ໝວດທີ່ຂຶ້ນຕົ້ນດ້ວຽຕົວ "ຄ"

 

  • ຄາດຊິ ເປັນຄູ່ຊ້ອນ ທຽມສະແນນ ມິມີຫຼີກ ເປັນເດ
    ຣາຫູ ບໍ່ຮ່ອນ ຄາຄາດຫ້າງ ຮາມແກ້ວ ໜ່ວຍພຣະຈັນ.
  • ຄ່າດອງ
    ຫຼ້ານາງເອີ້ຽ... ດອກເບັ້ຽແບ໊ງກ໌ ແພງຫຼາຽ ບໍ່ເຄີຽວ່າ
    ຂໍແຕ່ ນາງນາດນ້ອງ ຄອຽອ້າຽ ກະແມ່ນບຸນ
    ໜັກປານໃດ ກະສິຫາບ ຫຍາບປານໃດ ກະສິບືນ
    ຄ່ຳແລະຄືນ ກະບໍ່ຢ້ານ ວຽກງານຫຼາຽ ອ້າຽບໍ່ຫວັ່ນ
    ຄົນສຳຄັນ ເປັນແຮງໃຈ ໃຫ້ອ້າຽ ງານຫຍຸ້ງ ສິຄ່ອຽຖາງ
    ເມື່ອຽປານໃດ ກະບໍ່ຢ້ານ ຂໍພຽງໄດ້ ນ້ອງຄຽງຄູ່
    ສິນອນໝູນ ໝອນຂ້າງ ຕາງພໍ້ ຕັກພະນາງ
  • ຄາຖາຈີບສາວ
    ຈີບຜູ້ຍິງໃຈສົ້ມ ຕ້ອງອາຣົມຄ່ອງ
    ຈີບຜູ້ຍິງຈອງຫອງ ຕ້ອງຂະຫຍັນ
    ຈີບຜູ້ຍິງລວດລາຽ ຕ້ອງໄລ່ທັນ
    ຈີບຜູ້ຍິງໃຈສັ້ນ ຕ້ອງຜັນຜ່ອນ

    ຈີບຜູ້ຍິງສມັຍໃໝ່ ຕ້ອງໃຈກ້າ
    ຈີບຜູ້ຍິງມາຍາ ຢ່າໃຈຮ້ອນ
    ຈີບຜູ້ຍິງໄກ່ແກ່ ຕ້ອງແງ່ງອນ
    ຈີບຜູ້ຍິງໃຈອ່ອນ ຕ້ອງຜ່ອນຕາມ

    ຈີບຜູ້ຍິງຊ່າງເວົ້າ ຢ່າເວົ້າຫຼາຽ
    ຈີບຜູ້ຍິງຫຸບປາກ ຕ້ອງໝັ່ນຖາມ
    ຈີບຜູ້ຍິງອ້ອນແອ້ນ ຢ່າລວນລາມ
    ຈີບຜູ້ຍິງຮູບງາມ ຢ່າວາງໂຕ

    ຈີບຜູ້ຍິງຄົນຊົ່ວ ຕ້ອງສອນສັ່ງ
    ຈີບຜູ້ຍິງມີຮັ່ງ ຕ້ອງວາງໂກ້
    ຈີບຜູ້ຍິງນັກສຶກສາ ຢ່າຄຸຍໂວ
    ຈີບຜູ້ຍິງອວດໂຕ ຢ່າຂັດໃຈ

    ຈີບຜູ້ຍິງຮູບຮ້າຽ ຕ້ອງຍົກຍໍ
    ຈີບຜູ້ຍິງຂອງຕົກ ຕ້ອງເກັບໃຫ້
    ຈີບຜູ້ຍິງໃຈຮ້ອນ ຢ່າມືໄວ
    ຈີບຜູ້ຍິງບ້ານໄກ ຕ້ອງໝັ່ນຢາມ

    ຈີບຜູ້ຍິງນັກເດີນທາງ ຕ້ອງເງິນໜັກ
    ຈີບຜູ້ຍິງອົກຫັກ ຕ້ອງເປັນເພື່ອນ
    ຈີບຜູ້ຍິງຣຸ້ນນ້ອງ ຕ້ອງຄອຽເຕືອນ
    ຈີບຜູ້ຍິງເປັນເພື່ອນ ຕ້ອງໃຈເຢັນ...

    ຄາຖາຈີບສາວອັນນີ້ ໃຊ້ໄດ້ແນ່ນອນ ເອົ໋າ...ທຸກຄົນເວົ້າຕາມເດີ້...ຍໍມືຂື້ນ ຕັ້ງໃຈວ່ານຳ "ໂອມມ...ໂອມອຸກອັກ ມຸກມັກມູນມັງ ໂອມນະໂມຕັດເສື້ອ ເຫຼືອນັ້ນຕັດສົ້ງ ເຫຼືອຈາກສົ້ງເຮັດຜ້າເຊັດມື ເຫັດກະດ້າງເກີດຢູ່ເສົາໄຟຟ້າ  ຍາມແລງຜູ້ສາວມາຫາ ຄັນບໍ່ມາເຮົາກະໄປຫາເອງ ໂອມສະຫົມຕິດ ນະມະພະທະ ຜູ່ຜຜ....." ວ່າແລ້ວກະເປົ່າໃສ່ດອກໄມ້ ເອົາໄປໃຫ້ສາວເດີ້...ພີ່ນ້ອງເອີ້ຽ
  • ຄາຖາຫາເມັຽ
    ຍິງໃດ ເວົ້າປາກກ້ຽງ ແກມຫົວ ສຽງມ່ວນ
    ຍິງນັ້ນມີ ລູກເຕົ້າ ຄວາມຮ້າຽ ແມ່ນບໍ່ມີ
    ຄວນທີ່ ເອົາມາຊ້ອນ ເປັນມີ່ງເມັຽຂວັນ
    ບຸນຂອງ ນາງມີຫຼາຽ ຈັກບໍ່ເຄືອງ ຄວາມຮ້ອນ
    ຍິງໃດ ສຽງປາກຕ້ານ ຫວານຫູ ເວົ້າມ່ວນ
    ຕາເຊີດຊ້າຽ ຄໍປ້ອງ ຮູບງາມ

    ເກສາ ຜົມຍາວໄດ້ ວາປາຽ ຄືບນຶ່ງ
    ຍິງນັ້ນ ຄວນຄ່າລົ້ນ ຄຳຮ້ອຽ ຊອບທັມ
    ຍິງໃດ ຄໍຕົກປ້ອງ ຫາງຕາແດງ ພໍສະໜ່ອຽ
    ຍາມເມື່ອ ຍົກຍ່າງຍ້າຽ ພໍດ້າມເກິ່ງສເມີ

    ແມ່ນວ່າ ໃຜຢູ່ຊ້ອນ ຮຽງຮ່ວມ ເປັນເມັຽ
    ຍູທ່າງ ມີຄວາມສຸກ ນັ່ງປອງເປັນເຈົ້າ
    ຍິງໃດ ຕີນນູນຂື້ນ ຄືຫຼັງອອງເຕົ່າ
    ຍິງນັ້ນ ໃຈຊື່ແທ້ ປະສົງຕັ້ງ ຕໍ່ຜົວ

    ນາງບໍ່ມັກ ເຫຼັ້ນຊູ້ ຊາຽອື່ນເຊີຽຊົມ
    ກະທໍ່ ຈົງໃຈຮັກ ຕໍ່ຜົວ ຄີຄ້ອຽ
    ແມ່ນສິ ທຳການສ້າງ ແນວໃດ ກະເຮືອງຮຸ່ງ
    ແສນສິ ຈົມຢູ່ພື້ນ ມາແລ້ວ ກະຫາກຟູ

    ຍິງໃດ ບາດຍ່າງກວ້າງ ຕີນຄ່ວງ ທໍຣະນີ
    ອັນວ່າ ຕົນໂຕນາງ ກໍ່ຫາກ ເປັນລັງລ້າວ
    ບໍ່ອາດ ມີໃຍພ້ຽງ ເຮືອນຊານ ທຸກຂະມອດ
    ຍິງໃດ ຝາຕີນກວ້າງ ກົກຂາທືມ ແຄ່ງໃຫຽ່
    ຍິງນັ້ນ ໃຜຢູ່ຊ້ອນ ສອນໄດ້ ກະບໍ່ຟັງ

    ມັນກະ ຄຶດຖີ່ຖ້ວນ ໂຖງໂລກໂລກີ
    ອັນແຕ່ ໃນສົງສານ ບໍ່ອາດ ທັນທຽມໄດ້
  • ຄາວເມື່ອເວົ້າ ໝາຽຊິເອົາມາປີ້ງຈີ່
    ບາດວ່າ ມາຮອດແລ້ວ ສັງບໍ່ປີ້ງຈີ່ກິນ.
  • ຄາວເມື່ອເວົ້າ ແຕ່ກີ້ ວ່າຊິຕົບ ແຜ່ນແປ້ນ ແປນມື ໃຫ້ນາງນັ່ງ
    ບາດວ່າ ມາຮອດແລ້ວ ຈຳໃຫ້ ນັ່ງໜາມ.
  • ຄວາມເຈັບຊ້ຳ ເປັນແຮງໃຈໃຫ້ສູ້ຕໍ່
    ຢ່າສິໄປຄິດງໍ້ ໃຈທໍ້ຮັກຕໍ່ໄປ
    ໂບຮານ ເພິ່ນວ່າໄວ້ "ຮັກກັນໄວ້ ດີກວ່າຊັງກັນ
    ຜູກສັມພັນໄມຕຣີ ສາມັກຄີວອນໄຫວ້"
    ຄວາມເສັຽໃຈຢ່າເກັບໄວ້ ມັນເປັນພຽງ ຂອງເລັກໜ່ອຽ
    ອົກຫັກ ເຣື້ອງເລັກນ້ອຽ ໃຈນັ້ນ ຈັ່ງໃຫຍ່ຫຼວງ
  • ຄວາມມັກຫຼາຍ ຄວາມອາຍນ້ອຽ ພອຍຊິຕາຍ ບໍ່ຮູ້ເມື່ອ
    ຄວາມມັກມາ ແລ່ນກຸ້ມ ກຸມໄວ້ ກໍບໍ່ຟັງ.
  • ຄຳສັຈຈາ ທີ່ນາງເວົ້າ ບໍ່ເຄີຽຈົມ ສະນົມຫຼົ່ມ
    ບໍ່ຄືຕົມ ສະນົມຈື້ນ ບໍ່ຕົວະລື້ນ ໝື່ນທະລາຽ
    ຢ້ານແຕ່ ທາງຝ່າຽອ້າຽ ສິມາໝາຽ ຖແລງເປົ່າ

 

  • ຄຳສອນຮີຕຄອງເຮືອນ ຈາກເທວະດາສອນໂລກ
    ບັດນີ້... ຈັກກ່າວຕັ້ງ ສອນຮີຕຄອງເຮືອນ ກ່ອນແລ້ວ
    ຕາມແຕ່ເຄີຽເຫັນມາ ແລະທີ່ເຄີຽຮຽນຮູ້
    ຍິງໃດຍັງເປັນຜູ້ ຄະລຳຄີງສະງັດຢູ່
    ເທວະດາຢູ່ຟ້າ ຄອຽເຝົ້າໝື່ນຕົນ
    ຍິງໃດ ແຮງສງວນສູ້ ຕັນຫາກາມມະໂລກ
    ຝູງໝູ່ ເທພພະທ່ອນໄທ້ ເຫັນແລ້ວຖົ່ມນ້ຳລາຽ
    ແມ່ນຫາກມີສິນສ້າງ ຂອງອັນໃດບໍ່ປະເສີດ
    ແມ່ນວ່າມີລູກນ້ອຽ ຄວາມໄຮ້ບໍ່ເຫືອດຄີງ
    ມີແຕ່ຂີ້ມູກຍ້ອຽ ຍາມຍ່າງແຫຼວໄຫຼ
    ໃຜບໍ່ຍິນດີຮັກ ໃສ່ເພລາເອົາອູ້ມ
    ແມ່ນວ່າມັນມີຊູ້ ໂສມງາມບໍ່ຄືເພີ່ນ
    ແມ່ນວ່າ... ມີໜ່ວຽແກ້ວ ມາໄວ້ກໍ່ບໍ່ຄູນ
    ແມ່ນວ່າ ມີຜົວໄດ້ ປຸຖຸຊົນໃຈຖ່ອຽ
    ຈັກໄດ້ນອນນ້ຳຮ້ອນ ທັງຄັ້ນເປືອກແດງ ແທ້ແລ້ວ

