ນະມັສສະການພຣະຣັຕຕະນະຕຣັຍ

ສາທຸ ສາທຸ ຂໍນະມັສສະການ ພຣະຣັຕຕະນະຕຣັຍ

ວັນທານ້ອມ ໂຄດົມພຣະພໍ່

ຍໍຍື່ນໄຫວ້ ອົງໄທ້ໃສ່ສຽນ

 

ຮຽມນີ້ ຂຽນແຕ່ງແຕ້ມ ສານສົ່ງບູຊາ

ອັນວ່າ ໂພຍພັຍສັງ ຢ່າເກີດບັງກວມກັ້ງ

ບັດນີ້ຂ້າຂໍ ຍົກນອບນີ້ວ ອະພິວັນທູນເກດ

ໄຫວ້ສົມເດັດ ພຸທທະເຈົ້າ ອົງເຫງົ້າພໍ່ພຣະຄູ

 

ພຣະໂຄດົມຜູ້ຮູ້ ຜູ່ຕື່ນເບີກບານໃສ

ສອນເວ ໄນສັຕສາ ໝູ່ປະຊາໜີມົ້ມ

ສຸດຈາກ ໂສມົມຮ້າຽ ອະບາຽພູມຮ້ອນເຮັ່ງ

ເລັ່ງໃຫ້ ລຸດບ່ອນບັ້ນ ແລ້ວຫັນໜ້າເຂົ້ານີຣພານ

 

ຄຸນພຣະອົງຄ່າລ້ານ ຍາກທີ່ພັຣຣະນາ

ມີພຣະປັນຍາຄຸນ ເລີດພຣະຍານດວງກ້າ

ພຣະກະຣຸນນາ ຕໍ່ສັຕເຊື້ອ ປວງປະຊາໃຫ້ຫາຽໂສກ

ພຣະວິສຸທເລີດລ້ຳ ບໍ່ມີຂ້ອງຂຸ່ນມົວ

 

ໄຫວ້ໄປ ເໝີດຕລອດຮອດ ທຸກທີ່ພູມສຖານ

ຝູງໝູ່ມານ ຢ່າມາວຽນ ບັດຂຽນກອນໄຂອ້າງ

ຮຽມພຽນ ຫວັງສັນສ້າງ ບາຣະມີຄັ້ງໃຫຍ່

ທາງສມອງໃສ ວ່າບ່ອນໃດ ໃຫ້ມ່ວນແມ້ງ ຟັງແລ້ວໃຫ້ມ່ວນຫູ ນັ້ນຖ້ອນ

 

ຈົບຈາກໄຫ້ວ ພຣະເຈົ້າແລ້ວ ກະກົ້ມກຣາບຕໍ່ພຣະທັມ

ຄຳສັ່ງສອນພຣະສັມມາສາສສະດາໄຂແຈ້ງ

ສແດງຄວາມຈິງແທ້ ຄວາມງາມຄວາມຊອບ

ທັມມະຄວນນອບນ້ອມ ເອົາໄວ້ໃສ່ໂຕ

 

ໂອປະນະຍິໂກ ເພິ່ນວ່າໄວ້ ປັຈຈະຕຕ ເຕີມຕໍ່

ຂໍໃຫ້ ຄຸນຄ່າລ້ຳ ມາກວມກັ້ງແກ່ຮຽມ ແດ່ຖ້ອນ

ນອກຈາກນີ້ ຂ້າຂໍວັນທານ້ອມ ສັງໂຄທູນກະໝ່ອມ

ໝູ່ພຣະສົງຊາຕເຊື້ອ ໜໍ່ເນື້ອສາສສະດາ

 

ຜູ້ເພິ່ນສັງຄາຍະນາໄວ້ ຮັກສາທັມສືບຕໍ່

ບໍ່ໃຫ້ຜິດຈາກເຄົ້າ ພຣະສົງເຈົ້າເພິ່ນສືບສານ

 

ປະຕິບັດຕຣົງທຸກທ່ານ ປະຕິບັດຊອບເປັນອາຈິນຕ໌

ສຸປະຕິປັນໂນ ຂ້າຂໍຍໍມືນ້ອມ

ຂໍສັງຮອມ ແຕ່ພຽງນີ້ ມວນສັຕຕຣູໄພຣີ ໃຫ້ໜີເວັ້ນຫຼີກຫ່າງ

ອຸປປະສັນທຸກສິ່ງຢ່າງ ຢ່າໄດ້ມາກາງກັ້ນ ຍາມປັ້ນແປ່ງກອນ

 

ຈະຕຸພອນຊັຍແກ້ວ ອາຍຸ ວັນໂນແວວ ພລັງໝັ້ນ ສຸກຍິ່ງ

ສມອງໃສໄຫຼປານນ້ຳແມ່ກວ້າງ ຢ່າຕິດຄ້າງຫວ່າງຄຳ ແທ້ແລ້ວ.