ໝວດທີ່ຂຶ້ນຕົ້ນດ້ວຽຕົວ "ກ"

 

  1. ການທີ່ມາມື້ນີ້...
    ຄວາມກົກ ກໍ່ວ່າຢາກໄດ້ ຝ້າຽ ຄວາມປາຽ ກໍ່ວ່າຢາກໄດ້ ລູກສາວເພີ່ນ
    ເຈົ້າຜູ້ຂັນໝາກແກ້ວ ລາຍເຄືອດອກຜັກແວ່ນ
    ຊິໄປຕັ້ງແຫ່ງຫ້ອງ ຢູ່ຕີນສ້ວມຜູ່ໃດ.

  2. ການນັບຈອກເຫຼົ້າ
    ຈອກໜຶ່ງ ເອັນຄໍພືງ ຍັງບໍ່ທັນປາກ
    ຈອກສອງ ສຽງກະຊາກ ຜິດຈາກສຳນວນ
    ຈອກສາມ ຊວນພໍ່ເຖົ້າ ເວົ້າວ່າສະຫາຽ
    ຈອກສີ່ ຊວນເຈົ້ານາຽ ກາຽມາເປັນມິຕ
    ຈອກຫ້າ ເຫັນຄູບາ ຄິດວ່າແມ່ນຈົວນ້ອຽ
    ຈອກຫົກ ປ້າໃຫຍ່ ປ້ານ້ອຽ ວ່າແມ່ນເມັຽຕົນ
    ຈອກເຈັດ ເຫັນຄົນກາຽ ໄປມາຮ້ອງໃສ່
    ຈອກແປດ ເຫັນເປັດໄກ່ ວ່າແມ່ນໝູໝາ
    ຈອກເກົ້າ ໃບຫູຊາ ໜ້າຕາຄຽດເຄັ່ງ
    ຈອກສິບ ເວົ້າເປັ້ງເປັ້ງ ຈັກກູຈັກມຶງ
    ຈອກສິດເອັດ ບໍ່ເວົ້າເຖີງ ກໍ່ຫາກສິຮູ້ ນັ້ນແລ

  3. ການນັບຈອກເຫຼົ້າ
    ຈອກໜຶ່ງ ເອັນຄໍພືງ ຍັງບໍ່ທັນປາກ
    ຈອກສອງ ສຽງກະຊາກ ຜິດຈາກສຳນວນ
    ຈອກສາມ ໃຜບໍ່ຖາມກໍ່ປາກ
    ຈອກສີ່ ຫຼົງພີ່ຫຼົງນ້ອງ
    ຈອກຫ້າ ປາກກ້າຄໍແຂງ
    ຈອກຫົກ ຈົກພຸ້ນ ຈົກພີ້
    ຈອກເຈັດ ເຊັດຊ້າຽ ເຊັດຂວາ
    ຈອກແປດ ຟ້ອນຕາກແດດ ກໍ່ວ່າຝົນລີນ
    ຈອກເກົ້າ ເຂົ້າຢູ່ເລົ້າກໍ່ມາຈ່າວຂາຍ
    ຈອກສິບ ລິບພຸ້ນລິບພີ້