    ຍິງທີ່ບໍຣິສຸທນັ້ນ ເທວະດາຊູຊ່ອຽ
    ຈັກໄດ້ອ່ອນນ້ອຽໜ້າ ມາໄວ້ອຸ່ນເຮືອນ
    ເພີ່ນວ່າ ເທວະດາຄ້ຳ ຂອງໃນເຮືອນກໍ່ມູນມັ່ງ
    ແມ່ນວ່າມີລູກນ້ອຽ ຜູ່ໃດອູ້ມບໍ່ຢາກວາງ
    ແມ່ນວ່າມີຜົວໄດ້ ໃຈດີກວ້າງແຜ່
    ຄວາມຄິດມັນບໍ່ຕື້ນ ທັງຄ້າຽເພີ່ນຫອມ
    ໃຜຜູ້ຍັງເຫັນພື້ນ ຄະລຳຄີງສະງັດຢູ່
    ດູດັ່ງໝໍຄ້ອງຊ້າງ ປະກັນຫຸ້ມເຫຼື່ອມງຳ

    ຄັນວ່າຍັງຄະລຳໄດ້ ຜີຜະກັມລ້ຽງແມ່ນ
    ຜີຫາກມາຊ່ອຽນ້າວ ເອົາຊ້າງເຂົ້າໃສ່ຄອງ
    ປາບໍ່ຍິນດີບ້ອນ ຊົນລະທາເຂີນຂາດ ດອກນາ
    ຫົງຫາກຊົມຊື່ນເຕົ້າ ສະພັງກວ້າງດອກບົວ
    ຊາຕທີ່ມາລານີ້ ດວງຫອມຮົດຮ່ວງ
    ໃຜຜູ້ໄດ້ນັ່ງໃກ້ ດອມແລ້ວບໍ່ຢາກໜີ  (ຍັງມີຕໍ່)
  • ຄຳຊາຽເວົ້າ ເປັນຄືເລົາ ໄມ້ໄຜ່
    ແມ່ນສິ ເຫຼົາໃຫ້ມົນ ຝົນໃຫ້ກ້ຽງ ຍັງສ້ຽນທັ່ງມື
  • ຄຳປາກເຈົ້າ ບອກວ່າໄຫຼໆ ຫົວໃຈເຈົ້າ ບອກວ່າລ້ຽວໆ
    ເຈົ້າຫາກ ຝັງກ່ຽວໄວ້ ໃນຫັ້ນ ໝື່ນດວງ ບໍ່ຮູ້
  • ຄຳຜຍາ ພາເສົ້າ ເອົາກອນ ກະວີວ່າ
    ໜັກອຸຣາ ເຮັ່ງຮ້ອນ ບໍ່ຮອມຮູ້ ຫ່າງຫາຽ
    ຄິດຮອດອ້າຽ ຊາຽກະອ່ອຍ ຄຳອວນ
    ຄຳຈາຫວນ ແຫ່ງຫອມ ບໍ່ມີຮ້າຽ
    ໝາຽແຕ່ ຄວາມດີລ້ວນ ຄວນຄນິງ ອິ້ງໂອ່
    ແນວວ່າໂຕ ຕ່ຳຕ້ອຽ ຢາກຖອຽລ້າ ລ່າລົງ

    ໄກຟາກຊົ້ງ ຂົງເຂຕ ຄາເມ
    ສັນໃດ ເຊມາພົບ ຜ່າຽພານ ເຫັນພໍ້
    ຫຼືແມ່ນ ຊາຕາຫຍໍ້ ໂອນໍ ບຸປປະຊາຕ
    ເວນບໍ່ຂາດ ຈາກເຈົ້າ ຈຳຕ້ອງ ຈ່ອງດຶງ ແທ້ນໍ.
  • ຄຳຜູກແຂນ
    ສຣີໆ...ສິທທະພຣະພອນ ບໍວອນວິເສດ
    ຝ້າຽແກ້ວເກີດມຸງຄຸນ ປຸນລົງມາຕົກແຕ່ງ
    ກວັດອີ້ວແກວ່ງກົງຫຼາ ຜັດອອກມາເປັນຫຼອດ
    ຖອດອອກມາເປັນປຸ໋ຍ ສຸຍອອກມາເປັນເສັ້ນ
    ເສັ້ນແລະສີ ພັນຄຳ ເປັນດັ່ງແກ້ວມຸກດຳໃສສ່ອງ
    ງາມອ່ອງຕ່ອງສ່ອງໃສ ທັງນອກໃນລ້ຳເລີດ
    ຝ້າຽແກ້ວເກີດເມືອງສວັນ ປັນໃຫ້ຜູ້ຂ້າ ມາຜູກແຂນ ....ວ່າມາເຍີ້ຂວັນເອີ້ຽ
    ຂວັນເຈົ້າໄປມຸດນ້ຳໃຫຍ່ກິນປາ ກໍ່ໃຫ້ມາສາມື້ນີ້ວັນນີ້
    ຂວັນເຈົ້າໄປຢູ່ນາກິນເຂົ້າ ກໍ່ໃຫ້ມາສາມື້ນີ້ວັນນີ້
    ຂວັນເຈົ້າໄປກິນເຫຼົ້ານຳໝູ່ນຳຝູງ ກໍ່ໃຫ້ມາສາມື້ນີ້ວັນນີ້...ວ່າມາເຍີ້ຂວັນເອີ້ຽ
    ຂວັນເຈົ້າໄປຢູ່ຖ້ຳນຳພຍາງູ ກໍ່ໃຫ້ມາສາມື້ນີ້ວັນນີ້
    ຂວັນເຈົ້າໄປຢູ່ຮູນຳພຍານາກ ກໍ່ໃຫ້ມາສາມື້ນີ້ວັນນີ້
    ຂວັນເຈົ້າໄປລຳບາກນຳໝູ່ຜີຕາຽ ກໍ່ໃຫ້ມາສາມື້ນີ້ວັນນີ້ ວ່າມາເຍີ້ຂວັນເອີ້ຽ
    ຍາມເມື່ອຕາເວັນຕົກລັບປ່າແຊງ ຍາມເມື່ອຕາເວັນແດງລັບປ່າໄມ້
    ຂວັນເຈົ້າໄປຢູ່ຫົນເໜືອຫຼືຫົນໃຕ້ ກໍ່ໃຫ້ຮີບມາສາມື້ນີ້ວັນນີ້
    ຄັນວ່າມາຮອດແລ້ວ ໃຫ້ເຈົ້າຢູ່ສວັດດີ
    ມີຄວາມສຸກຄວາມຈເຣີນ ຄວາມເຈັບເຈົ້າຢ່າໄດ້ ຄວາມໄຂ້ເຈົ້າຢ່າມີ
    ໃຫ້ເຈົ້າໄດ້ເປັນເສດຖີ ເປັນມຫາເສດຖີ
    ມີອາຍ ວັນນະ ສຸຂະ ພະລະ ປະຖິພານ ທະນະສານສົມບັຕ ທຸກປະການ
    ນອນຫຼັບໄດ້ເງິນໝື່ນ ຍາມຕື່ນໄດ້ເງິນແສນເງິນລ້ານ
    ຍ່າງອອກຈາກບ້ານ ໂຊກໄຫຼຫຼັ່ງມາໂຮມເຈົ້າເດີ້
    ໂອມ ອຸ ອະ ມຸ ມະ ມູລລະມາ ສະທາໂສຕຖິ ພະວັນຕຸເຕ
  • ຄຳຫ່ວງນ້ອງ ນຸດທະນາດ ນາງໄພ
    ສຸດຫົວໃຈ ຫ່ວງຫາ ຜວາເວົ້າ.
  • ຄ່ຳແລງລົງ ພໍປານນີ້ ອ້າຍພີ່ ມາຄິດຮອດ
    ເຄີຍໄດ້ ອອດໆເວົ້າ ນຳເຈົ້າ ທຸກຄ່ຳຄືນ

    ຫົວໃຈ ອ້າຍສະອື້ນ ຈິດບໍ່ຊື່ນ ຊົງເຫງົາ
    ປານເມົາຊາ ຢາ ເບືອ ນັ່ງເຟືອ ເສົາບ້ານ
    ຄິດເຖິງການ ເວລາຍ້າຍ ກາຽມາ ເຄີຽເວົ້າຕໍ່
    ຄິດເຫັນ ໜ້າພົບພໍ້ ໂອນໍນ້ອງ ຢູ່ຈັ່ງໃດ.
  • ຄຳວ່າ ຄຶດຮອດນ້ອງ ຫາກອອກຈາກ ໃຈຈິງ
    ແສນຣຳພຶງ ຄວາມຄິດ ຮ່ຳຄນິງ ທາງພີ້
    ມີອິຫຼີ ບໍ່ຈາເຫຼັ້ນ ຫຼືພຽງເຫັນ ແຕ່ເວົ້າມ່ວນ
    ຄິດຮອດຄວາມ ວ່າເວົ້າ ຮຽມໄດ້ ວ່າກອນ

    ອ້າຽຫາກ ຄຶດອ້ອນຕ້ອນ ອອນຊອນຫ່ວງ ໃນດວງຈິຕ
    ໃນມະໂນ ຄວາມຄິດ ຫ່ວງຫາ ບໍ່ລາຮ້າງ
    ບໍ່ອາຈ ຫາ ອາ ອ້າງ ທາງໃດ ເອົາມາປຽບ
    ບໍ່ຫ່ອນທຽບ ທໍ່ເທົ້າ  ຄຶດຮອດເຈົ້າ ບໍ່ຫ່າງລາ.
  • ຄືມາ ເຮັດຕາສົ້ມ ຫຼັບຕາຊັງ ໃຫ້ອ້າຍພີ່
    ບາດມາຫາ ພັດແລ່ນລີ້ ໜີຈ້ອຍ ຄິດຈັ່ງໃດ
     
    ຍ້ອນເດົາໃຈ ບໍ່ອອກໄດ້ ມານຍາ ເຕັມກະຕ່າ
    ຄືເພິ່ນ ຈາວ່າໄວ້ ກຽນຮ້ອຍ ໃສ່ບໍ່ພໍ
     
    ເຮັດຈັ່ງໃດ ນໍລະອ້າຍ ອັນແນວຊາຍ ພວມຫັດໃໝ່
    ຢາກຮູ້ ໃຈສ່ອງແຈ້ງ ຄວາມແທ້ ຢູ່ໃນ.
  • ຄືມີ ແນວຄາຂ້ອງ ໝອງໃຈ ກັ້ນໂສກ
    ອຸກອັ່ງທ້ອນ ໂຮມເຂົ້າ ໃສ່ຜູ່້ດຽວ

    ແນວໃຈຄົນລົດລ້ຽວ ເລີຍຫ່ຽວ ໃນໃຈ
    ເຈັບພໍປານ ມີໄຟ ແຜດເຜົາ ໃນເນື້ອ
    ບໍ່ມີຫຍັງ ເຫຼືອແຫຼ້ວ ບໍ່ມີແນວ ຊິຄຶດຕໍ່
    ຢ້ານແຕ່ ມໍຣະມຸດມ້ຽນ ມາຽມ້າງ ຫ່າງຄຽງ.
  • ຄືນເດືອນຫງາຍ ສາຍລົມຕ້ອງ ຄືນທີ່ ເຮົາທັງສອງ ນອງຈາ ເວົ້າມ່ວນ
    ຫວນຄິດເຫັນ ນາດນ້ອງ ສອງພວງແກ້ມ ເບັ່ງບານ.
  • ຄືນນີ້ ດາວເຕັມຟ້າ ມອງນະພາ ໃສແຈ່ມ
    ແນມໄປມາ ເບິ່ງບ້ານ ສະຖານຫ້ອງ ແຫ່ງອະສັຍ

