ຄາດຊິໄດ້

ຄາດຊິໄດ້

ເພິ່ນວ່າ ຂອງທີ່ເຄີຍຄາດໄດ້ ບໍ່ຫ່ອນພ່າຍກາຍໜີ

ແສນຊິ ຮາມແຮມປີ ກໍ່ຍ່ອມມີວັນໄດ້

ແມ່ນຊິ ໜີໄກເວັ້ນ ກັມເວນຫາກຊິຈ່ອງ

ຄວາມເສົ້າ ໝອງພັດພາກ ຈາກເຈົ້າກັບຕ່າວເມືອ

 

ເຫຼືອແຄ່ ຄວາມຄິດໄວ້ ອາລັຍຈ່ອງປອງກັນ

ວັນເວ ລາເລີຍລັບ ນັບວ່າໄວຣະດູສັ້ນ

ເວົ້ານຳ ກັນພໍໄດ້ ດູແລຈ້ອງເບິ່ງ

ຍັງບໍ່ ເຖິງບ່ອນເບື້ອງ ຊິເອົາແທ້ແນ່ອິຫຼີ

 

ຕີຄວາມເວົ້າ ຖາມຂ່າວໄປມາ

ຈຶ່ງໄດ້ ພໍພຽງຈາ ວ່າກັນພໍພຽງໜ້ອຽ

ຈາພຽງຖ້ອຽ ຄຳຫວານເວົ້າອ່ອນ

ບໍ່ໄດ້ ຊົມຊູ່ຊ້ອນ ຕອນນັ້ນກໍເພາະອາຍ...

 

ຕອນນັ້ນ ຍັງໃໝ່ຮ້າຍ ຢ້ານເພິ່ນຊິຊັງໂຕ

ຢ້ານເພິ່ນ ວ່າພາໂລ ຊິລ່ວງເກີນກາຍຢ້ານ

ມັນຊິ ພານຄວາມເຖົ້າ ຄຳໂບລານະກາເກົ່າ

ມັນຊິ ຜິດຄອງເຮົາ ຢ້ານເຖົ້າແກ່ບໍພ້ອມ ສີໜ້າຊິລ່າເຫຼືອງ

 

ອົ້ວດອກເອື້ອງ ຊິເຄືອງຂຸ່ນໃນໃຈ

ຍາມເຂົ້າ ໃໝ່ປາມັນ ມາຈວບກັນພວມຟ້າວ

ຍາມຫົວ ໃຈພວມຫ້າວ ຍາມເມື່ອຄາວເຫັນກັນໃໜ່

ບໍ່ໄດ້ ເນົາຢູ່ໃກ້ ເປັນໄຂ້ບໍ່ຊ່ວງເຊົາ

 

ເອົາແຕ່ໄດ້ ຮັກໄຄ່ສມານປັກ

ຮັກແພງ ກັນມັນດີ ກວ່າຊິຊັງແລະດູຮ້າຍ

ດີໃຈຫຼາຍ ຕັ້ງແຕ່ຄາວຫຼັງພຸ້ນ ບາດວ່າພາຍລຸນ ມາໄດ້ໄກນໍ້ຈາກຫ່າງ

ຈາກກັນໄປຄົນລະທາງ ຫົວໃຈຍັງຢູ່ຄ້າງ ດອມເຈົ້າຢູ່ຫ່າງເຫີນ

 

ຕົກກະ ເທີນບາດຢ້າຍ ຍາມຮຽມພ່າຍຄືນກັບ

ນັບແຕ່ ຮຽມຮາມສູນ ຫ່າງໄກຄະນາມື້

ຄືນົກ ລາຕົ້ນໄມ້ ພຶງຄະນາລາທົ່ງ

ປານໃດເດ້...ຊິໄດ້ ກັບຕ່າວໂຄ້ງ ຄືນບ້ານຖິ່ນສະຖານ

 

ຈຶ່ງໄດ້ ໜີຈາກບ້ານ ມຸ້ງມ່ານອາວອາ

ລາທັງ ປູປານົກ ໝູ່ມັນເຄືອກ້ວຍ

ລາທັງ ບຸງຂັນຖ້ວຍ ທັງກະບວຍຫາບກະຕ່າ

ເລີຍບໍ່ ມີເວລາ ຊິມາບາຍຊ່ວງໃຊ້ ໃຫ້ໃສເຫຼື້ອມດັ່ງເດີມ

 

ເລີ້ມແຕ່ໄດ້ ພັດພ່າຍພະນາງໜີ

ເລີຍບໍ່ ມີຄວາມສຸກ ທໍ່ເມັດງາຂາຮີ້ນ

ເຖິງເມື່ອ ຍາມກິນເຂົ້າ ກືນບໍ່ລົງເອົານ້ຳລ່ອງ

ຄິດເຫັນ ໜ້າມ່ອມນ້ອງ ຄອງຖ້າແຕ່ຊິເຫັນ

 