  4. ກາລະນັບມື້ສ້ວຽ (ຈາກເທວະດາສອນໂລກ)
    ກາລະນັບມື້ສ້ວຽ ງົມງວຽເປັນອັນຕ່າງ
    ພຣະອົງ ເທເທສໄວ້ ພາຽຊ້ອຽສາສນາ ເຈົ້າເອີຽ
    ຝູງໝູຍິງຊາຽສ້ວຽ ສາມສິບປີມີລູກອ່ອນ ລືແລ້ວ
    ນັກປຣາດຖົມແມ່ນ້ຳ ນະທີກວ້າງຂາດເຂີນ
    ຜູ່ເພິ່ນ ສັງຄະເຈົ້າ ຊົງທັມໃນພຣະສູຕ ກໍ່ດີຖ້ອນ
    ຍັງເລົ່າປົງຈ່າຽຊື້ ເງິນຄວ້າງຄົ່ວຂາຽ
    ຝູງໝູ່ໂຈຣາໄດ້ ຊາຽຄຳມີຄວີ່ ກໍ່ມີ
    ນັກປຣາດເປັນງ້ວນງົ້ວ ຖືກະເບື້ອງຄວ່າຂໍ
    ຄົນຫຼັກສິເປັນຄົນໃບ້ ໃຈເບົາຄຶດບໍ່ຖືກ ເສັຽແລ້ວ
    ຫີນແຫ່ໄຫຼລ່ອງແກ້ງ ໂຮຮ້ອງສນັ່ນເມືອງ
    ກົບຂຽດມາອ່າວຮ້ອງ ປະສົງອ່ານໂຄງສາຣ
    ຝູງໝູ່ງູເພົາພິດ ເງືອກກົວເກງຢ້ານ

    ອັນວ່າ ສາລາກ້ອມ ໄຫຼນອງໃນແມ່ ນະທີນັ້ນ
    ປາບຶກ ຂື້ນຢູ່ລີ້ ປາຽໄມ້ດັ່ງແລນ
    ປູປາຮູ້ ເປີດນ້ຳ ແໜງໜ່າຽ  ວາຣີ
    ເຂົາກໍ່ແຍງພູຜາ ເຖື່ອນພະນາ ເນົາຄ້າງ
    ຝູງໝູ່ຍາງຂາວກົ້ວ ແກມຫົງ ຫົວມ່ວນ
    ແມ່ນວ່າ ອູ໋ແອ່ງນ້ຳ ໝາງນ້ຳວ່າສິໜີ
    ອ່ຽນກໍ່ມາເປີດນ້ຳ ແໜງໜ່າຽວັງຕົມ
    ເຂົາກໍ່ແປງຮວງຮັງ ຢູ່ເທິງປາຽໄມ້
    ມາລາຮ້າງ ຮາມສູນເສັຽກິ່ນ
    ຫົງຄຳກົ້ມກາບໄຫວ້ ປະນົມນ້ອມໝູ່ກາ
    ໝາກພ້າວ ມາເປີດຕົ້ນ ປົບປ່ວງລົງດິນ
    ຝູງໝູ່ກວາງຟານແໜງ ໜ່າຽຄົງຄາເວັ້ນ
    ຄົກມອງຮ້າງ ໝາງເໝັນເຂົ້າເປືອກ ເສັຽແລ້ວ

    ກະຊ້າມາເປີດເບັ້ຽ ແຖມຂື້ນໃສ່ໃນ
    ແມ່ນວ່າ... ຈວງຈັນຫຼ້າງ ຂອງແພງປະດັບເພສ ສຳເພົາພຸ້ນ
    ບັດນີ້ ມາຂົ່ວຫ້ອຽ ຫູກະຊ້າທ່ຽວຂາຽ
    ອັນມະນີນິລແກ້ວ ກາຽເປັນຫີນແຫ່ ແລ້ວນໍ
    ຂອນດອກເນົາຢູ່ນ້ຳ ເກີດເປັນຕົ້ນປົ່ງໃບ
    ມະນີ ນິລ ເສົ້າ ເສັຽແສງສັພພະຮູບ
    ຫີນແຫ່ກັບ ເປັນໜ່ວຽແກ້ວ ພີລາເຂັ້ມຄ່າແພງ....
    ເປີດອ່ານພໍ້ ຄຳຜຍາເພີ່ນມາວ່າ
    ແກ້ວຣຸ້ນຫຼ້າ ຈາຣໄວ້ຄ່າແພງ
    ສແດງບອກບ່ອນບັ້ນ ຄຳຄົມຮີດເກົ່າ
    ພາໃຫ້ຕື່ນເຣື່ອງເວົ້າ ເຫັນເຄົ້າຮີດເດີມ
    ພໍໄດ້ເປັນແຫ່ງເພີ້ມ ເຫັນທີທ່່າ ໃນຄຳກອນ
    ມັນຫາກສອນໃຫ້ໃຈ ລ່ວງຄືນຫາເຄົ້າ
    ທຳນອງລາວເຮົາພີ້ ເປັນຈິງຄັກແນ່
    ໃຫ້ເຈົ້າແວເພື່ອໄດ້ ຈາຣໄວ້ແຕ່ງເຕີມ
    ຣາຊະສາສຕຣ໌ ນັ້ນເຣີ້ມ ບອກກ່າວໃນຄະດີ
    ມີຫຼາຽແນວຄວນມອງ ໄຕ່ຕອງດູໄວ້
    ເຄີຽເຫັນຫຼາຽຫົວຂໍ້ ຈາຣນຳໄວ້ແມ່ນ
    ແມ້ແຕ່ຈູດຕົ້ນໄມ້ ໃບຫຽ້າຍັງວ່າ...ສອນ