    ເລາະໄປມາ ແຄມບ້ານ ຕັ້ງແຕ່ດົນ ແຕ່ນານ ຫວັງໄດ້ຢາມ ຖາມຂ່າວ
    ຢາກພໍ້ສາວ ໜໍ່ຫຼ້າ ຢາກຈາເວົ້າ ວ່ານຳ.
  • ຄັນເຈົ້າ ລາຈາກອ້າຽ ຕາຽໄປ ສິເປັນເຜດ ຊັ້ນກະເດະ
    ຢູ່ສຸດເຂດ ດ່ານກວ້າງ ໄກເຍີ້ນ ມະນຸສຄົນ
    ເນົາໃນຫົນ ລະເຫວຫ້ອງ ເຕໂຊກອງ ອັດຄີທາຕ
    ວິນຍານ ຂາດ ລ່ວງ ຕ້ອງ ເຕີມກຸ້ມກໍ່ສຸມ
    ປາຣະມີ ບໍ່ອາດກຸ້ມ ກວມກ່ອງ ສນອງບຸນ
    ຍັງຈັກສູນ ເສັຽສີ ສິ່ງດີ ກະລາລ້າງ
    ພໍມີທາງ ກະທຳໄດ້ ປົງໃຈ ນຳອ້າຽພີ່
    ຄິດຕໍ່ ຊາຽຜູ່ນີ້ ຢ່າໄປຢ້ານ ສິ່ງໃດ....ຮ່າໆໆໆໆ
  • ຄັນເຈົ້າ ໄລລືມລ້ຽວ ປັ້ນເຂົ້າໜຽວ ເຄີຽຈ້ຳປົ່ນ
    ຫຼືລືມຄົນ ຈັ່ງອ້າຽ ຍາຽເຖົ້າ ເຈົ້າຢ່າລືມ.
  • ຄັນເຈົ້າ ໄຂທາງໃຫ້ ຂອນເຕັມວັງ ກະໂຕນຜ່າ
    ຝູງໝູ່ ເງືອກ ແລະ ແຂ້ ຊິກິນອ້າຽ ກະບໍ່ແໜງ.
  • ຄັນເຈົ້າຟັງຄວາມເວົ້າ ເອົາຄວາມເກົ່າມາຈາ
    ມັນສິພາເຮົາເສັຽ ສິ່ງສງວນນວນນ້ອງ
    ບູຮານເວົ້າ ໄຂຄຳເວົ້າວ່າ
    ນຸ່ງຜ້າລາຽໝາເຫົ່າ ຄົ້ນຄວາມເກົ່າຜິດກັນ
  • ຄັນເຈົ້າ ມີເຮືອແລ້ວ ຢ່າລືມແພ ໄມ້ໄຜ່
    ມີໃໝ່ແລ້ວ ຢ່າລືມຂ້ອຽ ຜູ່ປະສົງ.
  • ຄັນເຈົ້າ ຄຶດຮອດຂ້ອຽ ໃຫ້ຫຼຽວເບິ່ງ ເດືອນດາວ
    ຂໍໃຫ້ ສາຽຕາເຮົາ ກ່ອມກັນ ຢູ່ເທິງຟ້າ.
  • ຄັນເປັນ ຄືຄວາມອ້າງ ຄຳພະນາງ ວາຈາສົ່ງ
    ຄວາມປະສົງ ບໍ່ມ້າງ ທາງອ້າຍ ກໍ່ດັ່ງດຽວ
     
    ຍັງຈຳ ຄຳປາກ ກ້ຽວ ທຽວສົ່ງ ຈຳນົງໝາຽ
    ແຕ່ເສັຽດາຽ ໄກກັນ ແຕ່ຝັນ ນຳນ້ອງ
    ຄິດຮອດ ສອງເຮົາເຫຼັ້ນ ຖຽງນາ ອ້ອນອ່ອຽ
    ຕອນນັ້ນ ເປັນໄກ່ນ້ອຽ ຍັງຫາເຫຼັ້ນ ເດີ່ນດິນ.
  • ຄັນແມ່ນ
    ເປັນຕາໄດ້ ຊິຄາດ ຫ້າງ ລົງ ສະ
    ຄັນບໍ່ເປັນ ຕາມີ ຊິແບກກະເຊີ ຄອນໂຊ້.
  • ຄັນແມ່ນ
    ເປັນຕາໄດ້ ຊິຄາດຫ້າງ ລົງສະ
    ເອົາໃຫ້ເຫັນ ໂຕປາ ລ່ອງລອຍ ໃນນ້ຳ.
  • ຄັນແມ່ນ
    ເປັນຕາໄດ້ ຊິຄາດຫ້າງລົງສະ
    ຄັນບໍ່ ເປັນຕາມີ ຊິແບກ ກະເຊີຄອນກະໂຊ້.
  • ຄັນແມ່ນ
    ເປັນຕາໄດ້ ຊິສານໄຊ ລົງໃສ່
    ຄັນແມ່ນ ຊິບໍ່ໄດ້ ໄຊຊິໄຫ້ ຕໍ່ປາ.
  • ຄັນແມ່ນ
    ເປັນຈັ່ງຊັ້ນ ຊິຂັນກິນ ງາຍຮ່ວມ
    ເປັນຕາ ໄດ້ຢູ່ລ້ວມ ໄກໃກ້ ກະຊິມາ.
  • ຄັນແມ່ນ
    ເປັນແນວນັ້ນ ກະເປັນສ່ວນ ບຸນສວນ
    ຫາກວ່າ ບຸນສວນມີ ຈຶ່ງປູກປີ ແທນກ້ວຍ
    ພໍເມື່ອ ເຄືອມັນສ້ວຽ ຕັດໃສ່ກວຽ ລົງບົ່ມ
    ໂຈມເອົາຫວີ ອວບອ້ວນ ມາມ້ວນ ນັ່ງກິນ.
  • ຄັນແມ່ນ
    ເປັນຄືອ້າຽເວົ້າ ສັຈຈັງ ໝັ້ນທ່ຽງ
    ໃຈບໍ່ອຽງ ງ່ຽງຄ້ອຽ ສິພຽນຈ້ອຽ ເຈັຽຣະຈາ
  • ຄັນແມ່ນ ເປັນ ຄືຄົມພ້າ ສັນໜາ ດ້າມທ່ຽງ
    ຂໍຮຽງຄູ່ ສືບສ້າງ ທາງນ້ອງ ກະບໍ່ຂີນ
    ວ່າແຕ່ ທາງຝ່າຽອ້າຽ ຂວ້າມຊາຍ ມາຫຼາຽແມ່
    ຂວ້າມຄັນແທ ມາ ຫຼາຽຄວ້າມ ຄວາມເວົ້າ ນ້ອງກະຫຼາຽ

    ເອົາເນາະ ຜະອວນອ້າຽ ຄັນແມ່ນໝາຽ ເອົາຄີ້ວກ່ອງ
    ລອງໄປຖາມ ພໍ່ແມ່ນ້ອງ ຄ່າດອງ ນັ້ນສິວ່າໃດ
  • ຄັນແມ່ນ
    ເຈົ້າເປັນ ຍັງນ້ຳ ໄຫຼຂາດ ວັງມາ ກໍ່ຕາມຖ້ອນ
    ອ້າຽຊິເປັນ ແປວໄຟ ຜ່າລົງ ວັງນ້ຳ
    ແມ່ນຊິມີ ດົງຂັ້ນ ຂວາງທາງ ແສນຍ່ານ
    ອ້າຽຊິບຸ ລ່ວງ ດັ້ນ ດົງ ດ້າວ ດ່ານ ໄພ.
  • ຄັນແມ່ນ
    ໃຈປະສົງແລ້ວ ເມືອງແກວ ກໍ່ດັ້ນຮອດ
    ໃຈປະສົງ ຍອດແກ້ວ ໃນຖ້ຳ ກະກົ່ນຫາ.
  • ຄັນແມ່ນ
    ໃຈປະສົງແລ້ວ ໜາມກະແທວ ກໍຊິຜ່າ
    ເຖິງແມ່ນປ່າ ຂີ້ອົ້ນ ພັນຊັ້ນ ກໍຊິໄປ.
  • ຄັນແມ່ນ...
    ຄາດສິໄດ້ ຫາໃສ ກະມີໃສ່
    ຄັນແມ່ນ ຄາດບໍ່ໄດ້ ຂຸດໄງ້ ກະບໍ່ເຫັນ
    ບຸນບໍ່ເຂັນ ໄດ້ພໍ້ອ້າຽ ບຸນນາງຫຼາຽ ໄດ້ພໍ້ພີ່
    ກັມບໍ່ມີ ໄລ່ຕ້ອນ ຄຳກ້ອນ ໄດ້ກ່າວຈາ
    ອຸປປະມາ...ອ້າຽເກີດ ເປັນນາເຮື້ອ ນວນນາງ ສິຖາງຖາກ
    ອຸປປະມາ... ອ້າຽເຫັນ ພັງຄີຮາກ ສິຖາກຄົ້ນ ກົ່ນໃສ່ຢາ... ດອກນາ

    ຢ້ານຫຼາຽເດ້...
    ຢ້ານແຕ່ ວ່າຈາຕ້ານ ອ້ອຽຫວານ ປົນເກືອຫວ່ານ
    ຢ້ານແຕ່ຫວານ ທາງກົກ ຢ້ານແຕ່ຮົກ ທາງໃບ
    ຢ້ານມາຄາຽ ກາກຖີ້ມ ຊີມແລ້ວ ກະເຫຼົ່າໜີ.
  • ຄັນແມ່ນ...
    ຈິງໃຈແທ້ ໃຫ້ຟ້າວແນ່ ຮີບມາຂໍ
    ຢ່າໃຫ້ ຣໍ ດົນຫຼາຽ ແມ່ອາຽ ຄົນເວົ້າ
    ໃຫ້ ມາເດີ ຟ້າວໆ ເຂົາສິລືທັງຊ່າ
    ຕາມຣາຄາ ວ່າໄວ້ ພໍເຮັດໄດ້ ບໍ່ລະນໍ
  • ຄັນແມ່ນ
    ຕາຽຍ້ອນໄຂ້ ຕາຽໄປ ອ້າຽບໍ່ວ່າ
    ຄັນແມ່ນ ຕາຽຍ້ອນ ເຈົ້າຜູ້ຮູ້ ຕາຽຍ້ອນ ຊູ້ຜູ້ນີ້ ເງິນລ້ານ ໃຫ້ທອດທານ.
  • ຄັນແມ່ນ
    ຊ້າງຖີ້ມຮອຽ ຄັນແມ່ນຫອຽ ຖີ້ມກາບ
    ຄັນແມ່ນຫາບ ຖີ້ມກະຕ່າ ຄັນແມ່ນ ປາຖີ້ມນ້ຳ ສາແລ້ວ ຈັ່ງສິລືມ
  • ຄັນແມ່ນ
    ອ້າຽວ່າແລ້ວ ແນວນາມ ຂໍຖາມກ່ອນ
    ຖາມໄປເຖິງ ບ່ອນບ້ານ ສຖານເບື້ອງ ບ່ອນອ່າສັຍ
    ກົກໄມ້ໃຫຍ່ ອ້າຽຢູ່ຊົ້ນ ຍັງມີໂກນ ຫຼືວ່າບໍ່
    ຫຼືວ່າຫໍ່ ກາບນ້ອຽ ອ້ອຽຊ້ອຽ ໝາກສິແຂວນ
  • ຄັນແມ່ນ
    ຮັກ ໃຫ້ ທຽວເວົ້າ ທຽວເອົາໃຈ ຢ່າໃຫ້ແປ່
    ເຮັດໃຫ້ເຫັນ ແທ້ໆ ເຫັນແຈ້ງ ຢ່າໃຫ້ເຫຼືອ
     
    ເອົາຄວາມຮັກ ລ້ວນໆ ບອກກ່າວ ຖແລງການ
    ເອົາຄວາມດີ ມີພຍານ ໃຫ້ເພິ່ນເຫັນ ຄຸນເຄົ້າ
    ຢ່າຕີເອົາ ຣາຄາດ້ອຽ ຂອງໂຕ ມັນບໍ່ແມ່ນ
    ເພິ່ນຊິຄຽດ ຄັ່ງແຄ້ນ ເຫັນເບື້ອງ ບໍ່ໃຈ
     