ມັນຫາກ ຈຳເປັນແລ້ວ ເອົາແຕ່ແກ່ວຊິພາເປັນ

ແລ້ວແຕ່ ເວນກັມພາ ວາສນາຊິແປງປັ້ນ

ແລ້ວແຕ່ ພຣົມລິຂິຕຂັ້ນ ປັນມາໃຫ້ເຮົາໄຕ່

ມັນແມ່ນ ຄາດຊິໄດ້ ຊິເປັນແທ້ດັ່ງຈາ

 

ມາບັດນີ້ ດວງຕາໝົ່ນໝອງເສົ້າ ເງົາກໍໝົ່ນໝອງດວງ

ຫວັ່ນທາງ ໃນໃຈຊວງ ຊິຫ່ວງການນານຊ້າ

ມາບໍ່ທັນ ເລີຍຊິບໍ່ເຫັນໜ້າ ຄັນແມ່ນກາຍເວລາ ນາງຊິກາຍເປັນອື່ນ

ຫຼາຍຄ່ຳ ຄືນລື່ນລົ້ນ ດົນຮ້າຍຊິບໍ່ທັນ

 

ຄວາມຝັນ ເລີຍຊິເພພັງຮ້າງ ເຫີນຫ່າງກາຍໜີ

ຄວາມສັມ ພັນໄມຕຣີ ເລີຍຊິຈາງຈົມຈ້ອຍ

ເລີຍຊິ ພອຍພັງຮ້າງ ທາງໃນໃຈຊິເຫຼືອງລ່າ

ຄືດັ່ງ ມ່າເຂົ້າໄວ້ ເລີຍບໍ່ໄດ້ຮ່ວມຫຸງ

 

ຄ່ຳຄືນ ນອນຍັງສະດຸ້ງ ເຊົ້າຮຸ່ງຍັງແລເຫັນ

ພໍຕາ ເວັນລົງລັບ ດັບເມື່ອແລງພໍປານນີ້

ໄດ້ຍິນ ສຽງຄີໄຫ້ ແຂວນຢູ່ປາຍຍອຽໄຮ ບາດຍາມໃກ້ຊິຄ່ຳ

ສຽງມຸ່ມ ມ່ຳປາກເວົ້າ ຄືສຽງເຈົ້າແມ່ຮຽມ

 

ກະຕຣຽມ ວ່າປີໜ້າ ຟ້າໃໝ່ຊິມາຢາມ

ພໍເມື່ອ ເດືອນສາມເພັງ ຊິຕ່າວຄືນມາຢ້ຽມ

ຕຣຽມຊິ ມາບຸນນ້ອມ ທາຕພະນົມຊົມເບິ່ງ

ເທິງວັດ ພູຢູ່ໃຕ້ ຊິໄປໃຫ້ທົ່ວເຖິງ

 

ເຫິງນານຫຼາຍ... ບໍ່ເຄີຍພໍ້ ໃຈຈໍ່ຢາກພານພົບ

ຍັງບໍ່ ເຄີຍມານົບ ນະມັສສະການທານໄຫວ້

ທັງວັດ ພູຢູ່ໃຕ້ ທາຕພະນົມຢູ່ໄທຍ໌ແລ່ນ

ຍັງບໍ່ ເຄີຍມີແຟນ ຢູ່ທັງແດນດ່ານດ້າວ ຜູ້ສາວຊູ້ຢູ່ຕ່າງເມືອງ

 

ຍັງບໍ່ ເຄີຍຮູ້ເຣື້ອງ ປະວັດທາຕເຈດີ

ມີແຕ່ ຄົນເຂົາລື ສນັ່ນບົນຄົນເວົ້າ

ແຕ່ລະ ຄາວບຸນຕັ້ງ ທາງນະຄອນກໍແໜ້ນອັ່ງ

ມີທັງໄທຍ໌ທັງລາວ ມີທັງສາວໃຫຍ່ນ້ອຍ ມາຄອຍຕ້ອນຮັບເອົາ

 

ເຂົາກໍ ຍົກມືໄຫວ້ ໃຈຊື່ນຍິນສະອອນ

ມາອົມ ອ່ານອວຍພອນ ມາກ່າວກອນປະນົມນີ້ວ

ລຽນເປັນ ຄີວຄອງຖ້າ ປວງປະຊາຊິມາຜ່ານ

ຄົນທີ່ ມາໃນງານ ບໍຣິການຮັບຕ້ອນ  ອວຍພອນໃຫ້ຄູ່ຊູ່ຄົນ ແທ້ແລ້ວ

ແຕ່ງໂດຍ: ຄຳຜາຍ ສຸດາລີ