ຜຍາ ນ້ຳຖ້ວມ

ຜຍາ ນ້ຳຖ້ວມ

ນ້ຳຕາໄຫຼ ຫົວໃຈວ້ຳ ກັມເຄີຽກໍ່ແຕ່ປາງໃດ

ຈັ່ງພໍ້ ພັຍພິບັຕ ຮັດຕຶງມາດຶງຊ້ຳ

ແສນຣະກັມ ນຳສາຽນ້ຳ ພັດ ເງິນ ຄຳ ເຂົ້າ ຂອງ ຜ່ານ

ຈັກໄມ້ທ່ອນ ເຮືອນຊານ ແປ້ນກະດານແຜ່ນພື້ນ ຝືນນ້ຳຖ້ວມບໍ່ໄຫວ

 

ຫຼັ່ງມາແຮງ ເກີນຫ້າມໄດ້ ໄຫຼຫຼັ່ງທັ່ງຄືສູນ (ສູນ = ຢາກຮ້າຽ)

ບວກແລ້ວ ຄູນຂຍາຽ ແຜ່ໄປໄວຟ້າວ

ຍາວສຸດຕາເຫັນໄດ້ ແນມທາງໃດ ນ້ຳໄຫຼຜ່ານ

ຕົກກະໃຈ ຈົນກາຽສັ່ນ ຫວັ່ນສາຽທານຣ໌ ມາກະສັນໃຈຂ້ອຽ ບໍ່ມີນ້ອຽໄປກວ່າກັນ

 (ທານຣ໌ = ນ້ຳ)

ແມ່ນຊິ ຂຸດດິນກັ້ນ ດັ້ນຊາຽໃສ່ກະສອບປິດ

ກໍ່ກ່ຳແພງກະຍັງພັງ ໜ້າຫຼັງກະຍັງໂຄ້ງ

ຄືຈັ່ງຄົງຄາແຄ້ນ ຄຽດແຄນແຖມໂຖມໄຖ່

ແມ່ນຊິ ປິດປ່ອງໃດ ສູງປານໃດກໍ່ປ້ານ ກຳລັງນ້ຳກໍ່ໄລ່ພັງ

 

ຫົນທາງ  ຂາດສະບັ້ນ ຖນົນຫຼັ່ນແຫຼກສລາຽ

ທາງເມືອງຮຸນ ເມືອງແບງ ແຮ່ງຂາດແຄນແສນເອົ້າ

ຕັ້ງນາເລົາຮອດນາສ້າວ ນາແລຫຼືບ້ານຖິ່ນ

ຕີນຕລາດລືໄຊ ເຄື່ອງຂອງໄຫຼລ່ອງນ້ຳ ແຖມຊ້ຳໃຫ້ທຸກຕາມ

 

ບ້ານບໍ່ສົນ ຄົນຜູ່ສ້າງ ຮື້ຢ່າງບໍ່ຣໍໃຜ

ປູກຝັງ ຫຼາຽປີເດືອນ ພັດເລົ່າມາສູນສິ້ນ

ປູກກັບດິນ ໄວ້ສອງຊັ້ນ ທາງໃຕ້ດັນ ຂັ້ນໄດໄຕ່

ຂື້ນຊັ້ນສອງນ້ຳຍັງໄລ່ ເໝີດບ່ອນໄປປີນຂື້ນຄ້າງ ຫຼັງຄາບ້ານເຫຼືອບ່ອນດຽວ

 

ນ້ຳກໍ່ຍັງໄຫຼຂ້ຽວ ທຽວບອກວ່າພາກັນໜີ... ສາເດີ້

ໃຫ້ນາທີຊີວິຕຄົນ ຍັງ ອິດູຕົນ ຖ້າຄົນຊ້ວນ

ສິ່ງຂອງມວນສະສົມໄວ້ ຊັພສິນໃນສຖານທີ່

ຂອງທຸກຢ່າງເໝີດຊີວີ ແມ່ວາຣີພັດຈາກບ້ານ ເໝີດຄຳຕ້ານແຕ່ຕະລຶງ

 