    ເຖິງຊິຕ່າງ ກັນຮ້າຽ ຢ່າໄດ້ລ່າ ລືມຫຼົງ
    ເອົາຊື່ຕົງ ເປັນຖານ ກໍ່ການ ວານຕັ້ງ
    ເອົາຄວາມຫວັງ ເປັນເຄົ້າ ໄປກັບເງົາ ຢ່າໄດ້ຫ່ວງ
    ບອກພຸ່ມພວງ ວ່າຮັກລົ້ນ ບໍ່ສົນແລ້ວ ແມ່ນຜູ່ໃດ.
  • ຄັນຄວາມຮັກ ຄືດັ່ງເຂົ້າ ຊິຂໍກິນ ໃຫ້ມັນອີ່ມ
    ຄັນຄວາມຮັກ ຄືຈັ່ງນ້ຳ ບໍ່ແກ້ວ ຊິລົງລ້າງ ອາບສົງ.
  • ຄັນສິ ໃຫ້ ໄລລືມອ້າຽ ຕ່ຳຜ້າໄໝ ເປັນຝ້າຽອ່ອນ
    ສິໃຫ້ຈອນ ຈາກອ້າຽ ປາເວົ້າໄດ້ ຈັ່ງສິໄປ
  • ຄັນຊິ ຫຍັບເຂົ້າໃກ້ ຢ້ານແຕ່ກີດ ພວງຫຼາ
    ນ້ອງນາ ຄັນຊິ ຫຍັບເຂົ້າຫາ ຢ້ານຊູ້ນາງ ທາງບ້ານ.
  • ຄັນບໍ່ແນ່ ບໍ່ຍິງ ບໍ່ຈິງ ບໍ່ເວົ້າ ບໍ່ເອົາ ບໍ່ວ່າ
    ຮັບຟ້າຜ່າ ຫ່າຕຳ ກໍໄດ້ ໃຈໝັ້ນ ທ່ຽງຕຣົງ.
  • ຄັນບໍ່ ໄດ້ເຫັນໜ້າ ເຫັນແຕ່ນາ ກໍພໍຢູ່
    ເຫັນແຕ່ເສື້ອ ພາດແຈ ເຫັນແຕ່ ແພ ພາດຮົ້ວ
    ເຫັນແຕ່ ບົວ ຢູ່ບ້ານ ພໍປານໄດ້ ນັ່ງນຳ.
  • ຄັນບໍ່ ເປັນຕາສ້ອນ ຊິຄອນຫວີງຄືນເມືອຕາກ
    ຊິຄອນດາກຂີ້ໂມ້ ເມືອຕ້ອນປ່າໝາກຢາງ.
  • ຄັນບໍ່ ໄດ້ທາງເລ້ ອ້າຍຊິໃສ່ ທາງຄາຖາ
    ບໍ່ໄດ້ ໂດຍວິຊາ ຊິໃສ່ມົນ ກົນພ້ອມ
    ຊິໃຫ້ຍອມ ນັ້ນນີ້ ຊິໃຫ້ໜີ ບໍ່ມີງ່າຍ
    ຄັນຕາເວັນ ບໍ່ຫງາຍ ຊາຍບໍ່ໄຫຼ ຈັ່ງນ້ຳ ໂຕອ້າຍ ແມ່ນບໍ່ຍອມ.
  • ຄັນບໍ່ຈິງ ອ້າຽບໍ່ເວົ້າ ງູປົ່ງເຂົາ ອ້າຽບໍ່ວ່າ
    ປາຖນາ ກິນນ້ຳອ້ອຽ ບໍ່ຖືມີດ ເຂົ້າປ່າມັນ
    ຄຶດຢາກຟັນ ເຄືອໄມ້ ຂຸດດິນ ປ້ຳ ເຮັດໄຮ່
    ຄຶດຢາກກິນ ແກງໜໍ່ໄມ້ ບໍ່ບຶນຂື້ນ ຕົ້ນໝາກທັນ ດອກນາ
  • ຄັນບໍ່ມັກ ອ້າຽບໍ່ເວົ້າ ຄັນບໍ່ເອົາ ອ້າຽບໍ່ວ່າ
    ບໍ່ຄື ຕອກມັດກ້າ ດຳນາແລ້ວ ຢຽບໃສ່ຕົມ
    ຢ້ານແຕ່ອ້າຽ ບໍ່ສົມເຈົ້າ ເສົາເຮືອນ ບໍ່ສົມຂື່
    ຜຶບໍ່ສົມ ສາດຫ້ຽນ ກວຽນງົວ ບໍ່ສົມແຫຼ່ງ
    ແກງບໍ່ສົມ ໄກ່ຕົ້ມ ງົມລ້ຽງ ກະບໍ່ຍືນ
  • ຄັນຕົມຕິດ ເອົາຕົມລ້າງ ເລືອລົງ ໃຫ້ມັນໝົ່ນ
    ຄັນນ້ຳຕິດ ເອົານ້ຳລ້າງ ແຊມຊ້ຳ ໃຫ້ຕື່ມງາມ.
  • ຄັນນາງ ຮັກສເມີໝັ້ນ ຂັນອາສາ ສິເປັນຄູ່
    ແຍ້ບໍ່ລະ ຈາກຮູ້ ໜູບໍ່ໄກ ຈາກຮັງ
    ນົກຍາງ ບໍ່ກາຽເປັນ ນົກເຕັນນ້ອຽ ສັນຍານ້ອງ ກະດັ່ງກັນ
  • ຄັນນາງໜີ ຈາກອ້າຽ ບໍ່ຈິງໃຈ ສັຕຊື່
    ໃຫ້ ເຈັບ ປ່ວຽສູ່ມື້ ບໍ່ມີວ້າງ ສວ່າງເຊົາ
    ຕື່ນມາ ທຸກໆເຊົ້າ ໃຫ້ເຫົາໄຊ ໜອນໄຕ່
    ຄວາມສຸກ ໃຫ້ຫ່າງໄກ ຄວາມໄຂ້ ໃຫ້ແລ່ນໂຮມ ເດີ້ນາງເດີ້ ເດີ້ໆນາງເດີ້
  • ຄັນນ້ອງ ຄຶດຮອດອ້າຍ ແກງຫອຍ ໃຫ້ມັນເປື່ອຍ
    ແກງປາ ໃຫ້ເປື່ອຍກ້າງ ແກງຊ້າງ ໃຫ້ເປື່ອຍງາ.
  • ຄັນນ້ອງ ຄຶດຮອດອ້າຽ ໃຫ້ຫຼຽວເບິ່ງ ເດືອນດາວ
    ສາຽຕາເຮົາ ຊິກ່າຽກັນ ຢູ່ເທິງຟ້າ.
  • ຄັນນ້ອງ ໄຂປາກຊ້າ ອ້າຍຊິງ່ຽງ ກະບຸງຕັກ
    ຄັນນ້ອງ ໄຂທໍຢາ ຊິຈິກຕອງ ມາພ້ອມ.
  • ຄັນນ້ອງ ມີຄູ່ຊ້ອນ ນ້ອງບໍ່ອອກ ເຮືອນມາ
    ນ້ອງຊິເນົາ ເຄຫາ ຮ່ວມຕຽງ ຄຽງຊ້ອນ.
  • ຄັນນ້ອງ ຕາຍເປັນນົກ ແອ່ນແສ້ວ ບິນແສ່ວ ຢູ່ກາງຫາວ
     ອ້າຍຊິເປັນ ແຫຼວຟານໂຕນ ແສ່ວລົງ ເອົານ້ອງ.
  • ຄັນນ້ອງ ຕາຍເປັນມ້າ ໂຕໃຫຍ່ ສີລານ
    ອ້າຍຊິຕາຍ ເປັນອານ ຂີ່ເທິງ ຫຼັງມ້າ.
  • ຄັນນ້ອງ ຕາຍເປັນກ້າ ກາງນາຂຽວອ່ອນ
    ອ້າຍຊິຕາຍ ເປັນນາ ໃຮ່ໂຫຼ້ງ ລົງກ້ຽວ ກ່ອມກັນ.
  • ຄັນນ້ອງ ຕາຍເປັນເຂົ້າ ກາງນາ ຂຽວອ່ອນ
    ອ້າຍຊິເປັນ ຄວາຍ ດ່ອນນ້ອຍ ກິນຫຍ້າ ຢູ່ທົ່ງ
  • ຄັນນ້ອງ ຕາຍເປັນມ້ອນ ປະສົງກ່ອມ ດອມໄໝ
    ອ້າຍຊິ ຕາຍເປັນມອນ ໃບຂຽວ ກ່ອມກັນ ໃນດົ້ງ.
  • ຄັນນ້ອງ ຕາຍເປັນດົງ ອ້າຍຊິຕາຍ ເປັນເນື້ອ ເຟືອກັນ ຄືໄໝກ່ອມ
    ຄັນນ້ອງ  ຕາຍເປັນຫອມ ອ້າຍຊິເປັນຕ່ອນຊີ້ນ ລົງໝໍ້ ອ່ອມໃສກັນ.
  • ຄັນນ້ອງ ຕາຍເປັນ ໄໝຄຳ ຝັ້ນ ພັນທະນັງ ຢູ່ໃນຫຼອດ
    ອ້າຍຊິ ຕາຍເປັນ ໄມ້ກ່ຳພັ້ນ ພັນເຂົ້າ ກ່ອມກະສວຍ.
  • ຄັນນາງ ຕາຍເປັນຝ້າຍ ຫຼາໃນໃຫ້ເຂົາແກວ່ງ
    ອ້າຍຊິເປັນໄມ້ກ່ຳຝັ້ນ ພັນກິ້ງກ່ອມແພ.
  • ຄັນບໍ່ ໄດ້ເຫັນໜ້າ ເຫັນຫຼັງຄາກະພໍຢູ່
    ເຫັນແຕ່ອູ່ແອ່ງນ້ຳ ເຮືອນຢ້າວກໍ່ອຸ່ນໃຈ.
  • ຄັນບໍ່ ໄດ້ເຫັນໜ້າ ເຫັນຫຼັງຄາກະພໍຢູ່
    ເຫັນແຕ່ເສື້ອພາດແຈ ເຫັນແຕ່ແພພາດຮົ້ວ ຕົວອ້າຽກໍ່ອຸ່ນໃຈ.
  • ຄັນບໍ່ ໄດ້ທາງເລ້ ອ້າຍຊິໃສ່ທາງຄາຖາ
    ບໍ່ໄດ້ໂດຍວິຊາ ຊິໃສ່ມົນກົນພ້ອມ
    ຊິໃຫ້ ຍອມນັ້ນນີ້ ຊິໃຫ້ໜີບໍ່ມີງ່າຍ
    ຄັນຕາ ເວັນບໍ່ຫງາຍ ຊາຍບໍ່ໄຫຼຈັ່ງນ້ຳ ໂຕອ້າຍແມ່ນບໍ່ຍອມ.
  • ຄັນບໍ່ ໄຂເໝືອງທ້າງ ບໍ່ເຫັນທາງປ່ອງນ້ຳທັ່ງ
    ມີແຕ່ຂັງປ່ອງໄວ້ ປາຊິເຕັ້ນໂດດຕາຍ

    ຄວາມຮັກອ້າຽມີໄວ້ ຄືໜາກປິ່ນບິນໝູນ
    ບຸນພີ່ຊາຽຂັນເອົາ ມ່ອມພະນາງຢ່າຂັນຮ້າງ
    ທາງຝັນຄືນເມືອສ້າງ ຊ່າງມາໄກຄອບລຳບາກ
    ຍາກຄອບຄວາມຮັກເຈົ້າ ຈັ່ງມາເວົ້າກ່າວຂໍ
     
    ຄິດເບິ່ງແດ່ເປັນຫຍັງຫຼ້າ...
    ສິບແມ່ນ້ຳຊາວແມ່ນ້ຳ ອ້າຍຫຍໍ້ເປັນແຜ່ນດິນດຽວ
    ທາງສິບຄືນຊາວຄືນ ອ້າຽຫຍໍ້ເປັນແຕ່ຄາວມື້
    ສິບແມ່ຊີກໍ່ໄດ້ຂວ້າມ ຊາວແມ່ຂອງກໍ່ໄດ້ຜ່າ
    ສິບແມ່ນ້ຳຊາວແມ່ນ້ຳ ຕັນໜ້າກະລ່ອງລອຽ

    ຕັ້ງແຕ່ຄັນຄາກນ້ອຽ ຍັງໄດ້ຮ່ວມພະຍາແຖນ
    ຍັງເປັນແຟນຄູຍກັນ ກ່ອມພະມັຍເທິງຟ້າ
    ວ່າຈັ່ງໃດເດ້ນໍ ເຈົ້າຜູ່ກອງສອງໜ້າ ເຈົ້າຜູ້ໄຊສອງງາ ບໍ່ມາຈານຳພີ່ ແດ່ລື
    ມັກອີຫຼີພີ່ຈຶ່ງເວົ້າ ບໍ່ລວງລໍ້ໃຫ້ລ່າຽພາງ
  • ຄັນບໍ່ ແນ່ບໍ່ຍິງ ບໍ່ຈິງບໍ່ເວົ້າ ຄັນບໍ່ເອົາອ້າຽບໍ່ວ່າ
    ຟ້າຜ່າຫ່າຕຳກໍ່ໄດ້ ໃຈນັ້ນຫາກທ່ຽງຊັນ
  • ຄັນບໍ່ຈິງອ້າຽບໍ່ເວົ້າ ງູປົ່ງເຂົາບໍ່ເຄີຽວ່າ
    ປາຖນານ້ຳອ້ອຽ ບໍ່ຖືມີດເຂົ້າປ່າມັນ
    ຄຶດຢາກຟັນເຄືອໄມ້ ຂຸດດິນປ້ຳເຮັດໄຮ່
    ຄືຢາກແກງໜໍ່ໄມ້ ບໍ່ບືນຂື້ນຕົ້ນໝາກທັນ ດອກນາ
  • ຄັນບໍ່ ມາຈາເວົ້າ ທາງໃຈເປັນລາຽຕ່າງ
    ເປັນກະເວີ້ງກະວ້າງ ກິນເຂົ້າກະບໍ່ລົງ

    ຍາມນອນຝັນເຫັນໜ້າ ເດິກໆມາຄົ້ວຜ້າຫົ່ມ
    ຍາມໜາວລົມພັດຕ້ອງ ຢາກມີນ້ອງຫົ່ມໃຈ

    ໜາວກາຽພໍທົນໄດ້ ໜາວໃຈກັ້ນບໍ່ຢູ່
    ຢາກມີຄູ່ແນບຂ້າງ ບັດຍາມເຂົ້າບ່ອນນອນ.
  • ຄັນໝາຍປອງກະ ໃຫ້ໝາຍປອງໝັ້ນ ສັມພັນໂນ້ມນຽ່ວ
    ຢ່າໄດ້ທຽວເລາະເຫຼັ້ນ ເຫັນພື້ນເພິ່ນຫຍັນ.
  • ຄັນບໍ່ ມັກຢ່າມາເວົ້າ ຄັນບໍ່ເອົາຢ່າມາວ່າ
    ຢ່າມາຈາປາກເວົ້າ ໃຫ້ເປັນບ້າປ່ວງນຳ.
  • ຄັນບໍ່ ມັກນ້ອງບໍ່ເວົ້າ ຄັນບໍ່ເອົານ້ອງບໍ່ວ່າ
    ບໍ່ແມ່ນທ່າ ນ້ອງບໍ່ໄລ່ຄວາຽລົງ
    ຕີລົງແລ້ວ ຖອຽຄືນມັນຊິຍາກ
    ມັນຊິລຳບາກແທ້ ທຽວຫຍຸ້ງຢູ່ບໍ່ເຊົາ.
  • ຄັນບໍ່ ມັກອ້າຽບໍ່ເວົ້າ ຄັນບໍ່ເອົາອ້າຽບໍ່ວ່າ
    ບໍ່ໄດ້ມາລ່ວງລໍ້ ໃຫ້ນາງນ້ອງໄດ້ຄຶດນຳ
     
