ຜຍາ ການກ່າວຄຳຜູກຂໍ່ຕໍ່ແຂນ ແລະການອວຽຊັຍໃຫ້ພອນ

ຄຳກ່າວ ຜູກແຂນ ທົ່ວໄປ

  1. ຝ້າຽອັນນີ້ ແມ່ນຝ້າຽພຣະຍາພຣົມ
    ພຣະບໍຣົມມຫາຣາຊ ເຄືອເຂົາຂາດປ່ອນລົງມາ
    ມີຄາຖາພຣະອຸປປະຄຸຕຢູ່ນຳ ມີຄາຖາພຣະທັມມະຄົບຖ້ວນ
    ພຣະຍາອິນລ້ວນສົ່ງດ່ວນມາຫາ ສົ່ງລົງມາວ່າໃຫ້ລູກ ວ່າໃຫ້ຜູກເອົາຂວັນ ວ່າສົມຄວນຜູກໄວ້ ໃຫ້ເປັນໃຫຽ່ໃນໂລກາ ຂວັນເຂົ້າມາຜູກແຂນຂໍ້ ຜູກເອົາໜໍ່ຄູນເຮືອນ ໃຫ້ເຈົ້າໃສປານເດືອນຢ່າມີເມຄ ໃຫ້ເປັນເອກໃນເມືອງຄົນ ຢ່າຍາກຈົນອຶດຢາກ ຍາມເຈົ້າປາກມີຄົນຖາມ ຜີວພັນງາມຜຸດຜ່ອງ ສີໃສສ່ອງດັ່ງທອງທາ ຍາມໄປມາຢ່າອືດອາດ ຍົວຣະຍາຕດັ່ງພຣະຍາຊ້າງສາຣ ກັບທັງບໍຣິວາຣພໍໝື່ນ ໃຫ້ລົ້ນລື່ນຄົນທັງຫຼາຽ ມີຍິງຊາຽຂ້ອຽຂ້າ ມີຊ້າງມ້າໂຕງາມ ມີຄົນຫາມແຫນແຫ່ ໃຫ້ເຈົ້າດີກວ່າພໍ່ກວ່າແມ່ທັງຫຼາຽ ມີຂອງຂາຽເຕັມບ້ານ ມີຢູ່ຮ້ານເນືອງນອງ ມີນາໜອງນາຫ້ວຽ ມີຄົນຊ່ວຽການງານ ອາຍຸນານປານພຣະອຸມາ ແລະນາງວິສາຂະສຸຂເລີດ ແສນປຣະເສີດດັ່ງນາງຜຸສດີ ມີຂັນຕີດັ່ງພຣະເຕມີໃບ້ ໃຫ້ເຈົ້າໃຫຽ່ດັ່ງພຣະອິສວນຢູ່ເຂົາໄກລາສ ງາມອົງອາຈດັ່ງພຣະນາຣາຽ ບໍ່ມີໃຜມາທໍ່ ຄືນ້ອຽໜໍ່ສີດາ ມີປັນຍາດັ່ງສຣີປຣາຊ ໃຫ້ສລາດດັ່ງສຣີທະນົນໄຊ ຄິດອັນໃດໃຫ້ເຈົ້າໄດ້ດັ່ງຄຳມັກ ຄຳປຣາຖນາ
    ມະ ອະ ອຸ ອຸ ມະ ນະ ຊາ ລິ ຕິ ສາທຸ...

  2. ຮ້າຽກວາດໜີ ໆ ໆ ດີກວາດເຂົ້າ ໆ ໆ ຂວັນເຈົ້າໃຫ້ຫຼັ່ງໂຮມ ເດີ້
    ສຣີ ສຣີ ສຣີ ຝ້າຽເສັ້ນນີ້ ເປັນຝ້າຽທີ່ສັກສິທ
    ຜູກແຂນແລ້ວມີຣິຖຮຸ່ງເຮືອງໄປໜ້າ
    ອັນໝູ່ໂຣຄາໄຂ້ ຫວັດໄອບໍ່ມາຜ່າ
    ພົບແຕ່ທາງກ້າວໜ້າ ຈເຮີນຂື້ນດັ່ງຝັນ
    ນອນຫຼັບນັ້ນ ໄດ້ເງິນພັນເງິນໝື່ນ
    ຕື່ນຂື້ນໄດ້ ເງິນ ເງິນ ເງິນ ແລະ ຄຳ
    ໂອມ.. ອຸ ອະ ມຸ ມູ ມູລມາ ສທາໂສຖີ ພະວັນຕຸເຕ ໂອ້ມ... ຈຶກ ຈຶກ ຈຶກ...ພ້ຽງ