ແມ່ນຊິຖາມບຶງຫ້ວຽ ຄົງເຖິງທີ່ເໝິດທາງຝືນ

ນ້ຳເອົາຄືນແກ້ງເຮັດ ເອົາປຽບມາຄາວກີ້

ເຖິງນາທີເຮັດຄືນແກ້ ອັດພລັງບໍ່ຍັ້ງທ່າ

ນັບເປັນເງິນແສນລ້ານຄ່າ ກັບຣາຄາຂ້າປ່າໄມ້ ໃນໄພກວ້າງບໍ່ຫ່ວງເຂົາ

 

ຄິດເຖິງຈຸດ ເພື່ອຢຸດເສົ້າ ແມ່ນເຮົາທຸກນ້ຳໄລ່ໜີ

ຫາກຊີວີ ຍັງຄົງໄຫຼ ລົມຫາຽໃຈ ສັນຈອນຄ້ຳ

ເສັຽເງິນຄຳ ທຳໃຈນິ້ງ ລົມດັນຄີງ ຍັງຕີງຕໍ່

ຖືວ່າ ກັມເຄີຽກໍ່ ຈຶ່ງມາເພມຸ່ນມ້າງ ຫາທາງຕັ້ງຕົນຕໍ່ໄປ

 

ເອົາຊີວິຕ ມາລອດໄດ້ ປານເກີດໃໝ່ ໃຜມີຫຍັງ

ຕ່າງກໍ່ ຂົນຂວາຽຫາ ຊຸພຊີວາທັງສິ້ນ

ຢູ່ກັບດິນ ຊິນກັບນ້ຳ ຍາມຕັດຕໍເຂົ້າໃນປ່າ

ເລິກປານໃດ ກໍ່ຄົ້ນຫາ ອາຍຸຫຼາຽແຮ່ງໝາຽໝົ້ນ ຄວາມຢາກລົ້ນໝົ້ນໃສ່ເງິນ

 

ແມ່ນໃບໄມ້ຊິເອີ້ນ ລົມເຕືອນພັດ ຢ່າຕັດສີນ

ເຮົາກໍ່ ຂີນຄວາມຕັດ ຮຸກຂາບໍ່ຍັງຄ້າງ

ເວລາພັງ ຄາງລັ່ນໄຫ້ ກ້ອງທົ່ວໄພ ນ້ຳຕາຊຸ່ມ

ລາກລົງມາຫຼາຽກຸ່ມ ຫຼາຽປີຊຸມມນຸສຮ້າຽ  ໄດ້ທຳຣ້າຽຕໍ່ພນາ (ພນາ = ພະນາ, ປ່າ)

 

ບັດນີ້ເຂົາບອກໃຫ້ສູ້ໜ້າ ຈຳໄວ້ຢ່າທຳລາຽກັນ

ນ້ຳພັດພານລ໌ໂກລາຫົນ ໃຫ້ໝູ່ຄົນ ຍາກ ວາຽວຸ້ນ

ຫາກຍັງບຸນໄດ້ເຄີຽຄ້ຳ ຄວາມດີນຳ ໜູນລ້ຽງລໍ່

ນ້ຳໃຈໄຫຼມາໝໍ່ ພໍແຕ່ຮູ້ຂ່າວໄດ້ ຄົນມືໄມ້ ໄປຊ່ອຽແຮງ

 

ສົ່ງເຂົ້າສານອາຫານແຫ້ງ ເງິນຄຳແບ່ງ ຈັດແຈງໝອນ

ມອບອາພອນຜ້າຫົ່ມຜືນ  ໃຫ້ຄ່ອຽຝືນຍືນວັນມື້

ອົດທົນຖືສິຕິໄວ້ ເບິ່ງກັນໄປຕາມໜ້າທີ່

ໄທເມືອງໄຊນ້ຳໃຈສາມັກຄີ  ຄວາມປຣານີຍາມທຸກທ້ອນ ມາໄຫຼຂ້ອນບ່ອນເບິ່ງງາມ

 