    ບໍ່ໄດ້ຈາຄຳເຫຼັ້ນ ແຕ່ເປັນຈິງຄືຄວາມວ່າ
    ບໍ່ຄືຕອກມັດກ້າ ດຳນາແລ້ວຫຍຽບໃສ່ຕົມ
     
    ບໍ່ໄດ້ງົມງວຍເວົ້າ ຍ້ອນຊິເອົາອ້າຍຈຶ່ງວ່າ
    ເອົາວາຈາອອກອ້າງ ໃຫ້ນາງນ້ອງລ່ຳແຍງ.
  • ຄັນບໍ່ ມັກອ້າຽບໍ່ເວົ້າ ຄັນບໍ່ເອົາອ້າຽບໍ່ວ່າ
    ຍ້ອນວ່າຮັກນ້ອງນາ ຈຶ່ງມາຈາກ່າຽກ້ຽວ ທຽວເວົ້າໃຫ້ອຸ່ນໃຈ
    ໜີໄປໄກຢາກເຫັນໜ້າ ຢາກມາຫາຈາກ່າວ
    ຍ້ອນວ່າຄວາມຮັກເຈົ້າ ຈຶ່ງທຽວເວົ້າຢູ່ບໍ່ເຊົາ.
  • ຄັນບໍ່ ມັກຢ່າມາລໍ້ ມາເຮັດພໍໃຫ້ນ້ອງຫ່ວງ
    ເຮັດໃຫ້ນ້ອງໄດ້ຫວງ ເຮັດໃຫ້ຊວງແຕກມ້າງ ພະນາງນ້ອງແມ່ນບໍ່ເອົາ.
  • ຄັນມີຂົວກ່າຍຂວ້າມ ອ້າຍຊິທ່ອງທຽວຫາ
    ສາຍທະຣານະທີຫຼວງ ຫາກກ່ວງໄກເຫຼືອຮ້າຍ
    ຄັນຊິພາຍເຮືອຂວ້າມ ພັດມາຄາເກາະແກ່ງ
    ຢ້ານແຕ່ເຮືອປັ່ນປີ້ນ ພາຫຼົ້ມເຄິ່ງວັງ.
  • ຄັນຢາກ ເຫັນໃຈອ້າຍ ໃຫ້ມືນຕາໃສ່ນ້ຳແຈ່ວ
    ມັນຫາກແສບຈ້າວໆ ໃຈອ້າຍກໍດັ່ງດຽວ.
  • ຄັນວ່າ ໃຈປະສົງແລ້ວ ກາງດົງກໍເປັນທົ່ງ
    ຄັນແມ່ນໃຈຂີ້ຄ້ານ ກາງບ້ານກໍວ່າດົງ.
  • ຄັນວ່າ ໃຈປະສົງແລ້ວ ເມືອງແກວກໍດັ້ນຮອດ
    ສາຍຕາຈອດຈໍ່ຈ້ຳ ໃນຖ້ຳກໍກົ່ນຫາ.
  • ຄັນວ່າ ປາກກ່າວຕ້ານ ວາທະການອ້າງເອີ່ຍ
    ເຮົາເປັນຄົນເປີດເຜີຍ ປາກຈັ່ງໃດໃຈຈັ່ງຊັ້ນ ບໍ່ເຄີຍຂັ້ນແບ່ງໃຈ

    ແນວເຮົາຮູບຮ່າງຮ້າຍ ໃຈມ່າຍຄະນິງຫາ
    ຮັກຄືແຕງແພງຄືຕາ ກະບໍ່ຫົວຊາຊ້ຳ
    ແມ້ແຕ່ຍາມກິນເຂົ້າ ກະເຫັນເງົາໃນປົ່ນ
    ອິດູຕົນໂອ່ນໂອ້ ໂຕອ້າຍຜູ້ໄຝ່ຫາ.
  • ຄັນວ່ານ້ອງ... ໄດ້ຮັກແລ້ວ ບໍ່ມີແວວຊິລືມງ່າຍ
    ບໍ່ໝາຽປະປ່ອຍຖິ້ມ ແນວນັ້ນແມ່ນບໍ່ເປັນ.
  • ຄັນວ່າ ມາຮອດແລ້ວ ຊິໝາຽຝາກພະມັຍມິດ
    ພັນທະນັງນຳຕິດ ໝື່ນປີບໍ່ໄລເຈົ້າ
    ວ່າຊິເອົາໃຈຂ້ອຽ ຄວາມຕາຽເກີດຮ່ວມ
    ວ່າບໍ່ໃຫ້ຄາດແລ້ວ ຊິໝາຽໝັ້ນໃສ່ໝອນ.
  • ຄັນວ່າມີໂຕນັ້ນ ບໍ່ຕ້ອງກ່ຽວຄຳຖາມ
    ຂໍໃຫ້ຈິດໃຈງາມ ກ່ອມກັນເອົາໄວ້
    ແມ່ນຊິໃສຄືແກ້ວ ມະນີນິນອັນລ້ຳຄ່າ
    ບໍ່ຖືກວາສນາ ພິ່ກະເອົາບໍ່ໄດ້ ຢ່າໄປເວົ້າໃຫ້ເມື່ອຽນຳ

    ໂອເດ້ນໍ... ອ້າຽຢາກຈູງແຂນເຂົ້າ ພາຂວັນປ້ອນໄຂ່ໜ່ວຽ
    ມືຂວາປ້ອນໄຂ່ອ້າຽ ມືຊ້າຽປ້ອນໄຂ່ນາງ.
  • ຄັນອ້າຍ ມີເມັຽແລ້ວ ຢ່າລົງເຮືອນໃຫ້ໝາເຫົ່າ
    ໃຫ້ອ້າຍນັ່ງເຄົ້າເມົ້າ ໄພຫຍ້າຢູ່ເຮືອນ.
  • ຄົກຮຽງສາກ
    ໝາກຮຽງຕ່າ
    ຣາຊາຮຽງນັກຣົບ
    ມະນີນົບເກົ້າຄູ່ສາວງາມ
    ນາທາມງາມຮຽງເຂົ້າ
    ຄືສອງເຮົາບໍ່ຂາດຫ່າງ
    ຄັນສວັນຢູ່ເສີມສ້າງ ທາງຊູ້ໄດ້ຄູ່ກັນ
  • ຄົນເຮົາ
    ທັງເໜືອໃຕ້ ໃຜກະຊ່າງຄືກັນເໝີດ
    ໂລພ ໂກດ ຫຼົງ ມີນຳກັນ ບໍ່ຕ່າງກັນຄືຕາຽແທ້
    ທັມມະດາຄົນເຮົານີ້ ມີຄົນດີມີຄົນຊົ່ວ
    ມີຂີ້ຕົວະຫຼອກລໍ້ ຍໍຍ້ອງມີດັ່ງກັນ

    ມີສຸກສັນ ມີຍາກຮ້າຽ ມີແໜງໜ່າຽຄືກັນເໝີດ
    ມີດີໃຈມີເສັຽໃຈ ເຈັບໄຂ້ມີຄືກັນແທ້
    ຟັງເອົາເດີ້ພວກພີ່ນ້ອງ ອີຜອງໝູ່ຄູອາຈານ
    ສັງຂານເຮົາຄືກັນເໝີດ ຕ່າງກະຕາຽ ຄືກັນສີ້ນ
  • ຄົນສມັຍດຽວນີ້ ບໍ່ຄືຄົນລຸ້ນເກົ່າ
    ຄົນເຮົາສູ່ມື້ນີ້ ບໍ່ຄືກີ້ເກົ່າຫຼັງ

    ຕັ້ງແຕ່ກີ້ ອະດີດເກົ່າຄາວລຸນ
    ອິນເຕີແນຕ ບໍ່ທັນມີ ໄຮຟາຍຣ໌ ບໍ່ທັນພໍ້
    ການແຕ່ງໂຕສມັຍນັ້ນ ປະເພນີແບບເກົ່າ
    ຜູ່ຍິງນຸ່ງສີ້ນຝ້າຽ ເຖີງພື້ນລຸ່ມດີນ

    ອັນວ່າ ສີ້ນໝີ່ເອື້ອ ຟືມຕ່ຳທຳເອງ
    ຝ້າຽກະເຂັນດ້ວຍມື ພ່ຳຫຼາກົງອີ້ວ
    ຍິງສາວລົງເຂັນຝ້າຽ ພາກັນລົງຂວ່າງ
    ເຂັນຝ້າຽຢູ່ເດີ່ນບ້ານ ໄຟໄຕ້ກະບໍ່ມີ

    ມີກະມີໄຟຕັ້ງ ກອງຟືນສຸມຕໍ່
    ເອົາແສງເດືອນຢູ່ຟ້າ ມາໃຊ້ຊ່ອຽແສງ

    ຢູ່ກັນເປັນຄຸ້ມໆ ລົງຂວ່າງໂຮມກັນ
    ກິນເຂົ້າແລງ ແລ້ວລົງໂຮມ ໝູ່ຝູງມາເຕົ້າ
    ບໍ່ຈັກເດັກຈັກເຖົ້າ ເອົາແຄນລົງມາເປົ່າ
    ອີກທັງແຄນໂອຍ... ຊ້ຳ ຊໍອູ້ກະໂຫ່ກັນ

    ອອກຂວ່າງນັ້ນ ແລ້ວກະໄປຂວ່າງນີ້ ລຽນເລາະຕົບມື
    ຜູ່ເຖົ້ານອນເທີງຊານ ງ່ຽງຫູຟັງໄວ້
    ເປັນປະເພນີ ໄທເຮົາແທ້ ບໍ່ຄືກັນຫຼາຽຢ່າງ
    ທາງເມືອງລາວທຸກຖ້ວນໜ້າ ເປັນຈັ່ງຊີ້ແຕ່ເກົ່າເດີມ ເພີ່ນ... ວ່າ.. ນໍ້
  • ຄົນຜູ້ຈົບຈັ່ງນ້ອງ ຄົນຜູ້ງາມຈັ່ງນ້ອງ ບໍ່ປະຖີ້ມໃຫ້ຄົນສ່າ ດອກນາ
    ຂອງມີຄ່າໃນໂລກລ້ວນ ຫຍັງສິສູ້ໝ່ອມພະນາງ
    ບຸນເຄີຽໄດ້ທຽວທາງສ້າງ ຜລາຍາວຍັງຍູ້ໃສ່
    ໃຈປະສົງເປັນຄູ່ຊ້ອນ ບໍ່ປະນ້ອງໃຫ້ແກ່ໃຜ ດອກນາ
  • ຄົນພຸທ
    ຄົນພຸທເອີ້ຽ... ເຈົ້າຢ່າມົວເມົາດົ້ນ ຢ່າຫຼົງຕົນໃຫ້ເກີນຄ່າ
    ຄົນເກີດມາ ມີແຕ່ທຸກຊອກຊ້ຳ ກັມໃຊ້ຈ່ອງດຶງ
    ໃຫ້ຄຳນຶງເຖິງຂໍ້ ວັຕຕະວົນກົລກໍ່ (ວັຕຕະ = ວົງວຽນ)
    ໃຫ້ເຮົາຄຶດເບິ່ງຂໍ້ ໃຫ້ພໍໄດ້ເພິ່ງຕົນ
    ເພິ່ນນັ້ນວ່າ... ຄົນເຮົານີ້ ມີກັມເກີດກໍ່
    ມີມາຍາຫຼອກລໍ້ ໃຫ້ຄົນນັ້ນກໍ່ກັມ
    ໃຜຜູ້ທຳບຸນສ້າງ ກຳໜົດທາງເພື່ອກ້າວຍ່າງ
    ປານໄດ້ ຖາງຖາກດົ້ນ ເພື່ອຂໍພົ້ນຈາກບ່ວງກັມ ແທ້ແລ້ວ
  • ຄິດເຮັ່ງຮ້ອນ ຮອນຮ່ຳທົນທຸກ
    ມະໂນໃນໃຈທຸກ ທ່າວທໍຣະມານມ້ຽນ
    ແສນຊິພຽນມະໂນນ້ອມ ຖນອມໃຈບໍ່ໃຫ້ປ່ວງ
    ແຕ່ຫາກ ຂວາງຂະໜາດອ້າຍ ຫະທັຍອ້າຍຊ່າງເປັນ