  3. ຜູກເບື້ອງຊ້າຽຂວັນມາ ຜູກເບື້ອງຂວາຂວັນຢູ່
    ວ່າມາເຢີ້ຂວັນເອີ້ຽ...
    ຂວັນເຈົ້າໄປກິນປາ ຂ້ອນຢູ່ຫົວນາ ກໍ່ໃຫ້ມາ ມື້ນີ້ວັນນີ້
    ຂວັນເຈົ້າໄປເຮັດນາກິນເຂົ້າ  ກໍ່ໃຫ້ມາ ມື້ນີ້ວັນນີ້
    ວ່າມາເຢີ້ຂວັນເອີ້ຽ...
    ຂວັນເຈົ້າໄປປັ້ນເບົ້າຫຼໍ່ເງິນຄຳ  ກໍ່ໃຫ້ມາ ມື້ນີ້ວັນນີ້
    ຂວັນເຈົ້າໄປຂາຽຂອງ ຢູ່ໃນຕລາດ  ກໍ່ໃຫ້ມາ ມື້ນີ້ວັນນີ້
    ຂວັນເຈົ້າໄປເບິ່ງນັກປຣາຊຍ໌ເຈົ້າກໍ່ສ້າງກະທຳບຸນ  ກໍ່ໃຫ້ມາ ມື້ນີ້ວັນນີ້
    ຂວັນເຈົ້າໄປນຳດອມຂຸນແລະຍົສໃຫຽ່  ກໍ່ໃຫ້ມາ ມື້ນີ້ວັນນີ້
    ຂວັນເຈົ້າຢູ່ສຸຂສົມສ້າງກິນທານທຸກເຊົ້າຄ່ຳ ເຊີນຂວັນຫົວເກດເກົ້າ ໃຫ້ຍືນໝັ້ນໝື່ນປີ
    ອາຍຸ ວັນໂນ ສຸຂັງ ພະລັງ...

  4. ຝ້າຽເສັ້ນນີ້ ກູໄດ້ມາແຕ່ວຽງໄຊ ໄໝເສັ້ນນີ້ກູໄດ້ມາແຕ່ວຽງແກ້ວ ຜູກໃຫ້ແລ້ວຢູ່ຊຸ່ມກິນເຢັນ ຜູກແລ້ວຫາຽເຄາະເຂັນໂຣຄາພຍາທ ຜູກແລ້ວເປັນນັກປຣາຊຍ໌ຄູບາອາຈາຣຍ໌ ຜູກແລ້ວໂຊກແລ້ວໝານ ບໍ່ມີອຶດຢາກ ຜູກແລ້ວມິຕຕະພາບ ສຫາຽມາກຄົນຫຸມຄົນຫອມ ຄືດັ່ງດອກໄມ້ຈອມພູສີສງ່າ ພຣະຈຶ່ງໃຫ້ກູວ່ ສັພພະພຸທທານຸ ພາເວນະ ສັພພະທັມມາ ນຸພາເວນະ ສັພພະສັງຄາ ນຸພາເວນະ ສັພພະໂສຕຖີ ພະວັນຕຸເຕ..