    ເພິ່ນຫາກວ່າ...

    ໄຟຊາຕບໍ່ຂາດບັ້ນ ບໍ່ມົວມອດເໝີດແສງ ດອກນາ
    ປະຊາແພງຄືຕາ ຣົຈຈະນາຂານໄວ້
    ໃສ່ໃບລານຍໍໃຫ້ ຫໍໄຕຣ ໄຂບ່ອນ
    ມັດແນບ ພັນ ຜູກຊ້ອນ ຊອນຊັ້ນ ຊອກ ຮຽນ ແທ້ແລ້ວ
    ໃຈປະສົງຕໍ່ຕັ້ງ ໃຈຍັງຄອຽຖ້າເບິ່ງ
    ຢາກສິເຫັນຫວ່າງຂໍ້ ພໍໃຫ້ໄດ້ອ່ານຖແລງ
    ຂໍໃຫ້ແກ້ວຣຸ້ນຫຼ້າ ຄືນມາຈາຖແລງກ່າວ
    ສຳນຽງເຮົາຕໍ່ແຕ້ມ ຄຳຄົ້ນ ຄ່າແພງ...


  5. ກັບແລ້ວແກ້ ຣະວັງແນ່ເດີ້ງູຂຽວ
    ດຽວສິຈົກກິນຕັບ ງັບໂຕໄປກິນພ້ອມ
    ທຽວຈອບຊອມມາຫຼາຽມື້ ຊົງຄືເວົ້າມ່ວນ
    ຈັກຍາມໃດຈັ່ງສິມ້ວນ ສຳນວນທ້າວບ່າວນາງ

    ຄັນມາເຫັນປາບ້ອນ ຄືໜອນ ແຫສິຫວ່ານ
    ໝານບໍ່ໝານກະຊ່າງຂ້ອງ ທາງມອງ ອ້າຽສິໃສ່
    ປາຄໍ່ໃຫຽ່ຫຼືປາຄ້າວ ປານາງສາວ ກະບໍ່ຈົ່ງ
    ໂສໄດ້ລົງປຽກນ້ຳ ສິສະຊ້ຳຈັ່ງຕ່າວເມືອ.


  6. ຫຼັກການ ພິທີກອນ

    ກົດແຫ່ງ ການປາກເວົ້າ ເອົາເຮື່ອງພິທີກອນ
    ເປັນຄຳ ສອນຍັງຫຼັກ ຊັກຈູງໃຫ້ສູງໄດ້
    ການກະ ຕຣຽມນັ້ນໃຫ້ ພ້ອມພຽງແລະຖ້ວນຖີ່
    ຊ້ອມໃຫ້ ດີຣຽບຣ້ອຽ ຄອຽຖ້ອງຢ່າໃຫ້ລືມ