    ບາບບໍ່ເວັ້ນ   ເວນຈ່ອງຈຳຈິດ
    ຫວນຄນິງນຳຄິດ ບໍ່ຫ່າງເຫີນເມີນມ້າງ
    ຄືດັ່ງຄົນຕົກສ້າງ ຫາທາງບໍ່ເຫັນປ່ອງ
    ຄຶດນຳ ນຸດທະນາດນ້ອງ ນາງນ້ອຍນຶື່ງດຽວ

    ເວົ້າຫຍອກກ້ຽວ ໂນ້ມໜ່ຽວກອນຜຍາ
    ພໍໄດ້ຫາຍໂສກາ ຜ່ອນຄາຽໝາຽມ້າງ
    ບໍ່ໄດ້ນອນນຳຂ້າງ ແຕ່ທາງໃຈພະທັຍຫ່ວງ
    ບໍ່ໝາຽລວງລ່ວງເວົ້າ ແຕ່ໃຈເສົ້າຫ່ວງນຳ.
  • ຄິດໄປ ຫຼາຍນັບມື້ຫຍຸ້ງ ຄືຍຸງຢູ່ໃນປ່າ
    ຄຶດໄປຫຼາຍນັບມື້ພໍ້ ພໍໄຫ້ຢູ່ຊູ່ຍາມ.
  • ຄຶດຕໍ່ນາໄຮ່ໂຫຼ້ງ ຝົນຕົກລົງນ້ຳບໍ່ຢູ່
    ຄຶດຕໍ່ເຈົ້າຜູ້ຮູ້ ຄຶດຕໍ່ຊູ້ຜູ້ນີ້ ຢ້ານມີຊູ້ໝື່ນຄົນ.
  • ຄຶດຮອດເຈົ້າ ແລດາວກະບໍ່ຊ່ວາງ
    ເຈັບໜ່ວງໃນໃຈໄຂ້ ເໝືອນໄມ້ມາທັງສຸມ
    ເໝືອນໝູ່ຊຸມເຂັມຮ້ອຽ ແທງເປັນຮອຽເລືອດຫຼັ່ງ
    ນ້ຳຕາພັງອາບແກ້ມ ແນມແລ້ວກະບໍ່ເຫັນ

    ຈັກແມ່ນເວນອ້າຽສ້າງ ປາງໃດໃຫ້ໄກຫ່າງ
    ມີແຕ່ທາງຫ່າງຂັ້ນ ກັນໄວ້ໃຫ້ຫ່າງໄກ
    ຄົນທີສັນຍາໄວ້ ຫາຽໄປແລ້ວເປັນອື່ນ
    ວັນຄືນຈັ່ງແມ່ນເຍີ້ນ ລເມີຮ້ອງສ່ອງດາວ

    ລົມພັດນ້າວ ໜາວໃນໆໃຈກໍສັ່ນ
    ຢາກນອນຝັນກອດເຈົ້າ ຈົນເຖົ້າກະບໍ່ຝັນ
    ຈັ່ງແມ່ນບຸນອ້າຽສັ້ນ ນອນພອຽຈົນໜາວສັ່ນ
    ວັນຄືນຄຶດຮອດເຈົ້າ ຈອບຈ້ອງສ່ອງແຕ່ດາວ

    ນາງເອີ້ຽ... ຄຶດຮອດອ້າຽ ໃຫ້ຫຼຽວເບິ່ງເດືອນດາວ
    ສາຽຕາເຮົາ ຈອບກັນເທິງຟ້າ
    ສົ່ງຫົວໃຈມາອ້ອນ ວອນເທວາໃຫ້ມາຊ່ອຽ
    ຄອຽຮັກຫວານຢູ່ເລິງ ສະເໝືອນດັ່ງນ້ຳເຜີ້ງ ເທິງຟ້າໜ່ວຽພະຈັນ
  • ຄຶດຮອດເດ້... ຄຶດຮອດບ້ານ ຄືດຮອດພານພາເຂົ້າແມ່
    ຄຶດຮອດແຕ່ເພີ່ນນັ້ນ ປານນີ້ຢູ່ຈັ່ງໃດ
    ຄິດຮອດຫຼາຽລາງເທື່ອໄຫ້ ໄດ້ແຕ່ຄນິງຫາ
    ຄຶດຮອດທັງອາວອາ ລູງຕາທີ່ເຄີຽເວົ້າ
    ຄຶດຮອດຍາມເອົາເຂົ້າ ໜາວໃນໃຈຢູ່ແວບແວ່
    ຄຶດຮອດພໍ່ແມ່ເຖົ້າ ບັງເກີດເກົ້າຣະມິ່ງຮຽມ
    ຄິດຮອດຄວາຽບັກຕູ້ ທີ່ເຂົາລູ່ລົງດິນ
    ຄິດຮອດຜັກຕ່ຳນິນ ລວກກິນຄາວມື້
    ຄິດຮອດຄາວເຄີຽຊື້ ເສື້ອແຂນຍາວໃຫ້ເຈົ້າໃສ່
    ຄິດຮອດເດ... ຍາມລົມໜາວລູບໄລ້ ກອດໄວ້ ພໍໄດ້ອຸ່ນຄີງ ແທ້ນໍ
    ຄິດຮອດປໍທົ່ງນັ້ນ ຫັກຫັ່ນເອົາມັນໝົກ
    ຄິດຮອດຈຳປາກົກ ນົກກະທາທັງແຕ໊ດແຕ້
    ຄຶດຮອດແຫຫວີງສ້ອນ ຄຶດຮອດໝອນຟູກຜ້າຫົ່ມ
    ຄຶດຮອດແກງໄກ່ຕົ້ມ ຄຶດຮອດສົ້ມໝາກມ່ວງດອງ ແທ້ເດ...
  • ຄິດຮອດຄາວກ່ອນກີ້ ໂຕບໍ່ມີຄືບ້ານເພິ່ນ
    ເຊົ້າແລງມາແມ່ກະເອີ້ນ ຕຳເຂົ້າພໍມ່າກິນ
    ກ່ອນເຂົ້າງາຍກະຟ້າວດີ້ນ ຕຳກ່ອນມັນສິສວາຍ
    ຟ້າວນຳຄວາຍນຳໝູ ໝູ່ກະມາຫາເອີ້ນ
    ໄປໂຮງຮຽນໄວຟ້າວ ຈ້າວກັບມາຢ້ານມັນຄ່ຳ
    ຟ້າວມາຕຳເພື່ອເຊົ້າ ກິນເຂົ້າແລ້ວຈັ່ງນອນ
    ຕາອອນຊອນຊູ່ມື້ນີ້ ບໍ່ໄດ້ມີດອກໃຫ້ເບິ່ງ
    ຄົນເກີດໃໝ່ໃຫຍ່ບໍ່ເຫີງ ແມ່ນບໍ່ເຫັນອີກແລ້ວ ຂອງແນວນີ້ແມ່ນບໍ່ຍັງ ພີ່ນ້ອງເອີ້ຍ
  • ຄຶດຮອດໜ້າ ຄົນເຄີຽຈາຕ້ານຕໍ່
    ຄິດຮອດຫຼາຽຢາກພໍ້ ພໍໄດ້ສວ່າງໃຈ
  • ຄິດຮອດຫຼາຽບອກບໍ່ໄດ້ ເຖິງທາງໃນເປັນລາຽຕ່າງ
    ມະໂນໃຈອ້າງວ້າງ ພໍຢາກໂຄ້ງຕ່າວຄືນ.
  • ຄິດຮອດນ້ອງ ເດິກດື່ນກໍຝັນເຫັນ
    ມາເປັນເຫດສັນໃດ ຈັ່ງເລົ່າຊັງໂຕອ້າຍ
    ໄກໄລພົ້ນ ບໍ່ຫົນຄືນກັບຕ່າວ
    ຄິດຮອດເຈົ້າ ແລງເຊົ້າຈົ່ມຫາ

    ເປັນປ່ວງບ້າ ເອົ້າອົ່ງຂັງກົງ
    ປົງໃຈຈິດ ຄິດນຳບໍ່ມີແລ້ວ
    ສາຍໃຈແກ້ວ ມາລືມຄຳເວົ້າຕໍ່
    ຄຶດພໍ້ວໍ້ ນຳນ້ອງບໍ່ລືມ ນັ້ນແລ້ວ.
  • ຄຶດຮອດນ້ອງ ເປັນຫ່ວງເຫຼືອຫຼາຽ
    ບໍ່ອາຈທຽວໄປຢາມ ໄຕ່ຖາມຕາມເວົ້າ
    ເຊົາດີແລ້ວ ຫຼືແນວໃດໄຂ້ປ່ວຽ
    ອໍຣະທັຍອ່ອນທ້ວຽ ໃຈສິມ້ວຽຫ່ວງນຳ
  • ຄຶດຍິ່ງລ້ຳ ນຳຈອບເຈຣະຈາ
    ແຕ່ຍາກນຳເວລາ ສິປາກຈາດອມເຈົ້າ
    ໝອງໃຈເສົ້າ ຄວາມເຫງົາຍ້ອນຄຶດຮອດ
    ຢາກສິກອດແຜ່ນຟ້າ ໄປຫານ້ອງຜູ້ຫ່າງໄກ.
  • ຄິດຮອດນ້ອງ ຄນິງນຳສຳສ່ອງ
    ຈິຕຕ່ອຍຕ້ອງ ພະອວນນ້ອງໜີ່ນັນ

    ແສນສະບັ້ນ ບໍ່ປັນແບ່ງແປງເປັນ
    ຄຶດຫວນເຫັນ ຊູ່ວັນບໍ່ມີເວັ້ນ
    ເປັນສັງເກີ້ ສັງກາກ້ຽວກ່າຍ
    ພາຍພີ່ຮ້ອນ ຮຸມຫຸ້ມຮ່ຳຮອນ ແທ້ແລ້ວ.
  • ຄຶດຮອດນ້ອງ ຄອຽຄອງກະແລ້ງເປົ່າ
    ຄຶດເຫັນແຕ່ໜ້າເຈົ້າ ຈວນແຈ້ງສວ່າງຕາ

    ນອນໄສຍາຄືນຄ້ອຽ ເຫງົາຫງອຽນ້ຳຕາຫຼັ່ງ
    ຄຶດຮອດແຕ່ຄວາມຫຼັງ ເຄີຽໄດ້ນັ່ງພ່ຳພ້ຽງ ຮຽງຂ້າງຄູ່ກັນ.
  • ຄິດຮອດນ້ອງ ສີກເອົາຕອງກ້ວຽປ່າ
    ຫຍິບປາກກາຂີ້ໝ້ຽງ ຢູ່ຖຽງນ້ອຽນັ່ງຂຽນ
    ຫຍິບເອົາທຽນມາໄຕ້ ແທນໄຟນິອອນຮຸ່ງ
    ສຸມຂີ້ຝອຽໄລ່ຍຸງ ຄວັນມັນຄຸງອູດເອົ້າ ຕາຜູ່ເຖົ້າແຮ່ງບໍ່ດີ
  • ຄິດຮອດນ້ອງ ຊູ້ເກົ່າເຄີຍຈາ
    ການເວລາ ຜ່ານໄປໄລຊ້ຳ
    ຄິດເຖິງກ້ຳ ຄຳຈາເຄີຍປາກ
    ຫາກບໍ່ ໄດ້ໄຕ່ຕ້ານ ຫານເວົ້າໃຫ້ໜ່າຍຊັງ
  • ຄິດຕໍ່ຕັ້ງ ຫວັງແຕ່ຊິຖາມເຖິງ
    ເຈົ້າຫາກຂຶງໂກທາ ວ່າຊາຍຄົນໄຮ້
    ໜີໄກພົ້ນ ຢ່າມາວົນມາວ່າ
    ອ້າຍເລີຍໝົດຄວາມຈາ ວ່າອິຫຽັງກໍບໍ່ໄດ້ ນອນໄຫ້ທຸກຣະທົມ.
  • ຄິດຮອດນ້ອງ ທົນຢູ່ໃນຈິດ
    ແສນຊິທໍຣະມານຄິດ ປ່ວຍໃຈທົນໂອ້
    ໂສດີແລ້ວ ທາງພະນາງກະແໜງໜ່າຍ
    ອ້າຍປາກເວົ້າ ທາງເຈົ້າກະບໍ່ຟັງ

    ຄິດຕໍ່ຕັ້ງ ເຕີມຕື່ມຄຳຜຍາ
    ເປັນວາຈາ ສົ່ງເຖິງນາງນ້ອງ
    ຈິຕໃຈຂ້ອງ ໃນມະໂນໂຕພີ່
    ຮອດມື້ນີ້ ບໍ່ທັນມົ້ມສ່ວງຫາຍ.
  • ຄຶດຮອດນ້ອງ ນາງໜຶ່ງທາງໄກ
    ໄປທາງໃດ ກະຮ່ຳຮອນໂຮຽຮ້ອງ
    ຫຼົບໃນຫ້ອງ ໂຫຽຫາຫົດຫູ່
    ຊາຽຂາດຊູ້ ຄຽງຂ້າງຄູ່ຄີງ