ຄຳກ່າວ ຜູກແຂນ ເດັກນ້ອຽ

  1. ສຣີ ສຣີ.. ດ້າຽເສັ້ນນີ້ແມ່ນດ້າຽ ພຣະຍາພາລີຜູ່ມີອຳນາຈ
    ຜູ່ອົງອາຈໃນຂີດຂີນ ກບທັງພໍ່ພຣະຍາອິນທ໌ ແຖນລໍແຖນຫຼໍ່
    ສົ່ງມາໃຫ້ນ້ອຽໜໍ່ລູກພຣະອິສວຣ ບໍຣະບວນທຸກສິ່ງ
    ໃຫ້ເປັນມິ່ງມຸງຄຸລ ວ່າບຸນເຈົ້າເກີດມາແຕ່ແຖນ ວ່າແນນເຈົ້າມາແຕ່ຟ້າ
    ພຣະໜໍ່ຫຼ້ານອນອູ່ສາຽໄໝ ຈອມພຣະທັຍແກ້ວແກ່ນ
    ຜູແຂນຂ້າງຊ້າຽໃຫ້ ເຈົ້າເປັນພຣະຍາ ຜູກແຂນຂ້າງຂວາໃຫ້ໄດ້ເປັນເອກ
    ໃຫ້ໄດ້ພອນພຣະປັຈເຈກອໍຣະຫັນຕ໌ ມາຮວມກັນຢູ່ກັບພໍ່
    ຜູ່ເພິ່ນກໍ່ແປງມາ ກັບມານດາຜູ້ໃຫ້ເຈົ້າຢູູ່ນອນເປ
    ຢ່າຫັນເຫ ໄປຢູ່ໃນປ່າ ໃຫ້ເຈົ້າມາຢູ່ທ່າໃນໂຮງ
    ເຖິງສາມໂມງ ໃຫ້ເຈົ້າດ່ວນ ຢ່າໄດ້ມ່ວນຢູ່ໃນໄພຣ໌
    ສັພພະສນຽດຈັງໄຣຈົ່ງຫາຽໜີ ໃຫ້ເຈົ້າສຸຂີຕຣາບເທົ່າອາຍຸເຈົ້າໄດ້ຮ້ອຽຂວບພັນສາ
    ທີຄາຍຸຕາ ສະ ທາ ໂສຕຖີ ພະວັນຕຸເຕ... ສາທຸ

ຄຳອວຽພອນ ຜູກແຂນລູກຫຼານ

  1. ຮ້າຽກວາດໜີ ໆ ໆ ດີກວາດເຂົ້າ ໆ ໆ
    ຂວັນເຈົ້າໃຫ້ຫຼັ່ງໂຮມເດີ້...
    ສຣີ ສຣີ ສຣີ ສິທທິພຣະພອນ ບໍວອນລ້ຳເລີດ ຝ້າຽແກ້ວເກີດເມືອງສວັນ
    ປັນລົງມາໃຫ້ຜູ່ຂ້າ ຜູກແຂນຫຼານ ໃນມື້ນີ້ວັນນີ້
    ມາເຍີ້ຂວັນເອີ້ຽ ຂວັນເຈົ້າມາຮອດແລ້ວ ໃຫ້ຢູ່ສວັດດີ ມີສຸຂະພາບແຂງແຮງ
    ພໍ່ແມ່ຮັກແພງຫຼາຽບໍ່ໜ້ອຽ ພີ່ນ້ອງ ຊ່ອຽສົງເສີມ ການງານໃຫ້ກ້າວ​ໜ້າ ການສຶກສາໃຫ້ເຮືອງຮຸ່ງ
    ໄດ້ຄແນນສູງດີລ້ວນ ດັ່ງທີ່ເຈົ້າປຣາຖນາ ໃຫ້ເຈົ້າມີອາຍຸຍືນຍາວ ຜີວພັນຂາວອ່ອງຕ່ອງ
    ງາມຜຸດຜ່ອງສ່ອງໃສ ໃຜເຫັນກະຮັກແພງ ໃຫ້ເຈົ້າແຂງແຮງ ບໍ່ເຈັບບໍ່ໄຂ້ ພໍ່ແມ່ພີ່ນ້ອງໄດ້ເພິ່ງພາ
    ຈັຕຕາໂຣ ວັຖທັນຕິ ອາຍຸ ວັນໂນ ສຸຂັງ ພະລັງ...
    ໂອມ ສະວາຫິ ໂອມ ສະວາຫະ ໂອມ ຕຸ ຕະ ຕຸ ຕະ ພ້ຽງ...

