ໝວດທີ່ຂຶ້ນຕົ້ນດ້ວຽຕົວ "ຂ"

 

  1.  ຂໍໃຫ້ເປັນດັ່ງດ້າມ ດົງດອຽດຳໃຫຽ່
    ຊ້າງບໍ່ໄລ ເສືອບໍ່ຮ້າງ ພະນາງນ້ອງກະດັ່ງດຽວ
    ໃຫ້ອ້າຽທຽວທາງເສັ້ນ ສົມນາງຜູ້ຮູບຄ່ອງ
    ອ້າຽຢ່າໄລລະນ້ອງ ສເມີຫ້ອງຮ່ວມຫໍ..
    ຄັນອ້າຽຕົວະນາງຫຼ້າ ຜິດສັນຍາທີ່ອ້າຽວ່າ
    ໃຫ້ຟ້າຜ່າຫົວອ້າຽ ໃຫ້ໄຟໄໝ້ຢູ່ຢ່າເຊົາ

  2. ຂໍໂທດເດີ້ນ້ອງຫຼ້າ ຂັນວາຈາເວົ້າລ່າຽ
    ບໍ່ແມ່ນຊາຽກ່າຽກ້ຽວ ຈຶ່ງທຽວເວົ້າແລ່ນນຳ

  3. ຂໍໂທດເດີ້ນ້ອງຫຼ້າ ຂັນວາຈາເວົ້າລ່າຽ
    ບໍ່ແມ່ນຊາຍປາກກ້ຽງ ພຽງເວົ້າໃຫ້ມ່ວນຍິນ
    ບໍ່ຖວິນດອກຟ້າ ແນວເປັນກາດຳກ່ຳ
    ໄດ້ຄູຍນຳກະວ່າໂກ້ ອັກໂຂແລ້ວຝ່າຽພະອວນ.

  4. ຂໍຄວາມຮັກ ໄດ້ຜູກໝັ້ນ ຄືຈັ່ງພັນ ສາຽສິນຈ່ອງ
    ຜູກແຂນເອົາ ຊາວພີ່ນ້ອງ ນຳຄ້ອງ ໄວ້ຮ່ວມກັນ
    ເຮົາມາ ເຖິງບ່ອນບັ້ນ ເຖິງວັນ ຂື້ນປີໃໝ່
    ຂໍຄວາມສຸກສົດໃສ ຢູ່ໃນໃຈພີ່ນ້ອງ ເຮຮ້ອງ ໃຫ້ມ່ວນແຊວ
    ໝົດປີເກົ່າ ໄປແລ້ວ ໃຫ້ເໝີດແນວ ສີ້ນຄວາມທຸກ
    ແນວໃດສຸກ ທຸກຖ້ວນໜ້າ ຂໍໃຫ້ຟ້າ ເພີ່ນສົ່ງພອນ
    ຂໍຍົກພອນ ສເມີເກດ ມີເຫດຫຍັງ ໃຫ້ແພ້ວຜ່ານ
    ປະທານພອນຈາກຟ້າ ທຸກຖ້ວນໜ້າ ໃຫ້ຢູ່ເຢັນ
    ໃຫ້ເວັ້ນຈາກໂຣຄຮ້າຽ ທັງຮ່າງກາຽ ກະແຂງແກ່ງ
    ຄົນຮັກແພງທົ່ວລ້າ ເງິນຄຳຖ້າ ເບິ່ງບໍ່ເປັນ
    ແສງຕາເວັນ ສິລັບຟ້າ ແສງຫວນມາ ກະມື້ໃໝ່
    ຄິດປະສົງສິ່ງໃດ ຢູ່ໃນໃຈໝູ່ເຈົ້າ ຮຽມກະເວົ້າ ວ່າສົ່ງພອນ ພີ່ນ້ອງເອີ້ຽ.

  5. ຂໍຢອກເວົ້າ ພໍເອົາ ເປັນວາດວ່າ
    ຄຳຜຍາ ສົ່ງຊ້ອນ ກອນແກ້ ກາບກະວີ

  6. ບໍ່ຮ່ອນມີ ປະສົງຕັ້ງ ໂວຫັງ ລວງຫຼອກ
    ພຽງແຕ່ຢອກ ກ່າວຕ້ອຽ ເຕີມແຕ້ມ ຕື່ມຄຳ.