    ຫຼິງຕາພໍ້ ດວງດາວເດັຽຣະດາດ
    ຊາຽຫາກຂາດຄູ່ຊ້ອນ ນອນນິ້ງໜ່າຽແໜງ
  • ຄຶດຮອດນ້ອງ ນາງໜຶ່ງທາງໄກ
    ບໍ່ອາດໄຂຄຳຈາ ຝາກຫາເຫັນພໍ້
    ເຄີຽຖາມສໍ້ ອື້ອໍຢອກກ່າວ
    ໃຈຄຶດນຳໜ່ວງນ້າວ ບໍ່ແໜງໜ້າໜ່າຽໜີ
  • ຄິດຮອດນ້ອງ ນາງນາດ....
    .....ຄົນງາມ ອ້າຽຢາກຖາມຈາເວົ້າ
    ພີ່ນີ້ທົນໝອງເສົ້າ ເຫງົາໃຈຍ້ອນເປັນຫ່ວງ
    ເຈົ້າຜູ່ດວງດອກຟ້າ ຜກາລ້ຳທຸກຄືນ
    ອ້າຽສອື້ນ ນອນແນບມີສນິທ
    ໃນອາຣົມຄວາມຄິດ ຫ່ວງຫາຜວາພໍ້
    ເລີຽຢາກຂໍໄຂແຈ້ງ ຍໍສແດງຜຍາຍ່ອຽ
    ທຸກວັນຄືນຄ່ຳຄ້ອຽ ໃຈຣະຫ້ອຽຄິດນຳ ນັ້ນແລ້ວ
  • ຄິດຮອດນ້ອງ ນິນເນດງາມຂຳ
    ນັຍຕາດຳ ດັ່ງໂອງແນວເນື້ອ
    ເຝືອແຝງຊ້ອນ ສອນລອນຮຽງຮ່ວມ
    ພຶກສາກວມກິ່ງກ້ານ ກໍສ້ວຽເຫຼື່ອມບັງ
    ເໝືອຽໝອກກັ້ງ ກັນດາດ ພິສສະດານ
    ປະສົມສານເວຫາ ຝ່າຽນະພາຜືນກວ້າງ
    ລວງລາລ້ຳ ຝົນຮຳຮວຽຮ່ຳ
    ກາຽນະທີເຖື່ອນຖ້ຳ ຜາກ້ຳຕາດໂຕນ
    ນ້ຳຄື່ນໂຄ້ນ ໂຕນຕາດພະລານຫີນ
    ສັກກູນາແນວບິນ ປີກກາງກວມກັ້ງ
    ອຸທທະກັງສິນຍ້ອຽ ຟອງຝອຽສາດໃສ່
    ຮຸກຂະຊາຕໝູ່ໄມ້ ໃບປີ້ນປົ່ງຂຽວ
    ວົນເລາະກ້ຽວ ກໍກ່ຽວໄພໜາ
    ຫາກຍັງແສນໂສກາ ຈາກລາຮຽມນ້ອງ
    ໄກຫົນຫ້ອງ ຫໍທອງງາມໂງ່
    ສຸດວິສັຍອ່າວໂອ້ ໂອ..ອ້າຽໜ່າຽພະທັຍ
  • ຄຶດຮອດນ້ອງ ນອນຖອດໃຈຝືນ
    ນອນເພິງຜືນ ແຜ່ນພູຜາກັ້ນ
    ເອົາຈັນແຈ້ງ ດາຣາເດັຽຣະດາດ
    ເປັນໂອກາດຕ່າງໄຕ້ ໄຟຮ້ອນທ່ອນກະບອງ
    ເອົາສຽງຫອງໂຫຽຮ້ອງ ສັຕຕາມາທຽນປີ່
    ສຽງຊະນີຮ່ຳຮ້ອງ ເປັນຄ້ອງຂຸ່ຍຊໍ
    ເອົາເຟືອຽໜາມເປັນມ່ານກັ້ງ ກັນຝັ່ງໄສຍາ
    ກັນກາຍາຍາມໜາວ ໝອກເໝີຽມາຍຍ້ອຽ
    ຫົວລົມວອຽໜາວເນື້ອ ເຟືອກາຽບໍ່ຫາຽສ່ວງ
    ທໍຣະມານຫຼາຽຫຼວງ ກະຄືຄຶດຮອດນ້ອງ ຫຼາຽແທ້ກວ່າສູ່ແນວ
  • ຄຶດຮອດນ້ອງ ນອນຮອງໝອນໄມ້ແກ່ນ
    ນອນກະດານແຜ່ນແປ້ນ ເປີງຫຍ້າອ່າວຄນິງ
    ຫຼິງບົນເບື້ອງ ບູຣະພາຟ້າພວມສ່ອງ
    ອາທິຕຈວນສາດຕ້ອງ ຕາເວັນມື້ສິໝໍ່ສວາຽ
    ລົມພານກວຽກໍກ້ານ ພຶກສາຫານກ້ານກິ່ງ
    ງ່າໄຫວຕີງຕ່ອຽຕ້ອງ ຄຶດເຫັນນ້ອງຜູ້ຫ່າງລາ
  • ຄຶດຮອດນ້ອງ ນ້ອຽນາດນາງດຽວ
    ຫຼຽວນຳທາງ ຖາກຖາງຄຳເວົ້າ
    ພາຕົນເຂົ້າ ໃນຂັນຝັນຮອດ
    ສອງມືກອດແຜ່ນຟ້າ ຄຶດເຫັນໜ້າຢູ່ສູ່ວັນ.
  • ຄິດຮອດນ້ອງ ນຸທທະນາດທາງໄກ
    ສອງຫົວໃຈ ຜູກພັນພາຽພື້ນ
    ວັນຄືນຄ້ອຽ ຈາອອຽອ້ອຽອິ່ນ
    ບໍ່ອາຈຜິນໜ້າລີ້ ໜີເຈົ້າຈາກຈອນ
  • ຄິດອ້ອນຕ້ອນ ນຳຕ່ອນສເນຫາ
    ບໍ່ອາຈລາເລີຽລັບ  ລ່ວງໄຫຼໄລມ້າງ
    ບຸນຜລາເຄີຽສ້າງ ປາງໃດໃຊ້ຊາຕ
    ສັງມາປາດເຄິ່ງຕັ້ງ ບັງໜ້າບ່າວພະອວນ.
  • ຄຶດຮອດນ້ອງ ນອນບໍ່ອີ່ມເຕັມຕາ
    ຜວານຳຄວາມຮັກ ຈ່ອຽເຫຼືອງຈົນເປັນໄຂ້
  • ຄຶດຮອດນ້ອງ ນອນຮອງໝອນໄມ້ແກ່ນ
    ນອນກະດານແຜ່ນແປ້ນ ເປີງຢ້າວອ່າວຄນິງ

    ຫຼິງບົນເບື້ອງ ບູຣະພາຟ້າພວມສ່ອງ
    ອາທິດຈວນສາດຕ້ອງ ຕາເວັນມື້ສິມໍ່ສວາຍ

    ລົມພານກັວຽກໍກ້ານ ພຶກສາຫານກ້ານກິ່ງ
    ງ່າໄຫວຕີງຕ່ອຽຕ້ອງ ຄຶດເຫັນນ້ອງຜູ່ຫ່າງລາ
  • ຄຶດຮອດນ້ອງ ນ້ອຽໜຶ່ງເນົາໄກ
    ເປັນສັນໃດ ຢູ່ດີສບາຽບໍ້
    ມາຖາມສໍ້ ຈັ່ງໃດນໍ..ຢາກຮູ້ຂ່າວ
    ສືບທໍ່ທາວຫ່ວງນ້ອງ ຜູ້ເນົາແຄວ້ນຖີ່ນໄກ

    ຫຼືແມ່ນເຈົ້າຖີ້ມໄວ້ ຄວາມເກົ່າເຮົາສອງ
    ລືມໃບຕອງຈອງຕັດ ມັດໜຽວແກມກ້ວຽ
    ລືມກະບວຽໂປະພ້າວ ຊາວເມືອງເຊື້ອສ່ຳ
    ລືມແຄນລຳແອ່ນຟ້ອນ ໜີໄປຍ້ອນໃສ່ເພງ ແລ້ວບໍ້
  • ຄິດຮອດນ້ອງ ນ້ອຽໜຶ່ງນາງດຽວ
    ຫຼຽວນຳທາງ ຖາກຖາງຄຳເວົ້າ
    ພາຕົນເຂົ້າ ໃນຂັນຝັນຮອດ
    ສອງມືກອດແຜ່ນຟ້າ ຄິດເຫັນໜ້າຢູ່ສູ່ວັນ
  • ຄິດຮອດນ້ອງ ຜູ້ເຄີຽກ່າວຈາດອມ
    ຜູ້ເຄີຽຫອມຫວນຮັກ ພັກພິງໃຈອ້າຽ
    ຫາຽໜີໜ້າ ບໍ່ຫົວຊາເຕື້ອງຕໍ່
    ຢາກຊິພົບພໍ້ ພໍໄດ້ເວົ້າດັ່ງເດີມ

    ຕັ້ງແຕ່ເລີ້ມ ບໍ່ເຄີຽຄິດຊິເປັນຫຼາຽ
    ບາດເຈົ້າມາໜີກາຽ ຊ່າງຫ່ວງຫຼາຽປານນັ້ນ
    ຫຼືເຈົ້າຕັດທາງສັ້ນ ສັມພັັນຖີ້ມປ່ອຽ
    ເຮັດໃຫ້ຊາຽຄິດຄ້ອຽ ຄນິງຫ້ອຽຢູ່ວັ່ງເວ.
  • ຄິດຮອດນ້ອງ ມະໂນໃນໜັກໜ່ວງ
    ຄິດນຳດວງດອກໄມ້ ເຄີຍໃຫ້ແກ່ກັນ

    ຈິດກະສັນແສນເສົ້າ ໂສກາສັນໂສກ
    ໂຣກຫົວໃຈເຮັ່ງຮ້ອນ ບໍ່ມີມື້ຊິຊ່ວາງຫາຍ

    ພັດແຕ່ ນ້ອງພາກອ້າຍ ນອນເສື່ອກະຄືໜາມ
    ຮອດຍາມກິນຍາມນອນ ຄິດເຫັນບໍ່ມີແລ້ວ
    ແນວວ່າໄກກັນເຍີ້ນ ໄກກັນແສນຍ່ານ
    ປານໃດນໍ້ ຊິໄດ້ ພໍ້ໜ້ານ້ອງ ຄອງຖ້າຢ້ານເປົ່າດາຽ.
  • ຄິດຮອດນ້ອງ ມິນອນເໜັ່ງໄສ(ໄສຍສ໌)ສນິດ
    ບາຫາກຮຳເພີງຄິດ ໄຄ່ຄວນເຫັນແຈ້ງ
    ສູຣຍະແສງແລງຄ້ອຽ ນຳຮອຽຟ້າຕ່ຳ
    ເມຄາດຳກ່ານສີ້ວ ທີວໄມ້ຫຼ່ຽມພູ

    ຝົນສົ່ງຍູ້ ຊູສາດກະດີດາຽ ນໍແມ່ນໍ
    ຢ້ານແຕ່ຫາຽເຫີນຫາ ຈາກລາໄລລ້າງ
    ອັນວ່າແນວຄອງສ້າງ ແປວທາງທີ່ເຄີຽກໍ່
    ຄຳມືຫາບໍ່ພໍ້ ກໍໄມ້ໄຜ່ສະບົງ ນັ້ນແລ້ວ
  • ຄິດຮອດນ້ອງ ຮ້ອນເຮັ່ງ ອົລລະຫົນ
    ຊອມໃຈຕົນ ສ່ຳສິຕາຽ ນຳນ້ອງ
    ໜີໄກຫ້ອງ ຫໍໂຮງ ແຮມຫ່າງ
    ຄອບວ່າເສິກໝ່າຽມ້າງ ຈວນໃກ້ ໝໍ່ເມືອງ
  • ຄິດຕໍ່ເຕື້ອງ ຄອຽຕອບ ເຕືອນຕົນ
    ອົດສາທົນທານຝຶກ ນຶກຣະວັງ ວອງໄວ້
    ແມ່ນວ່າພັຍ ພຍັນໜ້າ ອະຫັງການ ກ້ຳກ່ຽວ
    ບໍ່ລືມຫຼຽວສັ່ງເຈົ້າ ຈອມແກ້ວ ແຈ່ມໃຈ

    ຫອບຮັກໄວ້ ມ້ຽນໃສ່ໃນຈິຕ
    ພໍໄດ້ທວນຄວາມຄິດ ຄ່ຳຄືນ ຍາມລ້າ
    ຕາງໄດ້ຝັນເຫັນໜ້າ ມະໂນຫາ ຮຽງຮ່ວມ
    ຝາກເປັນຄວາມ ກາພກ້ອມ ກອນກ້ຽວສົ່ງມາ