    ທ່າທາງ ຢ່າກະລື້ມ ໃຫ້ສງ່າຣາສີ
    ມີໜ້າຕາສຸຂຸມ ຕື່ມພລັງຂັງຫຸ້ມ
    ທີ່ປະຊຸມຄົນລົ້ນ ຢ່າວົກວົນເວລາກ່າວ
    ເຣີ້ມຕົ້ນ ໃຫ້ໂນ້ມນ້າວ ສະຫາວນັ້ນ ຢ່າໃຫ້ມີ

    ເຣື່ອງຣາວດີເດັ່ນນັ້ນ ໃຫ້ກະຊັບຈັບໃຈ
    ນັຍຕາ ຈັບຄົນຟັງ ຍັ່ງໃຈໃຫ້ເຖິງຫ້ອງ
    ສຽງດັງກ້ອງ ໃຫ້ພໍຖອງເຖີງຖ່ອງ
    ຢ່າປອງມີ "ເອີ້...ອ້າ" ພາສານັ້ນບໍ່ຈເຣີນ

    ຢ່າໄດ້ເຜີນເມີນລ້າ ເບິ່ງເວລາໃຫ້ພໍຄົບ
    ສະຣຸປຈົບຈັບໃຈ ເນື້ອໃນໃຫ້ໃສແຈ້ງ
    ແຍງທາງຂວາທາງຊ້າຽ ທຣົງສະບາຽ ແລ້ວສງ່າ
    ໜ້າຕາ ທັງກິຣິຍາວາດເວົ້າ ໃຫ້ຍີ້ມແຍ້ມແຈ່ມໃສ (ຕລອດເວລາ) ນັ້ນເນີ

  7. ກໍຍັງ ສຸກຂີໜັ້ນ ກໍຍັງຝັນຜັນແຜ່
    ຫຼືຄາແຕ່ຫ່ວງແຟນ ຄາແຕ່ແຫນຫ່ວງຊູ້ ຊິນອນຄູ້ຢູ່ບໍ່ຝັນ.

  8. ກໍຍັງ ສຸກສເມີໝັ້ນ ສເມີມັນເຄືອເກົ່າ
    ຫຼືເຈົ້າເຈັບປ່ວຽໄຂ້ ໃນເນື້ອບໍ່ສບາຍ

  9. ກໍຍັງ ສຸກສເມີໝັ້ນ ສເມີມັນເຄືອເກົ່າ
    ຫຼືວ່າຂຸຫຼົ່ນຂວັ້ນ ຮົມຮ້ອນທົ່ວຄີງ

  10. ກໍຍັງ ສຸກສເມີໝັ້ນ ສເມີມັນເຄືອເກົ່າ
    ທັງພໍ່ແມ່ພີ່ນ້ອງ ສຳບາຽພ້ອມຄູ່ຊູ່ຄົນ ບໍ່ເດ
  1. ກຳເນີດຂອງ ຜຍາ

