອງນ້ຳ
    ຍາມວາສນາເຮົາໜ້ອຽ ກິນກອຽມັນຜັກຈ້ຳແຈ່ວ
    ວາສນາສົ່ງແລ້ວ ສິແກງຊ້າງໃສ່ຍອດຍາງ ພຸ້ແລ້ວ
    ແນວບໍ່ມີເງິນຊື້ ອາຫານດີ ຄືຊຸມເພິ່ນ
    ກິນປາແດກລ້າໆ ຜັກແກ້ມກະສ່ວນດີ
    ເພີ່ນມີເງິນກິນເທີງຫ້າງ ແອຣ໌ເຢັນໆ ມີເພງກ່ອມ
    ເຮົານັ່ງກິນ ໃຕ້ຕົ້ນໄມ້ ກູນາຮ້ອງແອ່ວເພງ
    ສຽງບັນເລງລຳໄມ້ ກໍໄຜ່ມັນສີກັນ
    ພັນທະນັງແນວຄິດ ຢູ່ກາງພົງກວ້າງ
    ມີດອກດວງມອນໄມ້ ໃຫ້ເຊີຽຊົມດົມກິ່ນ
    ຫາກິນນຳສ່ຳເຊື້ອ ເກືອກຸ້ມກຸ່ມເຮົາ
    ອາຫານເຮົາ ກິນສູ່ມື້ ເພື່ອໃຫ້ຍັ້ງປະທັງຊີພ
    ກິນຂຽດນ້ອຽຫຼືລາບຊ້າງ ກະເປັນເພັ້ຽສ່ຳກັນ ພີ່ນ້ອງເອີ້ຽ...
  • ຈົບຈັ່ງນ້ອງ ງາມຈັ່ງນ້ອງ ໃຜເດ້ນໍ້ຜູ້ປັ້ນຫຼໍ່
    ດຳຄໍ່ລໍ່ຄືຈັ່ງອ້າຍ ຕາຊ້າຽໃຫ້ລ່ຳມອງ ແດ່ເນີ້
  • ຈົບຈັ່ງນ້ອງ ງາມຈັ່ງນ້ອງ ຢືມເພດຜູ່ໃດມາ
    ຈົບຈັ່ງນ້ອງ ງາມຈັ່ງນ້ອງ ຢືມຂາຜູ່ໃດຍ່າງ
    ຫຼືແມ່ນເທພພະທ່ອນໄທ້ ລວງລໍ້ໃຫ້ພີ່ຕາຽ.
  • ຈອມປວກອົ້ນ ຂຸດກົ່ນເປັນໂພນ
    ແສນສິເປັນໂພນສູງ ຊົ່ວໄກເຫັນແຈ້ງ
    ຄັນບໍ່ມີສາຂາໄມ້ ໃບຂຽວປົກຫໍ່ ກໍ່ບໍ່ດູອາຈແທ້ ໂພນນັ້ນເປົ່າແປນ
  • ສັງມາປະອ້າຽໄວ້ ກາງໄຮ່ເປັນໝູ່ກາ
    ສັງມາປະອ້າຽໄວ້ ກາງນາເປັນໝູ່ໄກ່
    ສັງມາປະອ້າຽໄວ້ ໄລຖີ້ມໃຫ້ປ່ຽວພອຽ