ຄຳກ່າວ ຜູກແຂນ (ສຳນວນລາວ ຈຳປາສັກ)

  1. ຮ້າຽກວາດໜີ ໆ ໆ ດີກວາດເຂົ້າ ໆ ໆ
    ຜູກແຂນຊ້າຽໃຫ້ຂວັນມາ ຜູກແຂນຂວາໃຫ້ຂວັນຢູ່
    ສາມສິບສອງຂວັນແລ່ນມາເຕົ້າ ເກົ້າສິບສອງຂວັນແລ່ນມາໂຮມ
    ພຸທໂທສິທທິເດຊ ທັມໂມສິທທິເດຊ ສັງໂຄສິທທິເດຊ
    ຝ້າຽເສັ້ນນີ້ເປັນຝ້າຽສັກສິດ ອົງພຸທໂທຜູ່ມີຣິດຖ໌ ທອດປຣະທານມາໃຫ້
    ຂໍເຈົ້າມີສິຣິສວັສດີ ຜາບແພ້ຝູງໝູ່ ພຣະຍາມາຣ
    ຢ່າໄດ້ມີ ອັນມາພານບັງບຽດ
    ໃຫ້ເຈົ້າຄົມດັ່ງພ້າ ໃຫ້ເຈົ້າກ້າດັ່ງຫີນ ໃຫ້ເຈົ້າມີສັບສິນຫຼາຽໆ ໃຫ້ເຈົ້າມີແຕ່ໄດ້ ຢ່າມີເສັຽ
    ພໍ່ຊິແຖມໃຫ້ມີໄຊສິທທິໂຊຄ ໃຫ້ເຈົ້າລຸຣາຊ ຮ້າຽສົມແມ້ງປຣາຖນາ
    ທຸກຄ່ຳເຊົ້າໃຫ້ສົມພາພພໍອົກ ສຸກຢູ່ໃນຣາຕຣີ ຄອຽສບາຽເບົາເນື້ອ
    ຍາມນິ້ງນອນໃນຫ້ອງສວັນພັຍໃຫ້ພົ້ນ ໂສກໃຫ້ເຈ ົ້າໄດ້ກໍ່ເກື້ອຊູຊ້ວານສາສນາ
    ໂຣຄາໄຂ້ຫວັດໄອໃຫ້ໄກຫ່າງ ເຈັບຫຼັງທັງປວດທ້ອງເໜັບຂ້າງເຂົ່າຂາ
    ຢ່າມີແນວຂັດຂ້ອງແນວໃດກໍ່ໃຫ້ຜ່ານ ຄືດັ່ງຄຳຜູ່ເວົ້າ ໃສເຫຼື້ອມຮຸ່ງເຮືອງ
    ຍາມເມື່ອເຈົ້າຍ່າງຍ້າຽ ເດີນຖິ່ນທາງໄກ
    ຢ່າໄດ້ມີພັຍພານ ຍາກແຄນຄັ່ງຮ້ອນ
    ຖ້າລົງທຶນໄປຄ້າ ໃຫ້ກຳໄຣມີມາກ
    ລົງທຶນເທື່ອລະນ້ອຽ ກຳໄຣນັ້ນໃຫ້ໄດ້ຫຼາຽ
    ອາຍຸວັນໂນ ສຸຂຂັງ ພລັງ
    ອາຍຸນີ້ ໃຫ້ເຈົ້າຍືນຍາວໝັ້ນ ພັນປີຢ່າຂຸລ່ວງ
    ວັນນະໃສດັ່ງແກ້ວ ຍືນໝັ້ນພັນວັສສາ
    ສຸຂຂັງນີ້ໃຫ້ເຈົ້າສຸກລື່ນລົ້ນ ເກີນຄົນໃນໂລກ
    ພລັງໃຫ້ພລັງແຮງ ດັ່ງຊ້າງສານກ້າແສນໂຕ
    ອຸ ອະ ມຸ ມະ ມູລ ມາ
    ກິນຢ່າໃຫ້ບົກ ຈົກຢ່າໃຫ້ລົງ
    ທານມື້ເຊົ້າ ໃຫ້ໄຫຼເຂົ້າມື້ແລງ
    ເງິນໄຫຼນອງ ທອງໄຫຼມາ ເດີ້
    ນອນຫຼັບໃຫ້ເຈົ້າໄດ້ເງິນພັນ ນອນຝັນໃຫ້ເຈົ້າໄດ້ເງິນໝື່ນ
    ນອນຕື່ນ ໃຫ້ເຈົ້າໄດ້ເງິນແສນ
    ແປນມືໃຫ້ເຈົ້າໄດ້ແກ້ວມະນິໂຊຕ
    ໂທສຮ້າຽຢ່າມາພານ ມານຮ້າຽຢ່າມາບຽດ ໜັ້ນຍືນ ໝັ້ນຍືນ..
  1. ຄຳກ່າວ ຜູກແຂນ ຜູ້ສູງອາຍຸ (ຊາຽ)
    ຮ້າຽກວາດໜີ ໆ ໆ ດີກວາດເຂົ້າ ໆ ໆ  ຂວັນເຈົ້າໃຫ້ຫຼັ່ງໂຮມເດີ້...
    ສຣີ ສຣີ ສຣີ ສິທທິພຣະພອນ ບໍວອນລ້ຳເລີດ ຝ້າຽແກ້ວເກີດເມືອງສວັນ ປັນລົງມາໃຫ້ຂ້ອຽ ຜູກແຂນພໍ່ລູງ ໃນມື້ນີ້ວັນນີ້
    ມາເຍີ້ຂວັນເອີ້ຽ... ຂວັນເຈົ້າມາຮອດແລ້ວ ໃຫ້ເຈົ້າຢູ່ດີມີແຮງ ນອນຫຼັບໄດ້ເງິນພັນ ນອນຝັນໄດ້ເງິນໝື່ນ ນອນຕື່ນໄດ້ເງິນແສນ ແບນມືມາໄດ້ເງິນລ້ານ ອອກຈາກບ້ານ ພໍ້ຫ້ອງອາຫາຣ ພັຕຕຣາ ຄານ ມີຜູ່ສາວມາຫຸ້ມກອດ ໄປນວດຫຼັງນວດແອວ ໃຫ້ມ່ວນຊື່ນໂຮ່ແຊວ ບໍ່ແກ່ບໍ່ເຖົ້າ ຢູ່ເປັນເຈົ້າໂຄຕວົງສາ ສົມປຣາຖນາທຸກປຣະການ ເດີ້
    ຈັຕຕາໂຣ ທັມມາ ວັຖທັນຕິ ອາຍຸ ວັນໂນ ສຸ ຂັງ ພລັງ