    ບາດອ່ອນລ້າ ແຮງຫຼ່າທາງໃຈ
    ຍັງຈັກເປັນກະແຈໄຂ ເປີດທາງທະວານແຈ້ງ
    ຕາງເປັນແສງກະບອງໄຕ້ ແຍງໄຟ ໄດ້ຮູ້ຮຸ່ງ
    ຍາມຈູງແຂນເຂົ້າພາ ປາຖນາຊື່ນຊ້ອຽ ສຳອອຽເອື້ອນ ບາດຮ່ວມທາງ ນັ້ນແລ້ວ

    (ພຍັນໜ້າ = ໂພຍພັຍ ອັນຕະລາຽທາງໜ້າ, ອະຫັງກາຣ = ການຖືຕົວ ຄວາມທະນົງຕົວ, ກາພ = ຄຳຮ້ອຽກອງທີ່ແຕ່ງທຳນອງສັນທະລັກສນະ, ທວານ - ທະວານ = ປະຕູ ທາງ)
  • ຄິດຮອດພື້ນ ຄວາມເກົ່າເຄີຍຈາ
    ເຄີຍເອົາດວງມາລາ ຝາກນາງຊົມເອ້
    ຕິດສເນຜາງຮ້າຍ ໂຕຊາຍບໍ່ຢາກຕ່າວ
    ບາດວ່າຂ່າວເຫດຮ້ອນ ທາງບ້ານກໍຈົ່ມຫາ

    ເຖິງເວລາຊິໄກແລ້ວ ແນວໃຈຫາກຄິດຮ່ຳ
    ຂໍຝາກຄຳຕື່ມທ້າຍ ພາຍພີ້ໃຫ້ຄິດເຖິງ.
  • ຄິດຮອດຫຼາຍ ຢາກເຫັນໜ້າ ຜູ້ເຄິຽຈາຖາມຂ່າວ
    ເປັນຈັ່ງໃດນໍ້ສາວ ຍັງຢູ່ເນົາສຶບສ້າງ ທາງພຸ້ນບໍ່ຫ່ວງບາ

    ຫຼືວ່ານົງນາງຫຼ້າ ໄປເວົ້າຈາກັບຊາຍອື່ນ
    ປ່ອຍອ້າຍໃຫ້ສະອື້ນ ຢືນຮ້ອງຢູ່ຜູ້ດຽວ.
  • ຄຶດຮອດອ້າຽ ເຊົ້າສວາຽແລງຄ່ຳ
    ຝົນສິຮຳຟ້າສິແຈ້ງ ແລງເຊົ້າກະຈົ່ມຫາ
    ບຸນຜລາເຄີຽສ້າງ ຄືບໍ່ນຳທາງສ່ອງ ແດ່ນໍ
    ຫຼືໄປຈອບພໍ້ວໍ້ ຫາເຫຼັ້ນແຕ່ຜູ່ສາວ ນັ້ນລື
  • ຄຶດຮອດອ້າຽ ເຊົ້າສວາຽຕາເວັນສ່ອງ
    ບາດທາງກ້ຳຝ່າຽນ້ອງ ທຽວເຝົ້າແຕ່ຈົ່ມຫາ
  • ຄວາມທີ່ ຄຶດຮອດອ້າຽ ຫາກບໍ່ຕ່າງທາງອວນ
    ສຸດທີ່ທວນຄະນິງຫາ ຝາກນະພາເດືອນແຈ້ງ
    ແນມເອົາແສງຈັນຈ້າ ດາຣາແທນນ້ອງອຸ່ນ
    ແນວວ່າບຸນຫ່າງຮ້າງ ຜລາສ້າງຫ່າງໄກ.
  • ຄວາມທຸກມາແລ່ນຕ້ອງ ໃຫ້ໝອງໝົ່ນຕ້ອງທົນອຸກ ສາແລ້ວ
    ຊິນຊາຕາເຮົາທຸກ ໜ່າຍເດເພມ້າງ
    ທັງກັມວົນວຽນຕ້ອງ ຄວາມຈົນມາຜ່ານ
    ທາງລູງຕາແມ່ປ້າ ບໍ່ຫັນໜ້າມາຫຼ່ຳມອງ
    ທຸກຫຼາຍເດ້ພີ່ນ້ອງ ທ້ອງຖິ່ນຈັກກະວານ
    ຄຶດຢາກໄປຂໍທານ ແຕ່ບໍ່ຫານກະທຳໄດ້
    ເລີຽຈຳໃຈເປັນໜີ້ ຢືມສິນມາກ່ອນ
    ເພື່ອຄາຽຄວາມເດືອດຮ້ອນ ຕອນໜ້າຄ່ອຍຜ່ອນຄືນ
    ຕ້ອງອົດມື້ກິນມື້ ອົດສາບຶນ ອົດສາສູ້ ຢູ່ໄປບໍ່ໄດ້ໜ່າຽ
    ສູ້ຈົນຮອດມື້ຕາຽ ພຸ້ນລະເດີ້ພີ່ນ້ອງ ສິມີບໍ້ມື້ສິຣວຽ ພີ່ນ້ອງເອີ້ຽ
  • ຄວາມຜຍາ ອ້າຽເຕັມໂກນບັກຫອຽເດື່ອ
    ຖີ້ມໃສນ້ຳກະເຫຼືອ ຖີ້ມໃສເຮືອກະລົ້ນ
    ຖີ້ມໃສ່ຕົ້ນດອກໄມ້ ຫອມກຸ້ມຢູ່ສູ່ຍາມ.
  • ຄວາມອົດທົນປົນອົດກັ້ນ ບາກບັ່ນໃນທາງດີ
    ນີ້ແມ່ນແສງປະທີບທາງ ສ່ອງເຫັນທາງແກ້
    ຄັນມີໃຈແວລ້ຽວ ບໍ່ທົນໃຫ້ຮອດປ່ອງ
    ມີແຕ່ງໍຫຼ່ອງຫງ້ອງ ນຳຊ້ອງປ່ອງມະລາຍ
    ຄືດັ່ງເຕເມໃບ້ ບາກບັ່ນປະຊັນອຸກ
    ບໍ່ລຸກ ຕີງໄປໃສ ສິບຫົກປີຍັງທົນໄດ້
    ຂໍອົດທົນໄວ້ໃຫ້ ໃນໃຈສິບາກບັ່ນ
    ຄວາມໄຝ່ຝັນທີ່ຄາດໄວ້ ຄົງສິໄດ້ດັ່ງມະໂນ ນັ້ນແລ້ວ
  • ຄວາມຮັກ ແພງຖແລງເວົ້າ ທີ່ອ້າຍເອົາມາປຽບ
    ຫາກແມ່ນທຽບໃສ່ແລ້ວ ກະຄືແກ້ວສ່ອງໃຈ
    ຈາຄວາມໃນ ໄຂຄວາມຂ້ອງ ບໍ່ໝາຽປອງໄປເປັນອື່ນ
    ມີແຕ່ຫວັງພາກພື້ນ ມະໂນນ້ອມນັ່ງເນົາ

    ໝາຽເອົາຄວາມຈິງແຈ້ງ ຄຳຖແລງໃຫ້ນ້ອງອ່ານ
    ວ່າທາງໃນສອາດອ້ານ ຈິງແທ້ແນ່ຄື.
  • ຄວາມຮັກ ອ້າຽຕໍ່ນ້ອງ ກະຮູ້ຢູ່ເຕັມອົກ
    ຕັ້ງແຕ່ກົກສຸດປາຍ ບໍ່ໜ່າຽແໜງນາງນ້ອງ
    ເຖິງຊິມີເຄືອຂ້ອງ ກັ້ນຂວາງກໍຕາມແຕ່
    ຊິລ່ຳແລລ່ຳເວົ້າ ນຳເຈົ້າຢູ່ບໍ່ຖອຽ
  • ຄວາມຮັກມາແລ່ນກຸ້ມ ຄືກະຊຸ່ມງຸມກະທໍ
    ຄວາມຮັກມາພໍໆ ຄືກະທໍງຸມຮົ້ວ
    ຄືຂູລູນາງອົ້ວ ຜາແດງນາງໄອ່
    ຮັກຝ່າຽດຽວບໍ່ໄດ້ ໃຈທໍ້ບໍ່ສອອນ

    ມັກຮັກບໍ່ໄດ້ຊ້ອນ ນອນເສື່ອປານນອນໜາມ
    ເກີດສົງຄາມຫົວໃຈ ແມ່ນຜູ່ໃດຊິທົນໄດ້
    ແສນຊິເຮຮົນໄຫ້ ຢ້ານເຮໄປກະເຮເປົ່າ
    ແຫ່ງຄິດໄປໃຈແຫ່ງເສົ້າ ມັນຄາແຄ້ນຄັ່ງທວງ.
  • ຄວາມຮັກ ມາແລ່ນຕຸ້ມ ສເມີສຸ່ມງຸມຫົວ
    ຄວາມຮັກມາຮຽງຮໍ ສ່່ຳກະທໍງຸມໄວ້
    ມື້ໃດ ບໍ່ເຫັນໜ້າ ເຫັນຫຼັງຄາກະໄຄຢູ່
    ເຫັນແຕ່ ອູ່ແອ່ງນ້ຳ ເຮືອນຢ້າວກໍ່ອຸ່ນໃຈ.
  • ຄອງຄອຽເຈົ້າ ຄືກົບຂຽດຄອຽຝົນ
    ຄືຄົນຈົນຄອຽຣວຽ ຢ້ານແຕ່ຕາຽບໍ່ເຫັນຊ້ຳ.
  • ຄອງຄອຽເຈົ້າ ນານຫຼາຽຈົນວ່າເບື່ອ
    ຄວາມເວົ້າວ່າປີນີ້ ເຖິງແລ້ວວ່າປີຮື.
  • ຄອງຄອຽເຈົ້າ ຢູ່ຫົວນາຂອງເກົ່າ
    ນົກເຂົາຂັນແດດແດ້ ແຈນແວນຮ້ອງ ແຫ່ງຄຶດຫຼາຽ.
  • ຄວາມຮັກມາຫ່າງຮ້າງ ເປີດໜ່າຽແໜງໜີ
    ແສນໂສກີຣະທົມອຸກ ທຸກທໍຣະມານມ້າງ
    ຊາຽຍັງຄອຽຄຽງຂ້າງ ບໍ່ຫວັງວາງປະປ່ອຽ
    ຮັກບໍ່ເຄີຍຫງ່ຽງຄ້ອຽ ແພງສ້ອຽນາດນາງ.
  • ຄອງກິນນ້ອງຊ້າງ ສາມປີຂີ້ບໍ່ອອກ
    ຄອງເອົາລູກພະເຈົ້າ ເລີຽຊິເຖົ້າແກ່ຕາຽ.
  • ຄອງກິນນ້ອງຊ້າງ ສາມປີຂີ້ບໍ່ອອກ
    ອອກແຕ່ຂີ້ກຳພ້າ ສາມກ້ອນທໍ່ສາລາ.
  • ຄອງຄອຽເຈົ້າ ຢູ່ຫົວນາຂອງເກົ່າ
    ນົກເຂົາຂັນແຕດແຕ້ ແຈນແວນຮ້ອງ ແຫ່ງຄຶດຫຼາຽ.
  • ຄອງທັມ
    ຄົນເຮົານີ້ ຄຶດເອົາແຕ່ ທາງສິສຸກ
    ອັນໝູ່ ໂພຍພັຍທຸກ ບໍ່ຢາກມີ ມາໃກ້
    ແຕ່ບໍ່ເຄີຽ ໃສເຫຼື້ອມ ປະເທືອງທັມ ມາຄ້ຳແກ່ນ
    ຄິດແຕ່ແລ່ນຫຼີກເວັ້ນ ຫາເຫຼັ້ນ ກໍ່ແຕ່ເວຣ
    ຜົລການຄິດ ຫຼີກເວັ້ນ ເວຣພັຍ ຈຶ່ງໄດ້ລ່ວງ ເຂົ້າມາຫາ
    ຍ້ອນກໍ່ພັຍ ກັມມາ ຈຶ່ງທຸກຕຣົມ ໃຈຊ້ຳ

    ຈຶ່ງຂໍນຳ ເງື່ອນເຄົ້າ ຂອງດີເກົ່າ ທີ່ລືມຫຼົງ
    ຄືທັມອົງ ພຮະສັມມາ ເພີ່ນກ່າວສອນ ວອນຊີ້
    ທຸກຫຼືມີ ຕ້ອງຫັດໄວ້ ຕ້ອງຄອງໃຈ ຕັ້ງຕໍ່
    ພິນິຈທັມ ໃຫ້ຖືຂໍ້ ຈັ່ງພໍເວັ້ນ ຈາກໝູ່ເວຣ

    (ພິນິຈ = ພິເຄາະ ວິເຄາະ ພິດຈາຣະນາ ຕຣວດຕຣາ)