ນ້ຳໃຈຖ້ວມກວ່າມວນນ້ຳ ທຸກຊັ້ນສ່ຳ ຫຼ່ຳແລຫຼຽວ

ສັນຈອນທຽວໄປຊ່ວຽເຫຼືອ ເອື້ອອາທອນ ປ້ອນໃຈຟື້ນ

ຍາກກໍ່ບຶນ ຢືນຫຍັນໄວ້ ແມ່ນເສັຽໃຈໄປໜ້າຕໍ່

ຄົນໜຶ່ງພາຽ ຄົນໜຶ່ງຖໍ່ ງາມໃຈຂໍຍົກຍ້ອງ ມອງແລ້ວປະທັບຕາ

 

ຍາມໂສກເສົ້າຄາວພໍ້ໜ້າ ຊ່ອຽກັນຝ່າຍາມ "ວິກຣິດ" (ໃນຣະຍະອັນຕຣາຽ)

ເປັນຈະຣິດຄົນດີເຊີນ ເອີ້ນວ່າໃຫ້ມາຄາວນີ້

ບຸນເຮົາມີໄດ້ເກີດຊົ້ນ ຄົນໄທໄຊໃຫ້ມາຮ່ວມ

ນ້ຳໃຈກໍ່ ພລັງຣວມ ໃຫ້ຂວ້າມກາຽສາຽນ້ຳມ້າງ ຮວມໃຈກັ້ງເປັນຮົ່ມກັນ ພີ່ນ້ອງເອີ້ຽ..

 

(ໂດຽ, ໄທເມືອງໄຊ)

ສັງມາເປັນຈັ່ງຊີ້ ປີນີ້ເປັນບ້າປ່ວງ

ນ້ຳໄຫຼຫຼົວະໄຫຼລວງ ລ່ວງເໜືອຕລອດໃຕ້ ມາໄຫຼຖ້ວມຕື່ມແຖມ

ເຫັນນ້ຳໄຫຼຜ່ານໜ້າ ທາງນ້ຳຕາຜັດພັງຍ່າວ

ຖ້ວມທົ່ງນາປ່າເຂົ້າ ເຮືອນຢ້າວຮອດບໍ່ເຫຼືອ

 

ໄດ້ນັ່ງເຮືອແລ້ວບາດນີ້ ແສນເຕັມທີແລ້ວ ພໍ່ແມ່

ນ້ຳຫາກຫຼາຽແຕ່ແທ້ ໄຫຼລົ້ນຫຼັ່ງໂຮມ

ພາກສ່ວນເມືອງຈົມລົງພື້ນ ໃຕ້ບາດານສະພານມຸ່ນ

ສູນເຂົ້າຂອງພີ່ນ້ອງ ປີນີ້ມາຊ່າງເປັນ

 

ນີ້ບໍ້...ເພິ່ນວ່າ "ນ້ຳຊິຖ້ວມຟ້າ ປາຊິເລົ່າກິນດາວ

ຊາວນະຄອນເມືອງເຮົາ ຊິເລົ່າຕາຽເໝີດກ້ຽງ"

ສຽງໝໍລຳເຄີຽເວົ້າ ພວກຜູ່ເຖົ້າຍັງເຄີຽວ່າ

ຫຼືເພາະເຮົາຕັດປ່າ ເຜົ່າຂີ້ເຫຽື້ອກະພ່ອງນັ້ນ ໂລກຈັ່ງຮ້ອນຂື້ນກວ່າຫຼັງ

 

ສ້າງໂຮງງານເຜົາໄມ້ ນ້ຳກ້ອນກາຽເປັນນ້ຳທ່າ

ນ້ຳທະເລຍື່ງມາ ທັງນ້ຳຝົນຈາກຟ້າ ເລີຽໄຫຼຖ້ວມແຜ່ນດິນ

ຂໍໃຫ້ ຮິ່ນຕອງໄວ້ ໄທເຮົາໃຫ້ຄິດເບິ່ງ

ນ້ຳເນື່ອງນອງເທື່ອນີ້ ເພາະສັງແທ້ຄິດເບິ່ງດູ ພີ່ນ້ອງເຮີ້ຽ