  7. ຂ້າຂໍ ກາບກ່າວໂນ້ມ ນ້ອມນ່ຽວກຽວຖະນັດ
    ຕາມພາສາຈາສັດ ຊື່ຕົງບໍ່ຫຼົງສ້ຽວ
    ບໍ່ໄດ້ທຽວມາເວົ້າ ເອົາຄຳຜູ່ດຽວຊອບ
    ມາປະກອບເຫດບ້ານ ການຫຍຸ້ງບໍ່ຮຸ່ງໃສ

    ເປັນຈັ່ງໃດ ເຮົາກໍລົງເຮືອແລ້ວ ລຳດຽວຢ່າແຕກແບ່ງ
    ໄປໃຫ້ສົມດັ່ງແມ້ງ ສະພັງມົ້ມຮົ່ມດິນ

    ຢ່າຟ້າວສີນເສັຽຊ້ຳ ຕັດຈຳຈົນໝົດຮາກ
    ຢ່າຟ້າວຖາກເປືອກຖິ້ມ ຖອນທື້ນເປົ່າແປນ
    ອັນສິບແສນໄໝກ້ຽວ ບໍ່ຄືກຽວນ້ອງພີ່
    ສາຍໃຍສາມັກຄີ ມັນຫາກໜຽວໜິ່ງແໜ້ນ ສະເມີແມ້ນຕ່າງໄໝ.

  8. ຂ້າຂໍ ອະທິຖານຕັ້ງ ຝັງຝາກພະໄມມິດ
    ພັນທະນັງນຳຕິດ ໝື່ນປີບໍ່ໄລນ້ອງ
    ພີ່ນີ້ຈົງຈິຕຂ້ອງ ໝາຽຕາຽເກີດຮ່ວມ
    ຂໍຢ່າພາພະລາດແຄ້ວ ຄຳໝັ້ນຂອດສານ ນ້ອງເອີ້ຽ.

  9. ຂ້າຂໍ ອວຽພອນໃຫ້ ໄດ້ດີ ທຸກຝ່າຽ
    ມີເງິນຄຳຫຼາຽໆ ຊັພສົມບັຕ ມາກລົ້ນ ໃຫ້ຄົນໄດ້ ຍົກຍໍ
    ການຄອງເຮືອນ ກະໃຫ້ພໍ້ ສຸກຍິ່ງ ທະວີຄູນ
    ຢ່າໄດ້ສູນ ເສັຽຊັພ ອັບຈົນ ໃຫ້ຄົນເຍີ້ຽ
    ໃຫ້ໄດ້ ເຂີຽ ໄດ້ ໃພ້ ເປັນຄົນດີ ຜູ່ປະເສີດ
    ໃຫ້ເພິ່ນ ເລີດທຸກດ້ານ ຄູນແທ້ ຄູ່ສູ່ແນວ ນັ້ນເນີ

  10. ຂັນຕີຕັ້ງ ສັຈຈັງໝັ້ນທ່ຽງ
    ບໍ່ໄດ້ຄຶດບ່ຽງລ້ຽວ ລວງລໍ້ຫຼອກໃຜ
    ປານໃດນໍ້ ຊີ່ໄດ້ຈູງແຂນເຂົ້າ ພາຂວັນປ້ອນໄຂ່ໜ່ວຽ
    ມືຂວາປ້ອນໄຂ່ອ້າຽ ມືຊ້າຽປ້ອນໄຂນາງ.

  11. ຂົມຜັກ ຫຼືຂົມຫຍ້າ ຂົມຂີ້ກາມັນກືນຍາກ
    ຄັນແມ່ນຂົມຂີ້ເພັ້ຽ ຊິກິນກ້ຽງບໍ່ເຫຼືອ.

  12. ຂ້ອຽນີ້ ຄົນຂີ້ໄຮ້ ຄົນເກກາງກາດ
    ຄືດັ່ງ ຝາກກະຕາດໄວ້ ກາງບ້ານ ເກືອກຂີ່ດິນ ນັ້ນແລ້ວ.