    ມື້ນີ້ ຮຽມຈັກໄຂ ຂານຂໍ້ ກົກກໍ ຜຍາຫຍ່ອຽ
    ຄວາມເປັນມາ ແຕ່ເຄົ້າ ຄົນເຖົ້າວ່າມາ
    ເພິ່ນວ່າຄວາມ ຜຍານີ້ ເກີດຢູ່ ຫຼວງພຣະບາງ
    ທ້າວປາງຄຳເປັນ ຄົນຈົດ ແຕ່ງໂຄງ ນິທານກ້ອມ
    ມັນຫາກ ມີຫຼາຽບັ້ນ ໂຄງ ສັນ ກາບ ແຕ່ງ
    ວັນນະກັມ ພື້ນບ້ານ ຈາຣໄວ້ຫຼາກຫຼາຽ
    ຈຸດເຣີ້ມຕົ້ນ ປຣາດໃຫຍ່ຢູ່ເມືອງເຂມ (ສັນນິຖານວ່າແມ່ນ ເຂັມມະຣາດ ໄທຍ໌)
    ທ້າວປາງຄຳ ເປັນຄົນປັນຍາໃສ ລ່ຽນໄຫຼປານນ້ຳ
    ຫາຄວາມເວົ້າ ບົດກອນມາຜູກ
    ສັມຜັດໃນ-ນອກລ້ວນ ກະບວນເວົ້າ ຄ່ອງຄວາມ
    ປາງນັ້ນ ພູບາລທ້າວ ພະຍາເມືອງ ຮູ້ຮ່ອມ
    ຈຶ່ງໄດ້ນຳ ບ່າວທ້າວ ຄືນເຂົ້າສູ່ເມືອງ
    ຕົກແຕ່ງທ້າວ ປາງຄຳເປັນປຣາດ
    ຣາຊະຄູ ຜູ້ຕົ້ນ ຈາຣແຕ້ມ ແຕ່ງກອນ
    ເປັນທີ່ຮູ້ ກັນທົ່ວເມືອງຫຼວງ
    ເຫັນນຳກັນ ຍົກຍໍບາທ້າວ
    ຄາວນັ້ນ ຍັງມີສັມມະເນຣນ້ອຽ ນາມຊື່ບໍ່ປາກົດ
    ລາສິກຂາ ເຄື່ອງທົງເຫຼືອງຍ້ອມ
    ເປັນຊຽງນ້ອຽ ປັນຍາໄຫຼຫຼ່ຽນ
    ກິຕຕິສັພ ບ່າວທ້າວ ດັງກ້ອງ ສນັ່ນເມືອງ
    ພຣະທ່ອນໄທ້ ນຳສູ່ເມືອງຫຼວງ
    ເປັນກະວີນຳກັນ ຮ່ວມສມັຍປາງນັ້ນ
    ອັນນີ້ ຮຽມຫາກຫວນເຫັນຮູ້ ຕ່ຳຣາໄດ້ ເປີດອ່ານ
    ຈັ່ງໄດ້ຂຽນ ຂີດແຕ້ມ ມາເວົ້າສູ່ຟັງ ນີ້ແລ້ວ.

  2. ກ້ຽງແຕ່ ປາກເຈົ້າເວົ້າ ໃຈເຈົ້າເລົ່າໂງຄົດ
    ໃຈຂົດໄປໂງມາ ປຽບດັ່ງງູລອຽນ້ຳ.

  3. ກ້ຽງແຕ່ນອກທາງໃຈເປັນໝາກເດື່ອ
    ຫວານແຕ່ທາງນອກເນື້ອ ໃນສົ້ມດັ່ງໜາກນາວ

  4. ກ້ຽງແຕ່ນອກທາງໃຈເປັນໝາກເດື່ອ
    ເຈົ້ານັ້ນກ້ຽງປາກບັ້ງ ຂັງຂໍ້ປາກກະທໍ.

  5. ກ້ຽງຮອດໃນ ໃສຮອດກະດູກ
    ກ້ຽງຮອດລູກອ່ອນນ້ອຽ ຫຼານຊິຫ້ອຽກະບໍ່ມີ.

  6. ກ້ຽງຮອດບ້ານ ເຮືອຊານກໍແປນເປົ່າ
    ມີແຕ່ບ່ອນສິໃຫ້ເຈົ້າ ມາຊົ້ນຮົ່ມເງົາ

  7. ກ້ຽງອອດຫຼອດ ປອດອ້ອຽຊ້ອຽ ສເມີດັ່ງຕອງຕັດ
    ຜັດແຕ່ເປັນຊາຍມາ ກະບໍ່ມີເມັຽຊ້ອນ
    ຜັດແຕ່ເປັນກໍຂື້ນ ບໍ່ມີເຄືອສິກ້ຽວກຸ່ມ
    ຜັດແຕ່ເປັນພຸ່ມໄມ້ ເຄືອສິກ້ຽວກະບໍ່ມີ