ຄຳກ່າວຜູກແຂນ ບ່າວສາວ ໃນພິທີສົມຣົດ

ຄຳກ່າວຜູກແຂນ ບ່າວສາວ ໃນພິທີສົມຣົດ

ຄຳກ່າວຜູກແຂນ ບ່າວສາວ ໃນພິທີສົມຣົດ

  1. ອົມສຣີ.. ອົມສຣີ ຝ້າຽເສັ້ນນີ້ແມ່ນຝ້າຽພຣະຍາແຖນ
    ປ່ອນແຂນມາພໍ່ຊິຜູກ ເອົາເປັນລູກຂອງ ພຣະ ຍາ
    ຜູກເບື້ອງຊ້າຽຂວັນມາ ຜູກເບື້ອງຂວາຂວັນເຈົ້າຢູ່ ໃຫ້ເປັນຄູ່ທຽມສອງ
    ໃຫ້ປອງດອງຮັກຫໍ່ ຢູ່ນຳພໍ່ຄູນເຮືອນ

    ຫຼາຽປີເດືອນໃຫ້ເຈົ້າໄດ້ລູກນ້ອຽ ທັ້ງຂ້ອຽຂ້າແລະເງິນຄຳ
    ມີຜູ້ນຳເງິນລ້ານ ມີຜູ້ໃຫ້ບ້ານ ຫຼັງງາມ
    ມີນາທາມພັນໄຮ່ ມີໝູໝາເປັດໄກ່ ຊ້າງມ້າແລະງົວຄວາຽ
    ນອນຕື່ນສວາຽ ໃຫ້ເຈົ້າໄດ້ເງິນລ້ານ ອອກຈາກບ້ານຢ່າມີສັຕຕຣູ

    ໃຫ້ມີຜູ່ຊ່ອຽຊູຂົນຫາບ ມີໂຊຄລາພເນືອງນອງ
    ມີເຂົ້າຂອງເຕັມອັ່ງ ໃຫ້ເຈົ້າໄດ້ນັ່ງເປັນ ເສຖຖີ
    ສອງສາມີຈົ່ງຄວນຄູ່ ໃຫ້ທັ້ງສອງເຈົ້າຢູ່ຖາວອນ
    ຍາມກິນນອນຢ່າອຶດຢາກ ຂອງເຫຼືອປາກໂພຊນະ ອາຫາຮ

    ມີລູກຫຼານເຕັມເຫຼືອຫຼາກ ຢ່າອຶດຢາກແນວໃດ
    ໃຫ້ໄປໄວມາຄ່ອງ ໃຫ້ໄດ້ທ່ອງສິລທັມ
    ຈົ່ມມ່ຳໆ ໄຫວ້ພຣະເຈົ້າ ໃຫ້ເປັນພໍ່ເຖົ້າແມ່ເຖົ້າທັງສອງ
    ໃຫ້ໄດ້ຖືໄມ້ເທົ້າຍອດທອງ ຖືກະບອງຍອດເພັຊ

    ຢ່າໄດ້ບົກເປັນຫາດ ຢ່າໄດ້ຂາດເຂີນເປັນວັງ
    ໃຫ້ສົມຫວັງເຫຼືອເຫຕ ໃຫ້ເປັນດັ່ງພຣະເວສສັນດອນ
    ຄົນອອນຊອນເຫຼືອຫຼາກ ມີລູກມາກປານກະປູຍາມນາ
    ອຸ ອະ ມຸ ມະ ມູລມາ ສະວາຫົມຯ

ອວຽພອນຄົນທີ່ມາໃນງານ

  1. ຂ້າຂໍນົມນອບໄຫວ້ ປະທານໃຫຽ່ໃນງານ
    ສຸຂສຳຣານສູ່ຄົນ ທີ່ສົນໃຈມາງານນີ້
    ວັນທີ່ມີງານລ້ຽງ ສັງສັນວັນງານແຕ່ງ
    ນ້້ອງຄຳແພງຮັກກັນໝັ້ນ ພົວພັນໄວ້ດ້ວຽຮັກຫຼາຽ

    ຂໍສແດງຄວາມດີໃຈດ້ວຽ ເຈົ້າສາວສວຽເຈົ້າບ່າວຫຼໍ່
    ເໝາະສົມກັນກະດໍ້ ຊ່າງຫາພໍ້ກະຊ່າງເປັນ
    ຂ້ອຽຢາກເຫັນໝູ່ເຈົ້າ ມີລູກຫຼານຫຼານເຫຼັນຫຼ່ອນ
    ຂ້ອຽອອນຊອນລ່ວງໜ້າ ວ່າລູກເຈົ້າຕ້ອງຫຼໍ່ສວຽ

    ຈິງຂໍອວຽພອນໃຫ້ ໄດ້ມີເປັນທຸກສິ່ງຢ່າງ
    ຕາມທີ່ຫວັງວາດໄວ້ ສົມໃຈເຈົ້າໃຝ່ຝັນ
    ມີລູກຫຼານໄວຟ້າວ ເປັນບ່າວສາວເຈົ້າໄດ້ເພິ່ງ
    ໄທບ້ານໄດ້ຍົກຍ້ອງ ພີ່ນ້ອງໄດ້ເພິ່ງພາ...