  13. ຂ້ອຽນີ້ ບໍ່ໄດ້ ໂສດາດ້ວຽ ນຳຂະບວນ ໝາກພ້າວແກ່
    ໝາກພ້າວອ່ອນ ມີບໍ່ແພ້ ຊິຟັນເລື້ອຽ ເກື່ອຽລົງ.

  14. ຂ້ອຽຮັກເຈົ້າ ຮັກຫຼາຽສ່ຳກະຕ່າ
    ຮັກພໍ່ແມ່ສ່ຳກະເປ້ ເມືອງບ້ານສ່ຳກະບຸງ.

  15. ຂອບໃຈ ຫຼາຽເດີ້ຫຼ້າ ທີ່ອຳຄາບໍ່ລືມພີ່
    ຕັ້ງແຕ່ ຊາຕກ່ອນກີ້ ຄືສິໄດ້ຮ່ວມຮຽງ
    ອັນວ່າ ຖຽງນານ້ອຽ ຍັງຄອຽນາງ ມາເນົາຢູ່
    ອູ່ກະຜູກອ້ອນຕ້ອນ ຄອຽນ້ອງແກວ່ງໄກວ
    ເປັນຈັ່ງໃດນໍ້ຫຼ້າ ອຳຄານ້ອງຂອງພີ່
    ຍັງຢູ່ດີບໍ່ຫຼ້າ ຢ່າໃຫ້ອ້າຽດອກຄຶດນຳ

  16. ຂອບໃຈຫຼາຽເດີ້ອ້າຽ ນ້ອງບໍ່ວາຽສິຄຶດຮ່ຳ
    ໂຕຄົນດຽວຕ້ອງມາກຳ ພາຣະມັນໜັກອິ້ງ ຣຳພຶງແທ້ແລ້ວແຕ່ເວຣ
    ເຫັນຄົນອື່ນມີສຸກແທ້ ແນເບິ່ງໂຕບໍ່ຄືເພິ່ນ
    ດຽວກະຂາດດຽວກະເຂີນ ເປັນຢູ່ພໍສ່ຳນີ້ ວິທີແກ້ຫາກແມ່ນຕັນ ອ້າຽເອີ້ຽ

  17. ຂອບໃຈໃນຄຳຍ້ອງ
    ສິບຄຳເວົ້າ-ຊາວຄຳຍ້ອງ ປານໂສ້ທອງມາຄ້ອງພາດ
    ປານຝົນຢາດຍົດຍ້ອຽ ຮຳແລ້ງຖ້າແຂ່ງຝົນ
    ດວງກະມົນຊັນຊູ້ ເພີ່ນອິດູ-ຫຼູໂຕນຊາຕ
    ຈັ່ງໄດ້ວາດກ່າວຂໍ້ ຍໍຍ້ອງສ່ອງຖແລງ ແທ້ໄດ໋
    ພີ່ນ້ອງເອີ້ຽ... ໄທເມືອງໄຊ ຄົນໜ້ານ້ອຽ ຕ້ອຽຕ່ຳກະທຳການ
    ອາຈານທັງຄູສອນ ທອດວິຊາ ຈັ່ງພໍປື້ມ
    ອາສັຍຢືມພຸ້ນພີ້ ທັງອາລີຂໍຜູ່ລື່ນ
    ເອົາພຽນບືນຕໍ່ຕັ້ງ ຫັດສ້າງໃສ່ຕົນ
    ຂໍດູໂຕນຍັງນ້ອງ ຜູ່ປອງແຕ່ງແປງຜຍາ ແນ່ທ້ອນ
    ຫຼອນວ່າຈາຜິດຄອງ ປ່ອງໂປໂບຮານເວົ້າ
    ຂໍໃຫ້ເມທີເຖົ້າ ຊາວຄູບາໂປຣດສອນສັ່ງ
    ຍ້ອນຊາຽຍັງໜຸ່ມນ້ອຽ ຜຍາໜ້ອຽບໍ່ເຫຼື້ອມຄົມ...ແທ້ແລ້ວ