ຄຳກ່າວ ຜູກແຂນ ຜູ້ສູງອາຍຸ (ຍິງ)

  1. ຮ້າຽກວາດໜີ...ຮ້າຽກວາດໜີ...ຮ້າຽກວາດໜີ...ດີກວາດເຂົ້າ...ດີກວາດເຂົ້າ...ດີກວາດເຂົ້າ...ມາເຕົ້າມາໂຮມ ເດີ້
    ສຣີ ສຣີ ສຣີ ສິທທິພຣະພອນ ບໍວອນລ້ຳເລີດ ຝ້າຽແກ້ວເກີດເມືອງສວັນ ປັນລົງມາໃຫ້ຂ້ອຽ ຜູກແຂນແມ່ປ້າ ໃນມື້ນີ້ວັນນີ້
    ມາເຍີ້ຂວັນເອີ້ຽ... ຂວັນເຈົ້າມາຮອດແລ້ວ ໃຫ້ເຈົ້າຢູ່ດີມີແຮງ ນອນຫຼັບໄດ້ເງິນພັນ ນອນຝັນໄດ້ເງິນໝື່ນ ນອນຕື່ນໄດ້ເງິນແສນ ແບນມືມາໄດ້ເງິນລ້ານ ອອກຈາກບ້ານ ໄດ້ໄປວັຕໄປວາ ລູກຫຼານພາ ໄປໄຫວ້ພຮະທາຕ ແລະຄູບາອາຈາຣຍ໌ ໃຫ້ເຈົ້າສຸກສຳຣານ ແຂງແຮງບໍ່ແກ່ບໍ່ເຖົ້າ ຢູ່ເປັນເຈົ້າໂຄຕວົງສາ ສົມປຣາຖນາທຸກປຣະການ ເດີ້
    ຈັຕຕາໂຣ ທັມມາ ວັຖທັນຕິ ອາຍຸ ວັນໂນ ສຸ ຂັງ ພລັງ