    ໃຫ້ເຈົ້າມີອາຍຸໝັ້ນ ຂວັຍຍືນຍາວຍິ່ງ
    ສິ່ງໃດດີໃຫ້ຫຼັ່ງເຂົ້າ ສິ່ງໃດຮ້າຽໃຫ້ຫຼັ່ງໜີ
    ເປັນເສຖຖີເງິນລ້ານ ການງານໃຫ້ລຸຫຼັ່ງ
    ຍ່າງໄປໃສໄທບ້ານຫຸ້ມ ແຫ່ແຫນເຈົ້າດ້ວຽຮັກແພງ

    ຄວາມແຂງແຮງຄົງໝັ້ນ ບໍ່ມີວັນແປປ່ຽນ
    ຜີວນວນນຽນປານຍັງນ້ອຽ ມີຂ້ອຽຂ້າຊ່ອຽແຮງ
    ຮັກແພງຮອດມື້ເຖົ້າ ດູແລກັນຮອດມື້ແກ່
    ເປັນແມ່ຕູ້ພໍ່ຕູ້ ຊູໄມ້ເທົ້າຊອຽຍ່າງເດີນ ພຸ້ນລະເດີ້...

ຄຳອວຽພອນ ຜູກແຂນເຈົ້າບ່າວ

  1. ຮ້າຍກວາດໜີ ຮ້າຍກວາດໜີ ຮ້າຍກວາດໜີ
    ດີກວາດເຂົ້າ ດີກວາດເຂົ້າ ດີກວາດເຂົ້າ ຂວັນເຈົ້າໃຫ້ຫຼັ່ງໂຮມ ເດີ້

    ສຣີ ສຣີ ສຣີ ສິທທິພະພອນ ບໍວອນລ້ຳເລີດ ຝ້າຽແກ້ວເກີດເມືອງສວັນ
    ປັ່ນລົງມາໃຫ້ຜູ້ຂ້າ ຜູກແຂນເຈົ້າບ່າວ ເພີ່ນໄດ້ແຕ່ງງານກັບເຈົ້າສາວ ໃນວັນນີ້
    ມາເຍີ້ຂວັນເອີ້ຽ ຂວັນເຈົ້າມາຮອດແລ້ວໃຫ້ເຈົ້າຢູ່ສວັດດີ ມີສຸກຂະພາບເຂັ້ມແຂງ ພໍ່ເຖົ້າແມ່ເຖົ້າຮັກແພງຄືລູກຄືຫຼານ

    ພີ່ນ້ອງບໍຣິວານຮັັກແພງແຫ່ລ້ອມ
    ເມັຽອ່ອນນ້ອມເອົາອົກເອົາໃຈ ໄດ້ລູກຊາຍຍິງ ດັ່ງປຣາຖນາ
    ການງານໃຫ້ກ້າວໜ້າ ການຄ້າໃຫ້ຮູ່ງເຮືອງ
    ການເມືອງໃຫ້ລືລັ່ນ ການບ້ານໃຫ້ຂຍັນ

    ຜີວພັນໃຫ້ຜ່ອງໃສ ໃຫ້ເຈົ້າຮັ່ງເຈົ້າມີ ໃຫ້ເຈົ້າໄດ້ເປັນເສຖີ
    ເປັນມະຫາເສຖີ ເປັນລູູກເຂີຽທີ່ດີເປັນຜົວທີ່ດີ ເປັນພໍ່ທີ່ດີ ເດີ້
    ປະສິທທິ ເຕໂຊ ປະສິທທິ ມັງຄະໂລ ມະຫາຊັຍໂຍ ....ພ້ຽງ

ຄຳອວຽພອນ ຜູກແຂນເຈົ້າສາວ

  1. ຮ້າຽກວາດໜີ ໆ ໆ ດີກວາດເຂົ້າ ໆ ໆ ຂວັນເຈົ້າໃຫ້ຫຼັ່ງໂຮມ ເດີ້ ...
    ສຣີ ສຣີ ສຣີ ສິທທິພຣະພອນ ບໍວອນລ້ຳເລີດ ຝ້າຽແກ້ວເກີດເມືອງສວັນ
    ປັນລົງມາໃຫ້ຜູ່ຂ້າ ຜູກແຂນເຈົ້າສາວ ໃນມື້ນີ້ ວັນນີ້
    ມາເຢີ້ຂວັນເອີ້ຽ... ຂວັນເຈົ້າມາຮອດແລ້ວໃຫ້ ເຈົ້າຢູ່ສວັດສະດີ

    ມີສຸຂະພາພດີແຂງແຮງ ປູ່ຍ່າຮັກແພງຄື ລູກຄືຫຼານ
    ພີ່ນ້ອງບໍຣິວາຮຮັກແພງແຫ່ລ້ອມ ຜົວອ່ອນນ້ອມ ເອົາອົກເອົາໃຈ
    ໄດ້ລູກຊາຽຍິງດັ່ງເຈົ້າ ປຣາຖນາ
    ການງານໃຫ້ກ້າວໜ້າ ການຄ້າໃຫ້ຈເຣີນ

    ການເງິນໃຫ້ລືລັ່ນ ການບ້ານໃຫ້ຊ່ອຽກັນ
    ຜີວພັນໃຫ້ຜ່ອງໃສ ໃຫ້ເຈົ້າຮັ່ງເຈົ້າມີ ເປັນລູກສະໃພ້ທີ່ດີ ຂອງປູ່ຍ່າ
    ເປັນທີ່ເພິ່ງພາອາສັຍ ຂອງພີ່ນ້ອງ ປ້າ ລຸງ ລູກ ຫຼານສູ່ຄົນເດີ້
    ຈັຕຕາໂຣ ທັມມາ ວັຖທັນຕຸ ອາຍຸວັນໂນ ສຸຂັງ ພະລັງ...